Jobu 12 - FỊAFỊA BAỊBỤLỤ

Jobu Jọfa Pakịrịm

¹ Jobu Jọfa ḍuko ye naa fama tẹso, ọ̀ nwẹnị pakịrị:

² “Ḅio-maaịn-tọn-a ḅara ḅụ ọmịnị anie tomina ḅịḅị kẹ ẹkwẹn-arị apụ ma, nimi ọmịna aḅụụ sọ fịị ḅa.

³ Kụma í ye fie ye naarị ḅara, mie à ye fie ye naarị ḅara; ị́ iḅi ị̀ nẹngị-a. Tụḅọ nwẹn sime aị ma pembe aị nimi-a?

⁴ À kịnị-ḍẹrịmaḅọ sọ ị̀ ikiapụ pịrị tẹẹ; yẹrị ḅe tẹ Tamụnọ sịn tẹ ori ị̀ naarị ḅọ ḅe, karakara tẹ ḅịḅị ḅụụ la-a ḅọ ḅe, à kịnị-ḍẹrịmaḅọ sọ tẹ.

⁵ Gbọrụḅọ tẹ ḅụụ dein ḅụ emi ḅọ ḅe, ḍiki-sima nyana si-fụḅara pịrị wararị; anị ḅụụ tẹlẹma kẹ inima tẹ ḅụọ sịnịnị apụ ma pịrị wararị.

⁶ Furuapụ ma akpụrụ-awarị ma dein sime wararị, anịsakị Tamụnọ ịganịma apụ ma ye ịn la-a, inima tẹ ḅara-ḅio ịna oru-tamụnọ kẹ ḅo apụ ma.” Jobu nwẹnị pịkị Jọfa ḅẹẹ:

Tamụnọ Nimi Kẹ Nama Ma Sọ Pịrị Tẹẹ

⁷ Kụma piri anama ma gbelaa, anịsakị in ye kẹ í toluma ḅa; fiin-arị afeni ma gbelaa, anịsakị ịn ḍuko ị́ pịrị ḅa;

⁸ anịanịa kiri mẹ ḅio so-pakarị asịn ma, tẹ ịn ye kẹ í toluma ḅa; tẹ opu atọrụ ma ḅio ḅẹ inji ma mịẹ pakama í ḍie ḅa.

⁹ Mịna aị mamgba ogbo-ḅio tiye tẹ nimi-a mịnẹ KỊNỊNYANAḄỌ ḅe miemẹ mịẹm mẹ?

¹⁰ Ọ̀ ḅara-ḅio mie ḍumo wararị ye goyegoye ḍumo emi ye, pịkị tomi ḅara-ḅara mamgba sararị ọwụ mẹ sọ.

¹¹ Ḅeri mẹ anị ẹkwẹn-aḅịḅị pekele-ḍiki-a, ḅẹlẹ ọgọnọ mẹ wẹrịtẹ fịye ḅẹlẹ ḍiki ḅara?

¹² Nimi omongi na emi, anịsakị ye fie ye naa tọnwa aḍin ḅụ emi. Jobu pịkị ḅẹẹm:

Tamụnọ Ori Ine Ọ̀ Mịẹ-ḅẹ Ḅii Ye Goyegoye Mịẹ Ḅa

¹³ Tamụnọ nimi na kụrọ na nyana wararị, toluma ye ḅio ḍiki na, ye fie ye naa na ọ̀ ḅụụ emi.

¹⁴ Ọ̀ kan-sara kụma, inetẹ siin nama ḅẹ ḅọ ofori; ori ịkasị gbọrụḅọ pịrị kụma inetẹ finji ḅẹ ḅọ ofori.

¹⁵ Ò minji mẹ ọlọ-ọlọ, arị samụnọ-kpakịkịm; ori arị fịrịma pakama-pakama, arị kiri mẹ gbaịn ḅilemam.

¹⁶ Ịnyọ na, nimi na ori na emi; ini oḅori kẹ sịn ḅọ ḅe na, oḅori-kẹ-kịnịsịn ḅọ ḅe na ori ịn tẹmẹm.

¹⁷ Papaa ḅara kẹ ò ye-nimiapụ ḅọrọma pakamam, tẹ ọ̀ ḅẹrẹkọn-apụ kẹ oḅori atomi sọmam.

¹⁸ Ori amadapụ ma ikoli ma fimam, tẹ konju ḅụ ịnwaịn ḅịtẹ kẹ ịna aḅiri ḅụ ini ịnwaịnm.

¹⁹ Papaa ḅara kẹ ori agbamịẹapụ ḅọrọma pakamam, tẹ kụrọ nyana opu-apụ ma saakị gbinm.

²⁰ Inima tẹ ịn ḅioḅẹngbọ kẹ ḅụụ ḅụ gbana apụ ma, ọ̀ mịẹ tẹ ịn ḅarị ẹkwẹn ḅẹ ye nimi-a som, tẹ omongiapụ ma ḅẹrẹ sẹlẹ koroma mẹ, siin-ọkịm.

²¹ Ò ḍiki-sima kẹ amadapụ owiapụ-awọmẹ ọgọnọ saram tẹ kụrọ ḅọ ḅe ḅiri-ọkịye mẹ fimam.

²² Kanakana ḅio ò pokolo ayọ ma finjim, tẹ furu-kịtịpụ kẹ bele mịẹm.

²³ Ori opu asịẹ mịẹ tẹ arị gburo-gburom, tẹ ọ̀ pịkị arị famam; ori opu asịẹ mịẹ ḍụḅamam, tẹ ori ịn ḅọrọma som.

²⁴ Ò tomikiri mẹ ḅẹ atomi ma ḅẹ alapụ ma ḅụ ye fie ye ma ọkị-som, tẹ mịẹ tẹ ini etela ofori fa tẹ yọ ḅụ irima-irimam.

²⁵ Bele ofori ḅara kẹ ịn furu-minji ḅio irima-irimam; tẹ ori ịn mịẹ tẹ ini iru ḅuu tọrụ-ḅaama ḅọ ḅụọ pekele ḅara kẹ ḅụọ pekele pekelem.