Jerimaya 17 - FỊAFỊA BAỊBỤLỤ

Juda Si mẹ na Fomu-ḅara mẹ na

¹ KỊNỊNYANAḄỌ ḅe mẹẹ, “Juda ḅẹ apụ, ọmịna si mẹ ikulele ḍiri kẹẹ ye mie ịn kẹ anị kẹẹ yee; damịnị ḅịḅị nyana ye-kẹẹ-ye mie ịn kẹ anị kẹ ọmịna aḅioḅẹngbọ ḅụ kẹẹ ye, pịkị ọmịna agbamịẹ-anga ma ịkọlị ma ḅụ na.

² Ị́ atomi agbamịẹ-anga suku na, elekima kẹ sụa wẹrị wararị ayọ ma na, ḍumo wararị sịn goyegoye suku na, tụndụ ma ọgọnọ na sunsin Asịra nwẹn-sịn ẹrẹḅọ-oru ma pịrịarị,

³ pịkị tụndụ ma ọgọnọ piri ọgọnọ-jụ ḅụ. À mịẹ tẹ si kẹ ọ́ tọn apụ ọmịna ngọ na ó koko ḅụụ wẹrịma aị ma na ọkị so ḅa, ọmịna amakiri mẹ kana-koro ḅụ ọ́ mịẹ tẹ asi ma ẹrẹsị.

⁴ Ọmịnị à kẹ ọ́ pịrị amakiri mẹ ḅụ ḅara-siin nyanam, tẹ àrị ọ́ mịẹ tẹ ọ́ fịrịmẹnjị si kẹ ọ́ tọn apụ ma pịrị ḅa, ọmịnị anị gboloma gberie sọ nimi-a amakiri ḅụ, ị̀ ịganị ẹrẹsị, anị fịnị kịkarị, tẹ kọrị gbamaso ḅa.”

Kịrị-kịrị Ḍuko-aị

⁵ KỊNỊNYANAḄỌ ḅe mẹẹ: À ḅẹrẹ-ḅarasii pẹlẹ anị apụ ma pịrị ḅa anie ị̀ ḅụ pịkị-so tẹ ḅioḅẹngbọ kẹ tomi ọgọnọ gbanarị apụ ma, fị-fị atomi nyana wararị ịnyọ kẹ ḅiokpọmarị apụ ma.

⁶ Ini ịkpa ḅio ḅẹ piri-otokoloḅa kịkarị, anie kịnị anga-anga-a samụnọ kiri ḅụ so-pakarị ye mẹ, fụn-fụn-fụn kiri tẹ jen gberie-sọ so-paka-a yọ mẹ Gbọrụ iḅiye sọ ịna ḅụụ paka-paka-a.

⁷ Kụma àrị in boma ḅa, anie ịna aḅioḅẹngbọ kẹ ị̀ ḅụụ ḅụ gbanarị apụ ma.

⁸ Ịn mẹnjịarị minji akaka so-pakarị sịn kịka ḅa, tẹ kuno ma kẹ mu minji laarị ye. Ọfịrị sakị ḅoarị sakị anị ḅalafa-a, anị ḅẹ ịnyịnya sakị mamgba ịwọarị ẹrẹsị; Anị ḅụụ-ḅalaḅala nyana-a eene koro-a sakị ḅụ, anị paa mgbọlụ sụa-sụa-sụarị.

⁹ “Tụḅọ inetẹ tomina ḅioḅẹngbọ sime-ḅara nimi ḅẹ? Jen gberie-sọ ofori oḅori-kẹ-kịnịsịn anị la ye; Anị obi la ḅara ḅụ gwọ-gwọ ọkụ ofori.

¹⁰ Yẹrị, KỊNỊNYANAḄỌ ḅe, anie kuroma ma sọkịrịarị ḅọ, pịkị tomina aḅioḅẹngbọ daaḍikiarị. Ọrụḅọ-ọrụḅọ kẹ ḍumo kọn-arị ḅara mie à ḍiki tẹ mḅọ na mịẹarị, mḅọ mịẹarị ye sime-ḅara.”

¹¹ Kịnị mingirima ḅọkọ kẹ igbigi nyanarị ḅọ mẹ, mḅọ kịkarị ye anie feni tẹ ori koroma-a anyị kẹngẹarị feni. Ori asambịrịma sakị ḅụ ori ngọ mamgba faa ḅa, anịsakị kunoma ḅụ ori ḅarị gbọrụḅọ-sọ gbọrụḅọ-a, kụma oḅori-ḅọ.

¹² Wamịna Tamụnọ-warị mẹ anị ebube nyana emine kịkarị, sukuyọ-saakị ḅụ gele-tụndụ ọgọnọ sịẹ wararị.

¹³ KỊNỊNYANAḄỌ, anie Izirẹlị ḅiokpọ; í koroma tẹ so apụ mamgba ịna tọrụ-tuu ḅa. Ini ịmaịn-faa ḅarị ḅara fọọn ọgọnọ kẹ ẹrẹ kịka ḅa, ini, KỊNỊNYANAḄỌ ḅe, sịkị tẹ ẹrẹsị, ḍumo-pịrịarị ngụngụḅa minji ḅe.

Jerimaya KỊNỊNYANAḄỌ ḅe ḅara Ḅarasụa ḅiiarị

¹⁴ KỊNỊNYANAḄỌ, ị̀ gwọọ, anịsakị ì oju gbọrsịḅị kụrọ fama ḅa; ị̀ pụkọ-pakamaḅoo, anịsakị ye ḅarị gbala-gbala ị̀ la ḅịa. Ị́yẹrị anie à tokiniarị ḅọọ!

¹⁵ Tomi ma ị̀ ḅẹẹarị, “KỊNỊNYANAḄỌ ḅe kẹ wa ẹrẹma aị ma tọ-anga emi? Yee ori arị mịẹ pakama mịọkụ!”

¹⁶ Kụma, KỊNỊNYANAḄỌ, gbala-gbala arị ịgbanị kụrọma-a mịnẹ í opu ḅụụ-fụka ọkị-ḅo ịna ọgọnọ gbana; à ḅụụ-fụka sakị ịgbanị ịn pịrị-a. KỊNỊNYANAḄỌ, miemẹ í nimi wararị; à ḍuko ye í nimi wararị.

¹⁷ Tẹmẹ-naịn-naịnma ye sọ ị̀ pịrị ma. Ị́yẹrị anie à sime tẹ ye ị̀ la ḅịa yọ ḅụụ-fụka ḅoarị sakị.

¹⁸ Tọrụ-tuu ọkị-ḅo ḅaa-ḅọkọ kẹ ị̀ ḍọkịarị apụ ma pịrịị, kụma ḅara-wẹrị ị̀ pịrị, KỊNỊNYANAḄỌ. Tẹmẹ-naịn-naịn kẹ ịna ḅụụ ḅio suu ḅinma, kụma yẹrị ị̀ tẹmẹ-naịn-naịnma ma. Opu ḅụụ-fụka ọkị-ḅo ịna ọgọnọ gbana tẹ ịn gbẹẹ-kọsịmaa.

Ịnyọsara-Ene mẹ Koko Gboloma Ye

¹⁹ KỊNỊNYANAḄỌ ḅe ị̀ ḅẹẹm, “Jerimaya, mu tẹ Tomi ma Ogigo-ḅọkọ mẹ ḅụ, Juda ḅẹ aḍapụ ma mẹnjị sọ-na-paka-naarị anga mẹ, tẹ ì oku mẹ ḍuko wasama; anịtẹso Jeruselemu ḅẹ osi ogigo-aḅọkọ mamgba sọ muu.

²⁰ Ḍuko amadapụ ma na, Juda ḅẹ apụ mamgba na, Jeruselemu ḅio angarị ḅọ goḅọ-goḅọ na tẹ ma ogigo-aḅọkọ ma ḅụ mẹnjị sọarị apụ ma pịrị ini à ḍukoarị ye pokii.

²¹ Ḍuko ịn pịrị ini ịna aḍumo ḅẹlẹmarị ḅẹḅẹ ini ikuye dogi nyana-a Ịnyọsara-Ene mẹ ḅụ; in gberie-sọ dogi mẹnjị Jeruselemu ogigo-aḅọkọ ma tolu-ḅọrọ nyana-a

²² anịanịa ḅẹẹye-ḅẹẹye dogi paka ịna awarị ḅio Ịnyọsara-Ene mẹ ḅụ. Ịnyọsara-Ene mẹ ḅụ ịn kọrịnama kọrị nyana-a; ini anị kẹ fịafịa eneḅaka wẹrị nyanam, à sụa ịna elemu-aḍapụ pịrị oloko mẹ sime-ḅara ḅụ.

²³ Ịna elemu-aḍapụ ma poki-a anịanịa anị kẹ ye kala ye sọ sịn. Anie nakara ịn kọngọ-kụrọmam; ini ị̀ ḅịḅị poki ḍụkụ-a anịanịa ị̀ ḅara ye ḍawọ.”

²⁴ “Ḍuko mịna atomi ma pịrị mịnẹ ini à sụa oloko mamgba poki tẹ mịẹ nyanam. Ini ikuye dogi mịẹ opu ama mẹ ḅẹ ogigo-aḅọkọ ma ḅụ mẹnjị tolu-ḅọrọ so mu nyana-a Ịnyọsara-Ene mẹ ḅụ. Ini Ịnyọsara-Ene kẹ fịafịa eneḅaka wẹrị nyanam, tẹ gbala-gbala gbọrụ kọrịnama sọ kọrị nyana-a.

²⁵ Anịtẹso amadapụ ma na amadapụ awọmẹ ma na Jeruselemu ogigo-aḅọkọ ma sọ mu ḅa ama-da opu ḅụ, Devidi nyana gberie mẹ. Ini na Juda na Jeruselemu na ḅẹ apụ ma na gbọrụ ḅụ, in kirimẹnjị-ọmụarụ ma na, asụ amẹẹ na kpọlị tẹ kẹ dọkụ ḅa, tẹ Jeruselemu mẹ tomi sakị mamgba anị ḅio ḅin ḅa.

²⁶ Kịnị ḅo ḅa Juda ḅẹ ama ma ḅụ, pịkị Jeruselemu ikelema-koro ḅụ simearị kala-ama ma na ḅụ; Benijamịnị ibe ḅụ sọ in ḅo ḅa, tụndụ ma na gele-ayọ ma na ḅụ simearị ama ma ḅụ sọ, pịkị Juda suku-jụ ḅẹ apụ sọ. Ịn dọkịma agbamịẹ-aị na ja agbamịẹ-aị na ọkị-ḅo ḅa, mgbọlị afịaị ḍiepịrị-aị na kụnụaị na pịkị ịmịẹtẹ ḅẹ aị na sọ.

²⁷ Kụma ini ị̀ ḅịḅịpoki nyanam, tẹ Ịnyọsara-Ene mẹ kẹ fịafịa ene ḅara wẹrị. Gbọrụ ikuye sọ in dogi Jeruselemu ogigo-aḅọkọ ma sọ mu nyana-a anị ene mẹ ḅụ, kẹ gotẹ ọkọ ḍukoarị, ịn mịẹ-mịẹ à fịnị kẹ Jeruselemu ogigo-aḅọkọ ma ḅụ sụa ḅa. Fịnị Jeruselemu ḅẹ amada-awarị ma dọkịma kiri gbin ḅa, tẹ gbọrụḅọ-sọ inetẹ anị biinma ḅịa.”