Jerimaya 48 - FỊAFỊA BAỊBỤLỤ

Mohabụ Gulugulu Mẹ

¹ Miemẹ anie Kụrọmamgba nyana KỊNỊNYANAḄỌ ḅe Mohabụ gboloma ye ḅụ ḍuko ye: Nebo ḅẹ apụ ma ḍiki-sịḅịjịrịị ịna ama mẹ gulugulu tẹẹ! Ịn Kiriyatahịmu ọkị tẹẹ, Ịna opu kụrọ owuna-aị koko yọ ịn kan kiri lamatẹ, tẹ arịḅẹ apụ ma ḅụụ-jịrịma tẹẹ;

² Mohabụ tọrụ-gbẹ sime-ḅara mẹ so tẹẹ. Si kẹ ịn tọn apụ ma Hẹsịbọnị ọkị tẹẹ, ịn pịkị ḅịyatẹ in Mohabụ sịẹ mẹ guluguluma ḅa. Nọmụapụ nwẹn-sịn ama mẹ yaụ-sime ḅa ọmụ-ogbo-ogbo mẹnjị mu owu kẹ anị paka ḅa.

³ Horonayịmu ḅẹ apụ oloku pakamarị: Kụrọ-kụrọ ḅara! Guluguluma!

⁴ In Mohabụ guluguluma tẹ; awọmẹ ma owuarị ye pokii.

⁵ Ịn kọn-arị iningi mẹ naa, ḅọrọ mu Luhiti la-la etela mẹ ḅụ; ḅụụ-ḅalaḅala owu apọkọ ideri koro mu Horonayịmu la-la etela mẹ ḅụ.

⁶ Ini mẹẹ: Saramaa, í ḍumo-mangị kọn! Ịkpa ḅio ḅẹ kala asụ mangị ḅara mangịị!

⁷ “Mohabụ, ị́ ị́ ịnyọ na ị́ nyana sara aị na kẹ ḅiokpọmam, kụma mịọkụ í ḅioju sọ ini ị́ nẹngịma ḅa; ị́ tamụnọ Kẹmosi ḅe ini ori ọkị so ḅa, ini ori amadapụ awọmẹ na agbamịẹapụ na ọkị so ḅarị sakị mẹ ḅụ.

⁸ In guluguluma-a so ḅẹ gbọrụ ama sọ paka ḅịa; tụndụ-suku na lẹsẹrẹ-akiri na in sima ḅa gbọrụ sakị mẹ ḅụ. Yẹrị, KỊNỊNYANAḄỌ ḅe, ọkọ ḅẹẹm.

⁹ Ḍụḅarị kẹ pike Mohabụ pịrị; ala-a ini anị guluguluma ḅa. Anị ḅẹ ama ma si kọsị tẹ koro-sime ḅa, tẹ gbọrụḅọ-sọ ḅarị jen kẹ anịanga anga ḅịa.”

¹⁰ (Amịna ḅioḅẹngbọ mẹmgba kẹ KỊNỊNYANAḄỌ ḅe kọrịnama mẹ kọrị-a tomḅọ ḅe worii! Pẹlẹ kọsịma tẹ ḅaa-a tomḅọ ḅe worii!)

Mohabụ Ḅe Opu ama ma In Guluguluma tẹẹ

¹¹ KỊNỊNYANAḄỌ ḅe ḅẹẹm, “Sakị mamgba Mohabụ ye-ḅụụ-la-a ḅara kẹ sime tẹ, tẹ gbala-gbala kịnị amụ in kun so jen-anga mu-a. Mohabụ kịkarị ye anie jike-a tẹ kẹ wẹrị wararị iru jongo tẹ gbala-gbala amụ pẹlẹma jen gbọrụ jongo ḅio sọ sụa ye. Anị ḅẹ ḅẹlẹ mẹ gbala-gbala amụ si-a, tẹ anị paa ḅẹlẹ mu ḅẹẹ-sakị ḅẹẹ-sakị laarị.”

¹² Mie ḅụ mịọkụ, sakị mẹ ḅoarị, anie à kịnị fịrịma tẹ in mu iru ọsụma pakama ḅara kẹ Mohabụ ọsụma pakama ḅa. Ini ịna iru-ajongo ma ḅio iru mẹ ọsụma-ọsụma sara fama tẹ jongo ma ḅaa kọsịma ḅa.

¹³ Anịtẹso Mohabụ ḅẹ apụ ma ẹrị ḅa ye ḅarị in ḅiotọn ḅara paka-a, ini na ịna tamụnọ Kẹmosi na, anị gbọrụ ḅara mie anị sime Izirẹlịapụ ma na ịn kẹ ḅiokpọma sime ịna tamụnọ Bẹtẹlị ḅe na pịrị ḅara.

¹⁴ Mohabụ ḅe atomi, tiye ẹrẹsị ọmịnị ọmịna aḅụụ kẹ owu-kụrọnịapụ ḅara ọkịarị, ḅiokpọ wararị tẹ ọmụ ḅio ḅụụ aḍaka ḍikitẹ ọmụapụ ḅara?

¹⁵ Mohabụ na anị ḅẹ opu ama ma na ini arị guluguluma tẹ; anị ḅẹ iḅitẹịn asawọ ma ịn ḅaa pẹị ḅẹ anama ḅaa ḅara kẹ ịn ḅaa tẹẹ. Yẹrị anie amadaḅọ ḅe, Kụrọmamgba nyana KỊNỊNYANAḄỌ ḅe, ọkọ ḅẹẹm.

¹⁶ Mohabụ si-so mẹ ḅoarị; anị si koro ḅẹ sakị mẹ ala-a.

¹⁷ Ọmịnị kpeki tẹ angarị apụ, ó kururu anị sịẹ mẹ pịrịị, ọmịnị-mgba tẹ anị ereso mẹ nimi apụ ḅẹẹ: Anị ḅẹ ḅẹrẹtọn kụrọ mẹ kaan-sara tẹẹ, anị ḅẹ ebube na opu kụrọ na ḅarị ofori.

¹⁸ Ọmịnị Dibọnị ḅụ angarị apụ, ọmịnị ọmịna kụn nyana kiri mẹ ḅụ koro-ḅoo tẹ kiri ọgọnọ fọọn ḅio lẹgị-simee; Mohabụ guluguluma ḅọ ḅe mịanga emi tẹ arịḅẹ owuna-aị awarị ma kaan-sara tẹẹ.

¹⁹ Ọmịnị Arowa ḅụ angarị apụ, ọmịnị etela akaka sịẹ tẹ koruu; ọ́ mangị-soarị apụ ma gbela tẹ paka ye ḍọkị nimi ịna aḅịḅị ḅụ.

²⁰ Ịn pakịrị ḅa: Mohabụ ḅịkị tẹẹ, anị gotẹ owuu, miemẹ tọrụ-tuu ye. Anọnị Tọrụ akaka ḅụ anị ḍuko wasamaa, mịnẹ in Mohabụ guluguluma tẹẹ!

²¹ Ḅẹrẹkọn-ḅịḅị ḅo lẹsẹrẹtẹ tụndụ ọgọnọ mẹ ḅụ simearị opu ama ma ọgọnọ gbana tẹẹ; Holonị na, Jaza na, Mẹfatị na,

²² Dibọnị na, Nebo na, Bẹtị-dibilatahimu na,

²³ Kiriyatahịmu na, Bẹtị-gamulu na, Bẹtị-meyoni na,

²⁴ Kẹrịhọtị na, Bozara na ọgọnọ. Ḅẹrẹkọn-ḅịḅị ḅo Mohabụ ḅẹ opu ama ma ọgọnọ gbana tẹẹ, sụma-jụ sime aị na kpeki anga sime aị na.

²⁵ Mohabụ opu kụrọ mẹ ini anị ponoma tẹ; ini anị ḅẹ kụrọ mẹ guluguluma tẹ. Yẹrị, KỊNỊNYANAḄỌ ḅe, ọkọ ḅẹẹm.

In Mohabụ Iderima Ḅa

²⁶ KỊNỊNYANAḄỌ ḅe ḅẹẹm, “Mịẹ tẹ Mohabụ iru ḅụụ tọrụ-ḅaamaa, anị kọngọ-kụrọma ị̀ pịrị tẹẹ ẹrẹsị. Mohabụ amịna ọsụ-aị ḅio kpeleki ḅa, tẹ kịnị anị ḍẹrị ḅa.

²⁷ Mohabụ, kẹ ḅiokoroma ọ́ kẹ Izirẹlịapụ mịẹ sime-ḅara. Ọ́ kẹ ịn mịẹ ḅara gbala ini ịn kẹ furuapụ opu ogbo ḅụ sụa kunm.”

²⁸ “Ọmịnị Mohabụ sịẹ ḅụ angarị apụ, ọmịnị ọmịna ama ma koroma-so mu tụndụ ma tịkị-tịkị ọgọnọ-jụ angaa. Ọmịnị olosịkịya kịkaa, anie amịna warị kẹ tụndụ akaka puu foo wararị yọ namarị ye ḅẹ.

²⁹ Mohabụ mẹ anị ḅụụ-gelema ḅakam! Ịn kẹ ḅụụ-gelema ḅara na, opu aị opu aị ḍuko ḅara na, ịna atomi ma ịna aḅụụ ọkị tẹịnma jen-apụ nẹngịarị ḅara na, ịn kẹ ịna aḅụụ ḍikiarị ḅaka ḅara mẹ na, à naa tẹẹ.

³⁰ Yẹrị, KỊNỊNYANAḄỌ ḅe, ini opu aị opu aị ḍukoarị mẹ nimi wararị. Ịna aḅụụ boma ma kobiri fama kụma papaa ye, tẹ ịn mịẹarị aị ma sime ene la ḅịa.

³¹ Tẹ anie ḅụ arị owu Mohabụ ḅụ sime-ḅọ sime-ḅọ na Ka-hẹrẹsị ḅẹ apụ ma na pịrị ḅa.

³² Àrị owu Sibima ḅẹ apụ ma pịrị, kẹ àrị owu Jezarị ḅẹ apụ ma pịrị ḅara nẹngịma ḅa. Sibima opu ama, ị́ kịkarị ye anie kụrọ-sịn, tẹ amịna aḅara wasama saḅa-ḅọrọma mu Fịtẹ Tọrụ mẹ la tẹ pịkị Jezarị sọ la ye. Kụma mịọkụ ị́ ịrụa kụra ḅẹ sịnmgbọlụ ma na girepu-asịnmgbọlụ ma na sọ gulugulu fama tẹẹ.

³³ In ḅioḅẹlẹ na ḍereku na ọkị so tẹẹ, Mohabụ iḅi fịye pakama kiri nyana sịẹ mẹ ḅụ. À mịẹ tẹ kụrọ kin anga mẹ ḅụ iru ḅarị sara-paka-ḅoa; sime tẹ iru mẹ mịẹ tẹ ḍereku oloku kọn ḅẹ gbọrụḅọ-sọ ofori.”

³⁴ Hẹsịbọnị na Helehale na ḅẹ apụ ma owuarị, tẹ ịna owu-pọkọ mẹ Jehazi jụ ḅio sime apụ naarị Zoha ḅẹ apụ sọ inetẹ naa ḅa, ọkị nwenii mu Horonayịmu na Egilati na Sẹlisiya na la sọ kịnị anị naarị. Nimirimu ḍaḅa sọ samụnọ-kpakịkị tẹẹ.

³⁵ À Mohabụ ḅẹ apụ ma dasịẹma ḅa dọkịma-agba na ja agba na mịẹ-mịẹ ịna atamụnọ ma pịrị ḅụ in sunsin ịn pịrịarị ayọ ḅụ. Yẹrị, KỊNỊNYANAḄỌ ḅe, ọkọ ḅẹẹm.

³⁶ Mie ḅụ ì ḅioḅẹngbọ kururu Mohabụ na Ka-hẹrẹsị ḅẹ apụ ma pịrịarị, gbala gbọrụḅọ ḍụẹịn owu nume ofuroarị ye ọkụ, mḅọ nyana ye goyegoye fa tẹẹ ẹrẹsị.

³⁷ Inimgba ịna asịḅị sịn siin tẹ pịkị ịna mpọrị ma sẹịn-siin tẹẹ. Ini ịna aḅara puu-puu tẹ ịnọ paka wararị, tẹ ọrụḅọ-ọrụḅọ akpa ịnwaịn wararị.

³⁸ Mohabụ ḅẹ awarị isun mamgba na ama-ogbo mamgba ḅụ kururu sikima jen ofori; anị gotẹ ọkọ pakarị ye, à Mohabụ kẹ gbọrụḅọ-sọ ḅarị kẹ ye-mịẹ ḅịa jongo ḅaa sara ḅara ḅaa kọsịma tẹẹ.

³⁹ Mohabụ kọsị-sara tẹẹ! Owu pakamaa! Mohabụ tọrụ-tuu tẹẹ. Anị sii gulugulutẹ tẹẹ, tẹ anị ikelema-koro wararị asịẹ mamgba anị komboarị. Yẹrị, KỊNỊNYANAḄỌ ḅe, ọkọ ḅẹẹm.

Mohabụ Tolu ḅọrọ so Ḅẹ Ḅọkọ Ofori

⁴⁰ KỊNỊNYANAḄỌ ḅe minini tẹ mịnẹ gbọrụ sịẹ igo fiin ḅara fiin ideri-ḅo Mohabụ ọgọnọ sịẹ ḅa, amịna apamba ma finji wararị ḅara ḅụ,

⁴¹ tẹ ama ma na kụrọnị-ayọ mamgba ini ọkị fama ḅa. Anị ene mẹ ḅụ, Mohabụ ḅẹ ọmụapụ ma tẹmẹ-naịn-naịn ḅa, iyi la tẹ ẹrẹḅọ ọkụ.

⁴² Mohabụ gulugulu ḅa, tẹ ḅarị jen kẹ sịẹ ẹrẹ fị ḅịa, anị kọngọ-kụrọma ị̀ pịrịm ẹrẹsị.

⁴³ Tẹmẹ-naịn-naịn na, olulu na, ḍiein na sime tẹ Mohabụ ḅẹ apụ koruarị. KỊNỊNYANAḄỌ ḅe ọkọ ḅẹẹm.

⁴⁴ Tẹmẹ-naịn-naịnma ye mẹ gbarị ḅọ gbarị ḅọ, olulu ma ḅio ḅịkị sọ ḅa; tẹ olulu ma akaka kpọlị paka-ḅo ḅọ paka-ḅo ḅọ, ḍiein ma ḅio koro ḅa, KỊNỊNYANAḄỌ ḅe kẹ Mohabụ guluguluma ḅẹ sakị mẹ tọn koroma tẹ ẹrẹsị.

⁴⁵ Ọmụ ḅio mangị paka tẹ ḅarasụa nyana-a apụ, ḅụụkụrọma tẹ Hẹsịbọnị, Ama-da Siyọnị ḅẹrẹtọn sime opu ama mẹ ḅio sịḅị ḅọị ḅẹ ḍọkịarị, kụma anị kọrịarị fịnị ḅio. Fịnị Mohabụ ọmụ gbin ḅẹlẹma apụ ma na jen-apụ na bịama-bịama ọmụ atọrọkọ ma na gele-tụndụ ayọ ma na ịn dọkịma tẹẹ.

⁴⁶ Mohabụ ḅẹ apụ ma ḍiki-sịḅị-kụrụkụrụụ! Sunsin Kẹmosi pịrị sime apụ ma gulugulu tẹẹ, ini ịna owiapụ-awọmẹ na eremịna-awọmẹ na kun-so tẹẹ ikoliapụ ḅara ḅụ.

⁴⁷ Kụma tọrọkọ-jụ ḅo-ḅarị ene ma ḅụ KỊNỊNYANAḄỌ ḅe mịẹ tẹ Mohabụ siin lọkọlọkọ ḅa. Mie-mẹmgba mie KỊNỊNYANAḄỌ ḅe ḍuko tẹ ye mịnẹ anị paka ḅa.