Jerimaya 23 - FỊAFỊA BAỊBỤLỤ

Sime Tọrọkọ pịrị Ḅiokpọmaye

¹ KỊNỊNYANAḄỌ ḅe kpọma ḅalafama ḅẹrẹ-pẹlẹ sịḅịdapụ ma tẹ tomi ma ḅaa guluguluma na in dee gala-galama na mịẹarị apụ ma ọgọnọ gbana ḅa.

² Mie KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹ ye, anie ọkịarị mịnẹ ini anie sịḅịdapụ tẹ ị̀ atomi ma ḍikiḍikiarị nwẹn ḅẹẹ apụ ma gboloma ye ḅụ: “Ọmịnị ị̀ atomi ḍikiḍiki-a: ọmịnị ịn gala-gala tẹ in dee fama tẹẹ. Mịọkụ arị ọ́ mịẹ tẹ siye mẹ ḅẹ fomu-ḅara kẹ ọ́ pịrị ḅẹ-yearị.

³ Ị̀ atomi ma ḅụ kirikọn-apụ arị in kobiri ḅo ḅa, arị ịn gala-galama mu la asịẹ ma ḅụ, tẹ àrị ịn kẹ ḅo ịna amakiri lama ḅa. Ịn tọnwa awọmẹ nyana tẹ ịna kịẹn-ḅịḅị sun ḅa.

⁴ À sịḅịdapụ tọn tẹ ini in ḍikiḍiki ḅa. Ị̀ atomi ḅarị jen kẹ ḅalafa ḅịa, anịanịa tẹmẹ-naịn-naịn, tẹ à ḅarị jen kẹ in fomu ḅịa. Yẹrị KỊNỊNYANAḄỌ ḅe ọkọ ḅẹẹm.”

⁵ KỊNỊNYANAḄỌ ḅe mẹẹ, “Sakị mẹ ḅoarị, à karakara mịẹarị ḅọ sẹlẹ pakama-ḅo ḅarị sakị mẹ Devidi furo ḅụ, ama-da ḅẹ ḅọ ḅara ḅụ. Anị amadaḅọ ḅe nimi ḅara kẹ ḅẹrẹtọn ḅa, tẹ kura ḅara na inoma ofori ḅara kẹ ye mịẹ ḅa bebe amakiri mẹ ḅụ.

⁶ Ori ama-daarị sakị Juda ḅẹ apụ ma ye kẹ ịn lama ḅẹ ye ofori, tẹ Izirẹlịapụ ma dein ḅụ anga ḅa. Ịn kẹ ọ̀ sịn ḅarị ẹrẹ anie, ‘KỊNỊNYANAḄỌ ḅe anie Wamịna Ḅọrọma.’ ”

⁷ KỊNỊNYANAḄỌ ḅe mẹẹ, “Sakị mẹ ḅoarị, kịnị ḅarị jen kẹ ị̀ ḅụ ye karịarị tẹ ḅẹ ḅịa sakị mẹ ḅarị ḍumo wararị Tamụnọ ḅe tẹ Ijiputi amakiri ḅụ Izirẹlịapụ pakama-ḅo ḅọ ḅe.

⁸ Anie nakara ini ị̀ ḅụ karị tẹ ḅẹẹ ḅa ḍumo wararị Tamụnọ ḅe tẹ ọgọnọ-jụ ḅẹ amakiri mẹ na jen asịẹ mamgba tẹ arị ịn gala-gala mu la ayọ ma ḅụ Izirẹlịapụ ma pakama-ḅo ḅọ ḅe. Ini ịna ḅara-kuḅu ḅẹ amakiri ḅụ anga ḅa.”

Jerimaya Oku Ịkịankoroapụ ma gboloma ye ḅụ

⁹ Ì ḅioḅẹngbọ kọsị-sara tẹẹ, ì oju sẹkịarị. KỊNỊNYANAḄỌ ḅe gotẹ, Ọ̀ fịafịa ẹkwẹn ma gotẹ, Arị iru ḅuu tọrụ-ḅaamatẹ tomḅọ kịkarị, iru ḅuu ḅụlụ-ḅụlụmatẹ tomḅọ.

¹⁰ Amakiri mẹ ḅụ KỊNỊNYANAḄỌ ḅe ḅioḅẹngbọ kẹ ḅụụ ḅụ gbana na-iḅi-a atomi ḅin tẹẹ; si-sịḅịḅio-sụa ḍumo mie ịn kọn-arị tẹ ịn nyana kụrọ kẹ si-aị mịẹarị. KỊNỊNYANAḄỌ ḅe wori-nume ḅụ amakiri mẹ kururuarị tẹ nama osuka fịarị ayọ ma samụnọtẹ.

¹¹ KỊNỊNYANAḄỌ ḅe mẹẹ: Ịkịankoroapụ ma na agbamịẹapụ ma na ịn Tamụnọ nimi-a; In siye mịẹarị tẹ arị in kun tẹ Tamụnọ-warị mẹ ḅio ḅioju ḅụ sọ.

¹² Ịn mẹnjị ḅarị ayọ ma sịnịnị ḅa, pịkị kanakana ḅa; arị ịn mịẹ tẹ ịn pụmbụ tẹ ḅịkị ḅa, Àrị opu ḅụụ-fụka ọkị-ḅo ịna ọgọnọ gbana ḅẹ-yearị; in fomu-ḅara da ḅẹ sakị mẹ ḅoarị. Yẹrị, KỊNỊNYANAḄỌ ḅe ọkọ ḅẹẹm.

¹³ Sameriya ḅẹ ịkịankoroapụ ma si mẹ àrị ẹrị tẹẹ; in Balị oru ḅe ẹrẹ kẹ ẹkwẹn tẹẹ mịẹ tẹ ị̀ atomi etela-iri tẹ.

¹⁴ Kụma arị ẹrị tẹ Jeruselemu ḅẹ ịkịankoroapụ mịẹ si ịna nye nẹngị tẹẹ, ịn sẹfịarị pịkị iruo aị ḍukoarị; ịn ḅarasụa kịnị pịrị tẹ ịn kura-aye mịẹarị, mie ḅụ gbọrụḅọ-sọ ḅarị siye mị dasịẹma-a. Ị̀ ḅụụ ḅụ Sọdọmụ na Gomora na si ḅara, mie inimgba sọ si ḅara.

¹⁵ Mie ḅụ mie yẹrị Kụrọmamgba nyana KỊNỊNYANAḄỌ ḅe mẹẹ ye Jeruselemu ḅẹ ịkịankoroapụ ma gboloma ye ḅụ: À pilema-pilema kẹ ịn pịrị tokuru ḅa, tẹ kịnị-ḅaaḅa ye kẹ ịn pịrị ḅuu ḅa, ịn Tamụnọ nimi-a ḍumo kẹ bebe amakiri mẹ ikelema-koro tẹ ẹrẹsị.

¹⁶ Kụrọmamgba nyana KỊNỊNYANAḄỌ ḅe Jeruselemu ḅẹ apụ ma ḅẹẹm, “Ọmịnị ịkịankoroapụ ma ḍukoarị aị ma poki ma; papaa ḅiokpọma aị mie ịn kẹ ọmịna aḅụụ ḅio suu ḅinmarị. Ịna aḅioḅẹngbọ ḅụ ịn kuroma ḅo aị mie in ḍuko ọ́ pịrịarị, yẹrị ḅẹẹ ye-a.

¹⁷ Ḍụkụ tẹ à ḍuko tẹ aị ma poki-a apụ mie ịn ḅẹẹ-ḅẹẹ ḅara mịnẹ ye mamgba ini na iḅi fama ḅa. In ḍuko ḅẹḅọ-ḅẹḅọ tẹ kọngọ-kụrọmarị ḅọ pịrịarị mịnẹ gbala-gbala opu ḅụụ-fụka ḅo la ḅịa.”

¹⁸ À nwẹnị ḅẹẹ, “Mịna ịkịankoroapụ ma ḅẹ gbọrụḅọ-sọ amụ jen sakị KỊNỊNYANAḄỌ ḅe ḅọị tẹ akuroma ma nimi-a. Ịna ḅụ gbọrụḅọ-sọ amụ jen sakị ori oku mẹ naa-a, anịanịa anị fiearị ye naa, anịanịa poki, anịanịa ò ḍuko ye kẹ ye-sịn,

¹⁹ Ori ịganị mẹ anie erisee, opu ḅara fiearị fẹrụ tẹ fie mu si-sịḅịḅio-sụapụ ma asịḅị sara ḅa,

²⁰ tẹ anị fie pẹlẹ ḅịa nwenii ò ḅiotọn-arị ọ̀ mịẹ ḅa nwẹn ḅẹẹ ye goyegoye mịẹ fama ḅa. Ḅo ḅarị ene ma ḅụ ori atomi giregire ḅara kẹ miemẹ fiearị ye naa ḅa.”

²¹ KỊNỊNYANAḄỌ ḅe ḅẹẹm, “Mịna ịkịankoroapụ ma yẹrị ịn kẹ fịrịma-a, kụma anịsọ in mum. À gbọrụ oku sọ kẹ ịn pịrị-a, kụma ịn paa ị̀ ẹrẹ ḅụ ẹkwẹnm.

²² Ini ị̀ ḅọịtẹ akuroma nimim namịna, mimgbe ini inetẹ ì oku ḍuko wasama ị̀ atomi pịrị tẹẹ, tẹ mịẹ tẹ ini ịn kọn-arị si ḍumo mẹ na si-sịḅịḅio-sụa amịẹaị ma na ḅụ ḅara-siin tẹẹ.

²³ “Yẹrị anie yọ-yọ ḅụ emi Tamụnọọ, tẹ gbọrụ yọ kịngẹ ḅụ-a.

²⁴ Gbọrụḅọ-sọ inetẹ ḅọị tẹ arị inetẹ mḅọ ẹrị-a so ḅịa. Ó nimi-a mịnẹ So-ḅio na kiri ḅio na ḅụ yọ-yọ ḅụ arị emi?

²⁵ Arị ịkịankoroapụ ma ḍuko tẹ ye mẹ à nimi wararị, anie ị̀ ẹrẹ ḅụ iruo-iruo tẹ ọkịarị mịnẹ àrị ì oku kẹ ịn pịrị tẹ ịna aḍawọ ḅụ.

²⁶ Paa mu tọ-sakị la ḅẹ anị ịkịankoroapụ ma nwẹn kẹ ị̀ atomi da-irima ḅẹ, in kuroma-ḅo tẹ ḍukoarị iruo aị ma ḅụ?

²⁷ In kuromarị mịnẹ ịn ḍawọ tẹ ḍukoarị aị ma ḅụ ịn ḅọrọtẹ ị̀ atomi mịẹ tẹ ini ị̀ kẹ ḅioḅọrọma ḅa, ịna aḍapụ ị̀ kẹ ḅioḅọrọma tẹ pịkị Balị dama-mu gbọrụ ḅara mẹ.

²⁸ Ḍawọ kọn ịkịankoroḅọ emi-emii mḅọ mḅọ kọn ḍawọ ḍiki tẹ ḍukoo, kụma ì oku naa ịkịankoroḅọ mẹ mḅọ ḅioḅẹngbọ-kẹ-sịrẹrẹ-niḅi ḅara kẹ ì oku mẹ ḍuko-wasamaa. Tọ iḅi asịra nwẹn nyana anị kẹ mbịaka na tọnmarị kiri?

²⁹ Ì oku mẹ kọrị-fịnị na kịkarị, anị pịkị kẹ ịkụ ḅakụ-ḅakụ pakịrị-pakịrị puuarị amana sọ na kịkarị.

³⁰ Arị ịkịankoroapụ ma tẹ jụmọ-jụmọ ẹkwẹn ma ọkị kọn tẹ ọkịarị mịnẹ ini ì oku ḍuko wasamarị nwẹn ḅẹẹ apụ ma arị ini na tụḅụrụarị.

³¹ À pịkị arị ịkịankoroapụ ma tẹ amịna soku ḅẹ ẹkwẹn ma kọn-kọn tẹ ọkịarị ị̀ ẹkwẹn nwẹn ḅarị apụ ma na tụḅụrụarị,

³² Yẹrị, KỊNỊNYANAḄỌ ḅe, ḍukoarị ye pokii! Ịkịankoroapụ ma tẹ amịna iruo aḍawọ ma ḍuko arị apụ ma, arị ini na tụḅụrụarị. In mịna aḍawọ ma ḍuko tẹ ịna iruo-aị ma na ḅụụ-boma na kẹ ị̀ atomi da irimarị. Yẹrị ịn fịrịma-a, anịanịa tọn ịn pịrị in mu, tẹ gbala-gbala gbọrụ ḅarasụa sọ ịn nyana tomi ma pịrị-a. Yẹrị, KỊNỊNYANAḄỌ ḅe ọkọ ḅẹẹm.”

KỊNỊNYANAḄỌ ḅe Ikuye

³³ KỊNỊNYANAḄỌ ḅe nwẹnị ị̀ ḅẹẹ, “Jerimaya, ị̀ atomi ma ḅẹ gbọrụḅọ, anịanịa ịkịankoroḅọ, anịanịa agbamịẹḅọ ḅo ì gbela sakị, ‘Ndẹẹ KỊNỊNYANAḄỌ ḅe oku mẹ?’, ḍuko mḅọ pịrịị, ‘ị́yẹrị anie ikuye sọ KỊNỊNYANAḄỌ ḅe pịrị wararị, tẹ ori ị́ ḅụụ ḅara-siin ḅa.’

³⁴ Ị̀ atomi ma ḅẹ gbọrụḅọ anịanịa ịkịankoroḅọ anịanịa agbamịẹḅọ ‘KỊNỊNYANAḄỌ ḅe ikuye’ mẹ kẹ ẹkwẹn-arị ḅẹḅẹ, à fomu-ḅara kẹ mḅọ na mḅọ warị-kpoo na pịrị ḅa.

³⁵ Anie nakara, ọrụḅọ-ọrụḅọ mḅọ ikiapụ na mḅọ mịnapụ na gbela: ‘KỊNỊNYANAḄỌ ḅe ò tiye pakịrị-ḅịḅị pịrị? Ndẹẹ KỊNỊNYANAḄỌ ḅe ḍuko ye?’

³⁶ Mie ḅụ in jen kẹ ‘KỊNỊNYANAḄỌ ḅe ikuye’ ẹkwẹn ma kọn nyana-a, kẹ gotẹ ọkọ ḅarị, gbọrụḅọ mịẹarị ḅẹḅẹ, à mịẹ tẹ ì oku karakara ikuye sọ mḅọ pịrị ḅa. Tomi ma ịna Tamụnọ, ḍumo wararị Tamụnọ ḅe ẹkwẹn ma pịkị-iḅo tẹẹ, Kụrọmamgba nyana KỊNỊNYANAḄỌ ḅe.

³⁷ Jerimaya, ịkịankoroapụ ma gbela, ‘KỊNỊNYANAḄỌ ḅe ò tọ pakịrị-ḅịḅị kẹ ọ́ pịrị? Ndẹẹ KỊNỊNYANAḄỌ ḅe ḍuko ye?’

³⁸ Tẹ ini ì oloko mẹ poki tẹ mịẹ-a tẹ ‘KỊNỊNYANAḄỌ ḅe ikuye’ ẹkwẹn ma kọn-arị ḅẹḅẹ, anị sakị ẹrẹ ḍuko ịn pịrị mịnẹ

³⁹ piki-pikiye-ofori ḅara ḅụ arị ịn saakị ọkị tẹ ịn kẹ ị̀ ḅụ wakị ḅelema ḅa, ini na opu ama mẹ tẹ à kẹ ini na ịna elemu aḍapụ na pịrị ye mẹ na.

⁴⁰ À sime mu ḅẹẹ-sakị ḅẹẹ-sakị la ḅarị ḅụụ-jịrị na tọrụ-tuu na ọkị-ḅo ịna ọgọnọ gbana ḅa, gbala-gbala kịnị kẹ ḅioḅọrọma ḅịa ye.”