Jerimaya 38 - FỊAFỊA BAỊBỤLỤ

Jerimaya Minji Fa tẹ Suḅe Ḅio Simem

¹ Sẹfataya, Matani tụḅọ na, Gedalaya, Pasọ tụḅọ na, Jehukalị, Selemaya tụḅọ, na Pasọ, Malikịja tụḅọ ḅe na nwẹnị naa mịnẹ à ḍuko tomi ma pịrị simem mịnẹ

² KỊNỊNYANAḄỌ ḅe ḅẹẹ tẹẹ, “Mị opu ama mẹ ḅio sime-ḅọ sime-ḅọ fịị ḅa ọmụ ḅio, anịanịa ḅuru-ḅa ḅụ, anịanịa obi ḅụ, Kụma mẹnjị paka mu tẹ amịna ḅụụ sịkị Babịlonịya ḅẹ apụ ma pịrị-ḅọ pịrị-ḅọ ini mḅọ ḅaa ḅịa, ḅarị jen-a sọ mḅọ amịna ḍumo mẹ kịngẹ kẹ paka-ḅo ḅa.”

³ À pịkị ḍuko ịn pịrị simem mịnẹ KỊNỊNYANAḄỌ ḅe ḅẹẹ tẹẹ, “À mị opu ama mẹ kẹ Babịlonịya ḅẹ ọmụ-ogbo mẹ pịrị ḅẹ-yearị, tẹ ini anị ọkị ḅa.”

⁴ Anịtẹso fịrịmẹnjị-opuapụ ma nwẹnị amadaḅọ ḅe dama-mu tẹ ọ̀ ḅẹẹm, “Ḅị tomḅọ ḅe ọ̀ fịị nyanam. Ọ̀ mị-ḅara ẹkwẹn-arị ye, mịẹ-mịẹ tẹ opu ama mẹ ḅio simearị ọmụapụ ḅarị ḅiokpọ nyana-a, tẹ ọ̀ pịkị mị gberie mẹ kẹ opu ama mẹ ḅio kirikọnḅọ goḅọ-goḅọ mịẹarị. Ọ̀ ḅarasụa tomi ma pịrị-a; ye kẹ ịn lama kịngẹ mie ọ̀ ḅiiarị.”

⁵ Ama-da Zẹdẹkaya nwẹnị pakịrị, “Anị ḅara ḅẹḅẹ iḅi lamam, ọmịnị ò ḅiiarị ḅara kẹ ori na mịẹẹ; arị inetẹ ó kiki ḅịa.”

⁶ Mie ḅụ ịn nwẹnị ị̀ ọkị tẹ ị̀ kẹ Amadaḅọ tụḅọ Malikịja suḅe ḅio koroma ḍiki ḅụ, amadaḅọ ḅẹrẹ-siri mẹ nụngọ ḅụ. Anị ḅio minji ofori, opou ngẹrị, tẹ à nwẹnị anị ḅio sọ ḍiḅi.

⁷ Anị sime-ḅara sime-ḅara sọ, Ẹbẹdị-mẹlẹkị, Sudanị ḅẹ pootẹ ḅọ, tẹ Amada-Opu-warị mẹ ḅụ fịrịmẹnjịarị ḅọ, nwẹnị naa mịnẹ ini ị̀ kẹ suḅe mẹ ḅio suutẹ. Anị sakị mẹ ḅụ amadaḅọ ḅe ḅẹrẹ-siri ḅụ emi Benijamịnị Onu-ḅọkọ mẹ ḅụ.

⁸ Mie ḅụ Ẹbẹdị-mẹlẹkị anịanga mu tẹ amadaḅọ ḅe ḅẹẹm,

⁹ “Í opu ḅụ, mịna atomi ma mịẹ ye kura-a. Ịn Jerimaya kẹ suḅe mẹ ḅio suu tẹẹ, anịanga ḅụ ḅuru kịngẹ sọ ọ̀ ḅaa ḅa, opu ama mẹ ḅio fịturu fa tẹ nwẹn ḅẹẹ sakị.

¹⁰ Anịtẹso amadaḅọ ḅe tọn Ẹbẹdị-mẹlẹkị pịrịm mịnẹ ọ̀ tẹra owiapụ ọkị ọ̀ ḅụụ sụa tẹ ị̀ nụnụ pakama-ḅoo, tẹrẹmẹ à fịị sakị la.

¹¹ Mie ḅụ Ẹbẹdị-mẹlẹkị nwẹnị ama-da warị mẹ ḅẹ ngọ-warị mẹ ḅio mu tẹ kẹ ḅarịye mịẹ-a ḅịtẹ ọkị tẹ kẹ ḍiki ḅụ iderima ị̀ pịrị.

¹² Ọ̀ nwẹnị ị̀ ḅẹ mịnẹ arị anị kẹ ì toni-ḅio dẹẹ, ḍiki mẹ ḅarịye kẹ ị̀ lama ḅịa ḅara. À miemẹ mịẹm,

¹³ tẹ ịn nwẹnị suḅe mẹ ḅio ị̀ nụnụ pakama-ḅo. Anie ḅọrọ tẹso, ini ị̀ kẹ amadaḅọ ḅẹrẹ-siri onu mẹ ḅio wẹrịm.”

Zẹdẹkaya Datụkụma Ḅiim Jerimaya Ḅịḅị

¹⁴ Jen gbọrụ sakị ḅụ Ama-da Zẹdẹkaya ị̀ kẹ ò sime anga ḅom Tamụnọ-warị mẹ ḅẹ tẹrẹị karama ḅọkọ mẹ ḅụ, tẹ ori ị̀ ḅẹẹm, “À ye kẹ í gbela ḅẹ ḅiiarị, tẹ à ḅiiarị í bebe karakara mẹ ḍuko ị̀ pịrị.”

¹⁵ À nwẹnị pakịrị, “À karakara mẹ ḍuko ị́ pịrị kụma ị́ ị̀ ḅaa ḅa, tẹ à ḅẹrẹ ḍuko í toluma kụma kẹlẹ-sọ ị́ kẹ ye sịn ḅịa.”

¹⁶ Mie ḅụ Ama-da Zẹdẹkaya ḅe ḅọị anga ḅụụ ye minini ị̀ pịrịm, “À ḍumo wararị Tamụnọ ḅe ḅụ ye karịm, ḍumo kẹ wa pịrị Tamụnọ ḅe, mịnẹ arị ị́ ḅaa ḅịa, anịanịa ị́ saḅama ị́ ḅaa ḅẹ ḅiiarị apụ pịrị.”

¹⁷ Anịtẹso à ḍuko Zẹdẹkaya pịrịm mịnẹ Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ḍuko tẹẹ, “Ị́ ḅara sakị Babịlonịya ḅẹ amadaḅọ ḅe ọmụ-alapụ ma pịrị ḅẹḅẹ, ini í ḍumo wẹrị kpaịnma ḅa, tẹ mị opu ama mẹ ḅarị dọkị ḅo kiri la ḅịa. Ị́yẹrị-o, ị́ warị suku-o, ịn wẹrị kpaịnma ḅa.

¹⁸ Kụma ị́ ḅara saakị-a ḅẹḅẹ, anị sakị rẹ mie ịn mị opu ama mẹ saḅama Babịlonịya ḅẹ apụ ma pịrị ḅarịye, anie anị dọkịma kiri lama ḅẹ apụ ma, tẹso, ị́ ịna ḅara gbarị ḅịa.”

¹⁹ Kụma amadaḅọ ḅe pakịrịm, “À wamịna ama ḅẹ apụ ma tẹ mangị mu Babịlonịya ḅẹ apụ ma jụ sọ tẹ apụ ma ḍiki-ḅalafarị. Ẹbịsịya ini ị̀ saḅama ịn pịrị tẹ ini ì meni-oju mẹ kẹ tọrụsiẹrịma ḅa.”

²⁰ À nwẹnị ḅẹẹ, “Ini ị́ saḅama ịn pịrị ḅịa. Àrị ị́ tẹkẹm, KỊNỊNYANAḄỌ ḅe oku mẹ poki tẹ mịẹẹ, anịtẹso ye mẹmgba ị́ na iḅi ḅa, tẹ ini í ḍumo wẹrịso ḅa.

²¹ Kụma KỊNỊNYANAḄỌ ḅe ịkịan ḅara kẹ paka ḅẹ ye kẹ ì ḍie tẹ ị́ ḍụkụ tẹ ḅara saakị-a ḅẹḅẹ.

²² Anị ḅio ḅụ arị ẹrịm Juda ḅẹ Amada-Opu-warị mẹ ḅio kirikọn ereme mamgba ini ịn kẹ mẹnjị paka mu Babịlonịya ḅẹ amadaḅọ ḅe ọmụ-alapụ ma pịrịm.” In muarị sakị in ḍuko ye poki: Amadaḅọ ḅe ḅụụ iḅitẹịn ikiapụ ọ̀ da irima tẹẹ, ini rẹ ḅẹrẹtọn ọ̀ pịrịm. Tẹ mịọkụ ori aḅụọ opou ḅio ḍiḅi sọ-mu tẹso ori ikiapụ ma ò koroma-so tẹẹ.

²³ Anịtẹso à pịkị kẹ sụa ḍukom, “Í eremịna-awọmẹ mamgba ini ịn kẹ so mu Babịlonịya ḅẹ apụ ma pịrị ḅa, tẹ í ḅioju sọ ịna ḅara gbarị ḅịa. Ini ikoliḅọ ḅara kẹ ị́ kẹ so mu Babịlonịya ḅẹ amadaḅọ ḅe pịrị ḅa, tẹ ịn mịẹ opu ama mẹ dọkịma kiri lama ḅa.”

²⁴ Zẹdẹkaya nwẹnị pakịrịm, “Ḍụkụ tẹ gbọrụḅọ-sọ mị ḅịḅị-ḅẹlẹma mẹ gboloma ye nimi ma, anịsakị í ḍumo siye ḅụ sọ ḅịa.

²⁵ Fịrịmẹnjị-opuapụ ma naa mịnẹ ị́ ị̀ na ẹkwẹnm ḅẹ kụma ịn ḅo wa ḍuko ye kẹ í gbela ḅa. Ịn minini ị́ pịrị ḅa mịnẹ ini ị́ ḅaa ḅịa í ye goyegoye ḍuko ịn pịrị kụma.

²⁶ Miemẹ ngẹrị ḍuko ịn pịrị mịnẹ ị́ ị̀ tẹkẹ simem, mịnẹ à ḅarị ị́ kẹ pịkị ikoli fịrịma tẹ ị́ anịjụ fịị ma.”

²⁷ Anịtẹso fịrịmẹnjị-opuapụ mamgba ḅo tẹ ye kẹ ì gbelam, tẹ arị amadaḅọ ḅe ḍuko ị̀ pịrị tẹ gbọrụ ḅara mẹ ḍuko ịn pịrịm. Ịn kẹ ị́ mị ḅẹ gberie sọ ofori, jen gbọrụḅọ-sọ wa ḅẹlẹma ye mẹ ḅẹ ọwụ naa-a ẹrẹsị.

²⁸ Tẹ ini ị̀ kẹ amadaḅọ ḅẹrẹ-siri onu mẹ ḅio wẹrị nwenii ịn Jeruselemu ọkị sakị lam.