Jerimaya 30 - FỊAFỊA BAỊBỤLỤ

KỊNỊNYANAḄỌ ḅe Minini Ori Atomi Pịrị Aị

¹ KỊNỊNYANAḄỌ ḅe, Izirẹlịapụ tẹkẹarị Tamụnọ ḅe,

² ị̀ ḅẹẹm, “À ḍuko ị́ pịrị tẹ ye goyegoye kẹ ḍiri ḅio kẹẹ koromaa,

³ arị ị̀ atomi, Izirẹlị na Juda na, kẹ pịkị-ḅo ḅarị sakị mẹ ḅoarị ẹrẹsị. Arị ịn kẹ pịkị-ḅo à kẹ ịna elemu aḍapụ ma pịrị amakiri mẹ lama tẹ in siin ọkị tẹ kẹ ịna nye sọma ḅa. Yẹrị KỊNỊNYANAḄỌ ḅe ọkọ ḅẹẹm.”

⁴ KỊNỊNYANAḄỌ ḅe Izirẹlị na Juda na ḅẹ apụ ma ḅẹẹarị,

⁵ “À tẹmẹ-naịn-naịnma owu pọkọ naam, ḅalafa owu pọkọ tẹ dein ye-a.

⁶ Mịọkụ daasịẹ tẹ kuromaa! Owiḅọ inetẹ tụḅọ iyi pakama-ḅo ḅẹ? Tiye ẹrẹsị arị owiḅọ goḅọ-goḅọ ẹrịarị ori amịna aḅara kẹ ò furo gbana wararị iyi la tẹ ẹrẹḅọ ọkụ? Tiye ẹrẹsị ḅẹḅọ-ḅẹḅọ bosolo wararị?

⁷ Tẹmẹ-naịn-naịnma ene ḅoarị; kẹ anị na tọnma ḅẹ jen ene ofori ḅụụ-ḅalaḅala sakị sọ ị̀ atomi pịrị ḅẹ ene, kụma ịn fịị-a so ḅa.”

⁸ Kụrọmamgba nyana KỊNỊNYANAḄỌ ḅe ḅẹẹarị: Anị ene mẹ ḅụ, arị ịna kọngọ kpọọ wararị ye mẹ anyịma tẹ ịna ikoli ma siin ḅa, tẹ ịn ḅarị jen kẹ jen asịẹ ḅẹ apụ omoni-sọ ḅịa.

⁹ Anie nakara yẹrị KỊNỊNYANAḄỌ ịna Tamụnọ ḅe mie ịn fịrịmẹnjị pịrị ḅarịye, pịkị Devidi furo-ḅẹ-ḅọ tẹ à kẹ emine ḅụ lẹgịma tẹ ama-da ḅẹ ḅọ ḅe na.

¹⁰ Ị̀ atomi, ọ́ ḅalafa ma; Izirẹlịapụ, ọ́ tẹmẹ-naịn-naịn ma. Sụma-jụ ḅẹ amakiri mẹ ḅụ arị ọ́ pụkọ-pakamaḅo ḅa, ọmịnị omoniapụ ḅara kẹ simearị amakiri mẹ ḅụ. Ọ́ pịkị warị ḅo tẹ dein ḅụ anga ḅa; ye ḅarị ọ́ la ḅịa, tẹ gbọrụḅọ-sọ ḅarị ọmịna ḅalafama ḅịa.

¹¹ Àrị ọ́ ḍọkụma-ḅo tẹ ọ́ ḅọrọma ḅa. Tomikiri ḅẹ asịẹ tẹ arị ọ́ gala-galama mu anga mamgba arị ịn ḅaa guluguluma ḅa, kụma arị ọ́ ḅaa guluguluma ḅịa. À mịẹ tẹ ó fomu-ḅara da ḅa; kụma arị ó fomu ḅẹ sakị, à fomu na-iḅi ḅara kẹ ó fomu ḅa. Yẹrị, KỊNỊNYANAḄỌ ḅe ọkọ ḅẹẹm.

¹² KỊNỊNYANAḄỌ ḅe ori atomi ḅẹẹarị: Ọmịna ịnọ ma gwọ-gwọ ọkụ ofori, Ọ́ la aị ma inetẹ ḅịya ḅịa.

¹³ Ó ḍikiḍiki ḅẹ gbọrụḅọ-sọ ofori, ọmịna ịnọ ma arị arịḅẹ ḍiri nyana-a, ọ́ gwọ ḅẹ ḅiokpọ ofori.

¹⁴ Ọmịna ḅẹlẹmapụ mamgba ọ́ kẹ ḅioḅọrọma tẹ; ịn ḅarị jen kẹ ó gboloma ye kẹ ye-sịn-a. À si kẹ ọ́ tọn ḅọ ḅara kẹ owu kẹ ọ́ pakam; ọ́ da fomu-ḅara mẹ kụrọ ḅakam ọmịna asi ḅakam ẹrẹsị ọmịna si-sịḅịḅio sọ ḍụḅam.

¹⁵ Ọ́ ḅarị jen kẹ ọ́ la aị gotẹ ḍuko-sụa ma; ọ́ gwọ ḅẹ ye ofori. À mị-ḅara kẹ fomu-ḅara kẹ ọ́ pịrịm ọmịna asi ḅakam ẹrẹsị; ọmịna si-sịḅịḅio sọ ḍụḅam.

¹⁶ Kụma mịọkụ, ó kuun-pẹịarị apụ mamgba ini in kuun-pẹị ḅa, tẹ si kẹ ọ́ tọn-arị apụ mamgba ini ikoliapụ ḅara kẹ ini ọkị so ḅa. Ó ponomarị apụ mamgba ini in ponoma ḅa, tẹ ọmịna aị fọịn soarị apụ mamgba ini ịna aị fọịn so ḅa.

¹⁷ À mịẹ tẹ ọmịna oju siin iḅi ḅa; àrị ịnọ ma gwọ ḅa, karakaraye si kẹ ọ́ tọn apụ ḅẹẹarị: Zayọnị anie in dee-pakama tẹ apụ; in gboloma ye kẹ ye-sịn-arị gbọrụḅọ-sọ ofori. Yẹrị, KỊNỊNYANAḄỌ ḅe ọkọ ḅẹẹm.

¹⁸ KỊNỊNYANAḄỌ ḅe mẹẹ: Àrị ị̀ atomi kẹ pịkị ịna amakiri ḅo ḅa tẹ ọkụrụkụrụ nyana ere-furo goyegoye pịrị ḅa; In siin Jeruselemu nama ḅa tẹ anị ḅẹ ama-da warị mẹ kẹ tarị ḅara mẹ wẹrị ḅa.

¹⁹ Anị anga angarị apụ ma tokini nume-su ḅa; in ḍereku kẹ oloku ḅa. Ì boma ḅụ ịna kịẹn-aḅịḅị ḍụḅa ḅa; ì boma kun ọkị-ḅo ịn pịrị ḅa.

²⁰ Elemu sakị ḅụ ịn nyana sime kụrọ mẹ à kẹ siin ịn pịrị ḅa; tẹ mịẹ tẹ anị jen kẹ kụrọ sịẹsime ḅa; à fomu-ḅara kẹ in ponomarị apụ mamgba pịrị ḅa.

²¹ Ịna ḅụ ḅẹ gbọrụḅọ ịna sịḅịdaḅọ sọ ḅa ịna ḅẹrẹtọnḅọ ịna ogboku saakị paka-ḅo ḅa. Àrị ori ọkị-ḅo kpekima tẹ ò ḅo í kpeki tẹ sime ḅa, anịsakị tụḅọ ḅarana ḅụụ saakị ị̀ pịrị ḅa yẹrị mḅọ nụnụ ị̀ ḅụụ pịrị sikima? Yẹrị, KỊNỊNYANAḄỌ ḅe ọkọ ḅẹẹm.

²² Mie ḅụ ọmịnị ị̀ atomi sọ ḅa, tẹ yẹrị ọmịna Tamụnọ sọ ḅa.

²³ Ḍikii, KỊNỊNYANAḄỌ ḅe ịganị mẹ erise kaan-paka ḅara kẹ kan pakarị tẹ nume-naowu ḅara kẹ fiema mu si-sịḅịḅio-sụapụ asịḅị gbanarị.

²⁴ KỊNỊNYANAḄỌ ḅe owi ịganị mẹ ọḅụ da ḅịa nwenii ò ḅin tẹ ḅara kẹ ò ḅioḅẹngbọ ọ̀ tọn wẹrị aị ma mịẹ fama ḅa. Tọrọkọ-jụ ḅo ḅarị ene ma ḅụ anie ó mie fiearị ye naa ḅarịye.