Jerimaya 34 - FỊAFỊA BAỊBỤLỤ

Sime Zẹdẹkaya Pịrị Oku-ḅịḅị

¹ Ama-da Nebukadineza, Babịlonịya daarịḅọ ḅe, na ori ọmụ-ogbo na, pịkị sịẹ-sịẹ ma na kịrị-kịrị apụ tẹ ò suku-ḅio emi apụ na kẹ ḅarasụa ọ̀ pịrị ḅẹ ḅo ọmụapụ na, owu kẹ Jeruselemu na anị kpeki ama ma na pakarị sakị KỊNỊNYANAḄỌ ḅe ẹkwẹn ị̀ pịrịm.

² KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ḍuko ị̀ pịrịm à mu Ama-da Zẹdẹkaya Juda daarịḅọ ḅe ḅẹ, “Yẹrị KỊNỊNYANAḄỌ ḅe, ḅarana mịẹ opu ama mẹ kẹ Babịlonịya ḅẹ amadaḅọ pịrịtẹ ori anị dọkịma kiri lama ḅa.

³ Ị́ ọ̀ ḅara gbarị ḅịa; ini í kun tẹ ị́ saḅama ọ̀ pịrị ḅa. Ị́ tọrụ kẹ ori na dama-dama tẹ ḅarana ẹkwẹn ọ̀ pịrị ḅa; anịtẹso ị́ Babịlonịya mu ḅa.

⁴ Zẹdẹkaya í gboloma ye tẹ à ḍuko ị́ pịrịarị ye pokii. Ini ọmụ ḅio ị́ ḅaa ḅịa.

⁵ Í dein ḅụ fịị ḅa, tẹ í elemu aḍapụ fịị sakị ịn kụnụaị dọkịma ḅara, anie tarị ama-da tẹrẹmẹ da apụ ma, anị gbọrụ ḅara mẹ mie ịn kẹ kụnụaị dọkịma ị́ pịrị ḅarị ḅara. Ini í gotẹ kururu tẹ ḅẹẹ ḅa, ‘Wamịna amadaḅọ fịtẹ!’ Yẹrị, KỊNỊNYANAḄỌ ḅe ọkọ ḅẹẹm.”

⁶ Anịtẹso à nwẹnị mịẹ oku mẹ daḅọrọma Ama-da Zẹdẹkaya pịrị Jeruselemu ḅụ,

⁷ Babịlonịya ḅẹ amadaḅọ ọmụ-ogbo mẹ owu kẹ opu ama mẹ pakarị sakị. Ọmụ-ogbo mẹ pịkị owu kẹ Lakisi na Azẹka na tẹ Juda ḅụ kiri kọn ja kụrọnị ama ma sọ pakarị.

Ini Oḅori-kẹ-kịnịsịn Ḅara kẹ Omoniapụ ma Mịẹm

⁸ KỊNỊNYANAḄỌ ḅe ẹkwẹn Jerimaya pịrịm, Amadaḅọ Zẹdẹkaya na Jeruselemu ḅẹ apụ ma na ḅịḅị-kẹ-ogbosọ fama tẹso,

⁹ mịnẹ tomi mamgba ịna Hiburu omoniapụ ḅụụ ḅara-siin, tẹ ini ịna sịḅị atomi sọ — owiapụ na ereme na gbọrụ ḅara — mịẹ tẹ gbọrụḅọ-sọ ḅarị amịna pembema Izirẹlị ḅẹ ḅọ kẹ omoni sọma ḅịa ḅara.

¹⁰ Tomi mamgba na ịna sịḅịdapụ na ḅịḅị-kẹ-ogbosọm ịna ọmịnị apụ ḅụ ḅara-siin tẹ ḅarị jen kẹ ịn kẹ omoni sọma ma. Ini ịna ḅụ ḅara-siin,

¹¹ kụma sakị ḅọrọ tẹso, ini ịna akuroma ḍima tẹ siin ini ọkị tẹ ponoma ḅara kẹ siin ịn kẹ omoni sọmam.

¹² Anịtẹso KỊNỊNYANAḄỌ ḅe,

¹³ Izirẹlịapụ tẹkẹarị Tamụnọ ḅe ḍuko ị̀ pịrịm à tomi ma ḅẹẹ: “Àrị Ijiputi ḅara-ḅio ọmịna elemu-aḍapụ ma pụkọ-pakamaḅo tẹ ini omoni ḅụ so sakị mẹ ḅụ, arị ini na ọḅọkụ fịm tẹ ini omoni ḅara-ḅio paka-ḅom. À ḍuko ịn pịrịm mịnẹ:

¹⁴ ‘sọnọma kụra la sakị-sakị, ini ịna Hiburu omoni ma ḅụụ-ḅarasin tẹ ini ịna sịḅị atomi sọ nyanam, in sonio akụra kẹ fịrịmẹnjị ịn pịrị tẹ ḅẹḅẹ. Kụma ọmịna elemu-aḍapụ ị̀ bala-a anịanịa à ḍuko ye poki.

¹⁵ Boowa ene ḅọrọtẹ so sakị ọmịnị ọmịna akuroma ḍima tẹ ì ḅioḅẹlẹma ye mịẹm. Ọmịnị-mgba ḅịḅị-kẹ-ogbosọm, ọmịna pembema Izirẹlịapụ ma ḅụụ-ḅarasin tẹ ini ịna asịḅị-atomi sọ, tẹ ọmịnị anị ḅẹ ọḅọkụ fịm ị̀ tọrọkọ ḅụ, Tamụnọ-warị tẹ in sunsin ị̀ pịrịarị yọ mẹ ḅio.

¹⁶ Kụma anị tẹso, ó siin ọmịna akuroma ḍima tẹ ị̀ kụn-a ḅara kẹ ye mịẹm. Ọmịnị-mgba sọ ḅii tẹ ọ́ ḅụụ ḅụ ḅara-siin tẹ omoniapụ ma sịn pịkị ọkị tẹ ponoma ḅara kẹ ịn kẹ siin omoni sọmam.

¹⁷ Mịẹ ḅụ mịọkụ, yẹrị, KỊNỊNYANAḄỌ ḅe, ḍukoarị mịnẹ ọmịnị ị̀ ḅịḅị-kan tẹ: amụ ḅarana-sịḅị-nyana kẹ ọmịna pembema Izirẹlịapụ ma pịrị-a. Ọkọ ḅẹḅẹ, iḅi lamam, yẹrị ḅarana-sịḅị-nyana kẹ ọ́ pịrị ḅa: ọmụ ḅio fịị ḅarana-sịḅị-nyana, obi na ḅuru-ḅa na. À kẹ ọ́ mịẹ ḅarịye mẹ, kpọma tomikiri ḅẹ sịẹ goyegoye ḅụụ koro ḅa.

¹⁸ Tomi ma tẹ ị̀ ọḅọkụ mẹ sima tẹ ị̀ tọrọkọ ḅụ ịn fị ọḅọkụ mẹ ḍuko ḅara mẹ mịẹ-a apụ ma. Ịn kẹ ọḅọkụ mẹ mịẹ kụrọma ḅẹ tẹ kẹ maaịn pẹlẹ tẹ maa apakịrị ma ogboku mẹnjị ḅọrọ nambulo ḅe pẹlẹ ḅara mie à kẹ ịn pẹlẹ kọsịma ḅarị ḅara.

¹⁹ Juda na Jeruselemu na ḅẹ sịḅịdapụ ma na, amada-warị mẹ ḅẹ fịrịmẹnjị-opuapụ ma na, agbamịẹapụ ma na, amakiri mẹ ḅẹ atomi mamgba na tẹ nambulo ḅe maa apakịrị ma ogboku mẹnjị ḅọrọ apụ ma,

²⁰ àrị ịn saḅama si kẹ ịn tọn-arị apụ ma pịrị ḅa, anie ịn ḅaa ḅẹ-ḅiiarị apụ ma, tẹ feni amẹẹ na piri-ḅio-ḅẹ anama na ịna aḍụẹịn ma pẹị ḅa.

²¹ À pịkị Ama-da Zẹdẹkaya. Juda daarịḅọ ḅe na ọ̀ fịrịmẹnjị-opuapụ na saḅama ịn ḅaa ḅẹ ḅiiarị apụ pịrị ḅa. Àrị ịn saḅama Babịlonịya ḅẹ ọmụ-ogbo mẹ pịrị ḅa, anie mịọkụ owu kẹ ọ́ paka mẹ dasịẹma wararị apụ ma.

²² À tọn tẹ ịn pịkị mịẹ opu ama mẹ ḅo ḅa. Ini owu kẹ anị paka tẹ anị ọkị tẹ dọkịma kiri lama ḅa. À mịẹ tẹ Juda ḅẹ ama ma ịkpa kịka ḅa, gbọrụḅọ-sọ anga-a yọ. Yẹrị, KỊNỊNYANAḄỌ ḅe, ọkọ ḅẹẹm.’ ”