Jerimaya 7 - FỊAFỊA BAỊBỤLỤ

Jerimaya Tamụnọ warị Mẹ Ḅio Tamụnọ-Ẹkwẹn Kọn-arị

¹ Mie KỊNỊNYANAḄỌ ḅe ḅara ḅo Jerimaya pịrị ẹkwẹn mẹ,

² Mie KỊNỊNYANAḄỌ warị mẹ ḅẹ ogigo-ḅọkọ sịẹ tẹ mịẹ oku mẹ ḍuko-wasamaa. Ọmịnị Juda ḅẹ apụ mamgba tẹ mịna ogigo-aḅọkọ ma ḅụ ḅọrọ ḅo sunsin KỊNỊNYANAḄỌ ḅe pịrị apụ, ọ́ KỊNỊNYANAḄỌ ḅẹ ẹkwẹn mẹ naa.

³ Mie Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe, ḍukoarị ye. Ọmịnị ọmịna etela ma na mịẹ-aị ma na ḍima, anịsakị à ḍụkụ tẹ ọ́ mịẹ anga anga ḅa.

⁴ Ọmịnị mịna oḅori-kẹ-kịnịsịn ẹkwẹn ma minini mẹ dasịẹmaa, anie: “Wa la-la ye ofori! Mie KỊNỊNYANAḄỌ ḅe warị mẹ, mie KỊNỊNYANAḄỌ ḅe warị mẹ, mie KỊNỊNYANAḄỌ ḅe warị mẹ!”

⁵ Ọmịnị ó ḍumo kọn-arị ḅara ḍimaa, pịkị ọ́ mịẹarị aị ma dasịẹmaa. Ọmịnị inoma ofori ḅara kẹ Jụmọ-jụmọ na mị.

⁶ Ọ́ jen asịẹ ḅẹ apụ na, ḍapụ-na-iyingiapụ-na-fịtẹ-awọmẹ na, diapụ-fịtẹ-ereme na inoma dasịẹmaa. Ọ́ mịẹye-ofori apụ ḅaa dasịẹmaa, mị amakiri mẹ ḅụ. Ó sunsin oru-atamụnọ pịrị dasịẹmaa, kẹ gotẹ ọkọ ḍukoarị, anị ọ́ ḅaa guluguluma ḅa.

⁷ Ó ḍimam ḅẹḅẹ, à ḍụkụ tẹ ọ́ mị amakiri mẹ anga tọrọkọ-tọrọkọ mu ḅa, anie à kẹ ọmịna elemu aḍapụ ma pịrị ye mẹ, mịnẹ anị ịna nye sọ gbamasoo.

⁸ Ḍikii, ọmịnị oḅori-kẹ-kịnịsịn ẹkwẹn ma kẹ ḅiokpọmarị.

⁹ Ó furuarị, kịnị ḅaarị, sẹfịarị, ye karị tẹ iruo aị ḍukoarị, agbamịẹ Balị pịrịarị, tẹ sunsin ó nimi sọ nimi wẹrị-a atamụnọ pịrịarị.

¹⁰ Ọ́ mịna à ḍiki-ḅioḅuarị aị ma mịẹarị, tẹ ḅo ị̀ tọrọkọ sịẹ tẹ ị̀ ḅara-kuḅu ḅẹ Warị mẹ ḅio ḅẹẹarị: “Wa la-la ye ofori!”

¹¹ Ọ́ sịn-arị ị̀ Warị mẹ ḅo warị kan-kan tẹ furuarị apụ ḅọị yọ sọ tẹ? Ọ́ mịẹarị ye àrị ẹrị tẹẹ.

¹² Silo muu, à tarị sẹlẹ ọkịm in sunsin ị̀ pịrị ḅẹm nwẹn ḅẹẹ anga mẹ, tẹ à kẹ anị mịẹ ye ẹrị, ị̀ atomi Izirẹlị asi gotẹ.

¹³ Ọ́ mịna asi mamgba mịẹ tẹ, karakaraye arị ẹkwẹn ọ́ pịrị, pịkị siin ẹkwẹn ọ́ pịrịm sọ, ọ́ ḍụkụ tẹ poki-a. Àrị ọ́ sịn sakị ọ́ pakịrị-a.

¹⁴ Anie ḅụ, à kẹ Silo mịẹ ye mẹ à kẹ mie ị̀ Warị mẹ mịẹ ḅa, ọ́ kẹ ḅiokpọmarị ye mẹ. Mị yọ mẹ tẹ à kẹ ọmịna elemu aḍapụ na ọmịnị na pịrị ye mẹ, àrị à kẹ Silo mịẹ gbọrụ ye mẹ kẹ anị mịẹ ḅa.

¹⁵ Àrị ó dee-siin ḅa, ị̀ tọrọkọ, arị ọmịna amịnapụ Izirẹlịapụ dee-siin ḅara. Yẹrị KỊNỊNYANAḄỌ ḅe ọkọ ḅẹẹm.

Tomi Ma Ḅịḅịpoki-a

¹⁶ KỊNỊNYANAḄỌ ḅe ḅẹẹm, “Jerimaya, tẹkẹ mịna atomi ma pịrị ma. In gotẹ owu ma pịkị tẹkẹ ma; ịna iḅi gotẹ ị́ na ẹkwẹnma, kẹ gotẹ ọkọ ḍukoarị, àrị í poki ḅịa.

¹⁷ Juda ḅẹ opu ama ma ḅio na Jeruselemu etela ogbo ma ḅio na ịn mịẹarị aị ị́ ẹrị-a?

¹⁸ Awọmẹ ma sanga kolokoloarị, owiapụ ma fịnị tọnọarị, tẹ ereme ma fịlawa kpoo-kpoo tẹ kẹ kiki mịẹ-mịẹ ịn kẹ So-ḅẹ-Amada-Ẹrẹḅọ nwẹn sịn ẹrẹ oru ma pịrịarị. Ịn pịkị iru sara oru-atamụnọ pịrịarị, kẹ ị̀ ḅụụ-sịnịsịnịma ḅẹ ḅara.

¹⁹ Kụma karakaramatẹ yẹrị mie in ye kẹ mịẹarị aro? Ẹn-ẹn, ịna ḅụụ mie ịn kẹ mịẹarị, tẹ ḅụụ-jịrị dogi-ḅo ḅụụ pịrịarị.

²⁰ Tẹ mie ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ì owi ịganị ọsụma mị Tamụnọ-warị mẹ ọgọnọ sara ḅa. Àrị anị kẹ tomi na nama amẹẹ na ọgọnọ sọ sara ḅa, kịrị ofori ḅara ḅụ, pịkị sịn ma na ḍụọ ḅio soku la tẹ ḍiḅi-aị ma kịngẹ ọgọnọ sọ. Ị̀ ịganị gbọrụḅọ sọ inetẹ biinma ḅịa orumo kịka ḅa.”

²¹ Ì atomi, ọmịna agba ma ḅẹ jaị ọ́ dọkịma famarị agbamịẹ-anga ọgọnọ ḅụ, tẹ ọ́ mịẹ-mịẹ ḅara ḅụ, jaị ḅụ ọmịnị anga fịarị. Kụma yẹrị KỊNỊNYANAḄỌ ḅe mẹẹ mịnẹ mimgbe ọ́ gbọrsịḅị arịmgba fị fama ḅarị ya.

²² Àrị Ijiputi ḅụ ọmịna elemu aḍapụ ma pakama-ḅo sakị à dọkịma-agba gboloma aị tọn koroma ịn pịrị-a, anịanịa osi kịrị-kịrị agba ma.

²³ Kụma à tọn ịn pịrịm ini ị̀ ḅịḅị pokii, anie ḅụ àrị ịna Tamụnọ sọ tẹ ini ì atomi sọ ḅẹm. Tẹ à ḍuko ịn pịrịm ini à tọn ịn pịrị ḅara ḍiki ḍumo kọn, mịẹ tẹ ye ini na iḅi ḅarị ḅara.

²⁴ Kụma in poki tẹ mịẹ-a, anịanịa anị kẹ ye sịn. Anie nakara ịna kụrọtẹ si ḅioḅẹngbọ ḍuko ịn pịrịm mịẹ ḅẹẹye-ḅẹẹye mie ịn mịẹ ye, tẹ nwẹnị ḅo sii elemu in si ḅara nẹngị tẹẹ.

²⁵ Àrị Ijiputi ḅụ ọmịna elemu aḍapụ ma pakama-ḅo ene ọkị-ḅo mịẹ gbọrụ ene mẹ la, àrị ị̀ fịrịmẹnjịapụ ịkịankoroapụ ma kẹ ọ́ fịrịma-fịrịma-fịrịmarị.

²⁶ Anịsọ gbọrụḅọ-sọ poki tẹ kẹ ye-sịn-a. Anie nakara ó ḅioḅẹngbọ kụrọma tẹ kọngọ-kụrọma ọmịna elemu aḍapụ ma nẹngị tẹẹ.

²⁷ Anie ḅụ, Jerimaya, ị́ mịna ẹkwẹn mamgba ḍuko ị̀ atomi ma pịrị ḅa, kụma ini í poki ḅịa; ị́ ịn sịn ḅa, kụma ịn pakịrị ḅịa.

²⁸ Í ḍuko ịn pịrị ḅa mịnẹ ịna sịẹ mẹ yẹrị ịn Nyana Tamụnọ ḅe ḅịḅịpoki-poki-a, anịanịa ịn daa tẹ fomu-ḅara ḅụ ye-ḍawọ. Ḅioḅẹngbọ kẹ ḅụụ ḅụ gbana na-iḅi ḅara sime mẹ fịtẹ. Kịnị ḅarị jen kẹ anị gboloma ye ḍuko-a.

Hinọnị Tụndụ-suku Ḅụ Mịẹarị Si Amịẹaị

²⁹ “Jeruselemu ḅẹ apụ, ó kururuu; ọmịnị ọmịna sịḅị-ḅẹ-inume kịrị-siin tẹ kẹ gbin ngumaa; Ó tụndụ ma ọgọnọ-jụ sime tẹ ḍụẹịn owu nume-suu, kẹ gotẹ ọkọ ḍukoarị, yẹrị KỊNỊNYANAḄỌ ḅe, ịganịarị, tẹ ị̀ atomi sịkị tẹ.

³⁰ “Juda ḅẹ apụ siye mịẹ tẹẹ. Ini ịna oru-afụḅara ma kẹ ị̀ warị ḅio koroma tẹ anị pilema tẹẹ.

³¹ Hinọnị Tụndụ suku-ḅio ini ịn kẹ Tofẹti sịn-arị agbamịẹ-anga nama tẹẹ, tẹ ịna owiapụ-awọmẹ na eremịna-awọmẹ na kẹ fịnị ḅio agbamịẹ ḅẹ ḅara. Yẹrị tọn ịn pịrị-a ịn miemẹ mịẹẹ — ì kuroma kịngẹ ḅụ sọ anị sọ-a.

³² Tẹ mie ḅụ, sakị mẹ ḅo ḅa, ịn ḅarị jen kẹ Hinọnị Tụndụ-suku kẹ anị sịn ḅịa, kụma Kịnị-ḅa Tụndụ-suku. Ini anịanga kẹ kịnị ḍiḅi ḅa, kịnị ḍiḅi ḅẹ jen anga paka ḅịa ẹrẹsị.

³³ Ḍụẹịn ma fịye sọ feni ma na piri-ḅio-ḅẹ anama ma na pịrị ḅa, tẹ feni ma na nama ma na ḅalafama tẹ ịn so ḅẹ ḅọ paka ḅịa.

³⁴ Amakiri mẹ ḅo ịkpa sọ ḅa. Juda ḅẹ opu ama ma ḅio na Jeruselemu etela ma ḅụ na à mịẹ tẹ ḍereku na ḅioḅẹlẹ na apọkọ daasịẹ ḅa, pịkị ere-ịya-alalị ma ḅẹ ḅioḅẹlẹ apọkọ sọ.