Jerimaya 6 - FỊAFỊA BAỊBỤLỤ

Kịnị Na Fịya-a Apụ Jeruselemu Ikelema-koro Tẹẹ

¹ Benijamịnị ḅẹ apụ, ọ́ mangị ye ọ́ la ḅịa yọ muu! Ó Jeruselemu ḅụ mangị-soo! Ó Tẹkowa ḅụ ọdụ ofuroo, tẹ Bẹtị-hakeremu ḅụ fịnị tọnọọ anị kọrị gele tẹ elekima sọ. Opu ḅụụ-fụka na guluguluma na ọgọnọ-jụ ḅụ sime tẹ ḅo ḅẹ-yearị.

² Kpọma-ḅẹlẹmarị Jeruselemu mẹ anị iḅi wararị, kụma ini anị kan guluguluma ḅa;

³ amadapụ anịanga sime tẹ ịna ọmụ-ogbo-ogbo ma kẹ ọmụ gbin koru ḅa. Ini ịna akpụrụ-awarị nama opu ama mẹ ikelema-koro ḅa, ọrụḅọ-ọrụḅọ mḅọ ḅụụ-ḅẹlẹ anga nama ḅa.

⁴ Ịn ḅẹẹ ḅa, “Ọ́ tẹlẹma tẹ owu kẹ Jeruselemu pakaa! Ọ́ ḅụụ karakaramaa! Eneḅaka-ogbo ḅụ wa owu mẹ saakị ḅa!” Kụma ịn ḅẹẹ ḅa, “Sakị mẹ ḅụra ḅaka tẹẹ, mịmgba-ḅe-ene faa ḅẹ tẹẹ, tẹ ḅoḅiri-so mẹ pịkị kpiti tọrọkọ muarị.

⁵ Wa ḍin kẹ ama mẹ koro ḅa; wa opu ama ḅẹ kụrọnị-ayọ ma kan guluguluma ḅa.”

⁶ Kụrọmamgba nyana KỊNỊNYANAḄỌ ḅe tọn tẹẹ, mịnẹ mịna amadapụ ma sịn pẹlẹ-pẹlẹ-gbin tẹ kiri kpolima-kpolima Jeruselemu ikelema ḅa, kẹ ama mẹ ọkị ḅẹ ḅara. Ò ḍuko tẹẹ, “À fomu-ḅara kẹ mị opu ama mẹ pịrị ḅa, kịnị ponoma anị ḅio ḅin wararị ẹrẹsị.

⁷ Suḅe anị ḅio ḅẹ minji ịwọma ḅara mie Jeruselemu anị ḅẹ si mịẹ ịwọmarị ḅara. Kụrọ-kụrọ mịẹ na guluguluma na mie à naarị opu ama mẹ ḅio. Obi na ye-kịnị-la ịnọ na sikima à jen ẹrị-a.

⁸ Jeruselemu ḅẹ apụ, yee mịna ḅụụ-fụka ma ḅeri nụnụ ye sọ ọ́ pịrị, ọkọ-a kụma arị ọ́ kẹ gbin koroma tẹ so ḅa; arị ọmịna opu ama mẹ pịkịma-ḅo ịkpa sọma ḅa, gbọrụḅọ-sọ anga-a yọ.”

Kọngọ-kụrọmarị Izirẹlị

⁹ Kụrọmamgba nyana KỊNỊNYANAḄỌ ḅe mẹẹ, “Ini Izirẹlị paụma yarịrịma ḅa, tẹ anị mgbọlụ mamgba kaịn-siin famatẹ girepu-ḍụọ kịka ḅa. Mie ḅụ í inetẹ pụkọ-pakamaḅo ḅẹ goḅọ-goḅọ, pụkọ-pakamaḅoo sakị paa emi ogbo.”

¹⁰ À pakịrịm, “Àrị ẹkwẹn ịn pịrị tẹ ịna ḅeri nụnụm ḅẹ kụma tụḅọ ì poki ḅẹ? Inimgba kọngọ-kụrọma tẹ ḍụkụ tẹ í oku mẹ poki-a; ini ị́ ḅẹẹm à ḍukoo nwẹn ḅẹẹ ye mẹ ḍẹrịarị.

¹¹ KỊNỊNYANAḄỌ, ị́ ịganị tẹ sime ịn pịrị ye mẹ, ị̀ ḅụụ ḅio sọ fịnị kọrị ḅara kọrịarị, tẹ à ḅarị inetẹ jen kẹ anị ọlọ-sịẹma-a.” Anịtẹso KỊNỊNYANAḄỌ ḅe ị̀ ḅẹẹm, “Ị̀ ịganị mẹ ọsụma etela ogbo ma ḅụ simearị awọmẹ ma ọgọnọ sara-a, pịkị asawọ ma tẹ kobiri wararị apụ ma ọgọnọ sọ. In diapụ na sime-ereme na ọkị-so ḅa, tẹ omongi lamatẹ apụ kịngẹ sọ ịn wẹrịso ḅịa.

¹² Ịna awarị ịn kẹ ja apụ pịrị ḅa, anie ịn pịkị kẹ ịna ḍụọ kọrị akiri na ịna sime-ereme na kẹ mịẹ ḅarị ḅara. À fomu-ḅara kẹ mị amakiri ḅẹ apụ ma pịrị ḅa.

¹³ Ḅẹḅọ-ḅẹḅọ, opu na kala na kura-a ḅọkọ kẹ ngọ kọn ḅẹ ḍọkịarị; ịkịankoroapụ na agbamịẹapụ ma sọ tomi ma inomarị.

¹⁴ Ịn mịẹarị ḅara gbala ì atomi ma la aị ma papaa ọgọnọ-ọgọnọ ye oju-kiri gọrọrọ ye ọkụ. Ini mẹẹ, ‘Ye-mẹmgba iḅi wararị’, ye-mẹmgba iḅi-a ogbo ḅụ.

¹⁵ Ịn nwẹn kẹ ḅụụ ḅụ si ḅụra tẹ aị ma mị ye mẹ ịna ḅụụ-jịrị-a aro? Ẹn-ẹn, gbala-gbala ịna ḅụụ-jịrị-a; ịna aḅụụ kịngẹ sọ ḅa. Tẹ mie ḅụ ini sọ osi-apụ ḅịkị tẹ ḅara ḅịkị ḅa; à fomu-ḅara kẹ ịn pịrị sakị, anie ịna kunoma sọ ḅa. Yẹrị, KỊNỊNYANAḄỌ ḅe ọkọ ḅẹẹm.”

Izirẹlị Tamụnọ Etela Sịkịarị

¹⁶ KỊNỊNYANAḄỌ ḅe ori atomi ḅẹẹm, “Ọmịnị etela ma jen-jen saḅa-ḅọrọ wararị anga mẹ ḅụ sịẹsime tẹ ḍiki. Ọmịnị elemu sakị ḅẹ mẹnjị ḅọrọ ayọ ma gbela nimii, pịkị iḅi tẹịn etela mẹ simearị anga na. Ọmịnị anị ḅụ mẹnjị, anịsakị ó dein ḅụ anga ḅa.” Kụma ini mẹ, “Ẹn-ẹn, wa mịẹ ḅịa!”

¹⁷ Anịtẹso KỊNỊNYANAḄỌ ḅe ama-koru owiapụ tọnm ịn ḅeri nụnụ ọdụ mẹ poki. Kụma ini mẹ, “Wa poki ḅịa.”

¹⁸ Mie ḅụ KỊNỊNYANAḄỌ ḅe ḅẹẹm, “Ọmịnị sịẹ-sịẹ ma, ó pokii, tẹ ì atomi ḅụ paka ḅẹ-yearị ye mẹ ḅụ ye ḍawọọ.

¹⁹ Kiri, pokii! Ịn ḅọị ḅara kẹ tọn tẹ mịẹ ḅẹ aị ma gotẹ à fomu-ḅara ọkị-ḅo mịna atomi ma pịrịarị, ini ì tolumaye sịkị tẹ ị̀ ẹkwẹn ma poki tẹ arịḅẹ ḅara mịẹ à ẹrẹsị.

²⁰ Sẹba ḅụ ini ọkị-ḅo ị̀ pịrịarị kụnụaị dọkịma aị ma à kẹ tiye mịẹ ḅẹ, anịanịa sụma-jụ ḅẹ amakiri ḅụ ḅo kụnụaị ma? Ịn kẹ ḅoarị ḍiepịrị-aị ma à da ḅịa, anịanịa ịna agba ma ị̀ ḅụụ-ḅẹlẹ aị sọ.

²¹ Tẹ anie ḅụ à mịna atomi ma mịẹ tẹ ịn pụmbụ tẹ ḅịkị ḅa. Ḍapụ-na-iyingiapụ-na awọmẹ na fịị ḅa, tẹ anị gbọrụ ḅara mẹ anie anị paka ikiapụ na kpeki tẹ angarị apụ na pịrị ḅarị ḅara.”

Ọgọnọ-jụ Ḅo apụ Ma Ọmụ Kẹ Ama koro

²² KỊNỊNYANAḄỌ ḅe mẹẹ, “Ọgọnọ-jụ gbọrụ sịẹ ḅụ kịnị ḅoarị; opu kụrọ nyanatẹ gbọrụ sịẹ sụma-jụ tẹlẹma ọmụ pịrịarị.

²³ Ini ịna iboli ma na okologie ma na saakị tẹẹ; ini anie guda-guda apụ, ini ọkụrụkụrụ nyana-a. Ịna asụ aḅụọ fiearị ḅara ḍụrụkụarị abajị ọkụ, ini asụ ma kpọlị tẹ ḅọrọarị sakị. Ịn tẹlẹma wararị ọmụ kẹ kpọma-ḅẹlẹmarị Jeruselemu paka.”

²⁴ Jeruselemu ḅẹ apụ ḅẹẹarị, “Wa paka ye mẹ naa tẹẹ, tẹ wamịna aḅara wamịna akaka kpịlasaịma koro-sime tẹẹ; opu tẹmẹ-akụ wamịna ḅụ sọ tẹẹ, iyi laa tẹ ẹrẹḅọ ọkụ.

²⁵ Paka piri ọgọnọ mu kịngẹ sọ wa ḅarị ḅiokpọmatẹ paka mu-a, kịnị-na-fịya-a apụ ma owuna-aị ọlọ tẹ wa ikelema-koro wararị ye mẹ ḅẹ tẹmẹ-naịn-naịn gotẹ.”

²⁶ KỊNỊNYANAḄỌ ḅe ori atomi ḅẹẹarị, “Ọmịnị akpa ḅiri tẹ fọọn ḅio kpeleki. Ọ́ tẹmẹ-akụarị owu-minji ḅụ kururu, gbala tomḅọ amịna kpọkpọ gbọrụ owiḅọtụḅọ owuarị pembe ḅara, bẹkẹ-ḅara-kẹ owu kẹ ọ́ paka tẹ ọ́ ḅaa guluguluma ḅẹ apụ ma gotẹ.

²⁷ Jerimaya, ị̀ atomi ma tọn-ḍikii, í kiri ḅio soku-pakamaḅo ye tọn-ḍiki ḅẹ ḅara tẹ ịn kịkarị ye ḍọkị-pakama-ḅo.

²⁸ Inimgba kọngọ-kụrọma tẹ ḅiotọn ye kịngẹ mịẹarị apụ, ojo na ikulele na kụrọ ḅara kụrọ. Inimgba ḅụrụ-kọsị wararị, mẹnjị ma ḅọrọ tẹ ịba-fị ama ikelema.

²⁹ Ye tẹlẹma opu fịnị mẹ iḅiọkụ kọrịarị, kụma ye-ḅụ-sọ-a aị ma sanị-a tẹ papaa dọkị soarị. Anị ye ḅụ sọ-a ye, ì atomi mịẹ-fịafịama mịẹ ye mẹ mịẹ tọrọkọ-tọrọkọ mu, si-mịẹapụ ma amụ ini ịn saakị sin-a ẹrẹsị.

³⁰ Ịn kẹ ịn sịn ḅarịye: Ye-ḅụ-sọ-a Papaa Ye. Yẹrị, KỊNỊNYANAḄỌ ḅe, ịn sịkị tẹ ẹrẹsị.”