Jobu 2 - FỊAFỊA BAỊBỤLỤ

Ekwesu Ḅe Siin Jobu Daaḍikim

¹ Jen eneḅaka ḅụ, Tamụnọ enjelịapụ ma nwẹnị pịkị ịna ḅụụ kẹ KỊNỊNYANAḄỌ ḅe ḍie ḅẹ ḅo ọ̀ tọrọkọ ḅụ, tẹ Ekwesu ḅe sọ nwẹnị pịkị ịna ogbo-ḅio sọ tẹ ọ̀ ḅụụ kẹ KỊNỊNYANAḄỌ ḅe ḍie ḅẹ ḅo.

² KỊNỊNYANAḄỌ ḅe nwẹnị Ekwesu ḅe gbela, “ị́ tọ-anga ḅụ sime tẹ ḅo?” Ekwesu ḅe nwẹnị KỊNỊNYANAḄỌ ḅe pakịrị, “Tomikiri mẹ ḅụ mẹnjị ọḅụ-na-kuḅu-na da, anị ọgọnọ mẹnjị iwo na, ideri na ḅụ à sime tẹ ḅom.”

³ KỊNỊNYANAḄỌ ḅe nwẹnị pịkị Ekwesu ḅe gbela, “Ị̀ fịrịmẹnjịḅọ Jobu ị́ ọ̀ kẹ ḅiokoroma tẹ mọ, mịnẹ tomikiri mẹ ḅụ ò pembema ḅịḅị ḅụụ la-a tẹ karakara tomḅọ, tẹ ị̀ mangịma, tẹ siye ḅụ ḅụụ sikima ḅelema ḅọ ofori? Ị́ ị̀ sukuruma tẹ arị ọ̀ da-paka tẹ mịẹ ye ofori ḅara ḅụ ye kẹ ọ̀ lamam ḅẹsọ, ọ̀ paa katapụma ọ̀ karakara ḍumo fịnama ọlọ-sịẹma wararị.”

⁴ Anịtẹso Ekwesu ḅe nwẹnị KỊNỊNYANAḄỌ ḅe pakịrị, “Amụ ị́ ḅara kẹ ọ̀ ḅụụ akụ tẹịn ye lama-a. Tomḅọ ọ̀ nyana ye mẹmgba pịrị pakama ḅa ò ḍumo gotẹ.

⁵ Kụma mịọkụ ị́ ḅara-sụnmaa, tẹ kẹ ò meni na ori mgbe na lamaa, tẹ ị́ tọrụ ogbo ḅụ ori í wori ḅa.”

⁶ Anieḅụ KỊNỊNYANAḄỌ ḅe nwẹnị Ekwesu ḅe ḅẹẹ, “Ḍikii, ori ị́ kụrọ suku-ḅio ḅụ emi, ò ḍumo kịngẹ wẹrịsoo.”

⁷ Anịtẹso Ekwesu ḅe nwẹnị KỊNỊNYANAḄỌ ḅe tọrọkọ ḅụ mẹnjị so, tẹ fụrụarị ịnọ pakama sara Jobu ḅụọ-kuḅu ḅụ saakị mu ọ̀ sịḅị-ogbo la.

⁸ Jobu nwẹnị mu fọọn ma ogboku lẹgị, tẹ paịntẹ ḅẹlẹ pakịrị kẹ ori oju kụrọrọ.

⁹ Anịtẹso ọ̀ ta nwẹnị ọ̀ ḅẹẹ, “Ị́ paa ị́ karakara ḍumo mẹ ọlọ kụrọma ḅarị mọ? Tamụnọ wori tẹ fịị.”

¹⁰ Kụma Jobu nwẹnị á pakịrị, “Ye-nimia ereme ma ḅẹ gbọrụḅọ wẹrịtẹ ẹkwẹn ḅara mie ị́ ẹkwẹn-arị. Wa Tamụnọ ḅara iḅiye-iḅiye daa-ọkị tẹẹ; wa inetẹ siye daa-ọkị ḅịa mọ?” Mie-mẹmgba ḅụ Jobu Tamụnọ ḅụụ siye ḍuko-a.

Jobu Ikiapụ Ọ̀ Ḅio Kpọma Ḅẹ Ḅom

¹¹ Mịọkụ Jobu tẹra ikiapụ nyanam; mịna apụ ma anie Ẹlịfazị, Tẹmanị ḅẹ ḅọ ḅe na, Bilidadị, Suha ḅẹ ḅọ ḅe na, Zọfa, Nahama ḅẹ ḅọ ḅe na. In mị siye mẹmgba tẹ ḅo ọ̀ ḅụụ paka ye mẹ naam, tẹ ọrụḅọ-ọrụḅọ mḅọ sime anga ḅụ sime tẹ ḅom. Ini in ḅo “owu ma!” kẹ ọ̀ ḅẹẹ tẹ ò ḅiokpọma ḅẹ sakị pẹlẹ gbolomam.

¹² Ini ala-jụ ḅụ ori ẹrị sakị, ini ò lekiri-a; tẹ ịn nwẹnị ịna pọkọ saakị tẹ tẹmẹ-la ḅara kẹ owu, tẹ ịna kapa kan tẹ fọọn wakị wakị So da tẹ kẹ ịna asịḅị sara, kẹ ịna kururu na akụ na ḍie ḅụ.

¹³ Anịtẹrẹmẹ ịn nwẹnị sọnọma aḍin na sọnọma eneḅaka na kẹ ori na kiri mẹ ḅio lẹgị-sime; tẹ gbọrụḅọ-sọ ḅịḅị finji tẹ ẹkwẹn gbọrụmgbọ-sọ kọn ọ̀ pịrị-a. Anị kẹ gotẹ ọkọ mịẹ ye, ini ẹrịm mịnẹ ọ̀ tọrụsiẹrị mẹ gburo-gburo lamam ẹrẹsị.