Jerimaya 14 - FỊAFỊA BAỊBỤLỤ

Ḅalafama Minji-kụrọ Mẹ

¹ Minji-kụrọ mẹ gboloma ye ḅụ KỊNỊNYANAḄỌ ḅe ị̀ ḅẹẹm,

² Juda kururuarị, anị ḅẹ opu ama ma ḅẹ apụ fịịarị, in kururu ḅụ kiri ḅio ḅọlọlọ wararị, tẹ Jeruselemu ḅarasụa gotẹ owu pakamarị.

³ Ngọ-kọnapụ ma minji gotẹ tẹ ịna afịrịmẹnjịapụ fịrịma-pakamarị; ini ama minji koko ayọ ma muarị, kụma in minji ẹrị-a; ini ịna ye ofori ajongo ma kẹ pịkị-ḅoarị. Ḅioḅẹngbọ-ḅịkị na pikiri na ḅụ ini ịna atọrụ ḅọịarị.

⁴ Anị gotẹ ọkọ sime ye eene koro-a, tẹ kiri mẹ pịkị samụnọ-kpakịkị tẹẹ, ḍụọ-kọrịapụ ma ḅioḅẹngbọ si tẹẹ; ini ịna atọrụ ḅọịarị.

⁵ Ḍụọ kọrị akiri ma ḅio, tụḅụra ma ini ịwọma iyi aị ma kẹ gbin koroma-soarị, osuka ofori ẹrẹsị.

⁶ Piri asụ ma tụndụ ma ọgọnọ-jụ ḅio sịẹsime tẹ piri-obiri kịka tẹ ọgọnọ-ọgọnọ ịnyọsararị ịna atọrụngbọ ḅarị iḅiọkụ ye ẹrị-a ịn fịye ẹrị fị-a ẹrẹsị.

⁷ Ị̀ atomi owu ị̀ pịrịarị: Tụkụmaye wamịna asi ḅẹrẹ kẹ wamịna sịḅị gbanarị sọ, KỊNỊNYANAḄỌ, ḅarasụa wa pịrịị, í minini tẹ ḅara ḅụ. Tọnwa asakị wa nwẹn kẹ ị́ ḅụụ pịkị-so tẹẹ; wa si kẹ ị́ mịẹ tẹẹ.

⁸ Ị́yẹrị ngẹrị mie Izirẹlị nyana ḅiokpọ; anie opu ḅụụ-fụka ḅụ wa ḅọrọmarị ḅọ, Tiye ẹrẹsị ị́ wamịna amakiri mẹ ḅụ kịnị tọrụ-nimi-a ḅọ kịkarị, gbala ḅọrọ ye muarị tẹ agba tẹ ḍin mẹ kịngẹ kẹ sime ḅọ ọkụ.

⁹ Tiye ẹrẹsị í ye bẹkẹ-ḅara-kẹ paka pịrị tomḅọ kịkarị, gbala ọmụḅọ tẹ ḅarị kẹ ḅarasụa ḅẹ kụrọ nyana-a ḅọ ọkụ? Piki-pikiye-ofori ḅara ḅụ, KỊNỊNYANAḄỌ, ị́ wamịnị na emi! Wamịnị ị́ atomii; wa kẹ gbin-koroma so ma.

¹⁰ KỊNỊNYANAḄỌ ḅe mịna apụ ma gboloma ye ḅụ ḍukoarị: “ini ị̀ ḅụụ mangị-so ḅẹlẹmarị, tẹ ini ịna ḅụụ ọlọ ḅịa. Mie ḅụ ịna mịẹ ye ị̀ ḅụụ ḅẹlẹ-a. Ịn mịẹ tẹ iri-aị ma à kẹ ḅiokoroma ḅa, tẹ fomu-ḅara kẹ ịn pịrị ḅa ịna asi ẹrẹsị.”

¹¹ KỊNỊNYANAḄỌ ḅe nwẹnị ị̀ ḅẹẹ, “Ị̀ ḅara ḅii ma mịnẹ à ḅarasụa mịna apụ ma pịrịị.

¹² In ḅuru-ịmọ sọ, ịn ḅarasụa gotẹ kọn-arị owu mẹ à poki ḅịa; ịn dọkịma-agba na mgbọlị fịye agba na mịẹ-mịẹ ị̀ pịrịarị sọ, ịna mịẹ ye ị̀ ḅụụ-ḅẹlẹ ḅịa. Anie nakara, arị ịn ḅaa ḅa ọmụ ḅio na, ḅuru-ḅa na obi na ḅụ.”

¹³ Anịtẹso à ḅẹẹm, “Tẹịn-Ḅẹrẹtọn-Kụrọ-Nyana KỊNỊNYANAḄỌ, í nimi wararị mịnẹ ịkịankoroapụ ma ḍuko tomi ma pịrịarị mịnẹ ọmụ koro ḅịa, anịanịa ḅuru-ḅa ḅo, ị́yẹrị ọkọ minini ịn pịrị tẹẹ ẹrẹsị, ini ọkọ ḅẹẹarị, mịnẹ dein kịngẹ mie wamịna amakiri mẹ ḅio sime ḅarịye.”

¹⁴ Kụma KỊNỊNYANAḄỌ ḅe pakịrịm, “Ịkịankoroapụ ma iruo aị ḍukoarị ị̀ ẹrẹ ḅụ; yẹrị ịn fịrịma-a, à pịkị gberie-sọ tọn ịn pịrị-a, anịanịa gbọrụ ẹkwẹn sọ kọn ịn pịrị. Ini ẹrị tẹ arị gboloma aị ḍukoarị ịkịan ma ị̀ ḅara ḅo-a; tọrọkọ paka ḅa nwẹn ḅẹẹ tẹ in ḍukoarị ye-ḅụ-sọ-a aị ma ini ḅarana kuroma tẹ ḍukoarị aị.

¹⁵ Yẹrị KỊNỊNYANAḄỌ ḅe à kẹ arị ịkịankoroapụ ma mịẹ ḅẹ ye ḍuko ị́ pịrịarị, anie à fịrịma-a tẹ ị̀ ẹrẹ ḅụ ḍuko tẹ ḅẹẹarị apụ ma mịnẹ ọmụ na ḅuru-ḅa na mị amakiri mẹ la ḅịa — àrị ịn ḅaa ḅa, ọmụ ḅio na ḅuru-ḅa na ḅụ.

¹⁶ Ịn mịna aị ma ḍuko pịrịtẹ apụ ma sọ anị gbọrụ ḅọkọ mẹ ḅụ ḅọrọ tẹ fịị ḅa. Ini ịna oju-akpakpa ma kẹ Jeruselemu ḅẹ etela ma ḅụ gbin koroma tẹ àrị ḍiḅi ḅẹ gbọrụḅọ, sọ paka ḅịa. Miemẹ inimgba ḅụ paka ḅa ịna sime-ereme na, ịna owiapụ-awọmẹ na, ịna eremịna-awọmẹ na, kẹ sụa. À mịẹ tẹ ini ịna si-sịḅịḅio-sụa saa mẹ gbẹẹ ḅa.”

¹⁷ KỊNỊNYANAḄỌ ḅe tọn ị̀ pịrịm à ḍuko tomi ma pịrị ì kururu gboloma ye tẹ ḅẹẹ: yee eneḅaka na ḍin na ḅụ owu-minji ị̀ atọrụngbọ ḅụ sara, yee gbala-gbala àrị owu pẹlẹma, kẹ gotẹ ọkọ ḅẹẹarị, ị̀ atomi la ye mẹ pokolom, tẹ ye si ḅara kẹ ịn lam.

¹⁸ À ḍụọ ḍiḅi apiri ma ḅio sọ-muarị sakị ọmụ ḅio ịn ḅaa owiapụ ḍụẹịn mie arị ẹrịarị; arị ama ma sọ-muarị sakị, ḅuru-ḅaarị apụ mie arị ẹrịarị. Ịkịankoroapụ na agbamịẹapụ na ịna kọrịnama kọrịarị, kụma ịn mịẹarị ye tiye-o tiye-o in nimi-a.

Tomi ma KỊNỊNYANAḄỌ ḅe Tẹkẹarị

¹⁹ KỊNỊNYANAḄỌ, ị̀ gbọrsịḅị Juda sịkị tẹ? Ị́ Zayọnị ḅẹ apụ ma ḍiki-ḅioḅuarị? Tiye ẹrẹsị ị́ mị-ḅara kẹ ye kẹ wa lama, mịẹ tẹ wa inetẹ gwọ ḅịa ḅara? Wa tọrụ kẹ dein ḍikim, kụma gbọrụ iḅiye sọ paka-a, wa wa gwọ ḅẹ ḅiokpọ nyanam, kụma tẹmẹ-naịn-naịnmaye ẹrẹ mie ḅo ye.

²⁰ KỊNỊNYANAḄỌ, wa si kẹ ị́ mịẹ tẹẹ; wa wamịna asi ḍuko-pakamarị, pịkị wamịna elemu aḍapụ ma asi sọ.

²¹ Í minini aị ma kẹ ḅiokoroma tẹ wa ḍiki-sima ma; tọrụ-tuu ọkị-ḅo Jeruselemu ọgọnọ gbana ma, í ebube emine mẹ sime-yọ mẹ. Ị́ wamịnị na fị ọḅọkụ mẹ kan ma.

²² Tomikiri ḅẹ asịẹ ma oru-afụḅara ma ḅẹ gberie tẹ inetẹ eene koroma ḅẹ ye ofori; so tọrụ mẹ ḅioju sọ inetẹ nwẹịn-nwẹịn eene sọ koroma ḅịa. Ị́yẹrị mie wa kẹ ḅiokpọmarị ḅọ, yei KỊNỊNYANAḄỌ, wamịna Tamụnọ, ị́yẹrị anie mịna aị ma mịẹ-mịẹ ḅọ ẹrẹsị.