Jerimaya 18 - FỊAFỊA BAỊBỤLỤ

Jerimaya Kuku-Tẹmẹḅọ Ḅe Warị Mum

¹ KỊNỊNYANAḄỌ ḅe ị̀ ḅẹẹm,

² “Mẹnjị ideri kuku-tẹmẹḅọ ḅe warị muu, anị anga àrị ì oku kẹ ị́ fịrịma ḅa.”

³ Mie ḅụ à mu tẹ kuku-tẹmẹḅọ ḅe ẹrịm ori ọ̀ kọrịnama kọrị anga kọrịnama kọrịarị.

⁴ Ọgbọịn-lịka mẹ ḅẹ ye ḅarị ò ḅii ḅara sime-a sakị, ori anị ọkị tẹ kẹ jen ye tẹmẹm.

⁵ Anịtẹso KỊNỊNYANAḄỌ ḅe ị̀ ḅẹẹm,

⁶ “À kụrọ nyana-a, kẹ ọmịnị Izirẹlịapụ ma na mịẹ, kuku-tẹmẹḅọ ḅe kẹ ọgbọịn-lịka mẹ kẹ mịẹ ḅara mẹ? Ọmịnị ma ị̀ ḅara-ḅio simearị ḅara anie ọgbọịn-lịka mẹ kẹ kuku-tẹmẹḅọ ḅe ḅara-ḅio sime gbọrụ ḅara mẹ.

⁷ Ḅẹẹ-sakị ḅẹẹ-sakị ḅụ à ḅẹẹm mịnẹ à suku-na-suku-na kẹ gbọrụ sịẹ anịanịa amadaḅọ daarị yọ soku-pakama ḅa, kan-sara, anịanịa guluguluma ḅa,

⁸ anịtẹso anị sịẹ mẹ anị ḅẹ si ḅụ pịkị-pịkị, à ḅẹẹm à mịẹ ḅẹ ye mẹ à ḅarị mịẹ ḅịa.

⁹ Osi pakịrị anga kẹ anị ḍiki ḅụ, à ḅẹẹm mịnẹ à gbọrụ sịẹ anịanịa amadaḅọ daarị yọ nama sịẹma ḅa,

¹⁰ kụma anị sịẹ mẹ ḅo ị̀ ḅịḅị kan tẹ siye mịẹ-mịẹ, àrị à ḅẹẹm à mịẹ ḅẹ ye mẹ mịẹ ḅịa.

¹¹ Mịọkụ ọkọ ẹrẹsị ḍuko Juda na Jeruselemu na ḅẹ apụ pịrị mịnẹ arị à kẹ ịn mị ḅẹ aị tọn-arị, tẹ ḅụụ-tẹlẹmarị fomu-ḅara kẹ ịn pịrị. Ḍuko ịn pịrị in si mịẹ ḍumo kọn dasịẹmaa — ịna etela ma na ịn mịẹarị aị ma na ḍimaa.

¹² Ịn ḅẹẹ ḅa, ‘Ẹn-ẹn, tiye ẹrẹsị wa anị ḅara mịẹ ḅẹ? Wamịnị-mgba paa gbọrụ ḅara mẹ kẹ kọngọ-kụrọma tẹ wa ḅii ḅara ḅii ḅara kẹ sii ḅa.’ ”

Tomi ma KỊNỊNYANAḄỌ ḅe Sịkịarị

¹³ KỊNỊNYANAḄỌ ḅe mẹẹ, “Sịẹ goyegoye gbela jen sakị ọkọ sime ye paka tẹ ḅoto. Izirẹlịapụ ma ḅalafama ye mịẹ tẹẹ!

¹⁴ Lẹbanọnị ḅẹ geletẹ ịkụ ma ọgọnọ jen sakị kpootẹ igirigi sara-a so tẹ? Jen sakị anị ḅẹ tụndụ mẹ ḅẹ dein minji, arị ḅẹ okolo ma ḅio minji fa kụlụkụlụ tẹ?

¹⁵ Anịsọ ị̀ atomi ị̀ kẹ ḅioḅọrọma tẹẹ; ịn kụnụaị dọkịma-dọkịma oru-afụḅara pịrịarị. Ịn mẹnjị ḅii etela mẹ ḅụ ịn pụmbụ tẹ; elemu etela ma ḅụ ịn ḅarị mẹnjị-a; elekima ofori mẹnjị-ḅọrọ-anga ma mie ịn mẹnjịarị.

¹⁶ Ini amakiri mẹ kẹ sịḅị-kanakanama ye sọma tẹẹ, kịnị ḍiki-sima mu ḅẹẹ-sakị ḅẹẹ-sakị la ḅẹ ye. Mẹnjị-ḅọrọarịapụ mamgba ḅụụ-gbiripu ḅa ini ẹrịarị ye ḅụ; ịn sịḅị jike ḅa ḅụụ-bua ḅụ.

¹⁷ Àrị ị̀ atomi gala-galama ḅa si kẹ ịn tọn apụ tọrọkọ ḅụ, ịrụa saakịarị pakịrị anga ḅoarị fẹrụ kẹ fiin-arị fọọn ọkụ. Arị ọḅụ pịkị in gbin ḅa; À ḅarasụa ịn pịrị ḅịa opu ḅụụ-fụka mẹ ḅoarị sakị.”

Ḅiya Jerimaya pịrị Ḅẹrẹ

¹⁸ Anịtẹso tomi ma ḅẹẹm, “Ó yee wa gberie mịẹ Jerimaya gboloma ye ḅụ. Sakị mamgba ye kẹ wa toluma ḅẹ agbamịẹapụ paka ḅa; ḅẹrẹ tọrụ kẹ wa ḍie ḅẹ Ye-nimiapụ na Tamụnọ oku ḍuko wasama ḅẹ ịkịankoroapụ na sọ. Ó yee wa ḅẹrẹ ọkị-ḅo ọ̀ sịḅị gbana, tẹ ò ḍukoarị ye poki mẹ dasịẹma.”

¹⁹ Mie ḅụ à tẹkẹm, “KỊNỊNYANAḄỌ, à ḍukoarị ye naa, pịkị si kẹ ị̀ tọn apụ ma ì gboloma ye ḅụ ḍukoarị ye pokii.

²⁰ Si anie ịn kẹ iḅi gbẹẹ ḅẹ ye aro? Anịsọ ini olulu soku ị̀ pịrị tẹẹ, à ḅịkị sọ ḅẹ ḅara. Kẹ ḅiokoroma arị ịna sịḅị gotẹ ị́ dama-ḅo tẹ ẹkwẹn ị́ pịrị ḅara, mịẹ tẹ ị́ ịganị kẹ ini na mịẹ ḅịa ḅara.

²¹ Kụma mịọkụ, KỊNỊNYANAḄỌ, yee ịna awọmẹ ḅuru-ḅa ḅụ fịị; yee ini ọmụ ḅio ịn ḅaa. Yee ereme ma ịna diapụ na ịna awọmẹ na fama; yee owiapụ ma obi ḅụ fịị, tẹ ini ịna asambịrịma apụ ma ḅaa ọmụ kiri ḅụ.

²² Si atomi ogbo kẹ fịrịma mu ịna awarị fọịn ini ịba naa-a ḅara ḅụ; ịn mịẹ tẹ ini opu ḅalafa kẹ oloku pakama. Ini olulu soku ị̀ pịrịtẹ à ḅịkị sọ ḅẹ ḅara, pịkị ḍiein tuu tẹ kẹ ì kun ḅẹ ḅara.

²³ Kụma KỊNỊNYANAḄỌ, ini ị̀ ḅaa ḅẹ gotẹ ḅiya aḅẹrẹ mamgba í nimi wararị. Ịna si mẹ kẹ ḅioḅọrọma ma anịanịa ịna si-wẹrịso. Ịn kẹ kiri gbin owu-ḅara-sii ḅụ, tẹ ị́ ịganịarị ogbo ị́ kẹ ini na mịẹ ḅẹ ḅara kẹ ini na mịẹẹ.”