Jerimaya 8 - FỊAFỊA BAỊBỤLỤ

¹ “Anị sakị mẹ ḅụ Juda ḅẹ amadapụ ma na opu fịrịmẹnjịapụ ma na, pịkị agbamịẹapụ ma na, ịkịankoroapụ ma na, Jeruselemu ḅụ anga sime osi apụ ma na ḍụẹịn mgbe ma na ịn soku pakama-ḅo ḅa ịna aḍuḅu ḅio ḅụ.

² Ini arị kobiri tẹ ḍiḅi ḅẹ nakara ịna mgbe ma vooma kiri ḅio sara sime ḅa, kẹ ḍụọ ḍiḅi ḅẹ ḅụrụtẹ fun sara ḅara. Ini arị gala-galama sara ịrụa na akalụ na lolia ma na pịrị ḅa, anie mịna atomi ma ḅẹlẹma tẹ fịrịmẹnjị pịrị sime aị ma, anie ini arị aḅịḅị ḅii tẹ sunsin pịrị aị ma.

³ Tẹ mị si sịẹ mẹ ḅẹ apụ tẹ fịị-a so apụ ma, tẹ à gala-galama mu ayọ ḅụ angarị apụ ma, fịị ḅẹlẹma ịn paa ḍumo simearị ye nẹngị ḅa. Yẹrị Kụrọmamgba nyana KỊNỊNYANAḄỌ ḅe ọkọ ḅẹẹm.”

Si Na Fomu-ḅara Na

⁴ KỊNỊNYANAḄỌ ḅe ḍuko ị̀ pịrịm àrị ori atomi ma ḅẹẹ, “Tomḅọ ḅịkị kụma mḅọ saakị-saakị-a? Tomḅọ etela-iri kụma mḅọ pịkị-pịkị-a?

⁵ Ọkọ kụma tiye ẹrẹsị, ì atomi, ọmịnị ị̀ ḅụ pịkị-so tẹ ḅarị pịkị-ḅo-a? Ọmịnị ọmịna oru-afụḅara ma fịnama sịẹma tẹ ḍụkụ tẹ pịkị ị̀ ḍọkụma-ḅoa.

⁶ À kẹ ye-sịn ḅara kẹ pokim, kụma ọ́ karakara mẹ ḍuko-a. Ọmịna ḅụ gbọrụḅọ-sọ amịna si-sịḅịḅio-sụa mịẹ mẹ gotẹ kururu-a; ọmịna ḅụ gbọrụḅọ-sọ amụ gbela-a, ‘À tiye mịẹ-irima?’ Ḅẹḅọ-ḅẹḅọ amịna etela mẹnjị tọrọkọ-tọrọkọ muarị, fọnya mangị ọmụ ḅio sọarị asụ ọkụ.

⁷ Nturu afeni sọ pịkịma so-so sakị nimi wararị; olosịkịya amẹẹ, opulo-ngịangịa amẹẹ na minji owolo mịẹ-a anga mẹnjị-mẹnjị opu afeni ma sọ so tomikiri mẹ ḅẹ jen pakịrị mu-mu sakị nimi wararị. Kụma, ị̀ atomi, à kẹ ó ḍikiḍikiarị oloko ma ó nimi-a.

⁸ Ndẹẹ ọmịnị inetẹ ḅẹẹ-ḅẹẹ ḅara, mịnẹ ó ye nimi wararị, tẹ ì oloko ma nimi wararị? Ḍikii, oloko ma mingirima ḍumo kọn-arị ama-ḍiri-kẹẹapụ arị ḍima tẹẹ.

⁹ Ini ọmịna ye-nimi atomi ma kẹ ḅụụ-jịrị ḅio suutẹ, in pikiri-pikiri tẹ ḍiein ḅio koro tẹ. Ini ị̀ ẹkwẹn ma sịkị tẹẹ; mịọkụ ịn nyana nimi mẹ ḅọrọ tọ nimi?

¹⁰ Mie ḅụ àrị ịna aḍụọ ma kẹ ịwọ apụ pịrị nyana ḅa, tẹ ịna sime-ereme kẹ ja owiapụ pịrị ḅa. Ḅẹḅọ-ḅẹḅọ, opu na kala na, mingirima ḅọkọ ḅụ ḅọrọ tẹ igbigi mịẹ ḅẹ ḍọkịarị. Ịkịankoroapụ na agbamịẹapụ na kịngẹ sọ tomi ma inomarị.

¹¹ Ịn mịẹarị ḅara gbala ị̀ atomi ma la aị ma papaa oju kiri ḅụ ọgọnọ-ọgọnọ gọrọrọ ye ọkụ. Ịn ḅẹẹarị, ‘Ye mamgba iḅi wararị’, ye mamgba iḅi-a sakị ḅụụ.

¹² Ị̀ atomi, ọ́ ḅụụ-jịrịm aro, ọ́ mịna kịnị-ḅụụ-siarị aị ma mịẹ ye ẹrẹsị? Ẹn-ẹn, gbala-gbala ọ́ ḅụụ-jịrị-a, tọrụ-fụrụma kịngẹ sọ ọ́ mịẹ-a! Tẹ anie ḅụ ọmịnị osi apụ ma ḅịkị ḅara ḅịkị ḅa; à fomu-ḅara kẹ ọ́ pịrị sakị anie ọmịna kunoma sọ ḅa. Yẹrị, KỊNỊNYANAḄỌ ḅe ọkọ ḅẹẹm.

¹³ “À ḅiim à tomḅọ fịaị soku sakị ò soku aị kobiri ḅara kẹ ì atomi kobiri, kụma mgbọlụ sụa-a kụrọ-sịn mie ịn kịkarị, gbala ịla sịn tẹ ịla mgbọlụ sụa ye ọkụ. Ọkọ ẹrẹsị à minini anị gboloma-a apụ pịrịtẹ ini amakiri mẹ ọkị ịna nye sọmaa.”

¹⁴ Tamụnọ atomi ma gbelarị, “Tiye ẹrẹsị wa paa mị yọ lẹgị-sime wararị? Ó ḅoo, wa mangị kụrọnị opu ama ma mu tẹ arị anga ḅụ fịị. KỊNỊNYANAḄỌ, wamịna Tamụnọ ḅe, fịị ḅẹrẹ-pẹlẹ wamịna ọgọnọ gbana tẹẹ; ọ̀ kịnị-ḅaaḅa ye kẹ wa pịrị ḅuu tẹẹ, wa si kẹ ọ̀ mịẹ tẹ ẹrẹsị.

¹⁵ Wa dein nyana ḅẹ ḅiokpọ nyanam, pịkị gwọ sakị na, kụma anị gbọrụ iḅi sọ nyana-a; anie nakara tẹmẹ-naịn-naịnmaye.

¹⁶ Si kẹ wa tọn apụ ma mu Danị opu ama sọ tẹẹ; wa ịna asụ ma ọngọrịarị ye naarị. Bebe amakiri mẹ oju-sẹkịarị ini ịna asụ ma olokuarị ye naarị sakị. Si kẹ wa tọn apụ ma wamịna amakiri mẹ na anị ḅio simearị ye goyegoye na, wamịna opu ama mẹ na anị ḅẹ atomi mamgba na guluguluma ḅẹ ḅo tẹ.”

¹⁷ KỊNỊNYANAḄỌ ḅe mẹẹ, “Ọmịnị ẹbị-o! À si oronwi amẹẹ kẹ ọmịna ogboku fịrịmarị, oronwi-ḅịrịḅọ inetẹ ḅẹrẹtọn pịrị ḅịa aị, tẹ ini ọ́ gbọn ḅa.”

Jerimaya Nyana Ori Atomi Pịrị Kururu

¹⁸ Ì kururuu, inetẹ gwọ ḅịa; Ḅioḅẹngbọ ḅụ àrị obiarị.

¹⁹ Pokii! Bebe amakiri mẹ ikelema-koro à naarị ì atomi owu pakamarị, KỊNỊNYANAḄỌ ḅe ọ̀ ḅarị jen kẹ Zayọnị ḅụ ofori? Zayọnị amadaḅọ ḅe ọ̀ ḅarị jen kẹ anị anga ofori? KỊNỊNYANAḄỌ, ịna amadaḅọ ḅe, pakịrịarị, “Ó tiegotẹ ị̀ ịganịma, anie sunsin ọmịna oru-afụḅara ma pịrị, pịkị iḅo ọmịna ofori-ofori ja asịẹ ḅẹ atamụnọ ma pịrị ḅụ?”

²⁰ Tomi ma nwẹnị owu pakama, “Ịrụa kụra mẹ so tẹ, fịye-soku sakị mẹ ḅọrọtẹ, kụma amụ wa paa ḅọrọma-a.”

²¹ Ì ḅioḅẹngbọ kan kọsị tẹẹ, ini ị̀ atomi kọsịma tẹẹ ẹrẹsị; à kururuarị, ì ḅioḅẹngbọ ḅịkị fama tẹẹ.

²² Giliyadi ḅụ kịnị gwọ-gwọ gbọrụ ḍiri sọ ḅarị ofori? Anị anga ḅịrịapụ ḅarị ofori? Ọkọ kụma, tiye ẹrẹsị ị̀ atomi amụ paa gwọ-a?