Jobu 17 - FỊAFỊA BAỊBỤLỤ

Jobu Ọ̀ Ḅụụ-fụka Gotẹ Tẹkẹm

¹ “Ì ḅioḅẹngbọ kaan tẹẹ, ì ene ma fa tẹẹ, ḍuḅu mẹ tẹlẹma ị̀ pịrị tẹ.

² Tụkụma ḅara ḅụ, kịnị kombo apụ ì ikelema-koro wararị; tẹ arị ị̀ tọrụngbọ kẹ ịna ịganị ḅụ wẹrị wararị.”

Jobu Tẹmẹ-la Ḅara Kẹ Tamụnọ Tẹkẹm

³ Ị́ ḅụụ ḅụ ye minini wẹrị ị̀ pịrị; tụḅọ emi tẹ sịẹ ị̀ pịrị ḅẹ ḅọ?

⁴ Ị́ ịna ḅioḅẹngbọ gbaịn yefieye naa pịrị tẹ ḅẹ sakị, ị́ ḅarị anịẹrẹsị owu-ḅara-iḅi kẹ ịn pịrị ḅịa.

⁵ Oriḅe tẹ ịn nyana gboloma ye ḅụ, ori ikiaḅọ ḅofa kiri nyana gotẹ ye ḍuko ẹngbẹsẹ ḅọ ḅe, ori awọmẹ atọrụngbọ ma mịnịmịnị ḅa.

⁶ “Ori ị̀ kẹ egberi gbaa ḅẹrẹ ḍuko ḅọ sọma tomi pịrị tẹẹ, tẹ tomi tọrọkọ ḅụ fịla ngumarị gbọrụḅọ anie yẹrịị.

⁷ Kururu mịẹ tẹ ị̀ tọrụngbọ ḅutuḅutu tẹẹ, tẹ ì oju apakịrị-apakịrị mamgba tẹmẹ sime-ḅara sime tẹẹ.

⁸ Karakara tomi miemẹ ḅụ tẹmẹ-naịn-naịnarị, tẹ mịẹ ye ofori ḅọ ḅe nwẹnị Tamụnọ nimi-a ḅọ ḅe ḅụụ ịganị nyanarị.

⁹ Anịsọ kuraye-mịẹapụ ma ori etela ḅụ ḅụụ sikima-a, anịsakị anịḅọ ḅe tẹ ḅara fịafịa wararị ḅọ ḅe kụrọ tọrọkọ-tọrọkọ muarị.

¹⁰ Kụma ọmịnị, ọmịnị-mgba siin ḅo sọ arị ọmịna ogboku ye-nimi gbọrụḅọ-sọ ẹrị ḅịa.” Jobu ḅẹẹm:

Jobu Ḅarị Ḅiokpọ Nyana-a

¹¹ “Ì ene ma ḅọrọ tẹ, à mịẹ ḅẹ tọn aị ma kaan fa tẹ, ì ḅioḅẹngbọ ḅii aị ma.

¹² Ị́ ḍin kẹ eneḅaka mịẹm; ini mẹẹ, ‘Bele mẹ kanakana mẹ na kpeki wararị.’

¹³ À nwẹnị ḍuḅu kẹ ị̀ warị sọma ḅẹ ḍọkị, tẹ ì monoye kẹ kanakana ḅio anya,

¹⁴ à nwẹnị olulu mẹ ḅẹẹ, ‘Ị́yẹrị anie ị̀ ḍa’, tẹ nwẹnị angule ḅe ḅẹẹ, ‘Ị́yẹrị anie ì iyingi’ anịanịa ‘ị̀ ịyịmbara’ ḅẹẹ kụma,

¹⁵ ì ḅiokpọ mẹ nwẹnị tọ-anga emi? Tụḅọ ì ḅiokpọ mẹ ẹrị ḅẹ?

¹⁶ Anị ḅọrọ ideri ḍuḅu ḅọkọ amaa sịn ma mu ḅẹ?”