Jerimaya 15 - FỊAFỊA BAỊBỤLỤ

Sime Juda ḅẹ Apụ ma pịrị Ḅẹrẹ-pẹlẹ ḅịḅị

¹ Anịtẹso KỊNỊNYANAḄỌ ḅe ị̀ ḅẹẹm: Mozizi na Samụwẹlị na ị̀ tọrọkọ sịẹsime tẹ in gotẹ ị̀nịna ḅịḅị-ọkịyam sọ, gbọrụ ọkụrụkụrụ sọ à nyana mịna apụ ma pịrị ḅịa. Mịẹ tẹ in so; mịẹ tẹ ini ị̀ tọrọkọ sikima.

² Ini ịn tọ-anga mu ḅarị mọ kẹ í gbela sakị, ḍuko ịn pịrị mịnẹ yẹrị ḅẹẹm: obi ḅụ fịị sime jen-apụ pịrịm; anịanga mie ini mu ḅarịye! Ọmụ ḅio fịị sime osi apụ pịrịm; anịanga mie ini mu ḅarịye! Ḅuru-ḅa fịị sime jen-apụ pịrịm; anịanga mie ini mu ḅarịye! Ikoliapụ ḅara kẹ kun-so sime osi apụ pịrịm; anịanga mie ini mu ḅarịye!

³ Yẹrị, KỊNỊNYANAḄỌ ḅe tọn-pẹlẹ tẹẹ mịnẹ opu ḅalafama aị ịna ḅụ paka ḅa: ini ọmụ ḅio ịn ḅaa ḅa; obiri amẹẹ ịna oju-akpakpa ma fọnọ-so ḅa; feni arị pẹị ḅa, tẹ piri-ḅio-ḅẹ anama kiri kọn aị ma kanị pẹị ḅa.

⁴ À mịẹ tẹ tomikiri ḅẹ apụ mamgba in gotẹ sịḅị kanakana ḅa, Hẹzịkaya owiḅọtụḅọ Manasẹ Juda sịẹ mẹ daarị sakị ḅụ Jeruselemu ḅụ mịẹ ye ẹrẹsị.

⁵ KỊNỊNYANAḄỌ ḅe mẹẹ: Jeruselemu ḅẹ apụ, tụḅọ sịḅị-kụrụkụrụ nyana ọ́ pịrị ḅẹ, tụḅọ ó gotẹ tẹ kururu ḅẹ? Tụḅọ daasịẹ tẹ sakị ọkị tẹ ye kẹ ọmịnị na sime-ḅara gbela ḅẹ?

⁶ Ọmịnị ma ị̀ sịkị tẹẹ, Ọmịnị ọḅụ pịkị ì gbin tẹẹ. Anie ḅụ àrị ị̀ ḅara sụn-pakama tẹ kẹ ọ́ kọsịma tẹẹ ị̀ ịganị ọlọ-sịẹma ịnyọ kẹ ị̀ tama tẹẹ ẹrẹsị.

⁷ Amakiri mẹ ḅụ sime ama goyegoye ḅụ à samụnọtẹ asịra wakị sara ḅara kẹ ọ́ kẹ wakị fẹrụ pịrịm. Ì atomi, àrị ọ́ ḅaa gulugulumam, arị ọmịna ḍọkọḍọkọ-awọmẹ ḅaam ọmịnị ọmịna si etela ma dasịẹma-a ẹrẹsị.

⁸ Ọmịna amakiri mẹ ḅụ diapụ-fịtẹ-ereme kịẹn-ḅịḅị tuḅu ọgọnọ ḅẹ onwin mgbọlị ma kịẹn-ḅịḅị nẹngịm. Yẹrị ọmịna asawọ ma ḅaam ịna asambịrịma sakị ḅụ tẹ mịẹ tẹ ịna iyingiapụ tọrụsiẹrịm. Ḅiotọn-a ḅara mie à kẹ in fomu ye kururu na opu ḅalafama ye na ḅụ

⁹ Amịna sọnọma owiapụ-awọmẹ fama ẹrẹḅọ ma naịn-ḅọrọ tẹ sịngị-ịnyọsararị. Árị eneḅaka bele mẹ pịkị-ḅo ḍin kanakana sọ tẹ; á tọrụ-tuu tẹ á ḅioḅẹngbọ ḅẹ obi kọn-arị. À wẹrịso tẹ si kẹ ọ́ tọn apụ ọmịna ḅụ paa ḍumo wararị apụ ma ḅaa ḅa. Yẹrị, KỊNỊNYANAḄỌ ḅe, ọkọ ḅẹẹm.

Jerimaya Ḍuko-sụa KỊNỊNYANAḄỌ Ḅe pịrịarị

¹⁰ À kpọma ḅioḅẹlẹ nyana-a tomḅọ sọ la ḅara ḍikii! Tiye ẹrẹsị ì iyingi ì iyi pakama-ḅo tomikiri ḅụ? À sime kamụ-sọ na ḅẹḅọ-ḅẹḅọ na ye-nụnụa na pịrịm amakiri mẹ ḅio. Amụ arị igbigi kẹ kịnị ḅọlọ-a, tẹ kịnị pịkị amụ ị̀ ḅara ḅọlọ-a; anịsọ ḅẹḅọ-ḅẹḅọ ị̀ kẹ gboarị.

¹¹ KỊNỊNYANAḄỌ, yee ma gbo-aị mamgba ị̀ ḅụụ paka, amụ arị iḅi-oku fịrịmẹnjị ị́ pịrị-a ḅẹḅẹ, amụ à si kẹ ị̀ tọn-arị apụ ma sịḅị ẹrẹsị ị́ na ẹkwẹnma-a ḅẹḅẹ, ịn ḅụụ-fụka na ḅụụ-ḅalaḅala na ḅio sọ sakị.

¹² (Gbọrụḅọ-sọ inetẹ ikulele anyịma ḅịa, jen-a jen-a ọgọnọ-jụ ḅụ ḅo ikulele tẹ ojo kẹ gwaa wararị ye.)

¹³ KỊNỊNYANAḄỌ ḅe ị̀ ḅẹẹm, “Àrị ini na fịya-a apụ fịrịma mu ị̀ atomi ngọ ma na ịn kẹ ḅụụ wẹrịma aị ma na dogi-so ḅa, arị ịna bebe amakiri mẹ ḅụ mịẹ asi ma fomu-ḅara kẹ ịn pịrị ḅẹ ḅara.

¹⁴ À mịẹ tẹ ị̀ atomi fịrịmẹnjị ini na fịya-a apụ pịrị ḅa, ịn gbala-gbala amụ anị gboloma ye nimi-a amakiri ḅụ; ị̀ ịganị fịnị kịka tẹ kọrị gbamaso ḅa ẹrẹsị.”

¹⁵ Anịtẹso à ḅẹẹm, KỊNỊNYANAḄỌ, ị́yẹrị ye sime-ḅara nimi wararị. Ị̀ kẹ ḅiokoroma tẹ ḅarasụa ị̀ pịrị. Minini ị̀ pịrị tẹ à ḅaa-ḅọkọ kẹ ị̀ ḍọkịarị apụ ma gbẹẹfị ḅii. Gbọsime ịn pịrị nwenii tẹ ini ị̀ ḅaa ma. Kẹ ḅiokoroma mịnẹ ị́ sịḅị mie in gotẹ ị̀ mịẹ-simarị.

¹⁶ Ị́ ẹkwẹn ị̀ pịrịm, tẹ arị ẹkwẹn-ḅịḅị goyegoye pokim. À sime ị́ pịrịm, Kụrọmamgba nyana KỊNỊNYANA-TAMỤNỌ, tẹ anie ḅụ ị́ ẹkwẹn ḍereku na ḅioḅẹlẹ na kẹ ì ḅioḅẹngbọ ḅinmam.

¹⁷ À ja apụ na sime tẹ ì sakị fama-a, ḍẹrị na tọrụ-ḅẹlẹ na ḅụ. Ị́ tọn aị poki tẹ mịẹ ḅụ arị ngẹrị koro-simem, tẹ ịganị nwẹnị ị̀ ḅụụ ḅio ḅin.

¹⁸ Tiye ẹrẹsị à paa tọrụsiẹrị-siẹrị-siẹrịarị? Tiye ẹrẹsị ị̀ ịnọ ma ḅarị gwọ ḅịa ḅara simearị? Arị tiegotẹ gwọ ḅịa? Í ì pikirima ḅẹ ḅiiarị ḅoto, tẹ àrị ịrụa kụra ḅẹ ḍaḅa kịka tẹ samụnọ-kpakịkịarị?

¹⁹ Miemẹ KỊNỊNYANAḄỌ ḅe pakịrịm, “Ị́ pịkị-ḅo ḅẹḅẹ, à siin ị́ ọkị ḅa, tẹ ị́ pịkị siin ị̀ fịrịmẹnjịḅọ sọ ḅa. Ị́ nwẹnị nimi ofori ẹkwẹn kọn-a tẹ kọn na-iḅi ẹkwẹn kọn-arị ḅẹḅẹ, í siin ị̀ ịkịankoroḅọ sọ ḅa. Tomi ma pịkị ị́ dama-ḅo ḅa, anịsakị ị́yẹrị rẹ gotẹ ịn dama-mu mu ye ofori.

²⁰ Àrị ị́ kẹ kụrọtẹ ojo warị-akaka mịẹ ḅa ịna ḅụụ ḅụ. Ini owu kẹ ị́ na sọ ḅa, kụma ini ị́ nẹngịma ḅịa. Àrị ị́ na sime tẹ ị́ gbaịn wẹrị tẹ ye ị́ la ḅịa.

²¹ Si-sịḅịḅio-sụa tẹ kụrọ-kụrọ ḅara mịẹarị atomi ma ḅara-ḅio arị ị́ pụkọ-pakamaḅo ḅa. Yẹrị, KỊNỊNYANAḄỌ ḅe ọkọ ḅẹẹm.”