Jobu 14 - FỊAFỊA BAỊBỤLỤ

Jobu Tomḅọ Ḍumo Kpụlụ Ḅara Ḍukom

¹ Ẹrẹḅọ iyi tomḅọ boowa aḍin nwẹn nyanam, anịsakị ḅụụ-fụka mḅọ ḅụụ ḅin wararị.

² Ò brebrema fịlawa paka ḅara paka tẹ kpatụm; ori ịrụa ḅio ḅẹ tẹmẹ mẹnjị ḅara mẹnjịm, tẹ faam.

³ Ọkọ sime ḅọ ọgọnọ mie ị́ tọrụ finji tẹ ị́nịna ḅẹrẹkọn ḅẹ tẹ ị́ kẹ ḅẹrẹkọn ḅoarị?

⁴ Tụḅọ inetẹ muno ḅio fịafịatẹ ye pakama-ḅo ḅẹ? Gbọrụḅọ-sọ ofori.

⁵ Ori ene ma la ḅara tọn-pẹlẹ wararị, tẹ ori akalụ ma kịẹn-ḅịḅị ị́nịna emi, anịsakị ị́yẹrị pịkị ọ́ laa tẹ inetẹ ḅọrọ ḅịa anga tọn wararị ḅẹẹ sakị,

⁶ ò ḍiki-tọrụsin, tẹ ọ̀ ḅụụ wẹrị ḅelemaa, mịẹ tẹ ori ori ene ma ḅẹ tọrụ-ḅẹlẹ nyana, ye ọkọ ḅọ igbigi gbẹẹ tẹ anị ḅẹ tọrụ-ḅẹlẹ nyana ḅara. Jobu piki ḅẹẹm:

Jobu Ḅarị Ḅiokpọ Nyana-a

⁷ Sịn ḅiokpọ nyana wararị mịnẹ anị pịkị siin so-paka ḅa, ịn anị pẹlẹ-gbin gbin, anieḅụ anịḅẹ sịn-iyingi mẹ so-paka kunoma ḅịa.

⁸ Anị ḅẹ kuno mẹ kiri mẹ ḅio sime omongim, tẹ anị ḅẹ ikiḅa mẹ kiri mẹ ḅio fịịm ḅẹsọ,

⁹ anịsọ minji mẹ ḅẹ ọwụ mẹ ḅụ anị so-paka ḅa, tẹ ịwọma so-paka sịn ḅara sụa ḅara kẹ sịn aḅara sụa ḅa.

¹⁰ Kụma tomḅọ fị-fịị, ini mḅọ iderima koromam; tomḅọ ọwụ-sara kunoma kụma ọ̀ pịkị tọ-anga emi?

¹¹ Minji ḍaḅa ḅio fa kpalịkpalị ḅara, anịsakị puu mu tọrụ koroarị minji kụlụkụlụ tẹ samụnọ ḅara

¹² anị ḅara mie tomḅọ ḅọlọlọ tẹ ḅarị siin saakị-a ḅara, nwenii so ma ḅarị ofori sọ ọ̀ saakị ḅịa, anịanịa ò mono ḅụ naa-saakị.

¹³ Yei, mịẹ tẹ ị́ ị̀ kẹ ḍuḅu ḅio ḅọị ḅẹ ḅara, mịẹ tẹ ị́ ị̀ ḅọị wẹrị nwenii ị́ ịganị mẹ ḅọrọ ḅẹ ḅara, mịẹ tẹ ị́ ị̀ kẹ ḅiokoroma ḅarị sakị pẹlẹ ị̀ pịrị ḅẹ ḅara!

¹⁴ Tomḅọ fịị kụma ò siin ḍumo ḅarị mọ? Arị à fịrịmẹnjị ḅarị ene mamgba kẹ kọrị ḅa, nwenii ḅụụ-fụka ḅụ ị̀ paka-ḅo sakị ḅo ḅa.

¹⁵ Anịtẹso ị́ ị̀ sịn ḅa, tẹ arị ị́ pakịrị ḅa; ị́ ị́ aḅara kẹ tẹmẹ ye mẹ ẹrị ḅẹ ḅii ḅa.

¹⁶ Anịsakị ị́ ị̀ amẹnjị-aḅụọ ma kịẹn ḅa, ị́ ḅarị tọrụ kẹ ì si ḅụ wẹrị ḅịa;

¹⁷ opu akpa ḅio ini ì oloko kan mẹ fịna gbaịn ḅa, tẹ ị́yẹrị nwẹnị ị̀ mịẹ-irima gbaịn-kpịtịpụma ḅa.

¹⁸ Kụma tụndụ mẹ ḅịkịm tẹ kọsị faam, tẹ ịkụ mẹ sime kiri ḅụ ini anị saakị siinm;

¹⁹ minji ma ḍụḅarị ma sịkịrịma siinm; mẹnjịarị minji mẹ kiri mẹ ḅẹ fịye ḍiḅi anga mẹ sịkịrịma siinm; anị ḅara mie ị́ kẹ tomḅọ ḅiokpọ mẹ ḅaa sin-arị.

²⁰ Ị́ ori na tụḅụrụ gbamasom, tẹ ọ̀ ḅọrọm; ị́ ọ̀ tọrụkuḅu ḍimam, tẹ ọ̀ fịrịma-som.

²¹ Ori owiapụ-awọmẹ ḅo kụn nyanam, tẹ ori anị nimi-a; ini ini iderima koromam, tẹ ori anị kuroma ḅo-a.

²² Ori oju la ye ḅẹ akụ ngẹrị mie ọ̀ ḅụụ nimiarị, anịsakị ọ̀ ḅụụ ngẹrị mie ò kururu pịrịarị.