Jobu 18 - FỊAFỊA BAỊBỤLỤ

Bilidadị Maaịn-karama Sakị kẹ Ẹkwẹn: Ò Jobu Ḍiki-ịganịm

¹ Bilidadị, Suha ḅẹ ḅọ ḅe nwẹnị pakịrị:

² “Ị́ ẹkwẹn-aḅịḅị ḍọkị mu tọ sakị la ḅẹ? Ḅiokoromaa, anịtẹrẹmẹ wa ẹkwẹn ị́ pịrị ḅa.

³ Í tiegotẹ wa kẹ nama sịn-arị? Wa tiegotẹ ị́ tọrụ ye-nimia apụ sọarị?

⁴ Ị́yẹrị tẹ ị́ ịganị ḅụ amịna ḅụụ kanị-kọsịmarị ḅọ, ịn tomikiri mẹ sịkị ị́ pịrị ḅẹ, anịanịa ịkụ mẹ sime kiri ḅụ anị saakị-siin ḅẹ?

⁵ Inn, si-sịḅịḅio-sụaḅọ ḅe bele mẹ ịn biinma tẹ, tẹ ọ̀ fịnị mẹ ḅẹ fịnị-ḅẹlẹ mẹ ḅarị kọrị paka-a.

⁶ Ori akpụrụ-warị ḅio bele mẹ furu tẹ, anịsakị ọ̀ sịḅị ọgọnọ-jụ sime tọnjọ mẹ biin tẹẹ.

⁷ Ori ọ̀ kụrọ aḅụọ ma kpụlụma tẹẹ, tẹ ori ḅarana mịẹ ḅẹ tọn aị ma ọ̀ saakị gbin tẹ.

⁸ Kẹ gotẹ ọkọ ḅẹẹarị, ori ori aḅụọ na mẹnjị mu ịgbọ ḅio sụka tẹẹ, tẹ ọ̀ mịẹkọn ọgọnọ mẹnjịm.

⁹ Ọ̀ ḅụọ-tongu ḅụ ḍiein ori ọlọm, ḍiein ḅio ò mu korom.

¹⁰ Kiri ḅio ịn gbọrụ ḍiki kẹ ḅọị koroma ọ̀ pịrị wararị, kala etela mẹ ḅụ ịn gbọrụ ḍiein tuu koroma ọ̀ pịrị wararị.

¹¹ Tẹmẹ-naịn-naịnma apụ anga-anga ḅụ ò ḅalafamam, tẹ ọ̀ mangị kiri ḅụ ò ḍukam.

¹² Ḅuru-pọkọtarị ori ịnyọ lọkọmam, anịsakị ḅụụ-fụka mịẹ tẹ ọ̀ pụmbụ ḅẹ ḅara kẹ tẹlẹma tẹ.

¹³ Obi ḅụ ori oju kiri faam, fịị tarị tụḅọ ori eleke ma ḅaam

¹⁴ Akpụrụ warị mẹ tẹ ò ḅioḅẹngbọ kẹ gbanaye mẹ ḅụ ini ọ̀ saakị pakama tẹẹ, anịsakị ini ori ọkị-ḅo tẹmẹ-naịn-naịnma amadaḅọ ḅe pịrị tẹẹ.

¹⁵ Anị kpekima-a apụ ori akpụrụ-warị mẹ ḅio angam, gilogilotẹ ye dọkịmaye ịn nwẹn kẹ ò sime anga ḅụ saram.

¹⁶ Ori akuno suku-ḅio samụnọm, tẹ ori ịkpangị ma ọgọnọ-jụ kpatụm.

¹⁷ Tomikiri kẹ ọ̀ kẹ ḅiokoroma ḅẹ ye gulugulu-faam, anịsakị etela-ogbo ḅụ ori ẹrẹ gotẹ ḅẹ ye ofori.

¹⁸ Bele ḅụ ini ọ̀ gbọn mu kanakana ḅio sunm, tẹ tomikiri ḅụ ò dee pakamam.

¹⁹ Ori atomi ogboku ḅụ ọ̀ tụḅọ, anịanịa ọ̀ ḅụụ paka-ḅo ḅọ ofori, anịsakị ò sime-sime anga ḅụ kirikọntẹ sime gbọrụḅọ-sọ ofori.

²⁰ Ori ene mẹ tẹmẹ-naịn-naịn kẹ ini tẹ ịrụa-ideriarị-anga ḅẹ apụ ma pịrịm, opu ḅalafa nwẹnị ịrụa-saakịarị-anga ḅẹ apụ ma gbaịnm.

²¹ Tụkụma ḅara ḅụ anie Tamụnọ nimi-a apụ ma anga yọ sime-ḅara, anị ḅara mie anịḅọ ḅe tẹ Tamụnọ nimi-a ḅọ ḅe ye-yọ mẹ sime-ḅara. Wa ḅọrọ gbolomatẹ ideri fọọn mẹ ḅio mu ḅẹ?”