Jerimaya 40 - FỊAFỊA BAỊBỤLỤ

Jerimaya Gedalaya na Simem

¹ KỊNỊNYANAḄỌ ḅe ẹkwẹn ị̀ pịrịm, Nebuzaradanị, ḅẹrẹtọn ọmụ-ogbo mẹ pịrịarị ọmụ-alaḅọ ḅe ị̀ ḅụụ ḅara-siin tẹso, Rama ḅụ. Ini ikoli kẹ ị̀ ịkasị tẹ ị̀ ọkị osi apụ ma tẹ Jeruselemu na Juda na ḅụ ịn kun apụ ma ḅụ sụa tẹ kẹ so Babịlonịya mu simem.

² Ḅẹrẹtọn ọmụ-ogbo mẹ pịrị ọmụ-alaḅọ ḅe ị̀ ọkị sikima tẹ ḅẹẹm, “KỊNỊNYANAḄỌ ị́ Tamụnọ ḅe gulugulu kẹ mị amakiri mẹ ẹrẹmam,

³ tẹ mịọkụ ò ḅiim ọ̀ mịẹ ḅẹ ye mẹ ọ̀ mịẹ tẹẹ. Mie-mẹmgba gotẹ mịẹ ye ị́ atomi ma si kẹ KỊNỊNYANAḄỌ ḅe mịẹ tẹ ọ̀ ḅịḅị poki-a.

⁴ Mịọkụ arị ị́ aḅara ḅụ ikoli ma siin tẹ ị́ ḅụụ ḅara-siin-arị. Í ḅiiarị ị́ ị̀ na so Babịlonịya mu ḅẹḅẹ í inetẹ ọkọ mịẹ ḅa, tẹ arị í ḍikiḍiki ḅa. Bebe ama kiri mẹ sime ị́ pịrịm, sẹlẹ tẹ í ḅii-anga ḅii-anga mu.”

⁵ Amụ à pakịrị-a ogbo Nebuzaradanị ḅẹẹm, “Pịkị-so Gedalaya dama-muu, Ahikamụ owiḅọtụḅọ, pịkị Safani taa-owiḅọtụḅọ tẹ Babịlonịya ḅẹ amadaḅọ ḅe kẹ Juda ḅẹ ama ma ḅẹrẹtọnḅọ mịẹ ḅọ ḅe. Í inetẹ ori na sime tẹ ị́ atomi ma ogboku anga ḅa, anịanịa í inetẹ í kuromarị í na-iḅi anga-anga mu ḅa.” Anịtẹso ọ̀ fịaị kẹ ḍie ị̀ pịrịm à kẹ soo, tẹ ị̀ wẹrịso tẹ arị à mu ḅẹ anga mum.

⁶ À mu Gedalaya na simem Mizipa ḅụ, tẹ ama mẹ ḅụ kirikọn-apụ ma ogboku angam.

Gedalaya, Juda Ḅẹ Gọvịna

⁷ Juda ḅẹ fịrịmẹnjị-opuapụ na ọmụapụ na ḅẹ jen-apụ amụ ḅara saakị Babịlonịya ḅẹ ọmụapụ ma pịrị-a. Ịn naam mịnẹ Babịlonịya ḅẹ amadaḅọ ḅe Gedalaya kẹ ḅẹrẹtọnḅọ sọma tẹ ọ̀ kẹ ama mẹ ḅụ ini ọkị so Babịlonịya mu-a apụ ma ḍikiḍikiḅọ mịẹ tẹ ama mẹ ḅio igoin-tẹịn apụ ma.

⁸ Mie ḅụ Isimẹlị, Natanaya tụḅọ na, Johananị, Kariya tụḅọ na, Sẹraya, Tanihumẹti tụḅọ, Ẹfayị owiapụ-awọmẹ ma tẹ Nẹtofa ḅụ ḅo apụ ma, na Jezanaya, Mahaka ḅụ ḅọ apụ ma, na Jezanaya, Mahaka ḅụ ḅo ḅọ ḅe na nwẹnị ịna atomi na Gedalaya dama-mu Mizipa ḅụ.

⁹ Gedalaya nwẹnị ịn ḅẹẹ, “À karakaraye ḍuko ọ́ pịrịarị mịnẹ ó gotẹ ḅara saakị Babịlonịya ḅẹ apụ ma pịrị ḅalafa kọn-kọn ye ofori. Ọmịnị amakiri mẹ ḅụ ekpe-deinma tẹ sime, fịrịmẹnjị Babịlonịya ḅẹ amadaḅọ ḅe pịrị, tẹ ye goyegoye ọmịnị na iḅi ḅa.”

¹⁰ “Yẹrị ḅioju Mizipa ḅụ sime tẹ ọmịna tọrụ-ḍimaḅọ sọ ḅa Babịlonịya ḅẹ apụ ma mị yọ ḅo sakị. Kụma ọmịnị inetẹ iru, sịnmgbọlụ amẹẹ na olivu-olo na kobiri ḅụụ-wẹrịma, tẹ ọmịnị ọkị tẹ simearị kala-ama ma ḅio anga ḅa.”

¹¹ Ma ma mịẹarị sakị Izirẹlịapụ mamgba tẹ Mohabụ, Amọnị, Idọmụ na jen asịẹ ma ḅụ sime apụ ma naa tẹ mịnẹ Babịlonịya ḅẹ amadaḅọ ḅe minini ja Izirẹlịapụ pịrịtẹ in Juda ḅụ sime, ọ̀ pịkị Gadalaya kẹ ḅẹrẹtọnḅọ mịẹ tẹẹ.

¹² Mie ḅụ ini ịn gala-gala mu anga mamgba ḅụ pịkị so Juda ḅom. In ḅo Gedalaya lam Mizipa ḅụ, tẹ anịjụ ḅụ ini iḅiọkụ iru na sịnmgbọlụ na kobirim.

In Gedalaya Ḅaam

¹³ Miemẹ ḅọrọ tẹso, Johananị na ọmụapụ ma sịḅịdapụ ma tẹ amụ ḅara saakị-a apụ ma na Gedalaya dama-ḅom Mizipa ḅụ

¹⁴ tẹ ọ̀ ḅẹẹm, “Í gbeke nimi wararị mịnẹ Bahalisi, Amọnị ḅẹ amadaḅọ ḅe, Isimẹlị fịrịma tẹ ò ḅo ị́ ḅaa?” Kụma Gedalaya anị minini-a.

¹⁵ Anịtẹso Johananị jụmọ ofori anga ḅụ ọ̀ ḅẹẹm, “Yee à mu Isimẹlị ḅaa, tẹ gbọrụḅọ-sọ anị mịẹ ḅọ nimi ḅịa. Tiye ẹrẹsị kịnị ọ̀ wẹrịso tẹ ori ị́ ḅaa ḅẹ? Anie mịẹ tẹ Juu-ḅẹ-apụ mamgba tẹ ḅo ị́ ḅụ kobiri tẹ apụ mamgba gala-gala ḅa, tẹ anị nwẹnị opu ḅụụ-fụka dogi-ḅo Juda ḅụ kirikọn-apụ mamgba pịrị ḅa.”

¹⁶ Kụma Gedalaya pakịrịm, “Anie mịẹ ma! Isimẹlị ḅụ í ḍukoarị ye karakara ye-a!”