Jobu 16 - FỊAFỊA BAỊBỤLỤ

Jobu Ẹlịfazị Pakịrịm

¹ Anịtẹso Jobu nwẹnị pakịrị:

² “À nwẹn pembe tọnwa aị na tẹẹ; ọmịnị-mgba anie ḅụụ-fụkama kịnị-ibe apụ.

³ Fẹrụ ḅio ḅẹ ẹkwẹn-aḅịḅị kunoma nyana? Anịanịa ị́ ịganịma tẹ ị́ pakịrị ye tiye?

⁴ Yẹrị sọ inetẹ ị́ ẹkwẹn ḅara ẹkwẹn ḅa, ị́ à sime kiri ḅụ emi ḅẹ kụma; arị ị̀ sịḅị jike-jike ị́ pịrị tẹ, inetẹ ẹkwẹn kọn-kọn gboloma ị́ ẹngbẹsẹ ḅa.

⁵ Àrị inetẹ ị̀ ḅịḅị kẹ ịnyọ kẹ ị́ pịrị ḅa, tẹ ị̀ aḅịḅị-ḅọkọ ḅẹ ẹkwẹn mẹ ị́ fụka-ye mẹ deinma ḅa.” Jobu ḅẹẹm:

Jobu Ye Ḍuko Tamụnọ Sụam

⁶ Àrị ẹkwẹn sọ, ị̀ fụka-ye dein-a anịsakị arị inema kụma, tọ-ḅara la ye anị ḅụ ì koroma-so ḅẹ?

⁷ Mịọkụ tụkụma ḅara ḅụ Tamụnọ ị̀ kpọkụrọ-kpọkụrọma tẹẹ; ori ị̀ ḅụụ sime apụ mamgba fama-fama tẹẹ.

⁸ Ori ị̀ nwọnịma tẹ anị ogbo-sịẹye sọ ị̀ ẹngbẹsẹ wararị ì oju si mẹ ị̀ ḅụụ ḅụ paka-ḅo tẹ, anị ị̀ tọrụkuḅu ḅụ ḍie-paka wararị.

⁹ Ori ịganị ḅụ ori ì puu tẹ, ì ḍiki-ḅioḅu tẹ; ori ori aka kẹ ì tokuru kọsịma tẹ, ị̀nịna fịya-a ḅọ ḅe ori atọrụngbọ gegema ị̀ pịrị tẹ.

¹⁰ Tomi ịna ḅịḅị finji sara ị̀ da tẹ, ini ọkụrụkụrụ nyana-a ḅara kẹ ḅara finji ị̀ amgba ḅọrọ tẹ ini ịna aḅụụ kobiri gboloma ị̀ pịrị tẹẹ.

¹¹ Tamụnọ ị̀ kẹ Tamụnọ nimi-a apụ ma pịrị tẹẹ, tẹ ị̀ wakị si-sịḅịḅio-sụa tomi ḅara-ḅio suu tẹẹ.

¹² Arị ịnyọsara simem, tẹ ori ị̀ kẹ pakịrị-pakịrị puu tẹẹ, ori ị̀ kọngọ ḅụ ị̀ ọlọm, tẹ ị̀ kẹ gbin tẹ à pakịrị-pakịrị puu tẹẹ. Ò ye kẹ ị̀ mịẹ ḅẹ tẹ ị̀ ẹnyẹ wẹrị tẹẹ,

¹³ ọ̀ ḅara da ḍiein tẹịn apụ ị̀ ikelema-korom ori ị̀ san akpa tẹịn kan finjim, ye wẹrị-a ḅara; ori anị ḅio sime minji kẹ kiri-ḅio saram.

¹⁴ Ò ye kẹ ị̀ lamatẹ pịkị siin ị̀ lamam; kụrọ ḅọ kịnị ḍukatẹ mḅọ ọgọnọ sịẹ mẹnjị ḅara.

¹⁵ Arị akpụrụ kẹ kapa gbin ì oju sụa tẹ tẹ ịnyọ kẹ fọọn ḅio koroma tẹ.

¹⁶ Arị owu tẹ ị̀ tọrụ awụ ḅịyam, kịtịpụtẹ-furu-minji nwẹnị ị̀ tọrụ-saka gbaịn;

¹⁷ ye kẹ kịnị lama ị̀ aḅara-ḅio ofori tẹ ị̀ tẹkẹ karakara wararị ḅẹsọ. Jobu ḅẹẹm:

Jobu So-ḅio Ḅẹ Ogbo-sịẹḅọ Ḍọkịm

¹⁸ Yei kiri, ị̀ ọmbie gbaịn ma! Tẹ yee ị̀ owu mẹ ịnyọsara sime anga nyana ma!

¹⁹ Mịọkụ mẹ sọ ḍikii, ì ogbo-sịẹḅọ So-ḅio emi, anịsakị sịẹ ị̀ pịrịarị ḅọ ḅe ò gele yọ ḅụ emi.

²⁰ Ị̀ ikiapụ ì ḍiki-simam, owu aminji ị̀ tọrụngbọ sara Tamụnọ pịrịm,

²¹ mịnẹ ọ̀ Tamụnọ ḅụụ sime tomḅọ pịrị kiri ịgbanịị, tomḅọ mḅọ pembema tomḅọ ḅụụ nyana kiri pembe ḅara.

²² Gbala boowa akụra ḅo ḅọrọ sakị, à mu tẹ ḅarị pịkịma-ḅo-a etela mẹ mẹnjị ḅa.