Jerimaya 24 - FỊAFỊA BAỊBỤLỤ

Ịla sịnmgbọlụ Maa Akana

¹ KỊNỊNYANAḄỌ ḅe nwẹnị ịla sịnmgbọlụ maa akana kẹ ì ḍie, ịn kẹ Tamụnọ-warị mẹ tọrọkọ sịẹma wararị. (Babịlonịya ḅẹ Amadaḅọ, Nebukadineza, ikoliḅọ ḅara kẹ Juda ḅẹ Amadaḅọ Jehohakịnị, Jehohakịmụ tụḅọ ḅe, kun Jeruselemu ḅụ so Babịlonịya mu tẹso, mie miemẹ mịẹ ye, anịsakị Juda ḅẹ sịḅịdapụ na ḅara-ḍịn apụ na kọrịnama nimi apụ na sọ ịn kẹ amadaḅọ ḅe ḅụ sụa kun som.)

² Tarị kana mẹ iḅi figi-sịnmgbọlụ anị ḅio simem, iḅi sakị ḅịya aị; osi ye mẹ si figi-sịnmgbọlụ anị ḅio simem, arị si la ḅara ḅụ fị-fị ọkụ ofori.

³ Anịtẹso KỊNỊNYANAḄỌ ḅe ị̀ ḅẹẹm, “Jerimaya, í tiye ẹrịarị?” À nwẹnị pakịrị, “Figi-sịnmgbọlụ amẹẹ. Iḅi aị ma iḅi ḅakam, tẹ si-aị ma si ḅakam, arị si ḅaka ḅara ḅụ, fị-fị ọkụ ofori.”

⁴ Mie ḅụ KỊNỊNYANAḄỌ ḅe ị̀ ḅẹẹm,

⁵ “Yẹrị KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ọkịarị mịnẹ ịn kẹ so Babịlonịya mu apụ ma ịn ma iḅi figi-asịnmgbọlụ ma kịkarị, tẹ àrị iḅi ḅara kẹ ini na mịẹ ḅa.

⁶ Ị̀ tọrụ ịna ọgọnọ sime ḅa, tẹ àrị ịn kẹ pịkị-ḅo mị amakiri mẹ la ḅa. Àrị ịn nama saakị tẹ ịn kan koroma ḅịa; arị ịn kẹ ḍiḅi tẹ ịn nụnụ pakama-ḅo ḅịa.

⁷ Àrị ịn kẹ ì nimi ḍọkị ḅẹ tẹmẹ kẹ ịn pịrị ḅa, mịnẹ yẹrị anie KỊNỊNYANAḄỌ ḅee. Ini ị̀ atomi sọ ḅa, tẹ yẹrị ịna Tamụnọ sọ ḅa, ini ịna ḅioḅẹngbọ mẹmgba kẹ pịkị ị̀ dama-ḅo ḅa ẹrẹsị.

⁸ “Zẹdẹkaya, Juda ḅẹ Amadaḅọ ḅe, ò gbori wararị ama-ḅịḅị kẹ ẹkwẹn-arị apụ ma, na Jeruselemu ḅụ kirikọn-apụ ma na kịngẹ kụma, tẹ ama mẹ ḅio sime apụ ma, anịanịa so Ijiputi mu apụ ma, yẹrị, KỊNỊNYANAḄỌ ḅẹ, kẹ mịna si ḅaka tẹ ḅarị fị-fị ḅara sime figi-asịnmgbọlụ ma na mịẹ ḅara kịka ḅara kẹ inimgba na mịẹ ḅa.

⁹ Arị ọkị-ḅo ịna ọgọnọ gbana ḅarị opu ḅụụ-fụka mẹ sime ḅarị ḅara gotẹ tomikiri ḅẹ asịẹ mamgba tẹmẹ-naịn-naịn ḅa. Kịnị in kombo tẹ ḅịḅịkpọ-kpọ ịn pịrị ḅa, ịn kẹ kpọọtii-tii tẹ ịna ẹrẹ kẹ siye karị kịnị pịrị ḅa, arị ịn gala-gala mu la ḅarị anga mamgba ḅụ.

¹⁰ Arị ọmụ na, ḅuru-ḅa na, obi na ọkị-ḅo ịna ọgọnọ gbana ḅa, nwenii ịna ḅụ gbọrụḅọ sọ kirikọn ḅịa à kẹ ini na ịna elemu aḍapụ na pịrị amakiri mẹ ḅụ.”