Jerimaya 46 - FỊAFỊA BAỊBỤLỤ

Owu Ijiputi Ḅara-si Tẹẹ Kakẹmisi Ḅụ

¹ KỊNỊNYANAḄỌ ḅe ẹkwẹn ị̀ pịrịm sịẹ-sịẹ gboloma ye ḅụ,

² Ijiputi ḅụ saakị. Mie ò ḍuko ị̀ pịrị ye Ijiputi ḅẹ Amadaḅọ Neko ọmụ-ogbo gboloma ye ḅụ, anie Babịlonịya ḅẹ Ama-da Nebukadineza tọrọkọ owu-ḅara-sii ye mẹ, Kakẹmisi ḅụ, Yuferetisi Tọrụ kpeki ye mẹ, Jehohakịmụ ḅo Juda da tẹ ini karama kụra mẹ ḅụ:

³ Ijiputi ḅẹ ọmụ-alapụ ma olokuarị: Ọmịnị ọmịna ekpeke ma ọlọ wẹrị tẹ mẹnjị ọmụ ḅio sọọ!

⁴ Ọmịnị ọmịna asụ ma tẹlẹma tẹ arị kpọlịị! Ọmịnị ọgbụrụ-sụn tẹ ọmịna okpoko-asun suree! Ọmịna aḅẹkẹrẹ farị oḅumaa! Ọmịna owuna-aị ọkị ḅirii!

⁵ “Kụma à tiye ẹrịarị?” KỊNỊNYANAḄỌ ḅe gbelarị. “Ịn tẹmẹ-naịn-naịn ḅụ pịkị ọḅụ daarị. Ịna ọmụapụ ma ini in dee-pịkị tẹẹ; ḅalafa ịn gbaịn tẹ ini ine-ḅara ine-ḅara kẹ fọnya mangịarị tẹ ọḅụ ḍiki-a.

⁶ Fọnya mangịarị apụ ma ịn mangị-so ḅịa; ọmụapụ ma ịn pụkọ-so ḅịa. Ọgọnọ-jụ ḅụ, Yuferetisi tọrụ mẹ akaka, ịn pụmbụ-pụmbụ ḅịkịarị.

⁷ Ḅie ḅọrọ tụḅọ tẹ Nayịlị tọrụ kịka tẹ sun-sun gelearị, sun amịna akaka gbaịn-arị tọrụ ọkụ?

⁸ Anie Ijiputi, Nayịlị tọrụ kịka tẹ sun-arị, tọrụ tẹ sun amịna akaka gbaịn-arị ye kịkarị. Ijiputi ḅẹẹm: À sun gele tẹ bebe tomikiri mẹ gbaịn ḅa; àrị opu ama ma na anị ḅio anga apụ ma na guluguluma ḅa.

⁹ Tọn asụ ma pịrị in muu, tẹ kirimẹnjị-ọmụarụ sọ mbelembelee! Ọmụapụ fịrịma pakamaa; Sudanị na Libiya na ḅụ ḅo owiapụ, ekpeke na ini na, tẹ Lidiya ḅụ ḅo aka-nimi iboli dogiapụ.”

¹⁰ Mịmgba mẹ mie Tẹịn-Ḅẹrẹtọn-Kụrọ-Nyana Kụrọmamgba nyana KỊNỊNYANAḄỌ ḅe eneḅaka mẹ, mịmgba ọ̀ gbẹẹfị ḅii ḅa; mịmgba ò fomu-ḅara kẹ si kẹ ọ̀ tọn apụ ma pịrị ḅa. Ori okologie ḅuru fị nwenii anị furo ḅin ḅa, tẹ ịna ọmbie ḅuu nwenii anị anị pọkọ-ta ḅa. Mịmgba Kụrọmamgba Nyanaḅọ ḅe amịna anama kẹ agba mịẹarị ọgọnọ-jụ mẹ ḅụ, Yuferetisi tọrụ akaka ḅụ.

¹¹ Ijiputi-ḅẹ-apụ, ó Giliyadi mu tẹ obi-gwọ-ḍiri ḍọkịị! Ọmịna obi-gwọ-aḍiri mamgba ye mịẹ-a aị sọ tẹẹ; gberie-sọ ḅarị inetẹ ọ́ gwọ ḅịa.

¹² Sịẹ-sịẹ ma ọmịna ḅụụ-jịrị gboloma ye naa tẹ ḅẹḅọ-ḅẹḅọ ọmịnị owuarị ye naa tẹ. Gbọrụ ọmụḅọ osi-ḅọ ḅụọ tala tẹ, tẹ ini maa apụ ḅịkị kiri koro tẹ.

Nebukadineza Ḅoarị Mẹ

¹³ Ama-da Nebukadineza, Babịlonịya ḅẹ amadaḅọ ḅe, owu kẹ Ijiputi paka ḅẹ ḅo sakị, KỊNỊNYANAḄỌ ḅe ẹkwẹn ị̀ pịrịm. Ori mẹẹ:

¹⁴ Ijiputi ḅẹ ama ma ḅio ḍuko wasama, Migidọlị na, Mẹmụfịsị na, Tafanisi na ḅụ, ọ́ tẹlẹma tẹ ọmịna aḅụụ ḍụa; ọmịnị-mgba ọmụ ḅio ini ọ́ ḅaa-guluguluma ḅa!

¹⁵ Tiye ẹrẹsị ọmịna opu kụrọ tamụnọ Apisi ḅe ḅịkị? KỊNỊNYANAḄỌ ḅe ò fomu kiri gbinm!

¹⁶ Ọmịna ọmụapụ ma pụmbụ tẹ ḅịkị tẹẹ; ọrụḅọ-ọrụḅọ osi-ḅọ ḅẹẹarị: Saramaa! Yee wa so ama ọgọnọ wamịna atomi dama-mu, tẹ si kẹ kịnị tọn ḅọ ḅe ogie gbarị!

¹⁷ “Ịwọ ẹrẹ kẹ Ijiputi ḅẹ amadaḅọ ḅe sịịn, ‘Ye-yọ Fiema Ḅụụ Boma Ḅọ, Tẹ Amịna Sakị Gbarị Ḅọ.’

¹⁸ Yẹrị, Kụrọmamgba nyana KỊNỊNYANAḄỌ ḅee, amadaḅọọ. Yẹrị anie Ḍumo wararị Tamụnọ ḅe. Tabọ Tụndụ gele fatẹ tụndụ ma saḅa ḅọrọ ḅara tẹ Kamẹlị Tụndụ mẹ sịẹ gele iwo abajị mẹ ḅọrọ ḅara, anị ḅara mie owu kẹ ị́ pakarị ḅọ ḅe kụrọ sime ḅarị ḅara.

¹⁹ Ọmịnị Ijiputi-ḅẹ-apụ, Ọ́ tẹlẹma tẹ ini ikoliapụ ḅara kẹ ọmịnị ọkị so! Ịn Mẹmụfịsị kẹ ịkpa sọma ḅa, si fama tẹ gbọrụḅọ-sọ anga-a yọ.

²⁰ Ijiputi kịkarị ye anie tim-timtẹ nambulo, ọgọnọ-jụ ḅụ ḅo mgbele tẹịn ye ọkụ.

²¹ Árị ọkọ ḅo ọmụapụ kịngẹ sọ kala anambulo kịka tẹ ḅarasụa nyana á pịrị-a. Ịn sịẹsime tẹ owu-sọ-a; inimgba pịkị tẹ mangịm. Ịna si-so ene ḅo ịn lam, ini ịn ḅaa-guluguluma ḅẹ sakị mẹ.

²² Ijiputi mangị-soarị, oronwi ḅio-fiema ḅara kẹ ḅio-fiemarị, si kẹ kịnị tọn apụ ma tolu-sịẹarị sakị. Kumbu-kumbu mie ịn kẹ owu mẹ sọarị, sịn pẹlẹ-pẹlẹ-gbin-arị owiapụ ọkụ

²³ tẹ opu-piri gulugulumarị ye kịkarị. Ịna owiapụ ma ḅaka ḅara ḅụ ịn kịẹnkịẹn-ọkụ-ofori; ịna ọmụapụ ma igurube nẹngịm kịẹn-ḅịḅị ḅụ.

²⁴ Ini Ijiputi-ḅẹ-apụ ma kẹ ḅụụ-jịrị ḅio suutẹ ọgọnọ-jụ ḅo apụ ma ịn nẹngịma tẹẹ ọmụ kiri ḅụ. Yẹrị, KỊNỊNYANAḄỌ ḅe, ọkọ ḅẹẹm.”

²⁵ Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ḍukoarị, “À fomu-ḅara kẹ Amọnị pịrị ḅẹ-yearị, Tibesi tamụnọ ḅe, Ijiputi na anị ḅẹ atamụnọ ma na amadapụ ma na kẹ sụa. Àrị Ijiputi ḅẹ amadaḅọ ḅe na ọ̀ kẹ ḅiokpọmarị apụ mamgba na ọkị

²⁶ tẹ ịn saḅama ịn ḅaa ḅẹ-ḅiiarị apụ ma pịrị ḅẹ-yearị, Ama-da Nebukadineza, Babịlonịya daarị ḅọ ḅe, na ori ọmụ-ogbo na. Kụma sakị ḅọrọtẹ so, kịnị pịkị siin Ijiputi ḅụ anga ḅa, ḅọrọtẹ sakị ḅụ ịn mịẹ ḅara. Yẹrị, KỊNỊNYANAḄỌ ḅe, ọkọ ḅẹẹm.”

KỊNỊNYANAḄỌ Ḅe Ori Atomi Ḅọrọma ḅa

²⁷ Ị̀ atomi, ọ́ ḅalafa ma, Izirẹlịapụ, ọ́ tẹmẹ-naịn-naịn ma, Anị sụma-jụ ḅẹ amakiri mẹ ḅụ arị ọ́ pụkọ-pakamaḅo ḅa, ọmịnị ikoliapụ amakiri mẹ ḅụ. Ọ́ pịkị ama ḅo tẹ dein ḅụ anga ḅa; ye ọ́ la ḅịa, tẹ gbọrụḅọ-sọ mịẹ tẹ ọ́ ḅalafa ḅịa.

²⁸ Àrị ọ́ ḍọkụma-ḅo tẹ ọ́ ḅọrọma ḅa. À sịẹ-sịẹ mamgba guluguluma ḅa, àrị ọ́ gala-gala mu tẹ ayọ ma, kụma ọmịnị rẹ arị ó guluguluma ḅịa. À fomu-ḅara kẹ ọ́ pịrị-a ḅara kẹ ọ́ wẹrịso tẹ ó so ḅịa, kụma àrị ó fomu ḅẹ sakị à fomu na-iḅi ḅara kẹ ó fomu ḅa. Yẹrị, KỊNỊNYANAḄỌ ḅe, ọkọ ḅẹẹm.