Jerimaya 43 - FỊAFỊA BAỊBỤLỤ

In Jerimaya Ọkị-so Ijiputi Mum

¹ À KỊNỊNYANAḄỌ ịna Tamụnọ ḅe ị̀ fịrịmam à ḍuko ịn pịrị ḅẹ ye goyegoye ḍuko ịn pịrịm.

² Anịtẹso Azaraya, Hosaya tụḅọ, na Johananị, Kariya tụḅọ, na osi Opu ẹkwẹn kọn-kọn atomi ma na ị̀ ḅẹẹm, “Í iruoarị. KỊNỊNYANAḄỌ wamịna Tamụnọ ḅe ị́ fịrịma-a í ḍuko wa pịrị wa mu Ijiputi ḅụ angama.

³ Baruku, Nẹrịya tụḅọ í toluma tẹ ị́ wamịnị na tụḅụrụarị, mịẹ tẹ Babịlonịya ḅẹ apụ ma wa nẹngịma tẹ wa ḅaa anịanịa wa ọkị-so Babịlonịya mu ḅẹ ḅara.”

⁴ Mie ḅụ Johananị-o, ọmụ-alapụ ma-o, tomi ma ḅụ ḅẹ gbọrụḅọ kịngẹ-o, KỊNỊNYANAḄỌ ḅe tọn ye mẹ poki tẹ Juda ḅẹ amakiri mẹ ḅụ sime-a.

⁵ Anịtẹso Johananị na ọmụ-alapụ mamgba na nwẹnị Juda ḅụ kirikọnḅọ goḅọ-goḅọ ọkị-so Ijiputi mu, mangị gala-gala mu jen asịẹ ḅụ sime tẹ pịkịma-ḅo apụ sọ ọ̀ kẹ ịna ḅụ sụam:

⁶ owiapụ na, ereme na, awọmẹ na, amadaḅọ ḅe eremịna-awọmẹ ma na. Nebuzaradanị ḅẹrẹtọn ọmụapụ pịrị-ḅọ ḅe kẹ Gadalaya suku-ḅio wẹrị tẹ ò ḍikiḍiki sime apụ mamgba sọ ịn kẹ sụa som, Baruku na yẹrị na sọ ịna ḅụ simem.

⁷ Ịn KỊNỊNYANAḄỌ ḅe tọn ye poki tẹ mịẹ-a tẹ so Ijiputi mum, nwenii Tafanisi opu ama mẹ la.

⁸ Anị anga ḅụ KỊNỊNYANAḄỌ ḅe ị̀ ḅẹẹm,

⁹ “Ḍụḅa-ḍụḅatẹ aḍụḅarị ọkị tẹ kẹ ḅọrọ kọnsịnị warị sọarị ḅọkọ mẹ suku ḅụ ḍiḅii, mị opu ama mẹ ḅio. Tẹ ị́ ọkọ mịẹarị sakị, yee Izirẹlịapụ ị́ ẹrị.

¹⁰ Anie ḅọrọ tẹso, ḍuko ịn pịrịị mịnẹ yẹrị Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ị̀ fịrịmẹnjịḅọ Ama-da Nebukadineza, Babịlonịya ḅẹ ḅọ ḅe, kẹ ḅo ḅẹ-yearị, tẹ ori amịna emine kẹ ma aḍụḅarị ma tẹ ḍiḅi aị ma ọgọnọ sịẹma tẹ amịna ama-da akpụrụ-warị mẹ arị gbaịn ḅa.

¹¹ Nebukadineza ḅo tẹ Ijiputi nẹngịma ḅa. Obi ḅụ fịị si-so sime pịrị apụ fịị ḅa, ikoliapụ ḅara kẹ kun-so si-so nyana apụ ini ikoliapụ ḅara kẹ in kun-so ḅa, tẹ ọmụ ḅio ịn ḅaa ḅẹ si-so nyana apụ ọmụ ḅio ini ịn ḅaa ḅa.

¹² Arị Ijiputi ḅẹ atamụnọ-awarị ma dọkịma ḅa, tẹ Babịlonịya ḅẹ amadaḅọ ḅe ịna atamụnọ ma dọkịma-a so-so ori arị tan so Babịlonịya mu ḅa. Anana-ḍikiḍikiḅọ amịna akapa ḅụ iku kpọmbị siin fama ḅara mie Babịlonịya ḅẹ amadaḅọ ḅe kẹ Ijiputi ḅẹ amakiri mẹ kpọmbị fịafịama ḅarị ḅara, anịtẹso ori owu-ḅara-iḅiḅọ sọ ḅa.

¹³ Ijiputi ḅẹ Hẹlịyopolisi ḅụ simearị tẹ ịn kẹ tọn-tọn ḅara wẹrị wararị kịnị kẹ ḅiokoroma aḍụḅarị mamgba ò guluguluma ḅa, tẹ Ijiputi ḅẹ atamụnọ-awarị ma dọkịma kiri lama ḅa.”