Jerimaya 47 - FỊAFỊA BAỊBỤLỤ

KỊNỊNYANAḄỌ Ḅe Oku Mẹ Filisiteni Gboloma Ye Ḅụ

¹ Tẹrẹmẹ Ijiputi ḅẹ amadaḅọ ḅe owu kẹ Gaza paka KỊNỊNYANAḄỌ ḅe ẹkwẹn ị̀ pịrịtẹ Filisiteni gboloma ye ḅụ.

² Ori mẹẹ, “Ḍikii! Minji mẹ sun-sun gelearị mẹ ọgọnọ-jụ ẹgẹnẹ-minji kịka tẹ tọrụ ḅara kẹ owi ma ḅo ḅa. Anị ama kiri mẹ gbaịn ḅa anga-anga ḅụ na anị ḅụ sime ye na, opu ama ma na arị aḅio angarị apụ na. Kịnị ḅarasụa gotẹ oloku pakama ḅa, tomikiri emi ḅọ goḅọ-goḅọ tẹmẹ akụ ḅara kẹ owu ḅa.

³ Ini asụ aḅụọ kiri ḅụ fiearị ye naa ḅa, kirimẹnjị-arụ ma kiri ḅụ gbolokiarị ye, arịḅẹ aḅụọ ma ḍarị ye na. Ḍapụ-na-iyingiapụ-na tọrụ pịkị ọḅụ ḍiki ḅịa ịna awọmẹ gotẹ, ịna aḅara ma ịna akaka kpalasaịma siin sara ḅa.

⁴ Filisiteni kaan-guluguluma ḅẹ sakị mẹ ḅo la tẹẹ, Taya na Sayịdọnị na ḅụ ḅo ḅarị ḅarasụa mẹ tẹ kiri kọn ye mẹ kiki ḅa. Yẹrị, KỊNỊNYANAḄỌ ḅe, Filisiteniapụ ma ḅaa guluguluma ḅa, inimgba tẹ Kiriti pọkụ-ḅọkọ ḅụ sime tẹ ḅo apụ ma.

⁵ Opu kururu ḅo Gaza ḅẹ apụ la tẹ, tẹ Asẹkẹlọnị ḅẹ apụ gbọsime wararị Filisiteni ḅụ kirikọn-apụ ma kururu mu tọ-sakị la ḅẹ?

⁶ Oloku pakama, ‘KỊNỊNYANAḄỌ ḅe okologie! Ị́ pẹlẹ-pẹlẹ sara mu tọ-sakị la ḅẹ? Pịkị mu í lubulu ḅio sọ, anịanga sime tẹ ịnyọsara!’

⁷ Kụma ndẹẹ àrị inetẹ ịnyọsara ḅẹ ḅara, arị anị kọrị ḅẹ ye kẹ anị pịrị tẹ so sakị? À tọn anị pịrị tẹ anị owu kẹ Asẹkẹlọnị na anị ḅio angarị apụ na paka.”