Jerimaya 49 - FỊAFỊA BAỊBỤLỤ

KỊNỊNYANAḄỌ Ḅe Ḅẹrẹkọn-ḅịḅị Amọnị Ọgọnọ Ḅụ

¹ Mie KỊNỊNYANAḄỌ ḅe ḍuko tẹ ye Amọnị gboloma ye ḅụ: “Ndẹẹ Izirẹlị ḅẹ atomi ma? Gbọrụḅọ sọ ofori ịna amakiri mẹ ḍụa? In tiegotẹ wẹrịso tẹ Mịlịkọmụ tẹkẹarị apụ ma Gadi furo-ḅẹ-apụ ma kiri mẹ ọkị tẹ kẹ amịna nye sọma tẹ anị yọ ḅụ anga?

² Kụma sakị mẹ ḅoarị, anie à mịẹ tẹ sịḅịda opu ama, Raba mẹ, ọmụ yeke-yeke naa ḅa, tẹ ini anị kan-sara tẹ so ḅa, tẹ anị ḅẹ kala-ama ma dọkịma kiri lama ḅa. Tẹ Izirẹlị ịna kiri ọkị apụ ma ḅara siin amịna kiri ọkị ḅa.

³ Hẹsịbọnị ḅẹ apụ, ọmịnị owu pakamaa! Ini Aị guluguluma tẹẹ! Raba ḅẹ ereme, ó mu ḍụẹịn ḍuu apụ ḅara kẹ kururuu! Ọmịnị akpa ịnwaịn tẹ kẹ ḍuu. Ọ́ mịẹarị ye nimi-a apụ ḅara kẹ mangị ikele-ikelee. Ọmịna tamụnọ Mịlịkọmụ ḅe ini ori na, ori agbamịẹapụ na, amadapụ awọmẹ na kẹ ọ̀ ḅụ sụa ọkị-so jen sịẹ mu ḅa.

⁴ Ọmịnị ḅioḅẹngbọ-kẹ-sịrẹrẹ-niḅi-a apụ ma tiegotẹ ḅụụ-bomarị? Ọmịna ịnyọ faarị. Ó tiegotẹ ọmịna kụrọ kẹ ḅiokpọma tẹ ḅarị mịnẹ gbọrụḅọ-sọ ḅiokpọma tẹ owu kẹ ọ́ paka ḅịa.

⁵ Pakịrị-pakịrị ḅụ à tẹmẹ-naịn-naịnmaye ọkị-ḅo ọmịna ọgọnọ gbana ḅa. Ọmịnị-mgba mangị-so ḅa. Ọrụḅọ-ọrụḅọ amịna ḍumo-mangị kọn ḅa, tẹ ọmịna ọmụapụ ma kobiri kpoo ḅụ wẹrị ḅẹ gbọrụḅọ-sọ ḅarị paka ḅịa.

⁶ “Anịtẹso à mịẹ tẹ Amọnị siin lọkọlọkọ ḅa. Yẹrị, KỊNỊNYANAḄỌ ḅe, ọkọ ḅẹẹm.”

KỊNỊNYANAḄỌ Ḅe Ḅẹrẹ-pẹlẹ-ḅịḅị Idọmụ Ọgọnọ Ḅụ

⁷ Mie Kụrọmamgba nyana KỊNỊNYANAḄỌ ḅe ḍuko ye Idọmụ gboloma ye ḅụ: Idọmụ ḅẹ apụ ma ịna karakara ḅẹrẹkọn fama tẹ aro? Ḅẹrẹ ḍuko in tolumarị apụ ma ịn ḅarị inetẹ jen kẹ ḅẹrẹ ḍuko in toluma-a? Ịna ye-nimi mamgba fa fama tẹ?

⁸ Dedanị ḅẹ apụ, ọ́ pịkị tẹ mangịị! Ọ́ ḅọịị! Àrị Ịsọ furo-ḅẹ-apụ ḅaa fama ḅẹ-yearị, anie fomu-ḅara kẹ ịn pịrị ḅẹ sakị mẹ ḅo tẹ ẹrẹsị.

⁹ Tomi kụrọ-sịn mgbọlụ kaịn-arị sakị in boowa aị wẹrịso-som, anịsakị opu furuapụ mu furuarị sakị ini ọkị ḅii ye ngẹrị mie ini ọkị tẹ so-so ye.

¹⁰ Kụma àrị Ịsọ furo-ḅẹ-apụ ma paụma famatẹ ye kọnma-a ḅara ḅụ, tẹ ịna kikima ayọ mamgba à finji sara tẹ, mịẹ tẹ ịn ḅarị jen kẹ ḅọị ḅịa ḅara. Idọmụ ḅẹ apụ mamgba gulugulu fama tẹẹ. Ịna ḅụ kirikọn gbọrụḅọ-sọ ofori.

¹¹ Ọmịnị ọmịna ḍapụ na iyingi apụ na fịtẹ awọmẹ ma wẹrịso ị̀ pịrịị, tẹ arị in ḍikiḍiki ḅa. Ọmịna diapụ-fịtẹ-ereme ma inetẹ ị̀ ḅụ sịrẹrẹ ḅa.

¹² “Fomu na-iḅi-a apụ sọ in fomu-ḅara mọngị mẹ ḅuum ḅẹ sakị, í kuromarị í fomu-ḅara gbarị ḅẹ? Gbala-gbala ị́ mọngị mẹ ḅuu-a so ḅịa.

¹³ Yẹrị ḅarana karị tẹ mịnẹ Bozara ḅẹ opu ama ma ḍiki-tọrụ ḅụ sịḅị-kanakanama ye na ịkpa na sọ ḅa. Tomi anị ḍẹrị tẹ anị kẹ ye karị-karị ye sọma ḅa. Anị na kpeki kala-ama mamgba kan sara sime ḅa, ḅẹẹ-sakị ḅẹẹ-sakị ḅụ. Yẹrị, KỊNỊNYANAḄỌ ḅe, ọkọ ḅẹẹm.”

¹⁴ À nwẹnị ḅẹẹ, “Idọmụ, arị oku da tẹ KỊNỊNYANAḄỌ ḅe ḅịḅị ḅụ, mịnẹ à ḍuko sịẹ-sịẹ ma pịrị ini ịna ọmụ-ogbo-ogbo ma kobiri gboloma tẹ ḅo owu kẹ ị́ pakaa.

¹⁵ KỊNỊNYANAḄỌ ḅe mịẹ tẹ ị́ ḅarị ịnyọ nyana ḅịa, tẹ gbọrụḅọ-sọ ị́ kẹ ye-sịn ḅịa.

¹⁶ Ị́ ḅụụ-gelema mẹ oḅori kẹ ị́ sịn tẹẹ. Gbọrụḅọ sọ í ḍiki-ḅalafa-a, í kuroma mu laarị ịn mịẹarị ḅara. Ịkụ ọgọnọ-jụ ḅio mie ị́ angarị, gele-tụndụ mẹ ọgọnọ ḅụ, kụma karakaraye igo fiin gele mu la-la anga ḅụ ị́ angarị ḅẹsọ, KỊNỊNYANAḄỌ ḅe í ọkị-ḅo kiri lama ḅa. KỊNỊNYANAḄỌ ḅe ọkọ ḅẹẹm.”

¹⁷ KỊNỊNYANAḄỌ ḅe mẹẹ, “Ḅo Idọmụ la ḅarị gulugulu mẹ kpọma ḅalafamaye sọ ḅẹḅọ-ḅẹḅọ tẹ mẹnjị-ḅọrọarị goḅọ-goḅọ pịrị ḅa, pịkị mḅọ ḅụụ-buama tẹ mḅọ tẹmẹ-naịn-naịnma ḅa.

¹⁸ Sọdọmụ na Gomora na ḅụ paka gberie mẹ mie Idọmụ ḅụ paka ḅarịye, anie ini na ịna kpeki ama mamgba na fịị gulugulu sakị mẹ. Gbọrụḅọ sọ ḅarị jen kẹ anịanga anga ḅịa. Yẹrị, KỊNỊNYANAḄỌ ḅe, ọkọ ḅẹẹm.

¹⁹ Ọkụkụ kpiti tẹ piri-ḅio Jodanị tọrụ akaka ḅụ paka iwo ḅo anana osuka fị-fị kiri mẹ la ḅara, à ḅo mịẹ tẹ Idọmụ ḅẹ apụ ma ḅiotọn-a ḅara kẹ ịna sịẹ koroma mangị ḅa. Anịtẹso yẹrị ḅarana sẹlẹ pakama-ḅo ḅarị ḅẹrẹtọnḅọ ḅe sịẹ mẹ da ḅa. Ini inetẹ tụḅọ kẹ ị̀ na pii-pii ḅẹẹ ḅẹ? Tọ ḅẹrẹtọnḅọ ḅiokpọtẹ ị̀ na kuḅu dama ḅẹ? Tọ ḅẹrẹtọnḅọ inetẹ ị̀ na tụḅụrụ ḅẹ?

²⁰ Mie ḅụ ọmịnị à tọn tẹ kẹ Idọmụ ḅẹ apụ mịẹ ḅẹ ye pokii, à pịkị tọn tẹ kẹ Tẹmanị opu ama mẹ ḅẹ apụ ma mịẹ ḅẹ ye. Ịna awọmẹ sọ ini ịna fọnọ so ḅa, tẹ ḅẹḅọ-ḅẹḅọ sịḅị-kanakana ḅa.

²¹ Idọmụ ḅịkịarị sakị ini opu oloku bebe kiri mẹ jike ḅa, tẹ ḅụụ-ḅalaḅala oloku-ḅịḅị mẹ mu Akaba-Tọrụ mẹ la sọ kịnị naa ḅa.

²² Ini na fịya-a apụ ma owu kẹ ịn paka ḅarị ḅara gbala igo pamba finji sara tẹ fiin ideri-ḅo ḅara. Anị eneḅaka ḅụ Idọmụ ḅẹ ọmụapụ ma ḅalafa ḅarị ḅara iyi la tẹ ẹrẹḅọ ọkụ.”

KỊNỊNYANAḄỌ Ḅẹ Ḅẹrẹ-pẹlẹ-ḅịḅị Damasịkọsị Ọgọnọ Ḅụ

²³ Mie KỊNỊNYANAḄỌ ḅe Damasịkọsị gboloma ye ḅụ ḍuko ye: “Hamatị na Apadi na opu ama ma ḅio emi apụ ma ḅalaḅalarị, ḅụụ-fụka ịn la tẹ, in si ḅẹrẹ naa tẹẹ ẹrẹsị. Ḅio-sẹsẹ ḅo ịn gbaịn ḅarị ḅara abajị minji ọkụ, tẹ ini inetẹ ịnyọsara sime ḅịa.

²⁴ Damasịkọsị ḅẹ apụ ma ịn kụrọ-a, tẹ ịn mangị tẹẹ opu ḅalafa ḅụ. Ini akụye na ḅioḅẹngbọ-si na ḅio emi, iyi la tẹ ẹrẹḅọ ọkụ.

²⁵ Ḅioḅẹlẹ ḅio sime-sime opuma mẹ kịnị anị koroma mangị fama tẹẹ.

²⁶ Anị eneḅaka mẹ ḅụ ini árị asawọ ma kẹ opu ama mẹ etela-ogbo ma ḅụ ḅaa ḅa tẹ árị ḅẹ ọmụapụ mamgba ḅaa guluguluma ḅa.

²⁷ À fịnị kẹ Damasịkọsị onu ma ḅụ sụa ḅa tẹ Ama-da Bẹnị-hadadị amada-awarị ma dọkịma kiri lama ḅa. Yẹrị, Kụrọmamgba nyana KỊNỊNYANAḄỌ ḅe, ọkọ ḅẹẹm.”

Keda Furo na Hezọ Opu ama Mẹ Ọgọnọ Gbana Ḅẹrẹ-pẹlẹ-ḅịḅị Mẹ

²⁸ Mie KỊNỊNYANAḄỌ ḅe ḍuko ye Keda Furo na Hezọ ḍikiḍikiarị iri ma na gboloma ye ḅụ, anie Ama-da Nebukadineza ọkị aị ma: “Owu kẹ Keda ḅẹ apụ pakaa, tẹ ịn ḅaa guluguluma, anie ịrụa saakịarị anga mẹ ḅẹ apụ ḍumo kọn ḅara nyana wararị apụ ma.

²⁹ Kụrọ ḅara kẹ ịna akpụrụ-awarị ma ọkịị, pịkị ịna anama ogbo-ogbo ma sọ, ịna akpụrụ-warị kiki-pẹlẹ-aḅịtẹ ma na akpụrụ-awarị ma ḅio sime ye goyegoye na. Ịna ike-sụa-anama ma ọkị tẹ ḍuko tomi ma pịrị, ‘Tẹmẹ-naịn-naịnma ye ọmịnị ikelema-koro wararị-o!’

³⁰ Hezọ ḅẹ apụ, Yẹrị, KỊNỊNYANAḄỌ ḅe ọmịna ḅeri nụnụarị, mịnẹ ọ́ mangị faa so mu ḅọị. Ama-da Nebukadineza, Babịlonịya daarịḅọ ḅe ḅẹrẹ-ḅiya ọ́ pịrị tẹẹ, tẹ mie ò ḍukoarị ye:

³¹ ‘Ó ḅoo! Wa owu kẹ amịna aḅụụ ọkịarị mịnẹ ịn kpaịn sime wararị tẹ ịn la-la ye ofori ḅẹẹ apụ ma paka ḅa! Ịna opu ama mẹ onu-ḅọkọ nyana-a anịanịa ikpopu, tẹ gbala-gbala anị ḅụụ-ḍụa gbọrụ kikima ye sọ nyana-a.’ ”

³² “Ịna ike-sụa-anama ma na ịna anambulo mamgba na ọkịị! Àrị ịn gala-galama pakịrị-pakịrị mu ḅa, arị atomi ma tẹ sịḅị-ḅẹ-inume kịrị-kịrị lẹgịmarị apụ ma, tẹ ḅẹ ḅọkọ-ḅọkọ ḅụ arị opu ḅụụ-fụka ọkị-ḅo ịna ọgọnọ gbana ḅa.

³³ Hezọ ịkpa sọ ḅa, ḅẹẹ-sakị ḅẹẹ-sakị ḅụ, piri-obiri kịngẹ angarị yọ. Gbọrụḅọ sọ ḅarị jen kẹ anị yọ anga ḅịa. Yẹrị, KỊNỊNYANAḄỌ ḅe, ọkọ ḅẹẹm.”

KỊNỊNYANAḄỌ ḅe Ḅẹrẹ-pẹlẹ-ḅịḅị Ẹlamụ Ọgọnọ Ḅụ

³⁴ Zẹdẹkaya ḅo Juda ḅẹ amadaḅọ sọ tẹso, Kụrọmamgba nyana KỊNỊNYANAḄỌ ḅe ẹkwẹn ị̀ pịrịm Ẹlamụ sịẹ mẹ gboloma ye ḅụ.

³⁵ Ori mẹẹ, “À mịẹ tẹ Ẹlamụ kụrọmarị iboli tẹịn ḍin owiapụ mamgba fịị ḅa.

³⁶ À mịẹ tẹ fẹrụ fie-fie ḅo Ẹlamụ bịan ḅa pakịrị-pakịrị mamgba ḅụ, tẹ à mịẹ tẹ anị ḅẹ atomi gala-gala mu anga goyegoye la ḅa, nwenii tẹ tomikiri ḅẹ sịẹ tẹ á ḅụ sime tẹ ọmụ mangị-kọn-apụ la ḅịa anga paka ḅịa.

³⁷ À mịẹ tẹ Ẹlamụ ḅẹ apụ ma ini na fịya-a apụ gotẹ ḅalafaa ḅa, anie ịn ḅaa ḅẹ-ḅiiarị apụ ma. Ì opu ịganị ḅụ àrị Ẹlamụ ḅẹ apụ ma ḅaa guluguluma ḅa, tẹ ini na fịya-a apụ kẹ ịn fịrịma ḅa, nwenii àrị ịn ḅaa-fama ḅa.

³⁸ Àrị ịna amadaḅọ ḅe na ịna sịḅịdapụ ma na ḅaa guluguluma tẹ ì emine kẹ anịanga sịẹma ḅa.

³⁹ Kụma sakị ḅọrọ tẹso, à mịẹ tẹ Ẹlamụ ḅẹ apụ ma siin lọkọlọkọ ḅa. Yẹrị, KỊNỊNYANAḄỌ ḅe, ọkọ ḅẹẹm.”