Jobu 1 - FỊAFỊA BAỊBỤLỤ

Ekwesu Ḅe Jobu Daaḍikim

¹ Ḅọrọtẹ sakị ḅụ, ịn kẹ Uzu sịn ama mẹ ḅio Jobu nwẹn-sịn gbọrụ owiḅọ simem; ọ̀ ḅụụ ḅẹẹ-ḅẹẹye ofori; karakara tomḅọ tẹ Tamụnọ mangịma tẹ siye ḅụ ḅụụ sikima ḅelema ḅọ.

² In sọnọma owiapụ-awọmẹ na, tẹra eremịna-awọmẹ na iyim.

³ Ori anana maa ẹndẹ oyia asi finji ofori anana gbọrụ puku (7,000) na, ike-sụa-anama sọnọma ẹndẹ, oyia asi finji (3,000) na, pootẹ-nambulo maa ẹndẹ oyia asi finji (1,000) na, ịyọrọ yedogi-anama ẹndẹ sọnọa si finji (500) na, tọnwa-tọnwa fịrịmẹnjịapụ na nyanam; anie mịẹ tẹ ḅị tomḅọ ḅe anie ḍụḅa tẹịn ḅọ ịrụa-saakịarị-anga mẹ ḅụ.

⁴ Ọrụ ene-ene ḅụ ori owiapụ-awọmẹ mu gbọrụḅọ-gbọrụḅọ warị kopini afịaị fị fịm; anịsakị ịn ḅịḅị kẹ ịna tẹra eremịna-amịnapụ fịrịma tẹ ịn sịn ḅo ḅa, tẹ ini na fị-na-ḅuu-na ḅa.

⁵ Kopini afịaị fị ene ma ḅo ḅọrọ fama tẹso kụma Jobu fịrịma tẹ ịn mịẹ fịafịama ḅa, tẹ ḅaso kẹ saakị tẹ inimgba kịẹn-ḅịḅị wẹrịtẹ la ḅara ḅụ dọkịma-agba mịẹ ḅa; Jobu kẹ gotẹ ọkọ mịẹarị, ori mẹẹ, “Sosi-ọkụma, ị̀ owiapụ-awọmẹ ma ịna aḅioḅẹngbọ ḅụ Tamụnọ wori tẹ si mịẹ tẹ ḅoto.” Mị-ḅara mie Jobu sịkọpẹlẹ-a ḅara ḅụ mịẹ ḅara.

⁶ Gbọrụ ene ḅụ,, Tamụnọ enjelịapụ ma ḅo amịna ḅụụ kẹ KỊNỊNYANAḄỌ ḅe ḍie ḍie sakị ọ̀ tọrọkọ ḅụ, Ekwesu ḅe sọ ịna ogbo-ḅio sọ tẹ ḅom.

⁷ KỊNỊNYANAḄỌ ḅe nwẹnị Ekwesu ḅe gbela, “Ị́ tọ-anga ḅụ sime tẹ ḅo?” Ekwesu ḅe nwẹnị KỊNỊNYANAḄỌ ḅe pakịrị, “Tomikiri mẹ ḅụ mẹnjị ọḅụ-na-kuḅu-na da, anị ọgọnọ mẹnjị iwo-na-ideri-na ḅụ à sime tẹ ḅom.”

⁸ KỊNỊNYANAḄỌ ḅe nwẹnị Ekwesu ḅe gbela, “Ị̀ fịrịmẹnjịḅọ Jobu ị́ ọ̀ kẹ ḅiokoroma tẹ mọ, mịnẹ tomikiri mẹ ḅụ ò pembema ḅụụ ḅụ ḅẹẹ-ḅẹẹye ofori karakara tomḅọ, tẹ ị̀ mangịma tẹ siye ḅụ ḅụụ sikima ḅelema ḅọ ofori?”

⁹ Anịtẹso Ekwesu ḅe nwẹnị KỊNỊNYANAḄỌ ḅe pakịrị, “Jobu ọ̀ ḅọrọ gberie-sọ ofori ḅara kẹ ị́ mangịma tẹ siye ḅụ ḅụụ sikima ḅelema?

¹⁰ Amụ ị́ onu kẹ ori na, ọ̀ warị na, anga-anga ḅụ ọ̀ nyana aị mamgba na gbori-ikelema-a? Ị́ ori aḅara ḅẹ kọrịnama mẹ boma tẹẹ, tẹ ọ̀ nyana aị ma ama mẹ ḅio gburo-gburo tẹẹ.

¹¹ Kụma mịọkụ ị́ ḅara sụn-pakamaa, tẹ kẹ ọ̀ nyana aị mamgba ọkịị; ị́ tọrụ ogbo ḅụ ori í wori ḅa.”

¹² KỊNỊNYANAḄỌ ḅe nwẹnị Ekwesu ḅe ḅẹẹ, “Ḍikii, ọ̀ nyana aị mamgba ị́ kụrọ suku-ḅio ḅụ emi, kụma oriḅe ḅioju ọgọnọ ḅụ ị́ ḅara kẹ gbana ma.” Anieḅụ Ekwesu ḅe nwẹnị KỊNỊNYANAḄỌ ḅe tọrọkọ ḅụ mẹnjị-so.

Jobu Awọmẹ Fịị Tẹ Ori Ngọ Pịkị Si Fama Tẹẹ

¹³ Gbọrụ ene ḅụ, ori owiapụ-awọmẹ na eremịna-awọmẹ na ịna iyimbere omongiḅọ warị ḅụ fịye fị-fị tẹ iru ḅuuarị ogbo;

¹⁴ gbọrụ fịrịmẹnjịḅọ nwẹnị mangịma Jobu ḍọkụma-ḅo, tẹ ḅẹẹ, “Pootẹ-anambulo ma fịye ḍiḅi ḅara kẹ kiri sokuarị, tẹ yedogi-anama ma ịna akaka ḅụ sime tẹ osuka fịarị,

¹⁵ tẹ Sabịya apụ nwẹnị bẹkẹma ḅo ịn ponoma tẹ ịn kun ọkị, tẹ okologie kẹ fịrịmẹnjịapụ ma pẹlẹ-ḅaa; anịsakị yẹrị ngẹrị mie ḍumo-mangị kọn tẹ ḍuko ị́ pịrị ḅẹ ḅo ye.”

¹⁶ Ọ̀ paa ẹkwẹn-arị ogbo ọkụma, jụmọ pịkị ḅo tẹ nwẹnị ḅẹẹ, “So-ḅalapụ kama sara ḅo anana ma na, fịrịmẹnjịapụ ma na dọkịma fama tẹ, tẹ yẹrị ngẹrị mie ḍumo-mangị kọn tẹ ḍuko ị́ pịrị ḅẹ ḅo ye.”

¹⁷ Ọ̀ paa ẹkwẹn-arị ogbo ọkụma, jụmọ pịkị ḅo tẹ nwẹnị ḅẹẹ, “Kalidizi ḅẹ apụ ma tẹra ogbo sọ tẹ ḅo ike-sụa-anama ma gbaịntẹ ịn fọịn ọkị tẹ, tẹ nwẹnị okologie kẹ fịrịmẹnjịapụ ma pẹlẹ-ḅaa; anịsakị yẹrị ngẹrị mie ḍumo-mangị kọn tẹ ḍuko ị́ pịrị ḅẹ ḅo ye.”

¹⁸ Ọ̀ paa ẹkwẹn-arị ogbo ọkụma, jụmọ pịkị ḅo tẹ nwẹnị ḅẹẹ, “Ị́ owiapụ-awọmẹ na, eremịna-awọmẹ na ịna iyimbere omongiḅọ warị fị-na-ḅuu-na simem;

¹⁹ tẹ ḍikii ḅẹ sakị, gburo-gburotẹ kụrọ fẹrụ nwẹnị fie ịkpa mẹ saḅa koro tẹ warị mẹ ḅẹ inia ịkọlị ma sukuruma-gbin, arị nwẹnị ḅịkị asambịrịma atomi ma ọgọnọ koro tẹ ịn fịị tẹ; tẹ yẹrị ngẹrị mie ḍumo-mangị kọn tẹ ḍuko ị́ pịrị ḅẹ ḅo ye.”

²⁰ Anịtẹso Jobu nwẹnị saakị tẹ ọ̀ kapa kan, ọ̀ sịḅị sẹịn-siin, tẹ ḅịkị kiri-ḅio koro tẹ sunsin.

²¹ Ori mẹẹ, “À papaa ḅara kẹ ì iyingi furo ḅio paka-ḅom, anịsakị à pịkị papaa ḅara kẹ pịkịma-so ḅa; KỊNỊNYANAḄỌ ḅe pịrịm, anịsakị KỊNỊNYANAḄỌ ḅe pịkị ọkị so tẹ; boma sime KỊNỊNYANAḄỌ ḅe ẹrẹ mẹ pịrị.”

²² Mie-mẹmgba ḅụ Jobu si mịẹ-a, anịanịa mịẹ-irima kẹ Tamụnọ ọlọ.