Jerimaya 50 - FỊAFỊA BAỊBỤLỤ

Ịn Babịlọnị Ọkị Mẹ

¹ Mie KỊNỊNYANAḄỌ ḅe kẹ ị̀ pịrị Oku mẹ Babịlọnị opu ama mẹ na anị ḅẹ atomi na gboloma ye ḅụ.

² Oku mẹ ḍuko sịẹ-sịẹ ma pịrịị; anị ḍuko wasamaa! elekima pịrị tẹ kịnị mamgba naa ḅẹ ḅara kẹ oku mẹ ḍukoo! Anị kẹ ḅọị ma! Babịlọnị ḅịkị tẹẹ! Árị ẹkẹkẹ-tamụnọ Madọkụ ḅe ini ò puu kọsịma tẹẹ! Babịlọnị ḅẹ oru-afụḅara ma ḅụụ-jịrị tẹẹ. Á sịḅị-ngụngụnma ḍụẹịn-afụḅara ma kaan-sara tẹẹ!

³ “Ọgọnọ-jụ ḅụ gbọrụ sịẹ sime tẹ owu kẹ Babịlọnị paka ḅẹ ḅo tẹ, tẹ anị kẹ ịkpa sọma ḅa. Tomi na nama amẹẹ na mangị-so ḅa, tẹ gbọrụḅọ sọ anịanga anga ḅịa.”

Izirẹlị Pịkị-so

⁴ KỊNỊNYANAḄỌ ḅe mẹẹ, “Anị sakị mẹ ḅụ Izirẹlị na Juda na, ini maa apụ ma, owu ma ḅo ḅa, ị̀ ḍọkịarị, ịna Tamụnọ ḅe.

⁵ Ịn Zayọnị mu etela gbela ḅa, anịtẹso ini anị pakịrị daa mu ḅa. In sime-gbamaso ọḅọkụ kẹ ị̀ na fị ḅa, tẹ gbala-gbala ini anị kan ḅịa.”

⁶ “Ị̀ atomi ma kịkarị ye anie anana ogbo tẹ ḍikiḍikiarị apụ ḍiki-tọrụsin tẹ tụndụ ma ọgọnọ iri-faa aị. Ini anana kịka tẹ ikele-ikele tẹ, gbọrụ tụndụ ḅụ so mu osi ye la, tẹ ini ịna sime-anga kẹ ḅioḅọrọma tẹ.

⁷ Ini ẹrịapụ-ẹrịapụ owu kẹ ịn pakam. Si kẹ ịn tọn apụ ma ḅẹẹarị, ‘In si kẹ KỊNỊNYANAḄỌ ḅe mịẹ tẹẹ, tẹ anie ḅụ wa mịẹ ye kura-aye-a. Ịna atẹngịapụ ma KỊNỊNYANAḄỌ ḅe kẹ ḅiokpọmam, tẹ ini ma ḅioju sọ ḅioḅẹngbọ-kẹ-sịrẹrẹ-niḅi ḅara sime ọ̀ pịrị na-iḅim.’ ”

⁸ “Izirẹlị ḅẹ atomi, ọ́ Babịlonịya ḅụ mangị-soo! Ọ́ sịẹ mẹ koroma tẹ soo! Ọmịnị tarị apụ sọọ, mangị-so ḅụ!

⁹ À kụrọ-kụrọtẹ asịẹ ogbo jike saakịma ḅẹ-yearị ọgọnọ-jụ ḅụ, tẹ arị ịn mịẹ tẹ ini owu kẹ Babịlonịya paka ḅa. Ini ọmụ ọgbụrụ-sụn sịẹ mẹ pịrị tẹ anị nẹngịma ḅa. Ini ma piri-dee aka nimi apụụ; iboli tẹịn kụma, ini anie ḅara daa ye gbarị-gbarị-a apụ.

¹⁰ Ịn Babịlonịya fọịn ḅa, tẹ anị fọịn ḅarị apụ ma ịn ḅii-ye ḅii-ye ọkị-so ḅa. Yẹrị, KỊNỊNYANAḄỌ ḅe, ọkọ ḅẹẹm.”

Babịlọnị Ḅịkị

¹¹ KỊNỊNYANAḄỌ ḅe mẹẹ, “Babịlonịya ḅẹ apụ, ọmịnị ị̀ sịẹ fọịnm. Ó ḅioḅẹlẹ ma mẹnjị ma-ḅọrọarị tẹ nambulo kịka tẹ mbịaka nanga-nanga sịẹma sararị, owi-asụ kịka tẹ oloku-ma ḅọrọarị,

¹² kụma ini í soku-ḅẹ opu ama mẹ iderima tẹ anị tọrụ-tuu ḅa. Sịẹ-sịẹ mamgba ḅụ Babịlonịya yela-a tẹịn sịẹ sọ ḅa; anị samụnọtẹ minji ofori ịkpa sọ ḅa.

¹³ Ị̀ ịganị ẹrẹsị, gbọrụḅọ-sọ Babịlọnị ḅụ anga ḅịa, anị kan-sara tẹ gbin koro-sime ḅa, tẹ mẹnjị-ḅọrọarịapụ mamgba sịḅị-kanakana tẹ ḅụụ-bua ḅa.”

¹⁴ “Iboli tẹịn owiapụ, ọmịnị ọgbụrụ-sụn tẹ Babịlọnị ikelema-koroo. Ọmịnị ọmịna ḍiein mamgba kẹ Babịlọnị tẹịn, anị si kẹ yẹrị KỊNỊNYANAḄỌ ḅe mịẹ tẹ ẹrẹsị.

¹⁵ Ọmụ oloku mẹ kọn bebe opu ama mẹ kana-koroo! Mịọkụ Babịlọnị ḅara saakị tẹẹ. Ini anị ḅẹ onu ma kan tolu-ḅọrọ tẹ sukuruma kan kiri lama tẹẹ. À Babịlonịya ḅẹ apụ ḅara ị̀ gbẹẹfị ḅiiarị. Mie ḅụ ị́ gbẹẹfị ọkị ịna aḅara, tẹ ịn kẹ jen-apụ mịẹ tẹ ḅara kẹ ịn mịẹẹ.

¹⁶ Ḍụkụ tẹ ịn ḍụọ ḍiḅi ma anị amakiri mẹ ḅụ, anịanịa fịaị soku tẹ kobiri warị suu. Jen sịẹ ḅẹ ḅọ tẹ anị yọ angarị ḅọ goḅọ-goḅọ owu kẹ ịn pakarị ọmụ-ogbo mẹ gotẹ ḅalafaa ḅa, tẹ mangị pịkị-so ama mu ḅa.”

Izirẹlị Pịkị-ḅo

¹⁷ KỊNỊNYANAḄỌ ḅe mẹẹ, “Izirẹlịapụ ma ọkụkụ ḍuka tẹ dee gala-galamatẹ anana ogbo kịkarị. Tarị-tarị, Asiriya tomikiri mẹ daa sime ḅọ ḅe owu kẹ ịn pakam, anịtẹso Ama-da Nebukadineza, Babịlonịya da ḅọ ḅe, ịna mgbe ma kụngụrụm.

¹⁸ Miemẹ gotẹ, Yẹrị, Kụrọmamgba nyana KỊNỊNYANAḄỌ ḅe, fomu-ḅara kẹ Ama-da Nebukadineza na ọ̀ sịẹ na pịrị ḅa, à kẹ Asiriya tomikiri mẹ da ḅọ ḅe fomu gbọrụ ḅara mẹ.

¹⁹ Àrị Izirẹlịapụ ma kẹ pịkị-so mu ịna amakiri lama ḅa. Ịn Kamẹlị Tụndụ ọgọnọ ḅụ na Basani ibe na ḅụ ḍiḅi pakama-ḅo fịye fị ḅa, tẹ Iferemu na Giliyadi na akiri ḅụ paka afịaị mamgba sọ fị ḅa.

²⁰ Anị sakị mẹ ḅụ, Izirẹlị ḅụ si paka ḅịa, tẹ si-sịḅịḅio sọ paka ḅịa Juda ḅụ, kẹ gotẹ ọkọ ḍukoarị, à ḍumo fama-a so apụ ma si à wẹrịso ḅa. Yẹrị, KỊNỊNYANAḄỌ ḅe ọkọ ḅẹẹm.”

Tamụnọ Ḅẹrẹ-pẹlẹ-ḅịḅị Babịlonịya Ọgọnọ Ḅụ

²¹ KỊNỊNYANAḄỌ ḅe mẹẹ, “Owu kẹ Merateyimu na Pẹkọdị na ḅẹ apụ pakaa. Ịn ḅaa gulugulumaa. À tọn ị̀ pịrịye pịrịye mịẹẹ. Yẹrị, KỊNỊNYANAḄỌ ḅe, ọkọ ḅẹẹm.

²² Amakiri mẹ ḅụ ini ọmụ yeke-yeke naarị, tẹ opu guluguluma emi.

²³ Babịlonịya amana kẹ bebe tomikiri mẹ ḅakụ kọsịmam, tẹ mịọkụ anị amana mẹ ini anị anyịma kọsịma tẹẹ! Tomikiri ḅẹ asịẹ mamgba sịḅị-kanakanam anị sịẹ mẹ ḅụ paka ye mẹ gotẹ.

²⁴ Babịlonịya, í owu kẹ ị̀ pakam, tẹ mịọkụ à tuu ị́ pịrị ḍiein í kuun-sịẹma tẹẹ, tụkụmaye ị́ anị gboloma ye nimi-a ḅẹsọ.

²⁵ Arị ì owuna-aị kẹ koko wẹrị yọ mẹ ḅẹ ḅọkọ mẹ à finjitẹ, tẹ àrị arị pakama ḅo tẹ ị̀ ịganị ḅụ, anie Yẹrị, Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe, Babịlonịya ḅụ kọrị ḅẹ ye emi ẹrẹsị.

²⁶ Owu kẹ anị paka pakịrị-pakịrị ḅụ, tẹ anị ḅẹ mgbọlị afịaị koko anga mẹ kan finji. Fọịn aị tan-tan kpolima mgbọlị afịaị tan ḅo kpolima-kpolima ḅara! Sịẹ mẹ guluguluma famaa! Gbala-gbala gberie-sọ kọnma ma!

²⁷ Ịna ọmụapụ mamgba ḅaa famaa! Ḅaa pẹị ḅẹ nama ḅaa ḅara kẹ ịn ḅaa! Babịlonịya ḅẹ apụ in si-so ḅụ sọ tẹẹ. Fomu-ḅara kẹ ịn pịrị ḅẹ sakị mẹ ḅo la tẹẹ!”

²⁸ (Ọmụ mangị kọn apụ Babịlonịya ḅụ pụkọ-pakaḅo Jeruselemu laarị, tẹ ịn KỊNỊNYANAḄỌ, wamịna Tamụnọ ḅẹ wẹrịtẹ Babịlonịya apụ ma kẹ Tamụnọ Warị mịẹ ye ḅẹ gbẹẹfị ḅiiarị ḅara ḍukoarị.)

²⁹ Ḍuko iboli tẹịn owiapụ ma pịrịị ini owu kẹ Babịlọnị pakaa. Iboli na ḍiein na kẹ mịẹ-mịẹ ye nimi ḅọ nimi ḅọ fịrịma pakamaa. Ọmịnị opu ama mẹ ikelema-koroo, tẹ ḍụkụtẹ gbọrụḅọ-sọ pụkọ-so ma. Ịn mịẹ tẹ aị mamgba kẹ ịn gbẹẹ, tẹ ịn kẹ jen apụ mịẹ ḅara kẹ ịn mịẹẹ, ịn ḅụụ-gelema si kẹ ị̀ mịẹm ẹrẹsị, yẹrị Izirẹlị tẹkẹarị Fịafịa Ḅọ ḅe.

³⁰ Mie ḅụ ịn Jeruselemu etela-ogbo ḅụ ịna asawọ ma ḅaa ḅa, ịna ọmụapụ mamgba ịn ḅaa guluguluma ḅa anị ene mẹ ḅụ. Yẹrị, KỊNỊNYANAḄỌ ḅe, ọkọ ḅẹẹm.

³¹ “Ị́yẹrị, Babịlonịya, ḅụụ-gelema ị́ ḅụụ ḅio ḅin wararị, mie ḅụ yẹrị, Tẹịn-Ḅẹrẹtọn-Kụrọ-Nyana Kụrọmamgba nyana KỊNỊNYANAḄỌ ḅe, àrị ị́ na tụḅụrụ wararị! Fomu-ḅara kẹ ị́ pịrị ḅẹ sakị mẹ ḅo laa tẹẹ.

³² Ị́ ḅụụ-gelema sịẹ mẹ pụmbụ tẹ ḅịkị ḅa, tẹ gbọrụḅọ-sọ ḅarasụa tẹ ị́ nụnụ saakị ḅịa. À fịnị kẹ í opu ama ma ḅụ sụa ḅa, tẹ í ikelema-koro ḅụ sime ye sime ye à guluguluma ḅa.”

³³ KỊNỊNYANAḄỌ ḅe mẹẹ, “Izirẹlịapụ ma na Juda ḅẹ apụ ma na ini in ponomarị. In kun-so apụ mamgba tọrụ kẹ kiri lama tẹ ịn kẹ wẹrịarị tẹ ḍụkụ tẹ ịn so-a.

³⁴ Kụma ịn pụkọ-pakamaḅo ḅarị ḅọ ḅe kụrọ ḅọ — ori ẹrẹ anie Kụrọmamgba nyana KỊNỊNYANAḄỌ ḅe. Ò ḅioju ịna ḅẹrẹ saakị ọkị tẹ kẹ amịna nye sọma ḅa, pịkị dein ọkị-ḅo ḅa tomikiri ḅụ, kụma ọ̀ ḅụụ-fụka kẹ Babịlonịya ḅẹ apụ pịrị ḅa.”

³⁵ KỊNỊNYANAḄỌ ḅe mẹẹ: Fịị sime Babịlonịya pịrịị! Fịị sime anị ḅẹ apụ pịrị, sime anị ḅẹ ḅẹrẹtọn apụ pịrịị, sime anị ḅẹ ye-nimi atomi pịrịị.

³⁶ Fị sime iruo ịkịankoroapụ pịrịị; ini oḅori-sọ la ḅara ḍikii! Fị sime anị ḅẹ ọmụapụ pịrịị; ịn tẹmẹ-naịn-naịn la ḅara ḍikii!

³⁷ Anị ḅẹ asụ ma na kirimẹnjị-ọmụarụ ma gulugulumaa. Fịị sime ini ọkọ ḅo ọmụgbin apụ ma pịrịị ịn ḅarị ịnyọ nyana-a la ḅara ḍikii! Anị ḅẹ ngọ ma gulugulumaa; fọịn tẹ ọkị-soo.

³⁸ Minji kụrọ ọkị-ḅo ịna amakiri ḅụ tẹ anị ḅẹ atọrụ ma samụnọmaa. Babịlonịya anie tẹmẹ-naịn-naịnmarị oru-afụḅara ama, Ini amịna aḅụụ kẹ oḅori apụ sọma tẹ.

³⁹ Tẹ mie ḅụ Babịlọnị mẹ, oru amẹẹ na si-atomi na agbarị yọ sọ ḅa, pịkị fịafịa-a afeni sọ. Gbala-gbala kịnị ḅarị jen kẹ anị ḅio anga ḅịa, tọrọkọ-jụ ḅo ḅarị sakị mẹmgba ḅụ.

⁴⁰ Sọdọmụ na Gomora na ḅụ paka gbọrụ ye mẹ Babịlọnị ḅụ paka ḅa, anie arị ini na ini na kpeki tẹ anga apụ na guluguluma sakị mẹ ḅụ. Gbọrụḅọ-sọ ḅarị jen kẹ anị yọ anga ḅịa Yẹrị KỊNỊNYANAḄỌ ḅe ọkọ ḅẹẹm.

⁴¹ Kịnị ọgọnọ-jụ ḅẹ gbọrụ sịẹ ḅụ sime tẹ ḅoarị, opu kụrọ nyana sịẹ sụma-jụ ḅụ; tọnwa amadapụ tẹlẹma ọmụ pịrịarị.

⁴² Ini ịna iboli na okologie na ọkị tẹ; ini ma anie kụrọ-kụrọ ḅara kẹ kịnị na mịẹarị tẹ ọkụrụkụrụ nyana-a apụ. Ini ịna asụ ọgọnọ sime tẹ ḅoarị tẹ anị fiearị ḅara Abajị ḍụrụkụarị ḅara kịkarị. Ịn tẹlẹma wararị Babịlonịya na ọmụgbin.

⁴³ Babịlonịya ḅẹ amadaḅọ ịba mẹ naarị, tẹ ori angagbasa kpịlasaịma koro-sime wararị. Akụ ye ḅo ọ̀ la tẹẹ, ḅo iyi laa tẹ ẹrẹḅọ la-la akụye ọkụ.

⁴⁴ “Yẹrị, KỊNỊNYANAḄỌ ḅe, ọkụkụ Jodanị tọrụ akaka ḅẹ opu kpiti tẹ piri mẹ ḅio paka iwo ḅo ịwọ osuka fị kiri mẹ la ḅara kẹ ḅo ḅa, tẹ Babịlonịya ḅẹ apụ ma mịẹ tẹ in ḅiotọn-a ḅara kẹ sarama ịna opu ama ḅụ mangị-so ḅa. Anịtẹso à sẹlẹ pakama-ḅoarị sịḅịdaḅọ sịẹ mẹ da ḅa. Ini inetẹ ịna pii-pii ḅẹ ḅe ḅọ tụḅọ? Ḅiokpọ tẹ ḅo ị̀ na kuḅu dama ḅẹ ḅọ tụḅọ? Tọ ḅẹrẹtọnḅọ inetẹ ị̀ na tụḅụrụ ḅẹ?

⁴⁵ Mie ḅụ à tọn pẹlẹ tẹ kẹ Babịlọnị mịẹ ḅẹ-yearị ye pokii, à pịkị ḅiiarị à kẹ anị ḅẹ atomi ma mịẹ ḅẹ ye na. Ịna ḍọkọḍọkọ-awọmẹ kịngẹ sọ kịnị in fọnọ so ḅa, tẹ ọrụḅọ-ọrụḅọ sịḅị kanakana ḅa.

⁴⁶ Babịlọnị ḅịkịarị sakị anị fie lama tẹ kiri mẹmgba jike ḅa, tẹ anị ḅẹ ḅalafa oloku mẹ osi asịẹ ma naa ḅa.”