Jerimaya 4 - FỊAFỊA BAỊBỤLỤ

Si-ḅụ-pịkị Sịn-ḅịḅị

¹ KỊNỊNYANAḄỌ ḅe mẹẹ: Izirẹlịapụ ọ́ pịkị ḅii ḅẹḅẹ, ọ́ pịkị ị̀ dama-ḅoo. Ọmịnị oru-afụḅara tẹ à ḍiki-ḅioḅuarị aị ma ḅelema tẹ ḅioḅẹngbọ-kẹ-sịrẹrẹ-niḅi ḅara sime ị̀ pịrị ḅẹḅẹ,

² anị kuraye sọ ḅa ọmịnị ị̀ ẹrẹ ḅụ ye karị-karị. Anịtẹso sịẹ-sịẹ mamgba ị̀ ḅara ḅii ḅa arị in bomaa, tẹ ịn nwẹnị ì tokini ḅa.

³ KỊNỊNYANAḄỌ ḅe ḍuko Juda na Jeruselemu na ḅẹ apụ pịrịarị, “Ọmịnị ọmịna fịye ḍiḅi akiri ma tẹ amụ soku-a aị ma soku tẹlẹma; ọ́ nangị ogboku fịye ḍiḅi ma.

⁴ Ọmịnị ị̀ na fị ọḅọkụ mẹ kokoo, ọ́ Nyanaḅọ ḅara ḅụ, tẹ ọmịna aḅụụ wẹrị kpaịnma ị̀ pịrịị, ọmịnị Juda na Jeruselemu na ḅẹ apụ. Ọmịnị ọkọ mịẹ-a ḅẹḅẹ, ị̀ ịganị fịnị kọrị ḅara kọrị ḅa, ọ́ mịẹ tẹ asi-aị ma ẹrẹsị. Anị kọrị ḅa, tẹ anị biinma ḅẹ gbọrụḅọ-sọ paka ḅịa.”

In Ọmụ Kẹ Juda Paka Ḅẹ Tẹ Ẹrẹmarị

⁵ Ọdụ mẹ ofuro bebe amakiri mẹ ikelemaa! Gele-pọkọ kẹ giregirema olokuu! Ḍuko Juda na Jeruselemu na ḅẹ apụ ma pịrịị ịn mangị kụrọnị opu ama ma muu.

⁶ Ḅọrọ mu etela mẹ tọkịma Zayọnị pịrịị. Ḍumo mangị kọn! Sakị fama ma! KỊNỊNYANAḄỌ ḅe opu ḅụụ-fụka na opu ḅaa-guluguluma na ọkị-ḅoarị ọgọnọ-jụ ḅụ.

⁷ Ori ọkụkụ ḅara kẹ ọ̀ ḅọị sime yọ ḅụ Saakị paka sịẹ-sịẹ ma ḅaa-guluguluma ḅẹ ḅara kẹ ḅoarị. Ò Juda ḅaa-guluguluma ḅẹ ḅoarị. Juda ḅẹ opu ama ma kan-sara sime ḅa, tẹ gbọrụḅọ-sọ arị aḅio anga ḅịa.

⁸ Mie ḅụ ọmịnị akpa ḅiri, tẹ lee-leema owuu, KỊNỊNYANAḄỌ ḅe owi ịganị mẹ amụ Juda ḅụ pịkị-so-a ẹrẹsị.

⁹ KỊNỊNYANAḄỌ ḅe ḍukom, “Anị ene mẹ ḅụ, amadapụ na opu fịrịmẹnjịapụ na ịna ḅiokpọ fama ḅa agbamịẹapụ ḅụụ-gbiripu tẹ ịkịankoroapụ ḅụụ-bua ḅa.”

¹⁰ Anịtẹso à nwẹnị ḅẹẹ, “Tẹịn-Ḅẹrẹtọn-Kụrọ-Nyana KỊNỊNYANAḄỌ, ị́ gbọrsịḅị oḅori kẹ Jeruselemu sịn fama tẹẹ! Ị́yẹrị ḅẹẹm mịnẹ dein sime ḅa, kụma okologie ịna pọkọ-ḅẹ-ololo ma bịan-sịẹ tẹ.”

¹¹ Sakị mẹ ḅoarị, anie in ḍuko Jeruselemu ḅụ ḅẹ apụ ma pịrị ḅarị sakị mẹ mịnẹ oju dọkịma ḅara kẹ ọfịrịarị fẹrụ ịkpa mẹ ḅio sime tẹ fiema ịn dama-ḅoarị. Anị mẹmẹ fẹrụ tẹ fun dogi-soarị ye ngẹrị sọ ḅịa;

¹² KỊNỊNYANAḄỌ ḅe tọn ḅara kẹ ḅoarị fẹrụ mẹ kụrọ anie nẹngị ḅa! KỊNỊNYANAḄỌ ḅe ḅioju mị ḅẹrẹ-ḅarasii mẹ pẹlẹ ori atomi ọgọnọ gbanarị.

Juda na Fịya-a Apụ Anị Ikelema Koro tẹẹ

¹³ Ḍikii, kịnị-na-fịya-a ḅọ ḅe oḅuto ḅara kẹ ḅoarị, ò kirimẹnjị-ọmụarụ ma nume-naowu kịkarị, tẹ ori asụ ma mangị igo amẹẹ nẹngịm. Wa fa tẹẹ! Ḅọrọma ḅarị sime wa pịrị-a!

¹⁴ Jeruselemu, í ḅioḅẹngbọ ḅụ si mẹ sịkịrị-siin, mịẹ tẹ ị́ ḅọrọma ḅarị ḅara. Í si-aị kuroma mu tọ sakị la ḅẹ?

¹⁵ Danị opu ama mẹ na Iferemu atụndụ ma na ḅụ oku-mẹnjịapụ si-oku mẹ ḍuko wasamarị.

¹⁶ In ḅo sịẹ-sịẹ ma ḅeri nụnụ tẹ ḍuko Jeruselemu pịrị ḅa mịnẹ kịnị na fịya-a apụ ala-lamatẹ yọ ḅụ sime tẹ ḅoarị. Mịna kịnị-na-fịya-a apụ ma oloku Juda ḅẹ opu ama mẹ da ḅa,

¹⁷ tẹ ịn Jeruselemu ikelema-koro ḅa, gbala tomi ḍụọ ḍiḅi kiri ẹbịarị ye ọkụ, anie árị atomi kọngọ-kụrọma KỊNỊNYANAḄỌ ḅe pịrị tẹẹ ẹrẹsị. KỊNỊNYANAḄỌ ḅe ọkọ ḅẹẹm.

¹⁸ Juda, í miemẹ ọkị-ḅo ị́ ọgọnọ gbanam, ị́ wẹrịtẹ ḍumo kọn ḅara na ị́ mịẹ tẹ aị na ḅụ. Í si mịẹ tọrụsiẹrị mẹ dogi-ḅom; anị gbala-ḅọrọ ogie sọ tẹ í ḅioḅẹngbọ temi tolu-ḅọrọtẹ.

Jerimaya Nyana Ori Atomi Pịrị Kururu

¹⁹ Akụ mẹ! Arị inetẹ akụ mẹ da-a! Ì ḅioḅẹngbọ kịrị ḅara kẹ kpim-kpimarị! Àrị inetẹ yaụ-sime-a; Àrị ọdụ ma fiearị ye naarị, pịkị ọmụ oloku ma sọ.

²⁰ Gbọrụ opu ḅụụ-fụka jen pono ḅoarị; bebe yọ mẹ kaan-sara simearị. Ḅiotọn-a ḅara ḅụ ịn wamịna akpụrụ-awarị ma kaan-guluguluma tẹẹ; kẹ kiki-pẹlẹ-aḅịtẹ ma sọ ịn kanị-sara tẹẹ.

²¹ À nwẹn ḍụrụkụarị ọmụ mẹ ẹrị mu tọ-sakị la ḅẹ, pịkị fie-siin-fiearị ọdụ poki mẹ naa?

²² KỊNỊNYANAḄỌ ḅe mẹẹ, “Ị̀ atomi apantu sọ tẹẹ; ini ì nimi-a. Oḅori sọarị ḍọkọḍọkọ-awọmẹ mie ịn kịkarị; in yefieye naa nyana-a. Siye mịẹ ḅụ ịna ḅara gbana tẹẹ; kụma iḅiye mịẹ ḅụ ini papaa apụ.”

Jerimaya Ḅoarị Ḅaa-guluguluma Mẹ Ḅụ Ẹrị Ịkịan

²³ À kiri mẹ ḍikim — anị kẹ gberie-sọ mịẹ-a ḅara kẹ gbin koro-simem; So-tọrụ mẹ ḅụ sọ, bele ofori.

²⁴ À tụndụ ma ḍikim — arị jike simem, tẹ tụndụ ma nwẹnị yọngọ ama-ḅara na ere-ḅara na da.

²⁵ Arị ẹrịm tomi oforii; feni ma kịngẹ sọ fiin so tẹẹ.

²⁶ Ye pakama-pakama kiri mẹ ḅo ịkpa sọm; anị ḅẹ opu ama ma kan-saram KỊNỊNYANAḄỌ ḅe owi ịganị mẹ ẹrẹsị.

²⁷ KỊNỊNYANAḄỌ ḅe ọkọ ḅẹẹm mịnẹ bebe tomikiri mẹ ḅo kịnị anga-anga-a yọ sọ ḅa, kụma ọ̀ gbọrsịḅị anị guluguluma fama ḅịa.

²⁸ Kiri mẹ kururu ḅa, So-tọrụ mẹ ḅo kanakana ḅa, KỊNỊNYANAḄỌ ḅe ọkọ ḅẹẹm, ori ò kuroma ḍima ḅịa. Ọ̀ tọn pẹlẹ tẹẹ, Ọ̀ ḅarị ọḅụ ḍiki ḅịa.

²⁹ Asụ na iboli na ọmụapụ ma yoko-yokoarị ye mẹ ḅụ ḅẹḅọ-ḅẹḅọ mangị-soarị. Japụ mangị opu piri-ḅio mu ḅa, osi-apụ kpọlị iwo ḅa ịkụ ma ogboku ḅụ. Ama goyegoye ḅụ gbọrụḅọ-sọ kirikọn ḅịa, tẹ gbọrụḅọ-sọ ḅarị jen kẹ arị ḅio anga ḅịa.

³⁰ Jeruselemu, ị́ ḅọrọma ḅẹ ọkụ ḅarị ofori! Í tiegotẹ yela pọkọsụaye ḅiri tẹ ye kẹ ị́ atọrụngbọ ḅọrọma? Ị́ papaa ị́ ḅụụ mịẹ iḅimarị ḍiki-tọrụ ḅụ! Ị́ ḅẹlẹmapụ ma ị́ sịkị tẹ ị́ ḅaa ḅẹ ḍọkịarị.

³¹ Àrị owu pọkọ naam, iyi la tẹ ẹrẹḅọ ọkụ, Oloku ḅịḅị mẹ kịrarama fie ḅara tarị tụḅọ iyiarị ẹrẹḅọ ọkụ. Anie kpọma-ḅẹlẹmarị Jeruselemu owu pọkọọ, kụma á ḅụụkụrọma ịnyọsararị, arị á ḅara sụn-pakama tẹ ḅẹẹarị, “À ḅarị ḅọrọma ḅịa! Ini ị̀ ḅaa ḅẹ ḅoarị!”