Jerimaya 35 - FỊAFỊA BAỊBỤLỤ

Jerimaya na Rekabụ Furo-ḅẹ-apụ ma na

¹ Jehohakịmụ, Josaya tụḅọ ḅe Juda daarị sakị ḅụ, KỊNỊNYANAḄỌ ḅe ị̀ ḅẹẹm,

² “Rekabụ furo-ḅẹ-apụ ma dama-mu tẹ ẹkwẹn ịn pịrị. Anịtẹso ini ọkị-ḅo Tamụnọ-warị mẹ ḅẹ aḅio ma ḅụ gberie ḅio suu tẹ iru kẹ ịn pịrị.”

³ Mie ḅụ à Rekabụ bebe furo-ḅẹ-apụ ma ọkịm — Jazanaya (jen Jerimaya tụḅọ, ori anie Hazinaya owiḅọtụḅọ) na ori owiapụ-amịnapụ mamgba na ori owiapụ-awọmẹ na

⁴ tẹ ịn kẹ Tamụnọ warị mẹ ḅom. À nwẹnị ịn kẹ ịkịankoro Hanani, Igidalaya tụḅọ ḅe ḍukamẹnjịapụ ma ḅio mẹ mu. Mị ḅio mẹ Masẹya, anie Salumu tụḅọ ḅe tẹ Tamụnọ-warị mẹ ḅẹ opu fịrịmẹnjịḅọ ḅe ḅio mẹ ḅẹ ọgọnọ-jụ ḅụ anị simem, tẹ anị osi opu fịrịmẹnjịapụ ma aḅio na kpekim.

⁵ Anịtẹso à tọnwa akọpụ na iru sụa ḅinma-ḅinma tẹ amọngị na kẹ Rekabụ furo-ḅẹ-apụ ma tọrọkọ koromam, tẹ nwẹnị ịn ḅẹ, “Ọmịnị iru kalịye ḅuu.”

⁶ Kụma ịn nwẹnị pakịrịm, “Wa iru ḅuu-ḅuu-a. Wamịna elemu ḍaḅọ Jonadabụ, Rekabụ tụḅọ ḅe, ḍuko wa pịrịm mịnẹ anị ḅọrọ wamịnị-o, wamịna furo-ḅẹ-apụ sọ, wa gbọrụ iru sọ ḅuu ma.

⁷ Ọ̀ pịkị ḍuko wa pịrịm wa warị nama ma, pịkị ḍụọ ḍiḅi ma, anị ḅọrọ kụrọ-aḍụọ sọ, anịanịa igbigi kẹ fẹẹ. Ori oloko sụa wa pịrịm mịnẹ sakị mamgba wa akpụrụ-awarị ḅio anga, mịẹ tẹ wa igoni apụ ḅara kẹ emi anga mẹ kẹ ama sọma tẹ anga ḅẹ ḅara.

⁸ Jonadabụ kẹ wa pịrịm wa mịẹ ḅẹ aị mamgba wa poki tẹ mịẹ tẹẹ, wamịnị-o, wamịna tapụ-o, wamịna owiapụ-awọmẹ-o, wamịna eremịna-awọmẹ-o, gbala-gbala iru ḅuu-ḅuu-a,

⁹ anịanịa wa anga ḅẹ awarị nama, anịanịa kụrọ aḍụọ ḍiḅi, anịanịa fịaị aḍụọ.

¹⁰ Akpụrụ-awarị ḅio mie wa angarị ye, tẹ ye-kọnma-a ḅara kẹ wamịna atẹngịḅọ Jonadabụ tọn wa pịrị ye goyegoye poki tẹ mịẹ tẹẹ.

¹¹ Kụma Nebukadineza, Babịlonịya ḅẹ amadaḅọ owu kẹ mị ama mẹ paka sakị wa tọn pẹlẹm wa so Jeruselemu mu tẹ Babịlonịya na Siriya na ḅẹ apụ ma ọmụ-ogbo-ogbo ma aḅara gbarị. Anie wa gotẹ Jeruselemu ḅụ angarị.”

¹² Anịtẹso KỊNỊNYANAḄỌ ḅe ḍuko Jerimaya pịrị tẹ ḅẹẹm:

¹³ Mie Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹm, “Mu tẹ ḍuko Juda na Jeruselemu na ḅẹ apụ ma pịrịị, ‘Ó tiye gotẹ ị̀ ẹkwẹn ma poki tẹ à ḍuko ye mịẹ ḅịa?’ KỊNỊNYANAḄỌ ḅe gbelarị.

¹⁴ Jonadabụ furo-ḅẹ-apụ ma ọ̀ sụa ịn pịrịm ini iru ḅuu ma nwẹn ḅẹẹ oloko mẹ kokoarị, tẹ ḅo mịmgba ḅẹ ene mẹ la sọ ịna ḅụ gbọrụḅọ-sọ gbọrụ iru sọ ḅuu-a. Kụma yẹrị ẹkwẹn, siin ẹkwẹn ọ́ pịrịarị, tẹ ọmịnị ị̀ ḅịḅị poki-a.

¹⁵ Àrị ịkịankoroapụ ị̀ fịrịmẹnjịapụ ma kẹ sịkọpẹlẹ-a ḅara kẹ ọ́ fịrịmarị, tẹ in ḍuko ọ́ pịrịarị ọmịnị ọmịna si etela ma ḅụ ḅara-siin tẹ kuraye mịẹẹ. Ini ọmịna aḅeri nụnụm mịnẹ ó sunsin oru-atamụnọ pịrị ma, pịkị fịrịmẹnjị arị pịrị ma, pịkị fịrịmẹnjị arị pịrị ma, mịẹ tẹ ọ́ mị amakiri mẹ tẹ à kẹ ọmịnị na ọmịna atẹngịapụ pịrị ye mẹ ḅụ anga tọrọkọ-tọrọkọ mu ḅẹ ḅara. Kụma ọmịnị ì poki ḍụkụ-a anịanịa ị̀ kẹ ye-sịn.

¹⁶ Jonadabụ furo-ḅẹ-apụ ma ịna atẹngịḅọ sụa ịn pịrị oloko mẹ poki tẹ mịẹm, kụma ọmịnị mịna tomi ma amụ ị̀ ḅịḅịpoki-a.

¹⁷ Mịọkụ mie ḅụ, yẹrị, Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅẹ, à minini guluguluma mamgba ọkị-ḅo ọmịnị Juda na Jeruselemu na ḅẹ apụ ma ọgọnọ gbana ḅa. À miemẹ mịẹ ḅa arị ẹkwẹn ọ́ pịrị sakị ó poki ḍụkụ-a ẹrẹsị, tẹ à pịkị ọ́ sịn sakị sọ ọ́ pakịrị ḍụkụ-a.”

¹⁸ Anịtẹso à ḍuko Rekabụ furo mẹ pịrịm mịnẹ Kụrọmamgba nyana KỊNỊNYANAḄỌ ḅe, Izirẹlị Tamụnọ ḅe ḅẹẹ tẹ, “Ọmịnị ọmịna atẹngịḅọ jonadabụ sụa ọ́ pịrị oloko mẹ poki tẹ mịẹ tẹ; ọmịnị ò ḍukom ọ̀ mịẹ ḅẹ ḅara-ḅara mịẹ tẹ, ori tọn ọ́ pịrị ye goyegoye ọ́ mịẹ tẹẹ.

¹⁹ Mie ḅụ, Yẹrị, Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, mininitẹ mịnẹ Jonadabụ, Rekabụ tụḅọ ḅe sakị mamgba ò furo ḅẹ owiḅọ nyana tẹ fịrịmẹnjị ị̀ pịrị ḅa.”