Jerimaya 44 - FỊAFỊA BAỊBỤLỤ

KỊNỊNYANAḄỌ Kẹ Izirẹlị Ḅẹ Apụ Tẹ Ijiputi Ḅụ Sime Apụ Fịrịma Oku

¹ KỊNỊNYANAḄỌ ḅe ẹkwẹn ị̀ pịrịm Izirẹlịapụ tẹ Ijiputi sịẹ ḅio angarị apụ ma gboloma ye, mịna opu ama ma ḅio — Migidọlị na, Tafanisi na, Mẹmụfịsị na, pịkị sịẹ mẹ ḅẹ suku-jụ da pakịrị anga na.

² Kụrọmamgba nyana KỊNỊNYANAḄỌ ḅe, Izirẹlị sunsin pịrịarị Tamụnọ ḅe, ḅẹẹm, “Ọmịnị ḅarana àrị ọkị-ḅo Jeruselemu na Juda ḅẹ osi ama ma na ọgọnọ gbana gulugulu mẹ ẹrị tẹẹ. Mịọkụ mẹ ḅụ sọ arị paa kaan-sara wararị, tẹ gbọrụḅọ-sọ arị ḅio anga-a,

³ ịna atomi ma mịẹ asi tẹ ị̀ ịganịma ye mẹ ẹrẹsị. Ini agba mịẹ pịkị fịrịmẹnjị oru-atamụnọ pịrịm, oru-tamụnọ tẹ ini-o, ọmịnị-o, ọmịna elemu-aḍapụ-o jene-jene amụ sunsin pịrị-a aị.

⁴ Àrị ị̀ afịrịmẹnjịapụ ịkịankoroapụ ma kẹ ịn fịrịma-fịrịmam, anie mịẹ ḅalafama ye mẹ tẹ à ḍiki-ḅioḅuarị ye mẹ ḍuko ọ́ pịrị apụ ma.

⁵ Kụma ó poki ḍụkụ-a anịanịa kẹ ye sịn. Agba mịẹ oru-atamụnọ pịrị si mịẹ mẹ ḅụ, ọ́ ḅara-siin ḍụkụ-a.

⁶ Mie ḅụ arị ị̀ ịganị na ì owi-ịganị na ọsụma Juda ḅẹ ama ma na Jeruselemu ḅẹ etela ogbo ma na ọgọnọ sara tẹ fịnị kẹ arị ḅụ sụam. Arị kan-sara sime tẹ sịḅị-kanakanama ye sọ ḍiki apụ pịrịm, ḅo mịmgba la sọ arị simearị ḅara mẹ.

⁷ “Tẹ mie ḅụ, yẹrị, Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, gbelarị mịọkụ, tiye ẹrẹsị ọ́ mịẹ simetẹ siye kẹ ọmịna ḅụụ mịẹarị? Ó ḅiiarị ọ́ fịị gulugulu dogi-ḅo owiapụ na ereme na, awọmẹ na, ḍọkọḍọkọ-awọmẹ na ọgọnọ gbanarị mịẹ tẹ ọmịna ḅụ ḅẹ gbọrụḅọ sọ kirikọn ḅịa ḅara.

⁸ Ó tiegotẹ ị̀ ịganịmarị oru-afụḅara tẹkẹ na agba mịẹ oru-atamụnọ ma pịrị na ḅụ, mị yọ Ijiputi mẹ ḅio, ọmịnị anga ḅẹ ḅo yọ mẹ. Ọ́ ḅọrọ ọmịna aḅụụ fama ḅẹ-ḅiiarị mụnọọ, mịẹ tẹ tomikiri ḅẹ goyegoye ó ḍiki-iderima tẹ ọmịna ẹrẹ kẹ ye karị?

⁹ Juda ḅẹ ama ma ḅio na, Jeruselemu etela-ogbo ma ḅụ na ọmịna elemu-aḍapụ na. Juda ḅẹ amadapụ ma na ịna ereme na, ọmịnị na ọmịna tapụ na mịẹ tẹ si-sịḅịḅio amịẹaị ma ọ́ kẹ ḅioḅọrọma tẹ?

¹⁰ Kụma ḅo mịmgba la sọ amụ ọ́ paa ọmịna aḅụụ lẹgịma-a. Amụ ọ́ paa ị̀ kụn tẹ à sụa ọmịna elemu-aḍapụ ma pịrị oloko mamgba ḍiki anga-a.

¹¹ “Mie ḅụ, Yẹrị, Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, tọrụ pịkị ọ́ da tẹ Juda mamgba ḅaa guluguluma ḅa.

¹² Juda ḅẹ apụ tẹ kirikọn-apụ ma kịngẹ kụma, tẹ ịn mu Ijiputi ḅụ anga-anga-a ịgbanịarị apụ ma, arị ẹrị ḅa mịnẹ inimgba gulugulu-faam. Inimgba, opu na kala na, Ijiputi ḅụ fịị ḅa, anị ḅọrọ ọmụ ḅio-o, anịanịa ḅuru-ḅa ḅụ sọ. Ịn sịḅị-kanakanama ye sọ ḅa ḍiki-tọrụ ḅụ; tomi ịn ḍiki-iderima ḅara kẹ ini na mịẹ ḅa tẹ ịna ẹrẹ kẹ ye karị ḅa.

¹³ À fomu-ḅara kẹ Ijiputi ḅio angarị apụ ma pịrị ḅa, à kẹ Jeruselemu fomu gbọrụ ḅara mẹ — ọmụ ḅụ, ḅuru-ḅa ḅụ, pịkị obi ḅụ.

¹⁴ Juda koroma so tẹ Ijiputi mu atomi ma ḅụ gbọrụḅọ-sọ ḍumo tẹ fịị-a so ḅịa. Ini ḅẹ gbọrụḅọ-sọ pịkịma Juda mu ḅịa, in ḅiiarị ịn pịkị mu siin anga nwẹn ḅẹẹ anga mẹ. Gbọrụḅọ sọ pịkị so ḅịa, ọmụ mangị kọn boowa apụ sikima.”

¹⁵ Anịtẹso owiapụ mamgba tẹ nimim mịnẹ ịna ereme agba mịẹ-mịẹ oru-atamụnọ pịrị tẹ apụ ma, na anịanga sịẹsime-sime ereme ma na, pịkị Izirẹlịapụ tẹ Ijiputi sịẹ mẹ ḅẹ suku-jụ ḅụ anga sime apụ ma kẹ ịna ḅụụ sụa — inimgba kịẹn-ḅịḅị ḍụḅam — nwẹnị ị̀ ḅẹẹ,

¹⁶ “Wa poki ḅịa, KỊNỊNYANAḄỌ ḅe ẹrẹ ḅụ í ḍuko wa pịrị tẹ ye mẹ.

¹⁷ Wa ḅiim wa mịẹ ḅẹ ye goyegoye wa mịẹ ḅa. Wa agba mịẹ wamịna oru-tamụnọ, So Amada-Ẹrẹḅọ ma pịrị ḅa, tẹ pịkị iru sara á pịrị ḅa, anie wamịnị na, wamịna elemu-aḍapụ na, wamịna amadapụ na wamịna sịḅịdapụ na mịẹ sime gbọrụ ḅara mẹ Juda ḅẹ ama ma ḅio na Jeruselemu etela-ogbo ma na ḅụ. Wa ọkọ mịẹ tẹso, wa fịye nyanam, wa lọkọlọkọm, ḅụụ-fụka sọ ḅo-ḅo wa la-a.

¹⁸ Kụma agbamịẹ So ḅẹ Ama-da Ere-oru ma pịrị mẹ dasịẹma tẹ ḅarị iru sara á pịrị-a kụra ḅio, wa ḅarị gberie-sọ nyana-a, tẹ wamịna atomi pịkị ọmụ ḅio na ḅuru-ḅa na ḅụ fịị tẹẹ.”

¹⁹ Ereme ma pịkị kẹ sụa ḍukom, “Wa kịkị kẹ So ḅẹ Ama-da Ere-oru ma kịkama mịẹ, tẹ agbamịẹ á pịrị, tẹ iru sara á pịrị sime sakị ḅụ, wamịna adiapụ ma wa mịẹ sime ye mẹ ḅẹlẹmam.”

²⁰ Anịtẹso àrị owiapụ mamgba na ereme na tẹ mịẹ ḅara mẹ kẹ ị̀ pakịrị apụ ma ḅẹẹm,

²¹ “Àrị agba ma tẹ ọmịnị na ọmịna elemu-aḍapụ ma na, ọmịna amadapụ na, ọmịna sịḅịdapụ na, amakiri mẹ ḅẹ apụ ma na mịẹ aị ma, Juda ḅẹ ama ma ḅio na Jeruselemu etela-ogbo ma ḅio na ọ́ sịn-arị KỊNỊNYANAḄỌ ḅe ori arị gboloma ye nimi-a, anịanịa ọ̀ kẹ ḅioḅọrọma?

²² Mịmgba ḅẹ eneḅaka mẹ ḅụ ọmịna amakiri mẹ si kọsị-sara wararị, tẹ gbọrụḅọ-sọ anị ḅio anga-a. Anị ḅo sịḅị-kanakanama ye sọ tẹ ḍiki-tọrụ ḅụ, tẹ tomi pịkị anị ẹrẹ kẹ ye karịarị KỊNỊNYANAḄỌ ḅe ḅarị jen kẹ ọmịna si-sịḅịḅio mẹ na si amịẹaị ma na inema-a ẹrẹsị.

²³ Mịọkụ ḅo ọ́ la wararị opu ḅụụ-fụka mẹ ọmịnị agba mịẹ-mịẹ oru-atamụnọ ma pịrịarị ye na ọ́ kẹ Tamụnọ mịẹ si, anie ori oloko ma koko-a ḅụ, anị ḅọrọ ḅom.”

²⁴ Anịtẹso Jerimaya kịnị mamgba ḅẹẹm, ereme sọ ịna ḅụ simem, “Ọmịnị Juda ḅẹ apụ tẹ Ijiputi ḅụ simearị apụ, ọ́ KỊNỊNYANAḄỌ ḅe ẹkwẹn naa.

²⁵ Mie Kụrọmamgba nyana KỊNỊNYANAḄỌ, Izirẹlị Tamụnọ ḅe, ḍukoarị ye: Ọmịnị na ọmịna ereme na ọ́ mịẹarị aị ḅụ ḍie-pakama tẹẹ, ó minini ye mẹ ọ́ ḅẹẹ sakị, ‘Ḅịḅị ḍima-a ḅara ḅụ wa minini ịlọ ma wa suma ḅa, mịnẹ wa kụnụaị dọkịma ḅa, pịkị iru sara So ḅẹ Ama-da Ere-oru ma pịrị ḅa.’ Ọkọ ḅẹḅẹ, ọ́ mịẹ ma-muu, ọmịnị ó minini ye mịẹẹ. Ọmịnị ọmịna ịlọ ma sumaa!

²⁶ Kụma mịọkụ ọmịnị Yẹrị KỊNỊNYANAḄỌ ḅe, ì opu kụrọ ẹrẹ mẹ ḅụ minini Ijiputi ḅụ simearị Izirẹlịapụ mamgba pịrị ịlọ mẹ pokii: Gbala-gbala à ḅarị ḍụkụ tẹ ọmịna ḅụ ḅẹ gbọrụḅọ-sọ jen kẹ ị̀ ẹrẹ ḅụ ịlọ minini tẹ ḅẹẹ ḅịa, ‘À ḍumo wararị Tamụnọ ḅe ḅụ karịarị!’

²⁷ ‘Àrị ẹrị ḅa mịnẹ ó lolo ḅịa, kụma ó gulugulu ḅa. Ọmịnị-mgba fịị ḅa, anị ḅọrọ ọmụ ḅio-o, obi ḅụ-o, nwenii ọmịna ḅụ ḅẹ gbọrụḅọ-sọ ḅarị kọọn ḅịa.

²⁸ Kụma ọmịna ḅụ ḅẹ boowa apụ fịị-a so tẹ Ijiputi ḅụ pịkị-so Juda mu ḅa. Anịtẹso fịị-a so apụ ma nimi ḅa tụḅọ ẹkwẹn ḅo karakara aị sọ, ị̀ aị mụnọọ ịna aị.

²⁹ Yẹrị, KỊNỊNYANAḄỌ ḅe elekima kẹ ó ḍie ḅa mịnẹ à fomu-ḅara kẹ ọ́ pịrị ḅa mị yọ, tẹ à minini ma guluguluma ọkị-ḅo ọmịna ọgọnọ gbana ḅa ḅẹ ye mẹ nwẹnị karakaraye sọ ḅa.

³⁰ Àrị Ijiputi ḅẹ Amadaḅọ Hofara saḅama si kẹ ọ̀ tọn apụ ḅara-ḅio suu tẹ ini ọ̀ ḅaa ḅa, anie à Juda ḅẹ Amadaḅọ Zẹdẹkaya saḅama Babịlonịya ḅẹ Amadaḅọ Nebukadineza ḅara-ḅio suu gbọrụ ḅara mẹ, anie si kẹ ọ̀ tọn tẹ ọ̀ ḅaa ḅii ḅọ ḅe.’ ”