Jerimaya 37 - FỊAFỊA BAỊBỤLỤ

Zẹdẹkaya ḅii-ye Jerimaya Ḅara Ḅụ

¹ Ama-da Nebukadineza, Babịlonịya da ḅọ ḅe, Zẹdẹkaya, Josaya tụḅọ ḅe kẹ Juda ḅẹ amadaḅọ mịẹm, Jehohakịnị, Jehohakịmụ tụḅọ ḅe kiri ḅụ.

² Kụma Zẹdẹkaya-o, ọ̀ fịrịmẹnjị-opuapụ-o, tomi ma-o, KỊNỊNYANAḄỌ kẹ ị̀ fịrịma tẹ à da ḅo oku mẹ poki-a.

³ Ama-da Zẹdẹkaya nwẹnị Jehukalị, Selemaya tụḅọ ḅe na, Agbamịẹḅọ Zẹfanaya, Masẹya tụḅọ ḅe na kẹ fịrịma tẹ ḅii mịnẹ à KỊNỊNYANAḄỌ, wamịna Tamụnọ ḅe tẹkẹẹ wamịna sịẹ mẹ gotẹ.

⁴ Anị sakị mẹ ḅụ amụ ini ị̀ kẹ ikoli suu-a, tẹ à kiki ofori ḅara kẹ tomi ma ogboku mẹnjị ma-ḅọrọarị.

⁵ Babịlonịya ọmụ-ogbo mẹ Jeruselemu koro ḅẹ ḅara kẹ anị ikelema-koro tẹẹ, kụma in ḅo naa sakị mịnẹ Ijiputi ọmụ-ogbo mẹ amịna oke saḅa tẹ ḅẹẹ sakị ini ọḅụ dam.

⁶ Anịtẹso KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ị̀ ḅẹẹm,

⁷ à Zẹdẹkaya ḅẹẹ, “Amadaḅọ Fero ọmụ-ogbo mẹ tẹ ḅarasụa ị́ pịrị ḅẹ ḅoarị apụ ma, ịn pịkịma-so ịna ama Ijiputi mu ḅa.

⁸ Anịtẹso Babịlonịya ḅẹ apụ ma pịkị-ḅo ḅa, ini owu kẹ opu ama mẹ paka tẹ anị ọkị tẹ dọkịma kiri lama ḅa.

⁹ Yẹrị, KỊNỊNYANAḄỌ ḅe, ọmịna ḅeri nụnụarị ọmịnị oḅori kẹ ọmịna ḅụụ sịn tẹ kuroma ma mịnẹ Babịlonịya ḅẹ apụ ma ḅarị jen kẹ pịkị-ḅo ḅịa, in ḅo ḅarị ẹrẹsị.

¹⁰ Ọ́ nwẹnị nimiatẹ Babịlonịya ḅẹ ọmụ-ogbo mẹ nẹngịma sọ, tẹ ịna ḅụ ye la apụ ngẹrị kọn sọ, ịna akpụrụ-awarị ḅio ịn ḅọlọlọ sime wararị ayọ ma ḅụ ịn saakị tẹ mịẹ opu ama mẹ dọkịma kiri lama ḅa.”

In Jerimaya Kun tẹ Ọ̀ Kẹ Ikoli Suum

¹¹ Babịlonịya ḅẹ ọmụ-ogbo mẹ nwẹnị Jeruselemu ḅụ ọḅụ da Ijiputi ḅẹ ọmụ-ogbo mẹ tolu-paka ḅẹ-yearị ẹrẹsị.

¹² Mie ḅụ à nwẹnị Jeruselemu koroma so tẹ saakị Benijamịnị iri mu tẹ ḍiekiri ḅụ ị̀ la ye da ḅẹ ḅara furo ḅẹ ḍiepịrịye ḅụ.

¹³ Kụma à mu Benijamịnị Onu Ḅọkọ mẹ la tẹso, anị anga ama-koru sime ọmụapụ ma sịḅịdaḅọ, Irija nwẹn-sịn tomḅọ Selemaya owiḅọtụḅọ, pịkị Hananaya taa-owiḅọtụḅọ ḅe nwẹnị ị̀ dasịẹma tẹ ḅẹẹ, “Í so Babịlonịya ḅẹ apụ jụ sọ ḅẹ muarị!”

¹⁴ À pakịrịm, “Anie karakaraye-a! À so mu-a.” Kụma Irija ì poki ḍụkụ-a. Anie nakara ori ì kụn tẹ ì kụn tẹ ị̀ kẹ mu fịrịmẹnjị-opuapụ ma pịrịm.

¹⁵ Ini ịganị ị̀ pịrị ḅara ḅụram, tẹ tọnm mịnẹ ini ì fomu tẹ ì kẹ ịkasị wẹrị Jonatanị warị ḅio, ama-da ḅẹrẹ-siri mẹ ḅẹ ḍiri-kẹẹḅọ ḅe, ini ọ̀ warị mẹ kẹ ikoli-warị sọmam.

¹⁶ Kiri suku-ḅio ḅẹ ḅio ḅụ mie ini ị̀ kẹ wẹrị ye, tẹ anịanga ini ị̀ kẹ wẹrị alamam.

¹⁷ Sakị ḅọrọ lama tẹso, Ama-da Zẹdẹkaya fịrịma ị̀ sịnm, tẹ anịanga Amada-Opu-warị mẹ ḅio jen-apụ ofori ogbo ì gbelam, “KỊNỊNYANAḄỌ ḅe ḅara ḅo oku emi?” À pakịrịm: “Emii”, tẹ nwẹnị kẹ sụa ḍuko, “Ini ị́ saḅama Babịlonịya ḅẹ amadaḅọ ḅe pịrị ḅa.”

¹⁸ Anịtẹso à gbelam, “À tọ siye kẹ na ị́ fịrịmẹnjị-opuapụ ma, anịanịa mịna atomi ma na mị tẹ ọmịnị ị̀ kẹ ikoli suu?

¹⁹ Ọmịna ịkịankoroapụ ma tẹ ḍuko ọ́ pịrịm mịnẹ Babịlonịya ḅẹ amadaḅọ owu kẹ ọ́ paka ḅịa, anịanịa mị sịẹ mẹ paka ḅịa ḅẹ apụ ma, tiye ịna ḅụ paka?

²⁰ Tẹ mịọkụ, Í Opu ḅụ, arị ị́ tẹkẹm ì poki tẹ à ḅiiarị ye mịẹ ị̀ pịrị. Sisi ḅarị ị̀ kẹ pịkị Jonatanị warị ḅẹ ikoli mẹ mu ma. Ị́ ọkọ mịẹ kụma, piki-pikiye-ofori ḅara ḅụ à fịị ḅa.”

²¹ Mie ḅụ, Ama-da Zẹdẹkaya tọn tẹ ini ị̀ kẹ amadaḅọ ogigo mẹ ḅẹ ikoli-warị ḅio mẹ ḅụ ịkasị wẹrịm. Àrị anịanga simem, tẹ ene-ḅaaene-ḅaaene ịn fịturu kpoo kẹ ị̀ pịrịm, fịturu mịẹ anga mẹ ḅụ ḅo ye, nwenii opu ama mẹ ḅio sime fịturu goyegoye faam.