Jobu 13 - FỊAFỊA BAỊBỤLỤ

Jobu Tamụnọ Na Ye-nụnụam Ọ̀ Karakara Gbolomaye Ḅụ

¹ Ḍikii, ị̀ tọrụngbọ mie mẹmgba ẹrị fama tẹẹ, ì ḅeri anị naa tẹ anị fie ye nimi tẹẹ.

² Yẹrị sọ í nimi ye nimi wararị; í iḅi ị̀ nẹngị-a.

³ Kụma àrị ẹkwẹn Kụrọmamgba Nyanaḅọ ḅe pịrị ḅa, anịsakị à Tamụnọ na ị̀ ḅẹrẹ mẹ ẹkwẹn ḅii ḅa.

⁴ Ị́yẹrị kụma, í iruo kẹ weswasị sọma ọmbị wararị; ọmịnị-mgba papaa ḅịrịapụ famam.

⁵ Yei, mgbe í gbọsime namịna, anị ye-nimi sọ ị́ pịrị ḅa! Jobu pịkị ḅẹẹm:

Jobu Ḅẹẹm Ori Ikiapụ Ọ̀ Ḅụụ Ye Ḍuko Na-iḅi-a

⁶ À kẹ ye ọkị ḅara naa mịọkụ, tẹ ị̀ ḅịḅị ḅọkọ ḅẹ ịgbanị-aị ma pokii.

⁷ Ị́ iruo ḅara kẹ ẹkwẹn kọn Tamụnọ pịrị ḅẹ tẹ oḅori-kẹ-kịnịsịn ḅara kẹ ẹkwẹn ọ̀ pịrị ḅẹ?

⁸ Ị́ aḍụa ḍie-pakama kẹ ọ̀ dama-mu ḅẹ, ị̀ ḅẹrẹ mẹ ịgbanị Tamụnọ pịrị ḅẹ?

⁹ Ori ị́ ḍọkị pakama-ḅo sakị, anị ị́nịna iḅi ḅẹ? Anịanịa gbọrụḅọ oḅori kẹ gbọrụ tomḅọ sịn ḅara, í inetẹ oḅori kẹ ọ̀ sịn ḅẹ?

¹⁰ Ị́ ḅọịma tẹ aḍụa ḍie-ḍie, tụkụma ḅara ḅụ ori ịganị ị́ pịrị ḅa.

¹¹ Ori ama-da opu ị́ tẹmẹ-naịn-naịnma ḅịa, tẹ ọ́ ḅụụ ị́ nyana ḅalafa mẹ ị́ ọgọnọ gbana ḅịa?

¹² Ị́ gbaa-gbaa egberi ma anie fọọn ḅio ḅẹ egberi, ị́ ḅụụ-ḍụa aị ma anie lịka kẹ mịẹ aị. Jobu paa ẹkwẹn tẹ ḅẹẹm:

Jobu Ọ̀ Ḅẹrẹ Ḍuko Tamụnọ Sụam

¹³ Ye-yọ mẹ yaụma ị̀ pịrịị, anịsakị àrị ẹkwẹn ḅa, tẹ yee ḅo ị̀ la ḅẹ ye mẹ, ḅo ị̀ la.

¹⁴ Àrị ị̀ aka kẹ ì oju meni tokuru ḅa, tẹ ì ḍumo kẹ ị̀ ḅara-ḅio sụa ḅa.

¹⁵ Ḍikii ori ị̀ ḅaa ḅa; à ḅiokpọ nyana-a; anịsọ àrị ọ̀ tọrụ-ogbo ḅụ ì etela ḍuko pakama ḅa

¹⁶ Miemẹ ị̀ ḅọrọma sọ ḅa, mịnẹ Tamụnọ nimi-a tomḅọ ọ̀ tọrọkọ ḅo ḅịa. Jobu piki ḅẹẹm:

Jobu Tamụnọ Ḅẹẹm Ori Ọ̀ Mịẹ Si Kẹ Ò Ḍie

¹⁷ Iḅiọkụ ị̀ ẹkwẹn-aḅịḅị pokii, tẹ yee ì ḍuko-pakamaye mẹ ị́ aḅeri ḅio sime.

¹⁸ Ḍikii, àrị ị̀ ḅẹrẹ tẹlẹma tẹ; à nimi wararị mịnẹ arị ị̀ karakara ḍie-pakama ḅa.

¹⁹ Tụḅọ emi tẹ ị̀nịna ye na ịgbanị-a ḅẹ? Anịrẹ à gbọsime tẹ fịị ḅa.

²⁰ Ye ḅụ ḅẹ maaịn ngẹrị kẹ ị̀ pịrị, anịrẹ à ḅarị ị́ tọrụ ḅụ ị̀ ḅụụ ḅọị ḅịa:

²¹ Ị̀ ḅụụ ḅụ ị́ ḅara nụnụ-ọkị ḅelemaa, tẹ í ḅụụ à nyana ḅalafa ị̀ tẹmẹ-naịn-naịnma ma.

²² Anị tẹrẹmẹ sịịn, anịsakị à minini ḅa; anịanịa yee yẹrị ẹkwẹn, tẹ ị́yẹrị ị̀ pakịrị

²³ Ị̀ amịẹ-irima na, ị̀ asi na ḅọrọ nda aị? Ị̀ mịẹ àrị à kan oloko na ì si na nimi.

²⁴ Í tiegotẹ ị́ tọrụ ḅọị, tẹ ị̀ kẹ ị́nịna fịya-a ḅọ kịẹn?

²⁵ Ị́ fẹrụ jikearị ịnya ḅẹlẹ ḅalafama ḅẹ, tẹ samụnọtẹ fiin-arị ịnya ḍuka ḅẹ?

²⁶ Kẹ gotẹ ọkọ ḅẹẹarị, ị́ akụ aị kẹẹ ị̀ ẹngbẹsẹ wararị tẹ mịẹ tẹ ị̀ kala-sakị ḅẹ amịẹ-irima aị ma ị̀ ọgọnọ gbanarị

²⁷ Ị́ tọrụ kẹ ị̀ amịẹaị mamgba ḅụ wẹrị wararị, tẹ ì etela mamgba ḍikiarị ị́ nwẹnị ị̀ aḅụọ-kuḅu ma la anga ḅẹ elekima tọn ḍikiarị.

²⁸ À ḅụrụtẹ ye gulugulu ḅara gulugulum, etemi-laga pẹịtẹ kapa sime-ḅara simem.