Jerimaya 36 - FỊAFỊA BAỊBỤLỤ

Baruku In-ikoarị-abịlala mẹ Gom Tamụnọ-warị mẹ ḅio

¹ Jehohakịmụ, Josaya tụḅọ ḅe juda da tẹ ini karama kụra mẹ ḅụ, KỊNỊNYANAḄỌ ḅe ị̀ ḅẹẹm,

² “In-ikoarị-abịlala ọkị, tẹ anị ọgọnọ Izirẹlị na Juda na sịẹ-sịẹ mamgba na gboloma ye goyegoye kẹ koromaa. À ḍuko ị́ pịrị tẹ goyegoye kẹ kẹẹ koromaa, sukuyọ-saakị ḅụ Josaya ama-da sime sakị ḅụ saakị ḅo mịọkụ la.

³ Ẹbịsịya Juda ḅẹ atomi ma arị ọkị-ḅo ịna ọgọnọ gbana ḅẹ tọn-arị guluguluma mẹ gboloma ye naa sakị ini ịna si etela ma ḅụ pịkị ḅa. Anịtẹso arị ịna si-sịḅịḅio na ịna asi na wẹrịso ịn pịrị ḅa.”

⁴ Mie ḅụ à nwẹnị Baruku, Nẹrịya tụḅọ ḅe sịn tẹ KỊNỊNYANAḄỌ ḅe ḍuko ị̀ pịrị tẹ ye goyegoye ḍuko-ḍuko ọ̀ pịrị tẹ ori anị kẹẹ. Baruku mie mẹmgba kẹ in-ikoarị-abịlala mẹ ḅio kẹẹ koromam.

⁵ Anịtẹso à ḍuko Baruku pịrịm, anie ọ̀ mịẹ ḅẹ aị ma: “Ịn ḅarị ḍụkụ tẹ à Tamụnọ-warị mẹ ḅio sọ-mu-a.

⁶ Kụma à ḅiiarị jen sakị tomi ma ḅuru-ịmọarị sakị ị́ anịanga mu. Ị́ mịẹ ḅarịye, in-ikoarị-abịlala mẹ ḅio sime ye mẹ go ịn pịrị gele pọkọ ḅụ, mịẹ tẹ KỊNỊNYANAḄỌ ḅe ị̀ ḅẹ tẹ à ḍuko tẹ ị́ kẹẹ ye goyegoye ịn naa ḅarị ḅara, Juda ḅẹ apụ tẹ ịna ama-ama ma ḅụ sime ḅo apụ ma sọ ịna ḅụụ sọ tẹ naa.

⁷ Ẹbịsịya ịn KỊNỊNYANAḄỌ ḅe tẹkẹ tẹ ịna si etela ma ḅụ pịkị ḅa, gbala KỊNỊNYANAḄỌ ḅe ọ̀ ḅalafama owi ịganị ḅụ ma atomi ma ẹrẹma tẹ ẹrẹsị.”

⁸ Mie ḅụ Baruku nwẹnị KỊNỊNYANAḄỌ ḅe ẹkwẹn ma goo pakama, Tamụnọ-warị mẹ ḅio, à ḍuko ọ̀ pịrịm ọ̀ mịẹ ḅẹ ḅara ḅụ gberie-sọ sin-a ḅara.

⁹ Jehohakịmụ ḅo Juda da tẹ sọnọ karama kụra mẹ ḅụ eseni karama akalụ mẹ ḅụ, tomi ma ḅuru-ịmọm, mịẹ tẹ KỊNỊNYANAḄỌ ḅe iḅị-tọrụ kẹ in ḍiki ḅẹ ḅara. Jeruselemu ḅụ anga apụ mamgba na Juda ḅẹ ama ma ḅụ sime tẹ ḅo apụ mamgba na ḅuru-ịmọm.

¹⁰ Anịtẹso, tomi mamgba pokiarị ogbo, Baruku in-ikoarị-abịlala mẹ ḅio sime ye goyegoye, tẹ àrị ọ̀ ḅẹ ye mẹ gom. Tamụnọ-warị mẹ ḅio ò miemẹ mịẹm, Gemaraya, Safani tụḅọ ḅe ḅio mẹ ḅụ, anie ama-da warị mẹ ḅẹ ḍiri-kẹẹḅọ ḅe ḅio ḅụ. Ò ḅio mẹ, ama-da warị mẹ ḅẹ ọgọnọ-jụ ḅụ Tamụnọ-warị mẹ ḅẹ Ịwọ Onu-ḅọkọ mẹ tolu-sọ anga mẹ kpekim.

Ini In-ikoarị-abịlala Mẹ Go Fịrịmẹnjị-opuapụ Ma Pịrịm

¹¹ Mayịkaya, Gemaraya owiḅọtụḅọ, pịkị Safani taa-owiḅọtụḅọ ḅe naam Baruku in-ikoarị-abịlala mẹ ḅio KỊNỊNYANAḄỌ ḅe ḍuko aị ma goo sakị.

¹² Anịtẹso ori amada-opu-warị mẹ mu tẹ amadaḅọ ḅẹrẹ-siri mẹ ḅẹ ḍiri-kẹẹḅọ ḅio mẹ sọ-mum, anie opu-fịrịmẹnjịapụ mamgba kobiri sime anga mẹ. Ẹlịsama, ḅẹrẹ-siri mẹ ḅẹ ḍiri-kẹẹḅọ ḅe na, Delaya, Sẹmaya tụḅọ ḅe na, Ẹlịnetanị, Akịbọ tụḅọ ḅe na, Gemaraya, Safani tụḅọ ḅe na, Zẹdẹkaya, Hananaya tụḅọ ḅe na osi fịrịmẹnjị-opuapụ mamgba na sọ kiri ḅụ simem.

¹³ Mayịkaya nwẹnị Baruku goo tomi ma pịrị tẹ ọ̀ naa ye ḍuko-ḍuko ịn pịrị.

¹⁴ Anịtẹso fịrịmẹnjị-opuapụ ma Jehudi kẹ fịrịmam (anie Netanaya owiḅọtụḅọ, pịkị Selemaya taa-owiḅọtụḅọ, pịkị Kusi ile-owiḅọtụḅọ) mịnẹ ò mu ḍuko Baruku pịrị tẹ ori in-ikoarị-abịlala mẹ ọkị-ḅo, anie ò goo tomi ma pịrị tẹ ye mẹ. Barọkụ in-ikoarị-abịlala mẹ ọkị-ḅo ịn pịrịm.

¹⁵ Ịn nwẹnị ḅẹẹ, “Lẹgị sime tẹ in-ikoarị-abịlala mẹ go wa pịrịị.” Mie ḅụ Baruku ọkọ mịẹm.

¹⁶ Ori anị go tẹso, ịn ḅụụ-gbiripu ḅụ pịkị jụmọ-jụmọ da tẹ Baruku ḅẹẹm, “Wa anị ḍuko amadaḅọ ḅe pịrị nyanam.”

¹⁷ Anịtẹso ini ò gbelam, “Mịọkụ, ḍuko wa pịrịị, ndẹẹ ị́ mịẹ tẹ mie mẹmgba kẹẹ ḅara? Jerimaya anị ḍuko-ḍuko ị́ pịrị tẹ ị́ kẹ wararị ya?”

¹⁸ Baruku pakịrịm, “Jerimaya ẹkwẹn-ngbọ-ngbọ ḍuko ị̀ pịrị-pịrị tẹ à kẹ mị in-ikoarị-abịlala mẹ ḅio kẹẹ kuromam.”

¹⁹ Anịtẹso ini ọ̀ ḅẹẹm, “Ị́yẹrị na Jerimaya na ọ́ ḅọị nyanam. Ọ́ ḍụkụ tẹ gbọrụḅọ-sọ ó sime anga nimi ma.”

Amadaḅọ Ḅe In-ikoarị-abịlala Mẹ Dọkịmam

²⁰ Fịrịmẹnjị-opuapụ ma in-ikoarị-abịlala mẹ kẹ Ẹlịsama, amadaḅọ ḅẹrẹ-siri mẹ ḍiri-kẹẹḅọ ḅe ḅio ḅụ wẹrị tẹ amadaḅọ ḅe warị mẹ mum, anịanga ịn ye goyegoye ḍuko amadaḅọ ḅe pịrịm.

²¹ Anịtẹso amadaḅọ ḅe Jehudi fịrịmam ò mu in-ikoarị-abịlala mẹ ọkị-ḅo. Ẹlịsama ḅio ḅụ ọ̀ nwẹnị anị ọkị, tẹ goo amadaḅọ ḅe na sịẹ ori ikelema fịrịmẹnjị-opuapụ mamgba na pịrị.

²² Sakị mẹ okiringa sakị tẹ amadaḅọ ḅe Oḅoku sakị ḅẹ ama-da opu warị mẹ ḅio fịnị suku lẹgị wararị.

²³ Jehudi tẹra anịanịa inia apakịrị go famarị-famarị, amadaḅọ ḅe kala-ogie tụḅọ kẹ arị kịrị-siin tẹ kẹ fịnị mẹ ḅio gbin suum. Ọ̀ mị ḅara mẹ mịẹ nwenii bebe in-ikoarị-abịlala mẹ dọkị famam.

²⁴ Kụma amadaḅọ ḅe-o, ọ̀ fịrịmẹnjị-opuapụ ma ḅẹ gbọrụḅọ-o, tẹ mie mẹmgba naa apụ ma gbọrụ ḅalafa anịanịa gbọrụ kururu sọ ḍie-pakama-a.

²⁵ Karakaraye Ẹlịnetanị na, Delaya na, Gemaraya na amadaḅọ ḅe tẹkẹm ori in-ikoarị-abịlala mẹ dọkịma ma sọ, ori ịn kẹ ye-sịn-a.

²⁶ Anịtẹso ọ̀ tọn Jeramili, amadaḅọ tụḅọ ḅe pịrị tẹ Sẹraya, Azarẹlị tụḅọ ḅe na, Selemaya, Abudili tụḅọ ḅe na kẹ ọ̀ ḅụ sụam mịnẹ ini yẹrị na ì ḍiri-kẹẹḅọ Baruku na kun. Kụma KỊNỊNYANAḄỌ ḅe wa kikimam.

Jerimaya Jen In-ikoarị-abịlala Kẹẹm

²⁷ Ama-da Jehohakịmụ à ḍuko Baruku pịrị-pịrị tẹ kẹẹ in-ikoarị-abịlala mẹ dọkịma tẹso, KỊNỊNYANAḄỌ ḅe ḍuko ị̀ pịrịm

²⁸ à jen iko ḍiri ọkị tẹ anị ḅụ tarị kẹẹ ye mẹ goyegoye kẹ kẹẹ.

²⁹ KỊNỊNYANAḄỌ ḅe ḍuko ị̀ pịrịm arị amadaḅọ ḅe ḅẹẹ, “Í in-ikoarị-abịlala mẹ dọkịma tẹẹ, pịkị Jerimaya gbela tẹ mịnẹ ò tiegotẹ kẹẹ koroma mịnẹ Babịlonịya ḅo mị amakiri mẹ guluguluma tẹ anị ḅẹ atomi ma na anị ḅẹ anama ma na ḅaa ḅa.

³⁰ Mie ḅụ, mịọkụ yẹrị KỊNỊNYANAḄỌ ḅe, ị́ ḅẹẹarị, Ama-da Jehohakịmụ, mịnẹ í furo-ḅẹ-ḅọ Devidi ama-da yọ mẹ ḅụ ama-da ḅịa gbamasom. Ị́ fịtẹ oju-akpakpa mẹ ịn kẹ wakị nguma ḅa paụ ḅụ, tẹ ịrụa anị fọị ḅa eneḅaka ḅụ, tẹ oḅoku igirigi pịkị anị ọgọnọ sara ḅa ḍin ḅụ.

³¹ À fomu-ḅara kẹ ị́yẹrị na, í furo-ḅẹ-apụ na, ị́ fịrịmẹnjị-opuapụ ma na pịrị ḅa, ọ́ mịẹ tẹ asi mamgba ẹrẹsị. Ị́yẹrị-o, Jeruselemu na Juda na ḅẹ apụ ma-o, amụ à kẹ ọmịna aḅeri nụnụarị aị ma kẹ ye-sịn-a, ọkọ ẹrẹsị arị ẹrịma sime opu ḅụụ-fụka mẹ ọkị-ḅo ọmịna ọgọnọ gbana ḅa.”

³² Anịtẹso à jen in-ikoarị-abịlala ọkị tẹ kẹ ì ḍiri-kẹẹḅọ Baruku pịrị tẹ ori à ḍuko ọ̀ pịrị ye goyegoye kẹẹ koromam. Ọ̀ kẹẹ ye goyegoye anie pịkị in-ikoarị-abịlala mẹ ḅio sime ye, anie paa gbọrụ oku-aḅịḅị ma tẹ à ḍuko tẹẹ ọ̀ kẹẹ aị ma.