Jerimaya 31 - FỊAFỊA BAỊBỤLỤ

Izirẹlị Pịkịma Ama ḅo Mẹ

¹ KỊNỊNYANAḄỌ ḅe mẹẹ, “Sakị mẹ ḅoarị anie yẹrị Izirẹlị kịrị-kịrị afuro mamgba Tamụnọ sọ ḅẹ sakị mẹ, tẹ ini nwẹnị ị̀ atomi sọ ḅa.

² Ịkpa mẹ ḅio arị ọkụrụkụrụ nyana ini ma tẹ fịị-a so apụ ma pịrịm. Izirẹlịapụ ma ịnyọsara ḅii lama sakị,

³ iḅere-iḅerea anga ḅụ à ḅụụ-pakama ịn pịrịm. Izirẹlịapụ, sakị mamgba arị ọ́ ḅẹlẹma tẹ, mie ḅụ à paa ì kuno-a ḅẹlẹma mẹ kẹ ó ḍiearị.

⁴ À pịkị siin jen gbọrụ sakị kẹ ọ́ nama ḅa. Ọ́ pịkị jen kẹ ọmịna akwa ma farị tẹ sẹkị-sẹkị tẹ ḍereku ḅa.

⁵ Ọ́ pịkị jen kẹ kụrọ aḍụọ ḍiḅi ḅa Sameriya ḅẹ atụndụ ma ọgọnọ, tẹ kụrọ aḍụọ ma ḍiḅiapụ arị ḅụ pakama-ḅo aị fị ḅa.

⁶ Inn, sakị mẹ ḅoarị anie ama-koruapụ Iferemu atụndụ ma ḅụ sime tẹ oloku pakama ḅarị sakị mẹ, Ó yee wa Zayọnị mu, KỊNỊNYANAḄỌ wamịna Tamụnọ ḅe dama-mu.”

⁷ KỊNỊNYANAḄỌ ḅe mẹẹ, “Ḍereku kẹ nume-su Izirẹlị pịrịị, sịẹ-sịẹ ma ḅụ tẹịn ye mẹ. Í tokini nume suu, ‘KỊNỊNYANAḄỌ ḅe ori atomi ḅọrọma tẹ; kirikọn-apụ mamgba ori ịn pụkọ-pakamaḅo tẹ.’

⁸ Arị ini ọkị-ḅo ḅa ọgọnọ-jụ mẹ ḅụ tẹ in kobiri ḅa tomikiri mẹ akunoma ḅụ. Tọrụngbọ-pụụntẹ-apụ na ekeliapụ na ịna ḅụ sọ tẹ ḅo ḅa, furatẹ-ereme na iyi ḅẹ-yearị apụ na. Ini opu sịẹ ḅara kẹ pịkị-ḅo ḅa.

⁹ Ị̀ atomi owu-ma pịkị-ḅo ḅa, àrị ịna tọrọkọ tarị wararị sakị ịn tẹkẹarị. Àrị ịn kẹ mu minji mẹnjịarị ayọ la ḅa, gbima-gbima-a etela ḅụ, ịn pụmbụ ḅịa ḅara. À ḍaḅọ sọ Izirẹlị pịrị tẹẹ, tẹ Iferemu anie ị̀ mgbe.”

¹⁰ KỊNỊNYANAḄỌ ḅe mẹẹ, “Tomikiri ḅẹ asịẹ, ọmịnị ì pokii, tẹ ị̀ ẹkwẹn ma ḍuko wasama mu ala-jụ simearị dọkụ mu sọmarị ayọ ma lama. Yẹrị ị̀ atomi gala-galam, kụma arị in kobiri ḅa tẹ in kikima ḅa anana-ḍikiḍikiḅọ amịna anana-ogbo kikima ḅara.

¹¹ Arị Izirẹlịapụ mịẹ tẹ ini ịna sịḅị atomi sọ tẹ, arị ịn ḅọrọma tẹ opu kụrọ nyana sịẹ ḅara ḅio ḅụ.

¹² In ḅo tẹ Zayọnị Tụndụ ọgọnọ nume-su ḅa ḍereku ḅụ, tẹ ị̀ aḍiepịrị-aị ma ịna ḅioḅẹlẹma ḅa mbịaka na, ịn kẹ waịnị sịn iru na, olivu-olo na ḍiepịrị-aị ma, anana na opu anama na ḍiepịrị-aị ma. In minji iḅiọkụ laarị ḍụọ kịka ḅa ịn nyana na-iḅi ye goyegoye ịn nyana ḅa.

¹³ Anịtẹso eremịna-awọmẹ ma sẹkị-sẹkị tẹ ḅioḅẹlẹ ḅa, tẹ Owiapụ, asambịrịma apụ na omongi apụ na, ḍereku ḅa. Arị in dedema tẹ ịna kururu pịkị-ḅo ḍereku mịẹ ḅa ịna ḅioḅẹngbọ si mẹ kẹ ḅioḅẹlẹ sọma ḅa.

¹⁴ Arị iḅitẹịn fịye kẹ agbamịẹapụ ma pịrị fị furo ḅinma tẹ tomi ma ḅụụ-fụka mamgba mịẹ pẹlẹ ḅa. Yẹrị, KỊNỊNYANAḄỌ ḅe, ọkọ ḅẹẹm.”

KỊNỊNYANAḄỌ ḅe Ọkụrụkụrụ Izirẹlị Ọgọnọ

¹⁵ KỊNỊNYANAḄỌ ḅe mẹẹ: Rama ḅụ ịn pọkọ naam, Tẹmẹ-akụ ḅara kẹ owuarị pọkọ. Resẹlị árị awọmẹ gotẹ owuarị, in fịị-faa tẹẹ; á dedema ọkị ḍụkụ-a.

¹⁶ Ḅarị owu ma tẹ owu-minji mẹ siin fịafịamaa. Ị́ mịẹ ị́ awọmẹ pịrị tẹ aị mamgba gbẹẹ-ye ofori ḅara kẹ faa ḅịa; si kẹ ịn tọn apụ ma amakiri ḅụ ịn pịkịma-ḅo ḅa.

¹⁷ Tọrọkọ-jụ ḅiokpọmaye sime ị́ pịrị wararị; Ị́ awọmẹ pịkị ama ḅo ḅa. Yẹrị, KỊNỊNYANAḄỌ ḅe, ọkọ ḅẹẹm.

¹⁸ “Izirẹlịapụ ḅioḅẹngbọ-si ḅụ ḍukoarị ye à naarị, ‘KỊNỊNYANAḄỌ, wa amụ ye ḍawọ-a nama kịkarị, kụma ị́ ḅịḅịpoki kẹ wa tolumam. Wa kẹ pịkị-ḅoo; wa tẹlẹma tẹ pịkị ị́ ḍọkụma-ḅoo, KỊNỊNYANAḄỌ wamịna Tamụnọ ḅe.

¹⁹ Wa ị́ ḅụụ ḅụ pịkị-som kụma ala-a wa pịkị-ḅo ḅiim. Ị́ wa fomu fama tẹso, wa sịḅị-tuum ḅioḅẹngbọ-si ḅụ. Wamịna ḅụụ-jịrịm, wamịna tọrụ pịkị tuum, wamịna asambịrịma sakị ḅụ wa si mịẹm ẹrẹsị.’

²⁰ Izirẹlị, anie ị̀ ḅụụ-ḅẹlẹma tẹịn owiḅọtụḅọ, à ḅẹlẹma-tẹịn tụḅọ. Àrị ị́ ẹrẹ goo sakị goo sakị, à ḅẹlẹma ḅụ ị́ kẹ ḅiokoromarị. Gbala ì ḅioḅẹngbọ í gotẹ mẹnjị pakarị ye ọkụ; Arị ọkụrụkụrụ nyana ḅa.

²¹ Kẹ elekima sụa ḅẹ aị piketẹ etela mẹ lekiri; siin etela ḍọkị ẹrị, ọ́ ḅọrọ so anga mẹ. Izirẹlịapụ, ọ́ pịkị-ḅo, ọmịnị ama ḅoo, ó sime tẹ paka-so ama ma.

²² Ó ḅio-maaịn-tọn mu tọ-sakị la ḅẹ, minini nyana-a apụ? Arị ịwọ kịrị ye tẹmẹ tẹ, anị kịrị ḅara ẹrẹḅọ ẹrẹ owiḅọ gbaịn ḅọrọmarị ọkụ.”

Tamụnọ Atomi Lọkọlọkọ mẹ Tọrọkọ-jụ Ḅụ

²³ Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹm: À tomi ma kẹ pịkị ịna amakiri ḅo sakị, ịn pịkị siin ḅẹẹ ḅa Juda ḅẹ amakiri mẹ na ama ma ḅio na ḅụ, Yee KỊNỊNYANAḄỌ ḅe Jeruselemu ḅẹ tụndụ mẹ boma, ori angarị fịafịa yọ mẹ.

²⁴ Juda na anị ḅẹ ama mamgba na ḅio kịnị anga ḅa, tẹ ḍụọ-kọrịapụ paka ḅa, pịkị anana ḍikiḍikiapụ na ịna anana ogbo-ogbo na.

²⁵ À ḅụụ-lọkọtẹ apụ ma mịẹ tẹ ini ịwọ ịnyọ sụa ḅa, tẹ fịye kẹ ḅuru-pọkọtarị tẹ ịnyọ ḅụụ ḅio fa tẹ ḅọ goḅọ-goḅọ pịrị fị furo ḅinma ḅa.

²⁶ Ọkọ ẹrẹsị tomi ḅẹẹ ḅa: À mu monom, tẹ saakị tẹ ịwọ ịnyọ sụam.

²⁷ “Yẹrị, KỊNỊNYANAḄỌ ḅe mẹẹ mịnẹ sakị ḅoarị anie à tomi na nama amẹẹ na kẹ Izirẹlị na Juda na amakiri mẹ ḅio ḅinma ḅẹ sakị mẹ.

²⁸ Tẹ à tọrụ kẹ kiri lama tẹ suku-na-suku-na nụnụ pakama-ḅo, sukuruma-gbin, pịkị-iḅo, guluguluma, tẹ pịkị ịn kan-sara gbọrụ ḅara mẹ, mie à pịkị tọrụ kẹ kiri lama tẹ ịn kẹ ḍiḅi, tẹ ịn nama sịẹma ḅarị ḅara.

²⁹ Anị sakị mẹ ḅụ, kịnị ḅarị jen kẹ ḅẹẹ ḅịa: “Ḍapụ-na-iyingiapụ-na si girepu mgbọlụ fịm, kụma awọmẹ ma aka mie ḅuu yee.”

³⁰ Anie nakara si girepu mgbọlụ fị ḅọ fị ḅọ, mḅọ aka mie ḅuu ḅarịye; tẹ ḅẹḅọ-ḅẹḅọ fịị ḅa mḅọ mịẹ si gotẹ.

³¹ KỊNỊNYANAḄỌ ḅe mẹẹ, “Sakị mẹ ḅoarị anie àrị ịwọ oḅoku kẹ Izirẹlịapụ na Juda ḅẹ apụ na fị ḅarị sakị mẹ.

³² Anị à kẹ ịna elemu aḍapụ na fị ọḅọkụ mẹ na kịka ḅịa, anie à ḅara kẹ ini ọlọ tẹ Ijiputi ḅio ịn kẹ mẹnjị paka sakị mẹ. Arị ini na sime-ḅara ḅụ à diḅọ kịkam sọ; ini anị ọḅọkụ mẹ koko-a.

³³ Ịwọ ọḅọkụ mẹ tẹ à kẹ Izirẹlịapụ ma na fị ḅarị ọḅọkụ mẹ anie mie: àrị ì oloko kẹ ịna ḅụụ ḅio suu tẹ anị kẹ ịna aḅioḅẹngbọ ḅụ kẹẹ ḅa. Yẹrị ịna Tamụnọ sọ tẹ ini ị̀ atomi sọ ḅa.

³⁴ Ịna ḅụ gbọrụḅọ-sọ mḅọ pembema Izirẹlị ḅẹ ḅọ toluma ḅịa mḅọ KỊNỊNYANAḄỌ ḅe nimi, inimgba ì nimi ḅa ẹrẹsị, iderima-tẹịn ḅọ ḅụ ọkị mu geletẹịn ḅọ la. Arị ịna asi wẹrịso ịn pịrị tẹ ḅarị jen kẹ ịna mịẹ-irima ma kẹ ḅiokoroma ḅịa. Yẹrị, KỊNỊNYANAḄỌ ḅe, ọkọ ḅẹẹm.”

³⁵ KỊNỊNYANAḄỌ ḅe ịrụa mịẹ tẹ anị bele pịrịarị eneḅaka ḅụ, akalụ na lolia ma na nwẹnị ḍin ḅụ ḅịyarị. Ọ̀ tọrụ-minji mẹ jikema tẹ anị ḍụrụkụarị; Kụrọmamgba nyana KỊNỊNYANAḄỌ ḅe anie ori ẹrẹ.

³⁶ Ò minini wararị mịnẹ ori ye kẹ ọrụtọn wararị ḅara mẹ sime mu laa ḅiri laa ḅiri, Izirẹlị sọ sịẹ ḅara kẹ ọkọ sime ḅa.

³⁷ Gbọrụḅọ nwẹnị So-tọrụ mẹ ḅẹ finji mẹ tọn nimi tẹ kiri mẹ Suku-saakị mẹ ḍọkị ḅom ḅẹḅẹ anị sakị kịngẹ ẹrẹ mie arị Izirẹlị ḅẹ apụ ma sịkị ḅarịye ịn mịẹ tẹ aị mamgba gotẹ. KỊNỊNYANAḄỌ ḅe ọkọ ḅẹẹm.

³⁸ KỊNỊNYANAḄỌ ḅe mẹẹ, “Sakị mẹ ḅoarị, bebe Jeruselemu mẹ ḅio ịn warị-warị nama ḅinma ḅa, Hananẹlị Kụrọtẹ gele-warị ḅụ ịrụa-ideriarị-anga ḅụ ọkị mu Ịkọlị Ḅẹ Onu Ḅọkọ mẹ la.

³⁹ Japụ na ini na amakiri ma ḅẹ elekima mẹ anị anga mu ma mu ịrụa-ideriarị-anga anga ḅụ Garẹbụ tụndụ la ḅa, tẹ so mu Go-a ikelema-koro la ḅa.

⁴⁰ Bebe tụndụ-suku mẹ, ịn ḍụẹịn ḍiḅiarị pịkị fun sararị anga mẹ na ịn ḍụọ ḍiḅiarị ayọ mamgba na Kidirọnị ḍaḅa mẹ ọgọnọ-jụ ọkị mu nwenii mu Asụ Onu-ḅọkọ tẹ ịrụa saakị pakarị pakịrị anga emi ye mẹ la, fịafịa ayọ sọ ị̀ pịrị ḅa. Opu ama mẹ ịn ḅarị jen kẹ anị kan koroma anịanịa guluguluma ḅịa.”