Jobu 15 - FỊAFỊA BAỊBỤLỤ

Jobu Maaịn-karama Sakị Kẹ Ẹkwẹn Ori Ikiapụ Pịrịm Ẹlịfazị Maaịn Karama Sakị Kẹ Ẹkwẹn Jobu Pịrịm

¹ Ẹlịfazị Tama ḅẹ ḅọ ḅe nwẹnị pakịrị:

² “Ye-nimiḅọ nimi ofori ḅara kẹ ẹkwẹn tẹ yefieye nyana-a ye ḍuko na-iḅi?

³ Mḅọ sọye ofori ẹkwẹn kọn tẹ kẹ ye na ịgbanị-a, anịanịa ẹkwẹn-aḅịḅị tẹ mḅọ inetẹ kẹ iḅiye mịẹ ḅịa ẹkwẹn kọn na-iḅi?

⁴ Kụma ị́yẹrị í ḅioḅẹngbọ Tamụnọ mangịma dee sin-arị, tẹ ḅụụ sịkị Tamụnọ pịrị dasịẹmarị.

⁵ Kẹ gotẹ ọkọ ḅẹẹarị, ị́ mịẹ-irima ye kẹ ị́ ḅịḅị tolumarị tẹ ị́ nwẹnị epele-tiiḅọ ḅẹlẹ sẹlẹ-ọkị.

⁶ Ị́yẹrị ḅarana ị́ ḅịḅị kẹ ḅẹrẹ-pẹlẹ ị́ ḅara simam, yẹrị pẹlẹ-a; ị́ aḅịḅị-ḅọkọ ḅarana ye ḍuko-pakama ị́ ẹngbẹsẹm.

⁷ Ị́yẹrị anie tarị tomḅọ tẹ ini iyi ḅọ mọ? Anịanịa, ị́ paka tẹrẹmẹ tụndụ ma paka?

⁸ Jene ị́ Tamụnọ ḅẹrẹtọn poki tẹ? Nimi ị́ ḅụụ ḅụ kunoma?

⁹ Í tiye nimi tẹ wa nimi-a? Ị́ tọ fieye naa tẹ anị wamịna aḅụụ giregire-a?

¹⁰ Omongi ị́ ḍa nẹngị, iḅulu sịḅị ḅụ ḅịyatẹ apụ na, omongitẹ apụ na wamịna ogboku emi.

¹¹ Tamụnọ kẹ ị́ pịrị ḅiokpọma aị ma, anịanịa dein ẹkwẹn-ḅịḅị mẹ tẹ kọn ị́ pịrị ye mẹ ị́ ḅụụ ịrụ ḅaka?

¹² Tiegotẹ í ḅioḅẹngbọ í dogi-so, tẹ ị́ atọrụngbọ tiegotẹ ḅịya,

¹³ tẹ ị́ ị́ tẹmẹ pịkị tụḅụrụma Tamụnọ ḅụụ, tẹ ḍụkụtẹ ọkọ sime ẹkwẹn ị́ ḅịḅị-ḅio paka-ḅo?

¹⁴ Tomḅọ anie tiye, tẹ ori inetẹ fịafịa ḅẹ? Anịanịa ori tẹ ẹrẹḅọ iyitẹ inetẹ karakara ḅẹ ḅọ?

¹⁵ Ḍikii Tamụnọ ọ̀ fịafịa apụ ma ḅụụ ḅioḅẹngbọ kẹ gbana-a, anịsakị ò ḍiki-tọrụ ḅụ, so ma sọ fịafịa-a;

¹⁶ tọ-ḅara mịẹ kụma tomḅọ rẹ, ḅụụ si-si-si tẹ ịn tọn-tọn ḅọ ḅe, mịẹ-irima kẹ minji ḅuu ḅara ḅuuarị ḅọ ḅe!

¹⁷ Ì pokii, àrị arị ẹrị ye mịẹ pakama ị́ pịrị ḅa, tẹ kẹ í ḍie ḅa,

¹⁸ Ye-nimiapụ ḍuko tẹ ye, tẹ ịna aḍapụ ḅọị-a ye,

¹⁹ ini ama mẹ kẹ ngẹrị pịrị apụ ma tẹ gbọrụ igoniḅọ sọ ịna ogboku mẹnjị ḅọrọ-a.

²⁰ Si-sịḅịḅio-sụa ḅọ ḅe ori ene mamgba kẹ ikele-ikelem akụ ḅụ, ịn kẹ ọkụrụkụrụ nyana-a ḅọ ḅe pịrị akụra mamgba ḅụ.

²¹ Tẹmẹ-naịn-naịnmarị ye fie ḅara ori aḅeri ḅio emi, ye-sima ḅọ ọ̀ lọkọlọkọ ḅio sọ ḅo ḅa.

²² Ò minini-a mịnẹ ọ̀ kanakana ḅio pịkịma paka-ḅo ḅa anịsakị okologie mẹ pịkị ọ̀ ḅaa ḅẹ koruarị

²³ Ọ̀ paka jen anga mu tẹ fịye gotẹ ikele-ikele tẹ gbelarị, ‘Anị tọ-anga emi?’ Ò nimim mịnẹ kanakana gbọrụ ene tẹlẹmatẹ ḅo kpeki tẹẹ;

²⁴ ḅụụ-ḅalaḅala na, akụ na ọ̀ tẹmẹ-naịn-naịnmarị tẹlẹma ọmụ pịrị amadaḅọ pembe ḅara kẹ ini ori ẹngbẹsẹ wararị.

²⁵ Gbala ọ̀ Tamụnọ na tụḅụrụ ḅara kẹ ọ̀ ḅara sụn-pakama tẹ, tẹ tọrụ pakama owu kẹ Kụrọmamgba Nyanaḅọ ḅe sịn tẹ,

²⁶ kụrọtẹ akpakpa sọ tẹ ekpe kẹ sịḅịḅio kụrọ-ḅara kẹ mangị ọ̀ daasịẹ ḅẹ muarị

²⁷ gbala ọ̀ kọn ḍụḅa mu ọ̀ tọrụkuḅu gbaịn tẹ, tẹ oju iḅi ori aḅiri ḍụḅama tẹ,

²⁸ tẹ fatẹ opu ama ma ḅio, gbọrụḅọ-sọ anga na-iḅi-a awarị ḅio angarị, arị awarị ma tẹ ḅo sime kẹ sara ọgọnọ sara kpolima pịrị tẹ aị ma.

²⁹ Ori ngọ-kọn ḅịa, ọ̀ nyana ye sọ sime ala ḅịa anịanịa ò kiri-ḅio gbọrụ kuno nụnụ;

³⁰ kanakana ḅio ò ḍumo-mangị kọn so ḅịa; fịnị-ḅẹlẹ ò ḍiḅi tẹ pakarị aị ma samụnọma ḅa, tẹ fẹrụ ma panga-ḅaa tẹ aị ma ọfịn siin ḅa.

³¹ Yee ò ḅioḅẹngbọ kẹ ye ḅio ofori papaaye ọgọnọ gbanatẹ oḅori kẹ ọ̀ ḅụụ sịn ma; kẹ gotẹ ọkọ ḅẹẹarị, ye ḅio ofori papaaye mẹ ọ̀ gbẹẹ-ye sọ ḅa.

³² Ini anị gbẹẹ ḅinma tẹrẹmẹ ọ̀ sakị laa ḅa, tẹ ori ịkpangị eleleinda tọrụ sụa ḅịa.

³³ Ori girepu sịn amụ ḅịya-a girepu-asịnmgbọlụ sara pakama ḅara kịka ḅa; olivu sịn tẹ panga-ḅaa tẹ arị sara fama ye sime-ḅara.

³⁴ Gbala Tamụnọ nimi-a apụ ma afuro ma pụụn tẹẹ, tẹ fịnị ọḅụ-fị akpụrụ-warị ma dọkịma tẹẹ.

³⁵ Ịn si-aị kẹ tomi tọn tẹ siye mịẹarị; tẹ ịna ḅioḅẹngbọ oḅori-kẹ-kịnịsịn ḅẹ tẹ tẹlẹmam.”