Jerimaya 41 - FỊAFỊA BAỊBỤLỤ

¹ Anị kụra mẹ ḅụ ḅẹ sọnọma karama akalụ mẹ ḅụ Isimẹlị, Natanaya owiḅọtụḅọ, pịkị Ẹlịsama taa-owiḅọtụḅọ ḅe, amada-furo mẹ ḅẹ ḅọ, pịkị amadaḅọ ḅe fịrịmẹnjị-opuapụ ma ḅẹ gbọrụḅọ, oyi owiapụ na Mizipa ḅụ Gedalaya ẹrị ḅẹ mum. Inimgba yefịarị ogbo,

² Isimẹlị Netanaya owiḅọtụḅọ ḅe na ori na simearị oyia owiapụ ma na nwẹnị saakị tẹ ịna okologie wụrọ-pakama tẹ kẹ Gedalaya Ayikamụ owiḅọtụḅọ, pịkị Safani taa-owiḅọtụḅọ ḅe ḅaa, gbala Babịlọnị Amadaḅọ ḅe ori kẹ Gọvịna mịẹm ẹrẹsị.

³ Isimẹlị pịkị Gedalaya na Mizipa ḅụ sime Izirẹlịapụ sọ kẹ sụa ḅaam, pịkị Babịlonịya ḅẹ ọmụapụ tẹ anịanga sime apụ sọ.

⁴ Anị ḅẹ ene-ḅaa mẹ ḅụ gbọrụḅọ-sọ amụ in Gedalaya ḅaa ye gboloma ye nimi-a ogbo,

⁵ owiapụ inia si nwẹnị Sẹkẹmụ na Silo na Sameriya na ḅụ sime tẹ ḅo la. Ini ịna asịḅị sẹịn-kpụkpụnụmam, tẹ ịna akapa kan tẹ ịna oju pẹlẹ-pẹlẹ pokolomam. Ini mbịaka na kụnụaị na ọkị-ḅo Tamụnọ-warị mẹ ḅio ḅo agbamịẹ ḅẹm.

⁶ Mie ḅụ Isimẹlị Mizipa ḅụ sime tẹ ini na bịama ḅẹ tẹ paka mum, ò muarị sakị ori owuarị. Ò ḅo ịn la sakị ọ̀ ḅẹẹm, “Sisi ọ́ sọ-ḅo Gedalaya ẹrịị.”

⁷ Ini opu ama mẹ ḅio sọ-muarị-muarị, Isimẹlị na ori atomi na nwẹnị ịn ḅaa tẹ ịna oju-akpakpa ma kẹ suḅe ḅio gbin suu.

⁸ Kụma ịna ogbo mẹ ḅio oyi owiapụ sime tẹ Isimẹlị ḅẹẹm, “Sisi wa ḅaa ma! Wa ịn kẹ witi na, bali na sịn afịaị na, olivu-olo na, ḅẹm na kẹ ḍụọ ḅio ḅọị wararị.” Mie ḅụ ọ̀ ḅarị ịn ḅaa-a som.

⁹ Isimẹlị ọ̀ ḅaa atomi ma oju-akpakpa ma kẹ gbin suu suḅe mẹ anie Ama-da Asa soku opu suḅe mẹ, Izirẹlị ḅẹ Amadaḅọ Basa owu kẹ ọ̀ paka sakị. Isimẹlị fịtẹ oju-akpakpa ma kẹ suḅe mẹ ḅio suu ḅinmam.

¹⁰ Anịtẹso Isimẹlị nwẹnị amadaḅọ ḅe eremịna-awọmẹ ma na Mizipa ḅụ, ḅẹrẹtọn ọmụapụ ma pịrịarị ọmụ-alaḅọ Nebuzaradanị ḅe kẹ Gedalaya suku-ḅio wẹrị apụ ma ḅụ kirikọn-apụ mamgba na ọkị-so, ikoliapụ ḅara ḅụ, tẹ ịn kẹ Amọnị ibe pakịrị anga da-mum.

¹¹ Johananị na ọmụ-ogbo mẹ ḅẹ sịḅịdapụ tẹ ori na sime apụ ma na nwẹnị Isimẹlị mịẹ siye mẹ naa.

¹² Mie ḅụ ịn nwẹnị ịna atomi na paka mu ò ḍuka, tẹ Gibiya ḅẹ opu ḍaḅa mẹ kpeki ḅụ ọ̀ la.

¹³ Isimẹlị ikoliapụ ma Johananị Kariya tụḅọ ḅe na ọmụapụ ma sịḅịdapụ tẹ ori na sime apụ na ẹrị tẹso ịn nwẹnị ḅioḅẹlẹ.

¹⁴ Anie ḅụ Isimẹlị Mizipa ḅio dogi-so ikoliapụ nwẹnị pịkịma-ḅo, ma tẹ Johananị Kariya tụḅọ ḅe dama-mu.

¹⁵ Kụma Isimẹlị na ori atomi ma ḅẹ ninea apụ na ịna ḅara pẹlẹ mangị-so Amọnị ama mum.

¹⁶ Anịtẹso Johananị na ọmụapụ sịḅịdapụ ma tẹ ori na sime apụ ma na nwẹnị ò Mizipa ḅụ Gedalaya ḅaa tẹso, Isimẹlị kẹ ikoliapụ ḅara ḅụ ọkị-so sime apụ ma kẹ so, tẹ nwẹnị in ḍikiḍiki — ịna ḅụ ọmụapụ na, ereme na, awọmẹ na, ḅụụ-pootẹ owiapụ na simem.

¹⁷ Ịn nwẹnị so Ijiputi mu ḅẹ tẹ saakị mẹnjị mu, tẹ nwẹnị Bẹtịlịhẹmụ kpeki wararị Gerutu-Kimihamụ ḅụ daasịẹ, anie

¹⁸ Babịlonịya ḅẹ apụ ma ḅara-gbarị ḅẹ ḅara. Ịn Babịlonịya ḅẹ apụ ma gotẹ ḅalafaam, anie Isimẹlị, Netanaya tụḅọ ḅe Gedalaya, Ahikamụ tụḅọ ḅe ḅaa ye mẹ ẹrẹsị, anie Babịlonịya ḅẹ amadaḅọ ḅe kẹ ama mẹ ḅụ ḅẹrẹtọnḅọ sọma ḅọ ḅe.