Jerimaya 25 - FỊAFỊA BAỊBỤLỤ

Ọgọnọ-jụ Sime Tẹ Ḅo Ḅarị Kịnị-na-fịya-a ḅọ Ḅe

¹ Jehohakịmụ Josaya tụḅọ ḅe Juda da tẹ ini akụra karama kụra mẹ ḅụ, à KỊNỊNYANAḄỌ ḅe ḅara ḅo oku nyanam, anie Juda ḅẹ apụ mamgba gboloma ye. (Miemẹ anie Nebukadineza Babịlonịya da tẹ tarị kụra mẹ ḅụ)

² À Juda na Jeruselemu na ḅẹ atomi mamgba ḅẹẹm,

³ “si tẹra akụra finji ḅụ, Josaya, Amọnị tụḅọ ḅe Juda da tẹ oyi tẹrẹị finji karama kụra ḅụ ọkị-ḅo mịmgba la, KỊNỊNYANAḄỌ ḅe ẹkwẹn ị̀ pịrị tẹẹ, amụ à pịkị gbarị-a gbala-gbala, ori ị̀ ḅẹẹ ye ḍuko ọ́ pịrị ḅụ. Kụma ọ́ kẹ ye-sịn-a.

⁴ Ó poki ḍụkụ-a, anịanịa kẹ ye-sịn, karakaraye KỊNỊNYANAḄỌ ḅe ori afịrịmẹnjịapụ, ịkịankoroapụ ma kẹ fịrịma, siin fịrịma tẹ sọ.

⁵ In ḍuko ọ́ pịrịm ọmịnị ọmịna si-sịḅịḅio-sụa ḍumo etela mẹ na ọ́ mịẹarị si-aị ma na ḅụ pịkịị, mịẹ tẹ ọmịnị inetẹ paa KỊNỊNYANAḄỌ ḅe kẹ ọmịnị na ọmịna elemu aḍapụ ma na pịrị amakiri mẹ anga tọrọkọ-tọrọkọ mu ḅẹ ḅara, sime ọ́ pịrị gbamaso ye ḅara ḅụ.

⁶ In ḍuko ọ́ pịrịm ó sunsin oru-atamụnọ ma pịrị ma, pịkị fịrị mẹnjị arị pịrị ma, tẹ ọ́ pịkị KỊNỊNYANAḄỌ ḅe ịganịma ma, sunsin oru-afụḅara tẹ ọmịnị tẹmẹ-aị piri ḅụ. Ọ́ KỊNỊNYANAḄỌ ḅe ḅịḅịpoki namịna, ọ̀ ḅarị fomu-ḅara kẹ ọ́ pịrị-a so tẹẹ.

⁷ Kụma KỊNỊNYANAḄỌ ḅe ḅioju ḅẹẹarị mịnẹ ọ́ ḍụkụ tẹ ò poki-a. Anie nakara, ọmịnị ori ịganịma tẹ ọmịna oru-afụḅara ma ḅụ, tẹ mị fomu-ḅara mẹ dogi-ḅo ọmịna ọgọnọ gbanam.”

⁸ Mie ḅụ, ọmịnị ò poki ḍụkụ-a mẹ ẹrẹsị, Kụrọmamgba nyana KỊNỊNYANAḄỌ ḅe mẹẹ,

⁹ “Arị ó gotẹ ḅịḅị kẹ tomikiri mẹ ḅẹ ọgọnọ-jụ simearị apụ mamgba na ị̀ fịrịmẹnjịḅọ, Babịlonịya ḅẹ amadaḅọ Nebukadineza na fịrịma ḅoarị. Àrị ini ọkị-ḅo tẹ ini owu kẹ Juda na anị ḅio angarị apụ na anị na kpeki wararị asịẹ mamgba na paka ḅẹ-yearị. À mị sịẹ mẹ na anị na kpeki wararị si na guluguluma ḅẹ-yearị, tẹ arị wẹrịso tẹ arị fa gbamaso ḅa, ḍiki-tọrụ ḅụ kpọma ḅalafama tẹ ḅụụ-ịnọ ḅarịye. Yẹrị, KỊNỊNYANAḄỌ ḅe ọkọ ḅẹẹm.

¹⁰ Ịna ḍereku na, ḅioḅẹlẹ na oloku ma na ere-ịya asakị ḅẹ alalị ḅioḅẹlẹ ẹkwẹn apọkọ ma na à yaụma ḅa. In pulo nyana ḅịa kẹ ịna atọnjọ ḅio sụa, tẹ mbịaka ḅarị jen kẹ paka ḅịa.

¹¹ Mị bebe amakiri mẹ si tẹ koro-sime ḅa, tẹ ḍiki-tọrụ ḅụ kpọma ḅụụ-gbiripuma ye sọ ḅa, tẹ anị na kpeki wararị asịẹ ma na nwẹnị kụra atesi oyi finji kẹ fịrịmẹnjị Babịlonịya ḅẹ amadaḅọ ḅe pịrị ḅa.

¹² Aniemẹ ḅọrọ tẹso, à fomu-ḅara kẹ Babịlonịya mẹ na anị ḅẹ amadaḅọ na pịrị ḅa ịna si gotẹ. Àrị ịna sịẹ mẹ guluguluma tẹ anị si tẹ koro-sime gbamaso ḅa.

¹³ Opu ḅụụ-fụka mamgba tẹ arị ẹrẹmam arị ọkị-ḅo sịẹ-sịẹ ma ọgọnọ gbana ḅẹ Jerimaya ḅịḅị ḅụ ḍuko aị ma — arị ḅụụ-fụka mamgba tẹ mị ḍiri mẹ ḅio kẹẹ koro wararị aị ma, mie à kẹ Babịlonịya fomu ḅarị aị.

¹⁴ Babịlonịya ḅẹ apụ mịẹ tẹ ye mẹ gbẹẹ-ye kẹ in gbẹẹ ḅa, tẹ tọnwa asịẹ na opu amadapụ na ịn kẹ omoni sọma ḅa.”

¹⁵ KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ị̀ ḅẹẹm, “Mie iru mọngị, ị̀ ịganị anị ḅio ḅin wararị. Anị ọkị tẹ kẹ arị ị́ kẹ fịrịmarị asịẹ mamgba muu, tẹ ịn mịẹ tẹ ini anị ḅio ḅuu.

¹⁶ Ini anị ḅio ḅuu sakị, in pụmbụma-pụmbụma tẹ ịna akuroma ḅarị tụkụ ḅịa, à kẹ ịn fịrịmarị ọmụ mẹ ẹrẹsị.”

¹⁷ Mie ḅụ, à KỊNỊNYANAḄỌ ḅe ḅara ḅụ mọngị mẹ daa-ọkị tẹ anị kẹ ori ị̀ fịrịma asịẹ mamgba pịrị, tẹ mịẹ tẹ ini anị ḅio ḅụ ḅuum.

¹⁸ Jeruselemu na Juda ḅẹ ama mamgba na, pịkị anị ḅẹ amadapụ na sịḅịdapụ na sọ kẹ ịna ḅụ sụa tẹ in ḅuum, mịẹ tẹ ini ịkpa sọ ḅẹ ḅara, tẹ ḍiki-tọrụ ḅụ ḅalafamarị pịkị ḅụụ-gbiripumarị ye, mịẹ tẹ kịnị ịna ẹrẹ kẹ ye karị, anie mịọkụ sọ in paa mịẹarị ḅara.

¹⁹ Fero, Ijiputi ḅẹ amadaḅọ, ò ḍikiḍikiarị apụ na opu fịrịmẹnjịapụ na ori atomi mamgba na,

²⁰ pịkị anịanga ḅụ simearị ja asịẹ ma ḅẹ apụ mamgba na; Uzu ḅẹ amadapụ mamgba na, Filisiteni ḅẹ amadapụ mamgba na. (Asịkẹlọnị ḅẹ apụ, Gaza ḅẹ apụ, Ẹkịrọnị ḅẹ apụ, pịkị ini ma tẹ kirikọn-apụ ma na, Asịdọdị ḅụ)

²¹ Idọmụ na, Mohabụ na, Amọnị na,

²² Taya na, Sayịdọnị amadapụ mamgba; tọrụ saḅa koro ḅụ tọrụ akaka ḅẹ ama ma amadapụ sọ.

²³ Dedanị na, Tẹma na, Buzu na inimgba tẹ sụma-jụ simearị ayọ ma ḅụ emi apụ sọ,

²⁴ Arebịya ḅẹ amadapụ mamgba, pịkị ja asịẹ ḅẹ amadapụ mamgba tẹ ịkpa ḅio angarị apụ ma sọ,

²⁵ Zimiri na, Ẹlamụ na, Midiya na ḅẹ amadapụ mamgba;

²⁶ pịkị tomikiri mẹ ḅẹ ọgọnọ-jụ ḅẹ amadapụ mamgba, kpeki anga na sụma-jụ na simearị amadapụ mamgba, ọrụḅọ-ọrụḅọ tomikiri ḅụ amadapụ daarị ayọ mamgba. Inimgba ḅọrọ tẹso, Sisakị ḅe amadaḅọ sọ anị ḅuu ḅa.

²⁷ Anịtẹso KỊNỊNYANAḄỌ ḅe ị̀ ḅẹẹm, “ḍuko tomi ma pịrịị mịnẹ yẹrị Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, tọn in pịrịarị ini iru mẹ ḅuu nwenii anị ịna tọrụ-ḅaa tẹ ini ọsụ nwenii in ḅịkị koro tẹ ḅarị inetẹ saakị-so, anie à kẹ in fịrịmarị okologie mẹ gotẹ.”

²⁸ “Tẹ ini ị́ ḅara mọngị mẹ daa-ọkị tẹ anị ḅio ḅụ ḅuu ḍụkụ-a ḅẹḅẹ, anịsakị ḅụ ḍuko in pịrị mịnẹ Kụrọmamgba nyana KỊNỊNYANAḄỌ ḅe ḍuko tẹ mịnẹ ini anị ḅio ḅuu-a so ḅịa.

²⁹ Àrị à nyana tẹ kọrị ḅẹ guluguluma kọrịnama mẹ saakị ḅa ị̀ ḅara-kuḅu ḅẹ opu ama mẹ ḅio. In kuromarị in fomu-ḅara da-a so ḅa aro? Ẹn-ẹn; in fomu-ḅara da ḅa, kẹ gotẹ ọkọ ḅẹẹarị, arị ọmụ kẹ bebe tomikiri mẹ fịrịma ḅẹ-yearị. Yẹrị, Kụrọmamgba nyana KỊNỊNYANAḄỌ ḅe ọkọ ḅẹẹm.”

³⁰ Ị́yẹrị, Jerimaya, àrị ị́ ḅẹẹ ye ḅẹẹ ye, í ḍuko ịn pịrị nyanam. Gbarịma-a ḅara ḅụ ḍuko mịna apụ ma pịrịị, KỊNỊNYANAḄỌ ḅe So-ḅio sime tẹ ekire ḅa, tẹ So mẹ ọgọnọ-jụ ḅio so-alagba tẹịn ḅa. Ori ekire ori atomi pịrị ḅa; ori oloku ḅarị ḅara anie kẹ iru mịẹ ḅẹ girepu-asịnmgbọlụ nangarị ḅọ oloku ḅara. Tomikiri sime-ḅọ sime-ḅọ ọ̀ pọkọ naa ḅa.

³¹ Tẹ pọkọ mẹ fie ma mu tomikiri ḅẹ ịkọlị ma la ḅa. KỊNỊNYANAḄỌ ḅe sịẹ-sịẹ ma na ḅẹrẹ nyana wararị. Ọ̀ kịnị mamgba kẹ ḅẹrẹkọn ḅo ḅa tẹ si-sịḅịḅio-sụapụ ma ḅaa ḅa KỊNỊNYANAḄỌ ḅe ọkọ ḅẹẹm.

³² Kụrọmamgba nyana KỊNỊNYANAḄỌ ḅe ḍukoarị mịnẹ opu ḅụụ-fụka ḅoarị, anị gbọrụ sịẹ la tẹso, anị pịkị osi sịẹ la ḅa, tẹ opu erise fie ḅẹ-yearị tomikiri mẹ ḅẹ sụma-jụ ḅẹ ịkọlị ḅụ.

³³ Anị ene mẹ ḅụ, KỊNỊNYANAḄỌ ḅe ḅaa ḅarị apụ ma oju akpakpa ma gala-gala ḅa tomikiri mẹ ḅẹ gbọrụ ịkọlị ḅụ mu osi ịkọlị la. Gbọrụḅọ-sọ in ḍuu ḅịa, pịkị ḍụẹịn ma kẹ so mu ḍiḅi ḅịa. Arị kiri ọgọnọ kpoli sime ḅa, ḅụrụ tẹ afun, tẹ kẹ fịye ḍiḅi ḅẹ kiri tẹlẹma ḅẹ aị ọkụ.

³⁴ Ọmịnị owuu, ọmịnị Sịḅịdapụ, ọmịnị anana-ḍikiḍikiḅọ ḅara kẹ ị̀ atomi ḍikiḍikiarị apụ, ọmịnị owu pakamaa! Ó kururu tẹ fọọn ḅio mbelembelee. Ịn pẹị ḅẹ nama ḅaa-ḅaa ḅara kẹ ọ́ ḅaa ḅẹ sakị mẹ ḅo la tẹẹ, tẹ ini ejimina amẹẹ keni-keni ḅara kẹ ó keni ḅa.

³⁵ Ọ́ ḅara tẹ mangị-so ḅẹ gbọrụ ḅọkọ sọ paka ḅịa.

³⁶ Anana ḍikiḍikiapụ ma kọn-arị owu mẹ naa, ị̀ anana-ogbo mẹ sịḅịdapụ pee-peema owuarị anana-ogbo mẹ gotẹ; anie KỊNỊNYANAḄỌ ḅe ịna osuka-fị-kiri mẹ gulugulumarị ẹrẹsị.

³⁷ Deintẹ osuka kiri mẹ ḅo gberie-sọ paka-a tẹ papaa simearị ye sọ ḅa, KỊNỊNYANAḄỌ ḅe owi ịganị ẹrẹsị.

³⁸ KỊNỊNYANAḄỌ ḅe ori atomi kẹ gbin-koroma-so tẹẹ, ọkụkụ amịna fukuru koroma-so pembe ḅara. Ọmụ na mẹnjị si-aị ma na KỊNỊNYANAḄỌ ḅe owi ịganị mẹ na amakiri mẹ kẹ ḅo ịkpa sọma tẹẹ.