Jerimaya 9 - FỊAFỊA BAỊBỤLỤ

¹ À ḅiiarị mimgbe ị̀ sịḅị minji emi suḅe sọm, tẹ ị̀ atọrụngbọ ma owu-minji ngụngụḅa sọm, mịẹ tẹ àrị inetẹ eneḅaka na ḍin na kẹ owu ị̀ atomi ịn ḅaa tẹ apụ ma pịrị tẹẹ.

² À ḅiiarị mimgbe arị ịkpa ḅio sime-yọ nyanam, arị ì atomi ḅụụ ḅele sime ḅẹ anga, inimgba ḅioḅẹngbọ-kẹ-sịrẹrẹ-niḅi-a apụụ, kịnị kẹ jen-apụ ḅara-ḅio dẹrịmarị inweni-ogbo.

³ Sakị mamgba ịn tẹlẹma wararị iruo aị ḍuko; karakara nakara kịnị mingirima mie ama kiri mẹ daarị. KỊNỊNYANAḄỌ ḅe mẹẹ, “Ị̀ atomi gbọrụ si mịẹ tẹ so jen si mịẹarị, tẹ yẹrị ịna Tamụnọ ḅara kẹ ị̀ ọkị-a.”

⁴ Ọrụḅọ-ọrụḅọ mḅọ ikiaḅọ ẹbị nyanam, tẹ gbọrụḅọ-sọ ḅioḅẹngbọ kẹ mḅọ mịnaḅọ ọgọnọ gbana ḅịa; kẹ gotẹ ọkọ ḍukoarị, mịnaḅọ goḅọ-goḅọ Jekọbụ oḅori-kẹ-kịnịsịn ḅara kẹ oḅori-kẹ-kịnịsịn ḅa, tẹ ọrụḅọ-ọrụḅọ amịna ikiapụ ḍuko-simarị.

⁵ Ikiaḅọ oḅori kẹ ikiaḅọ sịn-arị, tẹ gbọrụḅọ-sọ karakara mẹ ḍuko-ḍuko-a; Ini ịna aḅẹlẹ toluma tẹ arị iruoarị, in si mịẹ nwenii ịnyọ ịna pọkọ-ta tẹẹ.

⁶ Oḅori-kẹ-kịnịsịn ogboku mie ini angarị Ịna oḅori-kẹ-kịnịsịn ḅụ ịn ḍụkụ tẹ ị̀ kẹ ye-sịn-a, KỊNỊNYANAḄỌ ḅe ọkọ ḅẹẹm.

⁷ Miemẹ gotẹ Kụrọmamgba nyana KỊNỊNYANAḄỌ ḅe mẹẹ, “Àrị ì atomi tẹlẹma ḅa, kiri ḅio soku pakama-ḅo ye la ye ọkụ tẹ ịn tọn-ḍiki ḅa. À pịkị tiye kẹ ini na mịẹ ḅẹ?

⁸ ịna ḅịḅị-ḅio-ḅẹ aḅẹlẹ ma kịnị-ḅaaḅa ye nyana wararị aḍịẹịn ọkụ; sakị mamgba arị iruo aị ḍukoarị. Ọrụḅọ-ọrụḅọ ikia ḅara kẹ ẹkwẹn kẹ mḅọ na kpeki tẹ anga ḅọ pịrịarị kụma karakaramatẹ ḍiein mie mḅọ tuu ọ̀ pịrịarị.

⁹ À fomu-ḅara kẹ mịna aị ma pịrị ḅịa? Nwẹn pembema sịẹ ḅụ à gbẹẹfị ḅii ḅịa? Yẹrị, KỊNỊNYANAḄỌ ḅe ọkọ ḅẹẹm.”

¹⁰ À ḅẹẹm, “À tụndụ ma gotẹ kururu ḅa tẹ owu iḅi-osuka-akiri ma pịrị ḅa, arị samụnọ-kpakịkịtẹ ẹrẹsị, tẹ gbọrụḅọ-sọ ye-muarị tẹ arị ḅụ mẹnjị tolu ḅọrọ-a. Kịnị ḅarị jen kẹ opu anama olokuarị ye naa-a; feni amẹẹ na piri-ḅio-ḅẹ anama na sọ mangị-so fama tẹẹ.”

¹¹ KỊNỊNYANAḄỌ ḅe mẹẹ, “À Jeruselemu kẹ sara sọma ḅa, piri-obiri amẹẹ angarị yọ; Juda ḅẹ opu ama ma ḅo ịkpa sọ ḅa, gbọrụḅọ-sọ anga-anga-a anga.”

¹² À nwẹnị ḅẹẹ, “KỊNỊNYANAḄỌ, tiye ẹrẹsị ị́ amakiri mẹ sima kọsịma tẹ anị kẹ ịkpa samụnọ ḅara samụnọmatẹ gbọrụḅọ-sọ ye-muarị tẹ ḅarị anị ḅụ mẹnjị tolu-ḅọrọ-a? Tụḅọ ye-nimi ḅo anị fiearị ye naa ḅiri la ḅẹ? Ị́ anị ḍuko finji pịrị tẹ inetẹ anị ḍuko jen-apụ pịrị ḅẹ ḅọ tụḅọ?”

¹³ KỊNỊNYANAḄỌ ḅe nwẹnị pakịrị, “Miemẹ gotẹ paka yee, ì atomi ma à kẹ ịn pịrị toluma ye mẹ kẹ gbin koroma-so tẹẹ. Amụ ini ị̀ ḅịḅị poki tẹ à ḍuko ịn pịrị ye mịẹ-a.

¹⁴ Anie nakara, ịn kọngọ kụrọma tẹ sunsin Balị oru-afụḅara pịrịtẹ, anie ịna aḍapụ ma kẹ in tolumam ịn mịẹ ḅẹ ḅara mẹ.

¹⁵ Mie ḅụ, ọkọ ẹrẹsị, Yẹrị, Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe, kẹ ịn mịẹ ḅarịye pokii: àrị akụarị sịn kẹ fịye sọma ì atomi pịrị fị tẹ kịnị-ḅaaḅa ye kẹ ịn pịrị ḅuu ḅa.

¹⁶ Sịẹ-sịẹ tẹ ini anịanịa ịna elemu-aḍapụ amụ arị gboloma ye naa-a apụ ogboku ḅụ, arị ịn kẹ gala-galama ḅa, tẹ ọmụ-ogbo-ogbo kẹ ịn fịrịma nwenii tẹ àrị ịn ḅaa guluguluma fama ḅa.”

Jeruselemu ḅẹ Apụ Ḅarasụa gotẹ Owu pakamarị

¹⁷ Kụrọmamgba nyana KỊNỊNYANAḄỌ ḅe ḅẹẹm, “Ọ́ pakarị aị ma kẹ kuroma ḅụ suu! Ọ́ ḍụẹịn owu ereme ma sịn-ḅoo, ḍụẹịn suku nume sun-sun ereme ma.”

¹⁸ Tomi ma mẹẹ, “Ḍuko ịn pịrị tẹ ịn fọnya gbọrụ ḍụẹịn owu nume-su wa pịrị, nwenii tẹ owu minji wamịna atọrụngbọ ḅio ḅin tẹ wamịna atọrụngbọ gbaịn apara ma pisi fama owu ḅụ.”

¹⁹ Zayọnị ḅụ owu-pọkọ fiearị ye pokii, “Wa fa tẹẹ! Wamịna tọrụ-tuu fama tẹẹ! Jen mịẹ-mịẹ ḅara ofori wa wamịna amakiri koroma-so ḅa; Wamịna sime-ayọ ma ịn kan sara tẹẹ.”

²⁰ À nwẹnị ḅẹẹ, “Ọmịnị ereme, ọ́ KỊNỊNYANAḄỌ ḅe pokii, ọmịnị ori ẹkwẹn ma kẹ elekima sụaa. Ọ́ ḍụẹịn owu-owu ḅara kẹ ọmịna eremịna-awọmẹ tolumaa, pịkị ḍụẹịn owu nume sun-sun ḅara kẹ ọmịna ikiapụ tolumaa.

²¹ Fị wamịna ikiḅa-aḅọkọ ḅụ ḅọrọ-so ḅo tẹẹ wamịna amada-awarị ma ḅio sọ; anị wamịna ḍọkọḍọkọ-awọmẹ ma pẹlẹ sara tẹẹ etela-ogbo ma ḅụ asambịrịma owiapụ ma sọ fẹ-siri ma ḅụ.

²² Anga mamgba ḍụẹịn gala-gala sara wararị, gbala kẹ kiri tẹlẹma tẹ kẹ ye ḍiḅi ḅẹ ḅụrụtẹ afun sara ḅara, gbala mbịaka pẹlẹ apụ pẹlẹ sara tẹ koroma-so aị ọkụ, pẹlẹ sara tẹ kolokolo apụ ofori mbịaka. Mie KỊNỊNYANAḄỌ ḅe ị̀ ḅẹẹm à ḍuko ḅẹ ye.”

²³ KỊNỊNYANAḄỌ ḅe mẹẹ, “Ye-nimi atomi ịna nimi kẹ ḅụụ-boma ḅịa ịnyọ nyana atomi sọ ịna ịnyọ kẹ ḅụụ-boma ḅịa ngọ-kọn atomi ịna ngọ sọ kẹ ḅụụ-boma ḅịa.

²⁴ Gbọrụḅọ nwẹnị ḅụụ-boma ḅarị ḅẹḅẹ, yee mḅọ ḅụụ-boma mịnẹ mḅọ ì nimi tẹ à fie ye naarị, gbala ị̀ ḅẹlẹma kuno-kuno-a ẹrẹsị, tẹ à pịkị inoma ofori ye na kuraye na mịẹarị. Mịna aị ma mie ì ḅio ḅẹlẹmarị. Yẹrị, KỊNỊNYANAḄỌ ḅe ọkọ ḅẹẹm.”

²⁵ KỊNỊNYANAḄỌ ḅe ḍuko-pakamarị, “Ene ma ḅoarị, à meni-oju kịngẹ ḅụ tarị-ḅụụ siin wararị apụ ma fomu ḅẹ sakị mẹ, anie —

²⁶ Ijiputi na, Juda na, Idọmụ na, Amọnị na, Mohabụ na, pịkị inimgba tẹ ịkpa mẹ ḅio sụma-jụ angarị apụ ma na, tẹ ịna asịḅị-ḅẹ-inume ma kịrị-kịrị kpụlụmarị apụ ma. Kẹ gotẹ ọkọ ḍukoarị, mịna asịẹ mamgba karakara-ḅara-ḅụ tarị-ḅụụ sin-a apụ famam, Izirẹlị bebe warị mẹ sọ tarị-ḅụụ sin-a apụ ḅioḅẹngbọ ḅụ.”