Jerimaya 51 - FỊAFỊA BAỊBỤLỤ

Jen Ḅẹrẹ-pẹlẹ-ḅịḅị Babịlonịya Ọgọnọ Ḅụ

¹ KỊNỊNYANAḄỌ ḅe mẹẹ, “À ye guluguluma fẹrụ ọkị-ḅo arị, kẹ Babịlonịya na anị ḅẹ apụ na ọgọnọ sara.

² À jen sịẹ ḅẹ apụ kẹ fịrịma tẹ in ḅo Babịlonịya guluguluma ḅa, fẹrụ fie ḅo asịra dogi-so ḅara. Gulugulu ene mẹ ḅụ, pakịrị-pakịrị ḅụ mie ini owu mẹ paka ḅarịye tẹ amakiri mẹ gberere tẹ koro-sime ḅa.

³ Sakị kẹ ịna ọmụapụ ma pịrị tẹ ini ịna iboli ma tẹịn anịanịa owuna-aị ḅiri asawọ amẹẹ ma wẹrịso ma! Bebe ọmụ-ogbo mẹ ḅaa siin!

⁴ Ye ịn la tẹ ini ịna opu ama ma ḅẹ etela-ogbo ma ḅụ fịị ḅa.

⁵ Yẹrị, KỊNỊNYANA-TAMỤNỌ, Kụrọmamgba Nyanaḅọ ḅe, amụ àrị Izirẹlị na Juda na kẹ gbin-koroma so-a, karakaraye in si kẹ yẹrị Izirẹlị tẹkẹarị Fịafịa Ḅọ ḅe mịẹ tẹẹ sọ.

⁶ Babịlonịya ḅụ mangị-soo! Ọmịnị ọmịna aḍumo mangị kọn! Ọ́ Babịlonịya si gotẹ fịị ma. Mịọkụ arị ị̀ gbẹẹfị ḅiiarị, tẹ arị anị gbẹẹ ḅara kẹ anị fomuarị.

⁷ Babịlonịya ị̀ ḅara-ḅio golu kọpụ kịkam, mịẹ tẹ bebe tomikiri mẹ anị ḅio ḅuuarị. Sịẹ-sịẹ ma anị ḅẹ iru mẹ ḅuum, tẹ ịn nwẹnị nọmụ.

⁸ Babịlonịya ḅiotọn-a ḅara kẹ ḅịkị tẹ gulugulu tẹẹ! Á ḍuu!. Obi-gwọ-ḍiri ọkị mu anị ḅẹ ịnọ ma mịẹẹ, tẹ ẹbịsịya anị inetẹ gwọ ḅẹ ḅoto.

⁹ Jen asịẹ ḅẹ apụ ḅẹẹm, ‘Wa ḅụụkụrọma tẹ ḅarasụa Babịlonịya pịrị ḅẹẹm, kụma sakị fa ḅaka tẹẹ. Ò yee wa á wẹrịso mịọkụ mẹ ḅụ, tẹ so ama mu. Tamụnọ ori opu kụrọ mẹmgba kẹ Babịlonịya fomu tẹ anị guluguluma fama tẹẹ.’ ”

¹⁰ KỊNỊNYANAḄỌ ḅe mẹẹ, “Ị̀ atomi ọmịnị olokuu, ‘KỊNỊNYANAḄỌ ḅe ḍie-pakama tẹ mịnẹ wa kura ḅụ emi. Ó yee wa mu ḍuko Jeruselemu ḅẹ apụ pịrị KỊNỊNYANAḄỌ wamịna Tamụnọ kọrị tẹ ye mẹ.’ ”

¹¹ KỊNỊNYANAḄỌ ḅe Midiya ḅẹ amadapụ ma jike-saakịma tẹẹ, ọ̀ tọn tẹ ọ̀ Babịlọnị guluguluma ḅẹ ẹrẹsị. Anị ḅara mie ọ̀ kẹ ini ọ̀ Tamụnọ-warị mẹ kan guluguluma ye mẹ ḅẹ gbẹẹfị ḅii ḅẹ ḅara. Owu mẹ pakarị ọmụ-alapụ ma tọn ọmụapụ ma pịrịarị, “Ọmịnị ọmịna aḍịẹịn ma farị oḅumaa! Ekpeke ma tẹlẹma wẹrịị.

¹² In kẹ owu kẹ Babịlọnị onu ma paka ḅẹ elekima kẹ ịn ḍiee. Ama-koru anga mẹ mịẹ kụrọmaa! Anga-anga ḅụ, ye-yọ mẹ ḍikiḍiki ḅẹ ọmụapụ koromaa. Pịkị owiapụ kẹ ḅọị ini ọmụapụ ẹbị!” KỊNỊNYANAḄỌ ḅe ḍukom ọ̀ kẹ Babịlonịya mịẹ ḅẹ ye mẹ ọ̀ mịẹ tẹ.

¹³ Anị sịẹ mẹ tọnwa atọrụ anị ikelema-koro wararị anị pịkị ye kọn wararị, kụma anị ḅẹ sakị ḅo laa tẹẹ, anị ḅẹ ḍumo ḍiki pẹlẹ tẹẹ.

¹⁴ KỊNỊNYANAḄỌ ḅe ò ḍumo kẹ ye karị tẹẹ mịnẹ ọ̀ tọnwa owiapụ ọkị-ḅo owu kẹ Babịlonịya paka ḅa, igurube ogbo-ogbo ọkụ, tẹ ịn nwẹnị owu-ḅara-iḅi oloku kọn ḅa.

Tamụnọ tokini Nume

¹⁵ KỊNỊNYANAḄỌ ḅe kiri mẹ mịẹm ọ̀ kụrọ ḅụ; ori tomikiri mẹ tẹmẹm ò nimi ḅụ, tẹ So mẹ mịẹfinjimam.

¹⁶ Ori tọn tẹ So-tọrụ ḅẹ minji mẹ ḍụrụkụm; kiri mẹ ḅẹ ịkọlị ma ḅụ mie ori oḅuto ọkị-ḅoarị. Eene koroarị sakị ọ̀ mịẹ tẹ so-ḅalapụarị tẹ ọ̀ fẹrụ koko anga ḅụ anị fịrịma pakamarị.

¹⁷ Tomi miemẹ ẹrị tẹ ọkịarị ini apantu pịkị sịḅịḅio nyana-a apụ; oru-afụḅara tẹmẹarị apụ ḅo ẹrị tẹ ini oḅori kẹ amịna aḅụụ sịn tẹẹ anie ịn mịẹarị atamụnọ ma iruo aị pịkị ḍumo nyana-a aị.

¹⁸ Arị yela-a tẹ kịnị pịkị arị ḍiki-simarị; KỊNỊNYANAḄỌ ḅe ini na mịẹ ḅẹ sakị in gulugulu ḅa.

¹⁹ Jekọbụ Tamụnọ ḅe ori ịn kịka-a; ori anie ye goyegoye mịẹ ḅọ ḅe, tẹ ori Izirẹlị sẹlẹ-ọkị tẹ ịn karakara mịẹ tẹ sime ọ́ pịrị apụ sọọ. Kụrọmamgba nyana KỊNỊNYANAḄỌ ḅe anie ori ẹrẹ.

KỊNỊNYANAḄỌ Ḅe Amana

²⁰ KỊNỊNYANAḄỌ ḅe mẹẹ, “Babịlonịya, anie ị̀ amana, ị̀ ọmụ gbin ye. Àrị ị́ kẹ sịẹ-sịẹ ma na amadapụ daarị ayọ ma na ḅakụ kọsịmarị,

²¹ kẹ asụ ma na arị dọkụ-mẹnjịarị apụ na gala-galama, kẹ kirimẹnjị-ọmụarụ ma na arị dọkụarịapụ na gala-galama,

²² kẹ owiapụ na ereme na ḅaa, kẹ omongiapụ na asawọ na ḅaa, kẹ owiapụ-awọmẹ na eremịna-awọmẹ na ḅaa,

²³ Kẹ pẹị ḅẹ nama ḅaa ḅara kẹ anana-ḍikiḍikiapụ na ịna anana ogbo-ogbo ma na ḅaa, kẹ ḍụọ ḍiḅi ḅẹ kiri soku tẹlẹmarị apụ na ịna asụ ma na kẹ pẹị ḅẹ nama ḅaa ḅara ḅaa, kẹ mịẹtẹ ḅẹrẹtọn-apụ na geletẹ opu fịrịmẹnjịapụ na sịḅị-tuu.”

Sime Babịlonịya Pịrị Fomu-ḅara

²⁴ KỊNỊNYANAḄỌ ḅe mẹẹ, “À kẹ Babịlonịya na anị ḅẹ apụ na gbẹẹ ḅẹ ḅara ọmịnị ẹrị ḅa ịn kẹ Jeruselemu mịẹ siye mẹmgba gotẹ.

²⁵ Babịlonịya, í tụndụ kịka tẹ bebe tomikiri mẹ gulugulumarị, kụma yẹrị, KỊNỊNYANAḄỌ ḅe, ị́ na fịya-a ḅọ sọ tẹẹ. À gịẹsịma í kuun-sịẹma tẹ ị́ ḅaa lẹsẹrẹma ḅa, tẹ ị́ wẹrịso tẹ ị́ fọọn sọ tẹ koro-sime ḅa.

²⁶ Ịn nwẹn kẹ í sukuruma-gbin tẹ ye mẹ, ị́ ḅụ paka-ḅo ḍụḅarị tẹ ịn kẹ warị nama ḅụ suu ḅẹ gberie-sọ ofori. Ị́ ịkpa sọ gbamaso ḅa. Yẹrị, KỊNỊNYANAḄỌ ḅe ọkọ ḅẹẹm.

²⁷ “Kẹ ọmụ mẹ saakị ḅẹ elekima mẹ pịrịị! Ọdụ ofuroo, mịẹ tẹ sịẹ-sịẹ ma inetẹ naa ḅẹ ḅara. Sịẹ-sịẹ ma tẹlẹma ọmụ kẹ Babịlonịya paka pịrịị! Ḍuko amadapụ daarị ayọ ma pịrị — Araratị, Mini, na Asịkẹnazị na pịrị mịnẹ ini ọmụ saakịị. Ọmụ-alaḅọ tọn ori ọmụ mẹ sịḅịda tẹ saakịị. Asụ ma ọkị-ḅoo, igurube ḅaka ḅara ḅaka wararị aị ma.

²⁸ Sịẹ-sịẹ ma tẹlẹma ini ọmụ kẹ Babịlonịya gbin. Midiya ḅẹ amadapụ ma fịrịma-ḅoo, ịna sịḅịdapụ na fịrịmẹnjị opu ama na, pịkị ịna suku ḅio simearị asịẹ mamgba ḅẹ ọmụ-ogbo-ogbo ma na.

²⁹ Kiri mẹ sẹkị-sẹkị tẹ jikearị, KỊNỊNYANAḄỌ ḅe tọnm ọ̀ kẹ Babịlonịya mịẹ tẹ anị ịkpa sọ ḅa ḅẹ ye mẹ mịẹarị ẹrẹsị, gbọrụḅọ-sọ anga-a yọ.

³⁰ Babịlonịya ḅẹ ọmụapụ ma owu-sọ dasịẹma tẹ ịna kụrọnị-ayọ ḅụ papaa simearị. Ịn ḅarị ḅiokpọ nyana-a tẹ ereme sọ tẹẹ. Ịna opu ama mẹ ḅẹ ogigo-aḅọkọ ma ịn kan kiri gbin tẹ fịnị kẹ ịna awarị ma ḅụ sụatẹ.

³¹ Oku-mẹnjịḅọ jen oku-mẹnjịḅọ palịarị, mangị mu ḍuko Babịlonịya ḅẹ amadaḅọ pịrị mịnẹ ori opu ama mẹ ịn kan tolu-sọ ḅo tẹ pakịrị-pakịrị ḅụ.

³² Ini na fịya-a apụ ma tọrụ-saḅa-ẹbẹ mẹ saḅa koro tẹ ḅo fịnị kẹ kụrọnị-ayọ ma ḅụ sụa tẹ Babịlonịya ḅẹ ọmụapụ ma ḅarị tẹmẹ-nyana-a.

³³ Ala-a sakị ḅụ ini na fịya-a apụ ma ịn pẹlẹ-gbin-gbin tẹ ịn nanga-nanga ḅọrọ ḅa, mbịaka sịẹma kiri ḅụ kẹ mbịaka nanga-nanga ḅara. Yẹrị, Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ọkọ ḅẹẹm.”

³⁴ Babịlonịya ḅẹ amadaḅọ ḅe Jeruselemu keni tẹ anị pẹịm. Opu ama mẹ ḅio ò ye kọnma-a, jongo ḅio minji ọsụma fama ḅara ò jim-jim kịka tẹ anị mẹnịm. Ori ò ḅii aị ọkịm tẹ kirikọn-aị kẹ wakị ngumam.

³⁵ Yee Zayọnị ḅẹ apụ ma ḅẹẹ, “Yee Babịlonịya ḅẹ apụ ma ịn kẹ wa mịẹ tẹ kụrọ-kụrọ aị ḅẹ ḅẹrẹ-ḅarasii minini ọkị!” Yee Jeruselemu ḅẹ apụ ma ḅẹẹ, “Yee Babịlonịya ḅẹ apụ ma kẹ wa ẹrịma tẹ atọrụsiẹrị ma ḅẹ ḅẹrẹ-ḅarasii minini ọkị!”

KỊNỊNYANAḄỌ Ḅe Ḅarasụa Izirẹlị Pịrị ḅa

³⁶ Tẹ mie ḅụ KỊNỊNYANAḄỌ ḅe Jeruselemu ḅẹ apụ ma ḅẹẹm, “Yẹrị ḅarana ọmịna ḅẹrẹ mẹ ọkị mịẹ ḅa, tẹ mịẹ tẹ si kẹ ọ́ tọn apụ ma ịn kẹ ọ́ mịẹ tẹ ye mẹ gbẹẹ ḅa. Babịlonịya ḅụ minji sime tẹ paka-ḅoarị anga mẹ à samụnọma ḅa, à pịkị anị ḅẹ atọrụ ma mịẹ tẹ arị samụnọ ḅa.

³⁷ Anị sịẹ mẹ ḅẹ amakiri mẹ sara sọ tẹ, piri-ḅio-ḅẹ anama angarị anga sọ ḅa. Ḍiki-tọrụ ḅụ anị sịḅị-kụrụkụrụma ḅa. Gbọrụḅọ-sọ anị ḅio anga ḅịa, tẹ anị ẹrị apụ mamgba tẹmẹ-naịn-naịn ḅa.

³⁸ Babịlonịya ḅẹ apụ mamgba ọkụkụ ekire ḅara ekirearị, pịkị ọkụkụ ḍọkọḍọkọ-awọmẹ ḅio-fiema ḅara kẹ ḅio-fiemarị.

³⁹ Ini opu-pọkọḅẹngbọ sụam aro? Arị alalị fịye mịẹ ịn pịrị tẹ mịẹ tẹ ini iru ḅuu tẹ ḅioḅẹlẹ ḅa. In mu mono tẹ ḅarị gbala-gbala saakị ḅịa.

⁴⁰ Arị ịn kẹ mu tẹ ini ịn kẹ anana na oḅori na ejimina na ḅaa ḅara ḅaa ḅa. Yẹrị, KỊNỊNYANAḄỌ ḅe, ọkọ ḅẹẹm.”

Babịlọnị Ḅụ Paka Ḅẹ Ye

⁴¹ KỊNỊNYANAḄỌ ḅe Babịlọnị gboloma ye ḅụ ḅẹẹarị, “Bebe tomikiri mamgba tokiniarị opu ama mẹ ini anị ọkị tẹ ọmụ ḅụ! Ḍiki-tọrụ ḅụ Babịlọnị kpọma sịḅị-kanakanamaye sọ sịẹ-sịẹ ma pịrị tẹ ḅara ḍikii!

⁴² Abajị mẹ mbelembelema ḅo Babịlọnị gbaịn tẹ iḅiọkụ fiearị ọnụngọ ḅara ḅụ.

⁴³ Ama ma sịḅị-kanakanama ayeyọ sọ tẹ ḍiki-tọrụ ḅụ, tẹ minji ofori ịkpa kịkarị, kịnị anga-a yọ, mẹnjị sọ ịn mẹnjị-ḅọrọ ye mu-a.

⁴⁴ À fomu-ḅara kẹ Bẹlị pịrị ḅa, Babịlonịya ḅẹ tamụnọ ḅe, tẹ ọ̀ mịẹ tẹ ori ò furu tẹ ngọ ma pakama-ḅo nyana apụ pịrị ḅa; sịẹ-sịẹ ma ḅarị jen kẹ sunsin ọ̀ pịrị ḅịa.” Babịlọnị ḅẹ onu ma ḅịkị tẹẹ.

⁴⁵ Izirẹlịapụ, ọmịnị anị anga mangị-so! Ì owi-ịganị mẹ ḅụ ọmịnị ọmịna ḍumo-mangị kọọn.

⁴⁶ Ḅiokpọ ọmịna ḅụụ so ma, anịanịa ọ́ ḅalafaa, ọ́ naarị ịba ma gotẹ — mịnẹ kụrọ-kụrọ amịẹaị amakiri mẹ ḅụ mịẹarị, pịkị gbọrụ amadaḅọ osi ḅọ na owu-sọarị gboloma ye na.

⁴⁷ Anie ḅụ sakị mẹ ḅoarị à Babịlonịya ḅẹ oru-afụḅara ma na mịẹ ḅẹ sakị mẹ. À bebe sịẹ mẹ kẹ ḅụụ-jịrị ḅio suu ḅa, tẹ ini anị ḅẹ atomi mamgba ḅaa ḅa.

⁴⁸ Kiri ọgọnọ na So-tọrụ na ḅụ sime-ye sime-ye oloku ḅa ḍereku ḅụ, Babịlonịya ḅịkị ọgọnọ-jụ ḅo anị fama ḅẹ apụ ma ḅara-ḅio sọ ḅarị sakị mẹ ḅụ.

⁴⁹ “Babịlonịya mịẹ tẹ tomikiri mẹ ikelema-koro ḅụ kịnị fịịm, tẹ mịọkụ Babịlonịya ḅịkị ḅẹẹ tẹ, anị mịẹ tẹ Izirẹlị ḅẹ tọnwa-apụ fịịm ẹrẹsị. Yẹrị, KỊNỊNYANAḄỌ ḅe, ọkọ ḅẹẹm.”

Tamụnọ Kẹ Babịlonịya Ḅụ Sime Izirẹlị Ḅẹ Apụ Fịrịma Oku

⁵⁰ KỊNỊNYANAḄỌ ḅe ḍuko ori atomi pịrịarị Babịlonịya ḅụ, “Fịị ḅio ọ́ pụkọ-so tẹẹ! Ó soo, mịọkụ! Ó koru ma. Karakaraye ọmịnị ama na kpeki-a sọ, ọmịnị ị̀ kẹ ḅiokoromaa, ọ́ Nyanaḅọ ḅe, ọ́ pịkị Jeruselemu kẹ ḅiokoromaa.

⁵¹ Ọ́ ḅẹẹarị, ‘Ịn wamịna atọrụ-tuu tẹ wamịna ḅụụ-jịrịma tẹẹ; wa gbọrsịḅị gbala-gbala ḅarasụa nyana-a ḅara sime tẹ tọrụ-nimi-a jen sịẹ ḅẹ apụ Tamụnọ-warị mẹ ḅio ḅẹ fịafịa ayọ ma ọkị amịna nye sọma tẹ ẹrẹsị.’

⁵² Ọkọ ẹrẹsị mie ḅụ, à ḍukoarị mịnẹ sakị mẹ ḅoarị à Babịlonịya ḅẹ oru-afụḅara ma na mị ḅẹ sakị mẹ, tẹ bebe sịẹ mẹ ikelema-koro ḅụ ye la tẹ apụ ma iningi ḅa.

⁵³ Babịlọnị nwẹnị So-tọrụ kpọlị mu ḅụ kụrọtẹ ama-ḍụayọ nama sọ, à paa kịnị fịrịma tẹ ini anị guluguluma ḅa. Yẹrị KỊNỊNYANAḄỌ ḅe, ọkọ ḅẹẹm.”

Jen Guluguluma Tẹ Sime Babịlọnị Pịrị ye

⁵⁴ KỊNỊNYANAḄỌ ḅe mẹẹ, “Owu-pọkọ pokii Babịlọnị ḅụ, amakiri mẹ gulugulu mẹ kururu ḅụ.

⁵⁵ À Babịlọnị mẹ gulugulumarị tẹ mịẹ tẹ anị gbọsimearị. Fịya-a Apụ mangị sọ-muarị ḅara ḍụrụkụarị ọnụngọ ọkụ, tẹ oloku-oloku mie ịn kẹ owu mẹ pakarị.

⁵⁶ In ḅo Babịlọnị guluguluma ḅẹm; ini anị ḅẹ ọmụapụ ma kun tẹ, ịna iboli ma anyịma tẹ. Yẹrị anie fomu-ḅara kẹ siye pịrịarị Tamụnọ, tẹ à Babịlọnị gbẹẹ ḅara kẹ anị na mịẹ ḅa.

⁵⁷ À mịẹ tẹ anị ḅẹ ḅẹrẹtọn-apụ iru ḅuu ḅa Ye-nimi atomi, sịḅịdapụ na ọmụapụ na. In mu mono tẹ ḅarị gbala-gbala saakị ḅịa. Yẹrị, amadaḅọ ḅe, ọkọ ḅẹẹm, Yẹrị, anie Kụrọmamgba nyana KỊNỊNYANAḄỌ ḅee.”

⁵⁸ Kụrọtẹ opu Babịlọnị onu ma, in sukuruma-gbin ḅa; tẹ anị ḅẹ sịẹ kperere-kperere wararị ogigo aḅọkọ ma dọkịma kiri pịrị ḅa. Tomikiri ḅẹ asịẹ ma mịẹarị aị mamgba papaa aị; ịn ḅụụ-kọsịtẹ kọrị aị ma dọkị faarị. “Yẹrị, Kụrọmamgba nyana KỊNỊNYANAḄỌ ḅe, ọkọ ḅẹẹm.”

In Jerimaya Oku Mẹ Kẹ Babịlonịya Fịrịma tẹ

⁵⁹ Ama-da Zẹdẹkaya na sakị mamgba emi tẹ fịrịmẹnjị ọ̀ pịrị-pịrị ḅọ anie Sẹraya, Nẹrịya owiḅọtụḅọ, pịkị Masẹya taa-owiḅọtụḅọ ḅe. Zẹdẹkaya ḅẹ Juda da tẹ ini karama kụra mẹ ḅụ Sẹraya ori na sọ muarị tẹ à mịna aị ma ḍuko ọ̀ pịrịm ọ̀ mịẹ.

⁶⁰ Ḅo Babịlonịya ọgọnọ gbana ḅarị guluguluma mamgba na osi-aị mamgba tẹ Babịlonịya gboloma aị ma na à kẹ ḍiri kẹẹm.

⁶¹ À ḍuko Sẹraya pịrịm, “Í mu Babịlọnị la sakị, ẹrị mịnẹ í gele pọkọ kẹ mịanga kẹẹ wararị ye goyegoye go tomi ma pịrịm.

⁶² Anịtẹso mị-ḅara tẹkẹẹ, ‘KỊNỊNYANAḄỌ, ị́yẹrị ḍuko tẹẹ mịnẹ ị́ mị yọ mẹ fama ḅa, mịẹ tẹ ḍumo wararị gberie-sọ anị ḅio anga ḅịa ḅara, anị ḅọrọ tomḅọ-o, nama-o, tẹ anị nwẹnị ịkpa kịka gbamaso ḅa.’

⁶³ Sẹraya, í mị ḍiri mẹ go tomi ma pịrị fama sakị, anị kẹ ḍụḅarị ḅụ kpọ tẹ anị kẹ Yuferetisi Tọrụ mẹ ḅio gbin nguma,

⁶⁴ tẹ ḅẹẹ, ‘Mie anị paka Babịlọnị pịrị ḅarị ḅara, anị ḅile sọ-mu tẹ ḅarị gbala-gbala jen kẹ saakị paka-ḅo ḅịa, KỊNỊNYANAḄỌ ḅe ọkị-ḅo anị ọgọnọ gbana ḅẹ-yearị gulugulu mẹ ẹrẹsị.’ ” Jerimaya ẹkwẹn-aḅịḅị ma mị yọ kunomam.