Jerimaya 13 - FỊAFỊA BAỊBỤLỤ

Lọkọ-ḅịtẹ Okolo-kapa Mẹ

¹ KỊNỊNYANAḄỌ ḅe ḍuko ị̀ pịrịm mịnẹ à mu lọkọ-ḅịtẹ okolo-kapa fẹ tẹ sụaa; kụma ò ḍuko ị̀ pịrịm à kẹ minji ḅio suu ma.

² Mie ḅụ à nwẹnị lọkọ-ḅịtẹ okolo-kapa fẹ, KỊNỊNYANAḄỌ ḅe ḍuko ḅara, tẹ anị sụam.

³ Anịtẹso KỊNỊNYANAḄỌ ḅe siin ẹkwẹn ị̀ pịrị tẹ ḅẹẹm,

⁴ “Yuferetisi Tọrụ mẹ mu tẹ okolo-kapa mẹ kẹ ịkụ mẹ ḅẹ ịḅụkụ mẹ ḅio ḅọị.”

⁵ Mie ḅụ à mu tẹ anị kẹ Yuferetisi tọrụ mẹ na kpeki yọ ḅụ ḅọịm.

⁶ Sakị kẹlẹ ḅọrọtẹ so KỊNỊNYANAḄỌ ḅe ḍuko ị̀ pịrịm à Yuferetisi tọrụ mẹ mu tẹ okolo-kapa mẹ ọkị.

⁷ Mie ḅụ à pịkịma mum, tẹ àrị anị kẹ ḅọị anga ḍọkị ẹrị sakị, arị ẹrịm anị si fama tẹ gbọrụ iḅiye ḅụ sọ anị ḅarị sọ ḅịa.

⁸ Anịtẹso KỊNỊNYANAḄỌ ḅe nwẹnị pịkị siin ẹkwẹn ị̀ pịrị. Ori mẹẹ,

⁹ “Mie à kẹ Juda ḅụụ-tọn mẹ guluguluma ḅarị ḅara, pịkị Jeruselemu opu amịẹaị ma na.

¹⁰ Mịna si-mịẹapụ ma ḍụkụ tẹ ị̀ ḅịḅịpoki-a. Anịngẹ-kụraḅio ini ma anie kọngọ kụrọma-kụrọma tẹ pịkị si-sịḅịḅio-sụa-sụa apụ, tẹ in sunsin oru-atamụnọ pịrị tẹ fịrịmẹnjị ịn pịrịm. Ọkọ ẹrẹsị ịn mị okolo-kapa mẹ kịka ḅa, anie ḅarị gbọrụ iḅiye ḅụ sọ-sọ ḅịa ye mẹ.

¹¹ Okolo-kapa kpataịma konju oḅoloarị ḅara mẹ anie à ḅii ḅara, mịnẹ Izirẹlị na Juda na ḅẹ apụ ma ọkọ kẹ ì oḅolo kụrọma. À gotẹ miemẹ mịẹ ye ini ị̀ atomi sọ tẹ tokini na kụn na ọkị-ḅo ị̀ ẹrẹ pịrị ḅarị ḅara; kụma ịn ḍụkụ tẹ ị̀ ḅịḅịpoki-a.”

Waịnị Nwẹn-sịn Iru Jongo Mẹ

¹² KỊNỊNYANA-TAMỤNỌ ḅe ị̀ ḅẹẹm, “Jerimaya, ḍuko Izirẹlịapụ ma pịrị, mịnẹ waịnị nwẹn-sịn iru sụa jongo goyegoye ḅio ịn waịnị sụa ḅinmaa. Ini ị́ pakịrị ḅa mịnẹ in nimi wararị waịnị sụa jongo goyegoye ḅio, ịn waịnị kẹ sụa ḅinma na-iḅim.

¹³ Anịtẹso ḍuko ịn pịrị mịnẹ, yẹrị KỊNỊNYANAḄỌ ḅe, iru kẹ amakiri mẹ ḅẹ apụ ma pịrị gbasịma ḅẹ muarị, nwenii in ḅuu tọrụ-ḅaama ḅa; amadapụ ma, anie Devidi furo paka apụ ma, agbamịẹapụ ma, ịkịankoro apụ ma, na Jeruselemu ḅẹ apụ mamgba na.

¹⁴ Anịtẹso maa jongo kẹ jen-jen gbolo tẹ arị fịị kọsị-sara ḅara mie à kẹ ịn ḅaa kọsịma ḅarị ḅara, omongiapụ na ḍọkọḍọkọ-awọmẹ na gbọrụ ḅara mẹ. Ḍiki-ḅụụjịrị ofori ḅara, sịḅị-jịrị anịanịa ọkụrụkụrụ sọ ị̀ dasịẹma ḅịa ịn ḅaa ḅụ.”

Jerimaya Tomi ma Ḅeri nụnụarị Ḅụụ-gelema Gotẹ

¹⁵ Izirẹlịapụ, KỊNỊNYANAḄỌ ḅe ẹkwẹn tẹẹ! Ọ́ ḅụụ-lẹgịma tẹ ò pokii.

¹⁶ Ọ́ kụn kẹ KỊNỊNYANAḄỌ ọmịna Tamụnọ ḅe pịrị, tẹrẹmẹ ọ̀ kanakana ọkị-ḅo sakị la, tẹ ọmịnị tụndụ ma ọgọnọ ḅụ pụmbụma-pụmbụma; tẹrẹmẹ ori ọ́ tọrụ kẹ ḍikiarị bele mẹ pịkị-ḅo kpọma kpititẹ kanakana sọma.

¹⁷ Ó poki ḅịa ḅẹḅẹ, à ḅọị ḅara kẹ ọmịna ḅụụ-gelema mẹ gotẹ owu ḅa; à tẹmẹ-akụ ḅara kẹ owu tẹ ị̀ tọrụ ḅẹ owu minji mẹ ogilolo puu mẹnjị ḅa, ịn KỊNỊNYANAḄỌ atomi ma kun-so tẹ ẹrẹsị.

¹⁸ KỊNỊNYANAḄỌ ḅe ị̀ ḅẹẹm, “Ḍuko amadaḅọ ḅe na ò iyingi na pịrị ini ịna emine ma ọgọnọ koro ḅo, ịna iḅitẹ amada-sun ma ịna asịḅị ḅụ siin-koro tẹẹ ẹrẹsị.

¹⁹ Juda ḅụ suku-jụ ḅẹ ama ma ama ọkị apụ arị ikelema-koro tẹ. Gbọrụḅọ sọ inetẹ tolu mu arị la ḅịa. Juda ḅụ sime apụ mamgba in kun-so jen asịẹ mu tẹ.”

²⁰ “Jeruselemu, ḍiki-o! Si kẹ ị́ tọn apụ ma ọgọnọ-jụ sime tẹ ideri-ḅoarị-o! Ịn kẹ ị́ ḅarasụa apụ ma ndẹẹ ini, ị́ kẹ ḅụụ-tọn-arị apụ ma?

²¹ Ndẹẹ í ḍuko ḅẹ ye, ị́ kẹ í ikiapụ sịn-arị apụ ḅo owu kẹ ị́ paka tẹ ị́ nẹngịma tẹ ḅẹrẹtọn ị́ pịrị kụma?” Ị́ akụye ḅụ sọ ḅa, tụḅọ iyiarị ẹrẹḅọ ọkụ.

²² Ị́ nwẹnị gbelarị tiye ẹrẹsị mie-mẹmgba ị́ ḅụụ pakarị ḅẹḅẹ — in tiegotẹ ị́ ḅịtẹ kporima tẹ kụrọ-ḅara kẹ ị́ na ye mịẹ ye mẹ — anị gotẹ ọkọ mịẹ yee, í sii ḅalafamam.

²³ Kurukuru oju sụa tomḅọ inetẹ anị ḍima ḅẹ, anịanịa sịrị ori oju ḅụ gbọọn-gbọọn aị ma siin? Ini inem ḅẹḅẹ, tẹ si sikima jen mịẹ ḍin-a ḅọ ma sọ ḍawọ tẹ kuraye mịẹ ḅa.

²⁴ KỊNỊNYANAḄỌ ḅe kẹ ị́ gala-galama ḅarị ḅara ịkpa ḅio fẹrụ samụnọtẹ asịra gala-galama ḅara kịka ḅa.

²⁵ Ó ḍuko tẹẹ mịnẹ miemẹ anie ị́ ḅụ paka ḅẹ tẹ sime ị́ pịrị ye. Miemẹ anie ọ̀ kẹ ị́ mịẹ ḅẹ tẹ tọn-pẹlẹ ḅara, ị́ ọ̀ kẹ ḅioḅọrọma tẹ iruo atamụnọ minini tẹ ẹrẹsị.

²⁶ KỊNỊNYANAḄỌ ḅe ḅarana ị́ paụma sịẹma tẹ ị́ ḅụụ-jịrị ḅa.

²⁷ Ori ị́ ẹrị tẹ í ò ḍiki-ḅioḅuarị aị ma mịẹarị. Ori ị́ ẹrị tẹ í oru nimi apụ ma ḍuka muarị tụndụ ma ọgọnọ na ḍụọ ḍiḅi akiri ma ḅio na, tomḅọ mḅọ na kpekitẹ angarị ḅọ taḅọ gotẹ lẹlẹ tẹ à ḍukarị ḅara, anịanịa owi-asụ ịyọrọ gotẹ lẹlẹ ḅara. Jeruselemu ḅẹ apụ ọ́ fa tẹẹ, ọ́ fa tẹẹ! Ó ḅo kpaịn ḅẹ sakị ḅọrọ tọ sakị?