Jerimaya 3 - FỊAFỊA BAỊBỤLỤ

Ḅioḅẹngbọ Kẹ Sịrẹrẹ Na-iḅi-a Izirẹlị

¹ KỊNỊNYANAḄỌ ḅe mẹẹ, “Tomḅọ nwẹnị ọ̀ ta na siya tẹ á jụmọ sime kụma ọ̀ ḅarị inetẹ jen kẹ árị ọkị sime ḅịa. Miemẹ gbọrụ sịḅị amakiri mẹ pilema fama ḅa. Kụma, Izirẹlị, mịọkụ ị́ tọnwa oloapụ nyana tẹrẹmẹ pịkịma ị̀ ḍọkụma-ḅo ḅẹ-ḅiiarị!

² Tọrụ sakị tẹ kẹ tụndụ ma ọgọnọ-jụ ḍikii. Gbọrụ anga tẹ amụ ị́ ama-mẹnjị-ẹrẹḅọ ḅara kẹ ḍumo kọn-a anga emi? Etela anga ḅụ sọ í sime tẹ oloapụ korum, anie Arabụ apụ ịkpa ḅio sime tẹ ịn ḅaa ḅẹ ḅara. Ị́ ị́ ama-mẹnjị mịẹ kẹ amakiri mẹ pilema tẹẹ.

³ Anie mịẹ tẹ eene ḅarị koro-a, tẹ fẹngụ aya-ḅịḅị ḅẹ nwẹịn-nwẹịn eene mẹ sọ ḅo-a. Ḍiki-tọrụ ḅụ kịngẹ sọ ị́ ama-mẹnjị-ẹrẹḅọ kịkarị; ị́ ḅụụ sọ jịrị-a.”

⁴ Tẹ mịọkụ ị́ ị̀ ḅẹẹarị: Ị́yẹrị ị̀ ḍa, ị̀ kala-sakị kụra ḅio ị́ sakị ị̀ ḅẹlẹmam.

⁵ Sakị mamgba ị́ ịganị ḅịa; Í ḅioḅẹngbọ sii ị̀ pịrị mu ḅẹẹ-sakị ḅẹẹ-sakị la ḅịa. Izirẹlị, anie í ḍuko ye, kụma í inetẹ mịẹ ḅẹ si-aị mamgba ị́ mịẹm.

Izirẹlị Na Juda Na Si Ḅụ Pịkị Nyanam

⁶ Josaya ama-daarị sakị ḅụ, KỊNỊNYANAḄỌ ḅe ị̀ ḅẹẹm, “Ị́ ẹrị tịya, Izirẹlị, anị si ẹrẹḅọ ma mịẹ tẹ ye? Árị ọḅụ pịkị ì gbin tẹ mẹnjị so tẹ, tụndụ goyegoye ọgọnọ na ḍumo wararị sịn goyegoye suku ḅụ na arị ama-mẹnjị-ẹrẹḅọ mịẹ-mịẹ ye mịẹ tẹẹ.

⁷ À kuromam mịnẹ, á ma-mamgba mịẹ fama tẹso, á pịkị ị̀ ḍọkụma-ḅo ḅa. Kụma á pịkịma-ḅo-a, á si ịyịmbara Juda ma-mamgba ẹrịm.

⁸ Juda sọ ẹrịm mịnẹ arị Izirẹlị siya tẹ á dee-pakama tẹẹ, arị ị́ ḅụ so tẹ ama-mẹnjị-ẹrẹḅọ sọ tẹ ẹrẹsị. Kụma, Juda, Izirẹlị si ịyịmbara ma, á ḅalafa-a. Árị sọ ḅo ama-mẹnjị-ẹrẹḅọ sọm,

⁹ tẹ gbala-gbala ḅụụ-jịrị-a. Árị amakiri mẹ pilema tẹ sẹfị ḅụ sunsin ḍụḅarị na sịn na pịrịm.

¹⁰ Tẹ ma-mamgba ḅọrọ tẹso, Juda, Izirẹlị si ịyịmbara ma, oḅori kẹ ị̀ sịn ḅara kẹ pịkị ị̀ dama-ḅom; anị á tẹmẹ-la-a. Yẹrị, KỊNỊNYANAḄỌ ḅe ọkọ ḅẹẹm.”

¹¹ Anịtẹso KỊNỊNYANAḄỌ ḅe ḍuko ị̀ pịrịm mịnẹ Izirẹlị ọ̀ ḅụụ pịkị-so tẹ sọ á ḍie-pakama tẹ mịnẹ árị ḅioḅẹngbọ-kẹ-sịrẹrẹ-niḅi Juda nẹngịm.

¹² Ò ḍuko ị́ pịrịm àrị Izirẹlị ḅẹẹ, “Ḅioḅẹngbọ kẹ ḅụụ ḅụ gbana na-iḅi-a Izirẹlị, pịkịma ị̀ ḍọkụma-ḅoo. Àrị ọkụrụkụrụ nyana wararị, tẹ arị ịganị ḅịa, arị ịganị ị́ pịrị mu ḅẹẹ-sakị ḅẹẹ-sakị la ḅịa.

¹³ Ị́yẹrị paa minini mịnẹ í siye mịẹ tẹẹ, mịnẹ ị́ kọngọ kụrọma KỊNỊNYANAḄỌ ị́ Tamụnọ pịrị tẹẹ. Ḍuko pakama mịnẹ ịwọ sịn goyegoye suku ị́ ị̀ ḅẹlẹma kẹ jen asịẹ ḅẹ atamụnọ pịrị tẹẹ, ị́ ị̀ tọn-aị ma mịẹ-a. Yẹrị KỊNỊNYANAḄỌ ḅe ọkọ ḅẹẹm.”

¹⁴ Ḅioḅẹngbọ kẹ ḅụụ ḅụ gbana na-iḅi ḅara sime-a apụ, ọ́ pịkị-ḅoo; yẹrị ọ́ nyanam. Arị ọmịna ḅụụ ama gbọrụḅọ-gbọrụḅọ na maa apụ maa apụ na ọkị Zayọnị tụndụ ḅo ḅa.

¹⁵ Àrị ị̀ ḅịḅịpokiarị ḅẹrẹtọn-apụ kẹ ọ́ pịrị ḅa, tẹ in nimi na yefieye naa na kẹ ḅẹrẹtọn ọ́ pịrị ḅa.

¹⁶ Anịtẹso anị amakiri mẹ ḅụ ọmịna kịẹn-ḅịḅị ḅo gburo-gburo sakị, kịnị ḅarị jen kẹ ị̀ Ọḅọkụ-Igbe mẹ gboloma ye ḍuko ḅịa. Ịn ḅarị jen kẹ anị kẹ kuroma ḅụ suu ḅịa, anịanịa anị kẹ ḅiokoroma; ini anị kẹ mịẹ ḅẹ ye kịngẹ sọ paka ḅịa, anịanịa anị kịka jen ye mị.

¹⁷ Anị sakị mẹ ḅụ, ịn kẹ Jeruselemu sịn ḅarịye: KỊNỊNYANAḄỌ Ḅe Emine, tẹ sịẹ-sịẹ ma anị anga kobiri tẹ sunsin ị̀ pịrị ḅa. Ịn ḅarị jen kẹ ịna kọngọ-kụrọ na sitẹ aḅioḅẹngbọ ma ḍuko ịn pịrị aị mịẹ ḅịa.

¹⁸ Izirẹlị na Juda na gboloma ḅa, tẹ ịn gbọrụ ḅụ kẹ ọgọnọ-jụ ḅẹ yọ mẹ ḅụ kun-ḅara ḅụ so ḅo à kẹ ịna elemu aḍapụ ma pịrị gbamaso wararị amakiri mẹ la ḅa.

Tamụnọ Atomi Ma Oru Fụḅara Tẹkẹ Mẹ

¹⁹ KỊNỊNYANAḄỌ ḅe mẹẹ, Izirẹlị, à ḅiim arị ị́ kẹ ì owiḅọ tụḅọ ḅara ọkị tẹ ḅioḅẹlẹmarị amakiri kẹ ị́ pịrị, bebe tomikiri mẹ ḅụ iḅi tẹịn amakiri. À ḅiim ị́ ḍaḅọ kẹ ị̀ sịn, tẹ gbala-gbala ḅarị ị̀ ḅụụ pịkị-so ḅịa ḅara.

²⁰ Kụma si ẹrẹḅọ ḅara ḅụ amụ í ḅioḅẹngbọ-kẹ-sịrẹrẹ-niḅi ḅara sime ị̀ pịrị-a. Yẹrị, KỊNỊNYANAḄỌ ḅe ọkọ ḅẹẹm.

²¹ Tụndụ ma ọgọnọ-jụ ḅio ḅịḅị yoko-yokoma fiearị; Izirẹlịapụ owu pọkọ na tẹkẹarị ḅịḅị na, in si ḍumo kọn tẹ ẹrẹsị pịkị KỊNỊNYANAḄỌ ịna Tamụnọ ḅe kẹ ḅioḅọrọma tẹẹ.

²² Ọmịnị KỊNỊNYANAḄỌ ḅe ḅụụ pịkị-so apụ mamgba ọ́ pịkị-ḅoo; Ori ọ́ gwọ tẹ ọ́ mịẹ tẹ ó ḅioḅẹngbọ kẹ ḅụụ ḅụ gbana na-iḅi ḅara sime ḅa. Ọmịnị mẹẹ: Inn, wa KỊNỊNYANAḄỌ ḅe ḍọkụma-ḅoarị, ori wamịna Tamụnọ ẹrẹsị.

²³ Tụndụ ma ọgọnọ-jụ wa mu tẹkẹ oru atamụnọ ma gbọrụ ḅarasụa sọ nyana wa pịrị-a. Izirẹlị nyanarị ḅarasụa KỊNỊNYANAḄỌ wamịna Tamụnọ ḅe ḅara mie anị ḅoarị.

²⁴ Kụma wa sunsin Balị pịrịarị ye mẹ, anị ḅụụ-jịrịma tamụnọ ḅe, mịẹ tẹ wa anana na ja anama na ogbo-ogbo ma fama tẹ, owiapụ-awọmẹ na eremịna-awọmẹ na sọ, ye goyegoye tẹ wamịna elemu aḍapụ elemu sakị kụra ḅio kọrị pakama-ḅo aị ma.

²⁵ Wa ḅụụ-jịrị ḅụ ḅịkị-koro gbẹẹm, tẹ ye tọrụ-tuu ḅụ wa gbaịn sime. Wamịnị na wamịna elemu aḍapụ ma na sakị mamgba si kẹ KỊNỊNYANAḄỌ wamịna Tamụnọ ḅe mịẹ tẹ; gbala-gbala amụ wa ọ̀ tọn wa pịrị aị poki tẹ mịẹ-a.