Jerimaya 21 - FỊAFỊA BAỊBỤLỤ

Jerimaya ini Ọmụ ḅio Jeruselemu Nẹngịma ḅẹ Ịkịan Koro Tẹẹ

¹ Zẹdẹkaya, Juda ḅẹ amadaḅọ ḅe, Malikịja tụḅọ Pasọ na Masẹya tụḅọ Zẹfanaya na kẹ ị̀ fịrịma tẹ ị̀ ḅara miemẹ ḅiim,

² “Sisi ḍuko KỊNỊNYANAḄỌ ḅe pịrị wa pịrịị, Babịlonịya ḅẹ Ama-da Nebukadineza ori ọmụ-ogbo kẹ opu ama mẹ ikelema-koro tẹ anị ọkị ḅẹ ẹrẹsị. Ẹbịsịya KỊNỊNYANAḄỌ ḅe ọ̀ ḅụụ-buama-aị ma ḅẹ gberie mịẹ wa pịrị tẹ kụrọ-ḅara kẹ ọ̀ mịẹ tẹ ọ̀ pịkị-so ḅa.”

³ Anịtẹso KỊNỊNYANAḄỌ ḅe ẹkwẹn ị̀ pịrị tẹ à ḍuko ịn kẹ ị̀ fịrịma atomi ma pịrịm

⁴ in ḍuko Zẹdẹkaya pịrị, mịnẹ KỊNỊNYANAḄỌ ḅe, Izirẹlịapụ tẹkẹarị Tamụnọ ḅe ḍuko tẹẹ, “Zẹdẹkaya, àrị ị́ ọmụ-ogbo mẹ tẹ Babịlonịya ḅẹ amadaḅọ ḅe na ori ọmụ-ogbo mẹ na sọarị ye mẹ mịẹ tẹ owu anị ḅara sii ḅa. Arị ị́ ọmụapụ owuna-aị ma kobiri ḅo kpolima ḅa opu ama mẹ karakara ogbo ḅụ.

⁵ Arị owu kẹ ị́ paka ḅa ì opu kụrọ mẹmgba ḅụ, ị̀ ịganị ḅụ, ì opu ịganị ḅụ, ì owi ịganị ḅụ.

⁶ Mị opu ama mẹ ḅio angarị ḅọ goḅọ-goḅọ à ḅaa ḅa; tomi na nama amẹẹ na gbọrụ ḅara kẹ fịị ḅa ḅalafama obi ḅụ.

⁷ Kụma ị́yẹrị na, í fịrịmẹnjị-opuapụ na, ama mẹ ḅio ọmụ ḅụ na ḅuru-kụrọ ḅụ na obi ḅụ na fịị-a so apụ ma na wẹrịso tẹ Ama-da Nebukadineza na si kẹ ọ́ tọn apụ tẹ ọ́ ḅaa ḅẹ ḍọkịarị apụ ma na ó kun-so ḅa. Ọmịna ḅụ ḅụụ ọ̀ wẹrịso ḅẹ ḅọ ofori, anịanịa ọkụrụkụrụ, anịanịa ḍiki-sịḅịjịrị nyana gbọrụḅọ kịngẹ sọ pịrị ḅịa. Yẹrị, KỊNỊNYANAḄỌ ḅe ọkọ ḅẹẹm.”

⁸ Anịtẹso KỊNỊNYANAḄỌ ḅe ḍuko ị̀ pịrịm à tomi ma ḅẹ, “Ó poki! Yẹrị, KỊNỊNYANAḄỌ ḅe ye ḅụ ḅẹ maaịn kẹ ọ́ pịrịarị, ó gberie sẹlẹ ọkị ḅẹ ḅara, anie mu ḍumo la ḅẹ etela na, mu fịị la ḅẹ etela na.

⁹ Opu ama mẹ ḅio sime-ḅọ sime-ḅọ, mḅọ ọmụ ḅio fịị ḅa, anịanịa ḅuru-ḅa ḅụ, anịanịa obi ḅụ. Ḅẹḅọ-ḅẹḅọ tẹ paka mu ḅara sakị Babịlonịya ḅẹ apụ ma tẹ owu kẹ opu ama mẹ pakarị apụ ma pịrị-ḅọ pịrị-ḅọ, ini mḅọ ḅaa ḅịa, jen-a jen-a sọ mḅọ amịna ḍumo mẹ pụkọ-paka-so ḅa.

¹⁰ À tọn-pẹlẹ tẹ mịnẹ à mị opu ama mẹ wẹrịso tẹ so ḅịa, kụma àrị anị guluguluma ḅa. Ini anị saḅama Babịlonịya ḅẹ amadaḅọ ḅe pịrị tẹẹ, ori anị dọkịma kiri lama ḅa. Yẹrị, KỊNỊNYANAḄỌ ḅe ọkọ ḅẹẹm.”

Sime Juda ḅẹ Ama-da Warị mẹ Pịrị Ḅẹrẹkọn-ḅịḅị

¹¹ Pịkị jen, ḍuko Juda ama-da warị mẹ pịrịị, “Ọ́ KỊNỊNYANAḄỌ ḅe ẹkwẹn mẹ naa.

¹² Yei Devidi warị, mie KỊNỊNYANAḄỌ ḅe ḅẹẹ ye: ‘Ọmịnị aḍụa ofori ḅẹrẹ kọọn, ene mamgba; ọ́ jụmọ ponomarị ḅọ mẹ pụkọ-pakamaḅo mḅọ inomarị ḅọ ḅara-ḅio ḅụ. Ọkọ-a kụma ì opu ịganị fịnị kịka tẹ kọrị paka ḅa ọ́ mịẹ tẹ siye mẹ ẹrẹsị — anị kọrị tẹ biinma ḅẹ ḅọ paka ḅịa.

¹³ Ị́yẹrị, Jeruselemu, ị́ lẹgị-sime wararị, tụndụ suku ma ḅụ í gele fa wararị, ịkụ kịka tẹ lẹsẹrẹ-kiri mẹ ḅụ so sọ wararị, Kụma yẹrị owu kẹ ị́ paka tẹ Ị́ ḅarị mịnẹ gbọrụḅọ-sọ inetẹ owu kẹ ị́ paka anịanịa ị́ kụrọnị-anga ma kan tolu-ḅọrọ ḅịa.

¹⁴ Kụma yẹrị í fomu ḅa ị́ mịẹ tẹ ye gotẹ. À fịnị kẹ ị́ ama-da warị mẹ ḅụ sụa ḅa, tẹ fịnị mẹ anị gbori-ikelema ye goyegoye dọkịma kiri ḅio sara ḅa. Yẹrị, KỊNỊNYANAḄỌ ḅe ọkọ ḅẹẹm.’ ”