Jerimaya 29 - FỊAFỊA BAỊBỤLỤ

Jerimaya Kẹ tẹ kẹ Babịlonịya ḅio sime Juu-ḅẹ-apụ fịrịma Ḍiri

¹ À ḍiri kẹẹ tẹ kẹ agbamịẹapụ ma na, ịkịankoroapụ ma na, tomi ma sịḅịdapụ ma na, osi apụ mamgba na tẹ Nebukadineza ikoliapụ ḅara kẹ ọkị so Babịlonịya mu apụ ma fịrịmam.

² Arị anị kẹ sakị anie ini Ama-da Jehohakịnị na, ò iyingi na, ama-da warị mẹ ḅẹ opu fịrịmẹnjịapụ na, Juda na Jeruselemu na ḅẹ sịḅịdapụ na, ḅara-ḍịn apụ ma na, kọrịnama ḍin apụ ma na ọkị so jen sịẹ ḅụ koroma sakị mẹ ḅụ.

³ À ḍiri mẹ kẹ Elasa, Safani tụḅọ ḅe na Gemaraya, Hilikaya tụḅọ ḅe, na ḅara fịrịmam, Ama-da Zẹdẹkaya, Juda daarịḅọ ḅe ịn kẹ Ama-da Nebukadineza, Babịlonịya daarịḅọ ḅe fịrịmarị sakị. Anị mẹẹ:

⁴ Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, inimgba tẹ ò minini Nebukadineza pịrị tẹ ori ikoliapụ ḅara kẹ Jeruselemu ḅụ ọkị so Babịlonịya mu apụ ma ḅẹẹarị:

⁵ “Ọ́ warị nama-nama tẹ ekpe deinma tẹ angaa. Ọ́ ḍụọ ḍiḅi-ḍiḅi tẹ arị ḅio paka-ḅo aị fịị.

⁶ Ọmịnị ere-sime sime tẹ awọ iyii. Anịtẹso yee ọmịna awọmẹ sọ ere-sime pịkị owiapụ sime, mịẹ tẹ ini sọ awọ iyi ḅarị ḅara. Ọmịna kịẹn-ḅịḅị iwo ma-muu, ideri ma.

⁷ Àrị ọ́ mịẹ tẹ ọmịnị ikoliapụ ḅara kẹ mu tẹ opu ama ma, ọmịnị arị iḅi ḅẹ ḅara gotẹ kọrịnama kọrịị. Ọmịnị in gotẹ ị̀ tẹkẹẹ, kẹ gotẹ ọkọ ḍukoarị, ịn lọkọlọkọ kụma, ọmịnị sọ lọkọlọkọ ḅa.

⁸ Yẹrị, KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ọmịna ḅeri nụnụarị mịnẹ ọmịnị ọmịna aḅụụ wẹrịso tẹ ọmịna ogboku anga ịkịankoroapụ ma oḅori kẹ ọ́ sịn ma, anịanịa ḅẹ japụ-japụ tẹ amịna aḅụụ ọkịarị mịnẹ ini inetẹ ḅaa paka ḅẹ ye nimi tẹ ḍuko ḅa. Ịn kọn-arị aḍawọ ma ḅẹ gberie-sọ ọ́ kẹ ye-sịn ma.

⁹ Ini iruo aị ḍuko ọ́ pịrịarị ị̀ ẹrẹ ḅụ. Yẹrị ịn fịrịma-a. Yẹrị, KỊNỊNYANAḄỌ ḅe ọkọ ḅẹẹm.”

¹⁰ KỊNỊNYANAḄỌ ḅe mẹẹ, “Babịlonịya kụra atesi oyi finji ma ḅọrọ sakị, à ḍie-pakama ḅa mịnẹ arị ó gotẹ ḅio-sẹsẹarị, tẹ à minini ọ́ pịrị ye mẹ mịẹ ḅa, ọ́ kẹ pịkị ama ḅo mẹ.

¹¹ Yẹrị kịngẹ mie à tọn wẹrị ọ́ pịrị aị nimi wararị, à tọn tẹ lọkọlọkọ ọkị-ḅo ọ́ pịrị ḅẹ aị ma, opu ḅụụ-fụka-a, tọn tẹ tọrọkọ-jụ ọ́ kẹ tọrụ-ḅaama wararị ḅiokpọmaye mẹ ọkị-ḅo ọ́ pịrị ḅẹ aị ma.

¹² Anịtẹso ọmịnị ị̀ sịn ḅa. Ó ḅo tẹ ị̀ tẹkẹ ḅa, tẹ arị ọ́ pakịrị ḅa.

¹³ Ọmịnị ị̀ ḍọkị ḅa, tẹ ọmịnị ị̀ ḍọkị ẹrị ḅa, ọmịnị ọmịna ḅioḅẹngbọ mamgba kẹ ị̀ ḍọkị ḅarị ẹrẹsị.

¹⁴ Inn, à ḍukoarị, ọmịnị ị̀ ḍọkị ẹrị ḅa, tẹ arị ọ́ kẹ pịkị ọmịna amakiri ḅo ḅa. Sịẹ goyegoye na ye-yọ goyegoye na tẹ arị ọ́ gala-gala mu la anga ma, arị ó kobiri ḅa, tẹ ọ́ kẹ pịkị-ḅo ó simearị tẹ arị ọ́ kẹ kun-so mu yọ fịrịma amakiri mẹ la ḅa. Yẹrị, KỊNỊNYANAḄỌ ḅe ọkọ ḅẹẹm.”

¹⁵ Ọ́ ḅẹẹarị mịnẹ KỊNỊNYANAḄỌ ịkịankoroapụ kẹ ọ́ pịrị tẹẹ Babịlonịya ḅụ.

¹⁶ Ọ́ KỊNỊNYANAḄỌ ḅe Devidi da tẹ so ama-da yọ mẹ daarị ḅọ ḅe na mịẹ opu ama mẹ ḅẹ apụ, anie ọmịna amịnapụ tẹ ịn kẹ ọmịna ḅụ sụa ikoliapụ ḅara kẹ kun-soa apụ na gboloma ye ḅụ KỊNỊNYANAḄỌ ḅe ḍukoarị ye pokii.

¹⁷ Kụrọmamgba nyana KỊNỊNYANAḄỌ ḅe ḅẹẹarị, “Àrị ọmụ na, ḅuru-ḅa na, obi na ọkị-ḅo ịna ọgọnọ gbanarị, tẹ arị ịn mịẹ tẹ in si ḅụrụ tẹ ḅarị fị-fị ḅara sime-a figi-sịn mgbọlụ kịka ḅa.

¹⁸ Àrị ọmụ na, ḅuru-ḅa na, obi na kẹ in ḍuka ḅa, tẹ tomikiri ḅẹ asịẹ mamgba ini ẹrị ye ḅụ ḅalafaa ḅa. Àrị ịn gala-gala mu anga mu anga kịnị ịna ḅụ paka tẹ ye gotẹ ḅụụ-gbiripu tẹ tẹmẹ-naịn-naịn ḅa. Kịnị in kombo tẹ ịna ẹrẹ kẹ ye gbo ḅa.

¹⁹ Miemẹ ịna ḅụ paka ḅa ini arị ị̀ fịrịmẹnjị ịkịankoroapụ ma ḅụ ḅọrọtẹ kẹ ịn fịrịma-fịrịma-fịrịmarị oku mẹ poki tẹ mịẹ-a ẹrẹsị. In poki ḍụkụ-a.

²⁰ Ọmịnị-mgba tẹ à kẹ kun-ḅara ḅio sime apụ ḅara kẹ Babịlonịya fịrịma apụ ma, ọmịnị yẹrị KỊNỊNYANAḄỌ ḅe mẹẹ ye poki.”

²¹ “Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, Ehabụ, Kolaya tụḅọ na Zẹdẹkaya, Masẹya tụḅọ ḅe na ḅụ ye ḍuko tẹẹ, anie ori ẹrẹ ḅụ iruo aị ḍuko ọ́ pịrịarị apụ ma. Ò ḍuko tẹẹ mịnẹ ori ịn saḅama Babịlonịya ḅẹ Ama-da Nebukadineza kụrọ ḅara ḅio suu tẹ ọ́ tọrụngbọ kẹ ẹrị ḅarị ḅara kẹ ịn ḅaa ḅa.

²² Ini ikoliapụ ḅara kẹ Jeruselemu ḅụ ọkị-so Babịlonịya mu apụ ma ye karị ḅẹ sakị ịn ḅẹẹ ḅa: ‘Yee KỊNỊNYANAḄỌ ḅe ọ̀ kẹ Zẹdẹkaya na Ehabụ na mịẹ ḅara kẹ ị́ na mịẹ, anie Babịlonịya ḅẹ amadaḅọ kẹ ḍumo tọrụ ḅụ fịnị ḅio fọị apụ ma!

²³ Miemẹ sime ịn pịrị tẹ ịna ḅụ paka ḅẹ ye sọ ḅa, ịn ḅalafama asi mịẹ tẹ ẹrẹsị — ịn sẹfị tẹ pịkị KỊNỊNYANAḄỌ ḅe ẹrẹ ḅụ iruo aị ḍuko tẹẹ. Miemẹ KỊNỊNYANAḄỌ ḅe ḅiiarị ye na tụḅụrụm; ori ịn mịẹ tẹ ye mẹ nimi wararị, ori ḅẹrẹ-kiri sime-ḅọ sọ tẹ ini na tụḅụrụ wararị.’ ” KỊNỊNYANAḄỌ ḅe ọkọ ḅẹẹm.

Sẹmaya Ḍiri Mẹ

²⁴ Ḍuko Sẹmaya, Nehelamụ ḅẹ ḅọ ḅe pịrịị,

²⁵ “Miemẹ anie Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹ ye: Ị́ ị́ soku ḅẹ ẹrẹ kẹ ḍiri kẹẹ-kẹẹ tẹ kẹ Jeruselemu ḅụ sime apụ mamgba na Zẹfanaya, Masẹya tụḅọ Agbamịẹḅọ ḅe, na osi agbamịẹapụ mamgba na fịrịmam. Ị́ Zẹfanaya ḅẹm,

²⁶ ‘KỊNỊNYANAḄỌ ḅe ị́ kẹ agbamịẹḅọ sọma tẹ kẹ Jehohada kiri ḍima tẹẹ, anie mịọkụ sịḅịda fịrịmẹnjịḅọọ Tamụnọ-warị mẹ ḅio. Anị ị́ kọrịnama sọ tẹẹ, nọmụḅọ goḅọ-goḅọ tẹ amịna ḅụụ kẹ ịkịankoroḅọ sịn-arị ḅọ kọngọ ḅụ ikoli kẹ ịkasị koroma.

²⁷ Tiye ẹrẹsị amụ í miemẹ kẹ Anatọtị ḅẹ Jerimaya ma, anị kụra ḅio ịkịankoroḅọ ḅara kẹ ẹkwẹn-ẹkwẹn tomi ma pịrịarị ḅọ ḅe?

²⁸ Ị́ ọ̀ dasịẹma nyanam, anie ò ḍuko Babịlonịya ḅụ emi apụ ma pịrị tẹ ẹrẹsị mịnẹ ini ikoli ḅio sime alama ḅa anị anga, ọkọ ẹrẹsị ịn warị nama-nama tẹ ekpe-deinma tẹ anga, ḍụọ ḍiḅi-ḍiḅi tẹ arị ḅio paka-ḅo aị fị.’ ”

²⁹ Zẹfanaya agbamịẹḅọ ḅe nwẹnị ị̀ tọrọkọ ḍiri mẹ go ị̀ pịrị.

³⁰ Anịtẹso KỊNỊNYANAḄỌ ḅe nwẹnị ẹkwẹn ị̀ pịrị,

³¹ “Mị oku mẹ kẹ kun-so apụ mamgba fịrịmaa: ‘Mie KỊNỊNYANAḄỌ ḅe Sẹmaya, Nehelamụ ḅẹ ḅọ ḅe ḅụ ḍukoarị ye, Sẹmaya ịkịankoro ọ́ pịrịtẹ ẹrẹsị, karakaraye yẹrị ọ̀ fịrịma-a sọ, tẹ mịẹ tẹ ọmịnị iruo ye minini tẹ,

³² mie KỊNỊNYANAḄỌ ḅe mẹẹ ye, piki-pikiye-ofori ḅara ḅụ à fomu-ḅara kẹ Sẹmaya Nehelamụ ḅẹ ḅọ ḅe pịrị ḅa, ò furo-ḅẹ-apụ sọ. Ori atomi ḅụ kirikọn ḅẹ ḅọ ofori, ò ḍumo sime tẹ tọrụngbọ kịngẹ sọ kẹ à mịẹ ị̀ atomi pịrị ḅẹ iḅi aị ma sọ ẹrị ḅịa, KỊNỊNYANAḄỌ ḅe ḍuko pakamarị, ò tomi ma kọngọ kụrọma ị̀ pịrịị nwẹn ḅẹẹ ye ḍuko ịn pịrị ye ẹrẹsị.’ ” Yẹrị KỊNỊNYANAḄỌ ḅe ọkọ ḅẹẹm.