Jerimaya 12 - FỊAFỊA BAỊBỤLỤ

Jerimaya ḅii-aḅịḅị kẹ KỊNỊNYANAḄỌ Ḅe Ḅiiarị

¹ KỊNỊNYANAḄỌ, àrị ị́ tọrọkọ ị̀ ḅẹrẹ ịgbanịm ḅẹ kụma, ị́yẹrị mie paa kuraye mịẹ ḅọ sọ ḅẹ yee. Anịsọ à paa inoma ofori gboloma ye kẹ í gbela ḅẹm. Tiye ẹrẹsị si-sịḅịḅio-sụapụ ma loloarị? Tiye ẹrẹsị ye kịnị mingirimarị atomi ma na iḅiarị?

² Ị́yẹrị ịn kẹ ḍiḅi tẹ in kuno-sụarị; in so-paka tẹ mgbọlụ sụarị. Sakị mamgba ini ị́ ḅụụ iḅiye ḍukoarị, anịsọ ini ị́ bala ḅaka-a.

³ Kụma, KỊNỊNYANAḄỌ, í ì nimi wararị, ị́ à mịẹarị ye ẹrịarị, pịkị àrị ị́ ḅẹlẹmarị ḅara sọ. Mịna si-mịẹapụ ma fọnọ soo, kẹ mu ḅaa ḅẹ anana ọkụ; Tọrụ kẹ ịna ḅụ wẹrị nwenii ini ịn ḅaa ḅẹ sakị la.

⁴ Wamịna amakiri mẹ samụnọ mu tọ sakị la ḅẹ, tẹ ḍụọ ma ḅio mamgba nama fị ḅẹ osuka mamgba kpatụ fama ḅẹ? Nama ma na feni ma na fịịarị wamịna ama ḅẹ apụ ma si-sịḅịḅio ẹrẹsị, anie ḅarị apụ ma, “Wa mịẹarị aị ma Tamụnọ ẹrị-a.”

⁵ KỊNỊNYANAḄỌ ḅe nwẹnị ḅẹẹ, “Jerimaya, ì tomi na mangịarị tẹ ịnyọ ị́ taarị kụma, ndẹẹ í inetẹ asụ na mangị ḅẹ ḅara? Ḅele wararị piri-ḅio ḅụ sịẹsime kịngẹ sọ í ine-a kụma, ndẹẹ ị́ mịẹ ḅẹ ḅara Jodanị tọrụ akaka ḅẹ opu piri mẹ ḅio?

⁶ Ị́ amịnapụ kịngẹ sọ ị́ warị-kuḅu ḅẹ apụ, ị́ kẹ tomina ḅara-ḅio dẹrịma tẹẹ; tomi kẹ ị́ pakarị owu mẹ ini sọ anị ḅio emi. Ḅioḅẹngbọ kẹ ịna ọgọnọ gbana ma, ini ikia ḅara kẹ ẹkwẹn-arị sọ.”

KỊNỊNYANAḄỌ Ḅe Ori Atomi Gotẹ Nyana Kururu

⁷ KỊNỊNYANAḄỌ ḅe mẹẹ, “Àrị Izirẹlị kẹ gbin koroma-so tẹẹ; Arị ị̀ sịẹ tẹ à sẹlẹ ọkị tẹ apụ ma sịkị tẹẹ. Àrị à ḅẹlẹmarịapụ ma kẹ si kẹ ịn tọn-arị apụ kụrọ ḅara-ḅio suu tẹẹ.

⁸ À sẹlẹ ọkị apụ ma pịkị tẹ ị̀ na tụḅụrụ tẹ, opu piri-ḅio-ḅẹ ọkụkụ ọkụ, ini oloku ị̀ da tẹẹ, anie ḅụ àrị in ḍiki-ḅioḅuarị.

⁹ À sẹlẹ ọkị apụ ma, agụnkwọ amẹẹ pakịrị-pakịrị ḅụ kuun ḅẹ ḍọkịarị feni kịka tẹẹ. Piri-ḅio-ḅẹ anama ma sịịn, in ḅo ini na alalị mẹ fịị!

¹⁰ Tọnwa jen asịẹ ḅẹ ḅẹrẹtọn apụ ị̀ kụrọ-aḍụọ ma guluguluma tẹ; ini à ḍiḅi aị ma nanga ḅọrọtẹ; ì iḅi amakiri mẹ kẹ ḅo ịkpa mịẹ tẹ.

¹¹ Ini anị kẹ kịnị anga-anga-a yọ sọma tẹ, anị papaa kan-sara tẹ koro-simearị ị̀ tọrọkọ. Bebe amakiri mẹ ḅo ịkpa sọ tẹ, gbọrụḅọ-sọ kẹ ye-sịn-a.

¹² Ịkpa mẹ ḅẹ gele akiri ma mẹnjị saḅa ḅo ye fọịn ḅẹ owiapụ ḅo tẹ. Arị ọmụ kẹ fịrịma bebe amakiri mẹ guluguluma ḅẹ ḅo tẹẹ; gbọrụḅọ-sọ inetẹ dein ḅụ anga ḅịa.

¹³ Ì atomi mbịaka ḍiḅim, kụma osuka mie ịn pẹlẹ ye; ịn ḅụụ-kọsị tẹ kọrịnama kọrịm, kụma gberie sọ ịn nyana ḅo-a anị ḅụ. Ì opu ịganị gotẹ in ḍiḅi aị ma fịaị pakama-a.”

KỊNỊNYANAḄỌ Ḅe Minini Izirẹlị Na Kpekitẹ Anga Apụ Pịrị Ye

¹⁴ KỊNỊNYANAḄỌ ḅe mẹẹ, “Izirẹlị na kpekitẹ anga apụ tẹ à kẹ ị̀ atomi Izirẹlị pịrị amakiri mẹ guluguluma apụ ma ḅụ à ḍuko ḅẹ ye emi. Àrị arị si-sịḅịḅio-sụapụ ma ọkị-so ḅa ịna sime-yọ ḅụ, suku-na-suku-na kẹ kiri ḅio ḍiḅi wararị sịn nụnụ pakama-ḅo ḅara, tẹ Juda pụkọ-pakamaḅo ḅa ịna aḅara-ḅio.

¹⁵ Àrị ini ọkị so tẹ sọ àrị ọkụrụkụrụ nyana ịn pịrị ḅa; à sịẹ goyegoye kẹ pịkị-ḅo ịna ḅara-kuḅu ḅẹ amakiri lama ḅa, pịkị anị sime-sime yọ na.

¹⁶ Ịn nwẹnị ịna ḅioḅẹngbọ mẹmgba kẹ ị̀ atomi Tamụnọ-nimi ḅara mẹ ọkị, tẹ in ye karị ḅẹ sakị ḅẹẹ ḅa, ‘KỊNỊNYANAḄỌ ḅe ḍumo wararị ogbo’ anie gbọrụ sakị ḅụ ini ị̀ atomi toluma tẹ in Balị ḅụ karị-karị ḅara mẹ — anị sakị rẹ mie ini ị̀ atomi ma ḅẹ apụ sọ ḅarịye, tẹ pịkị lolo ḅa.

¹⁷ Kụma gbọrụ sịẹ nwẹnị ḅịḅịpoki-a ḅẹḅẹ, anị sakị ẹrẹ mie à gbọrsịḅị anị soku pakama-ḅo ḅarịye, suku-na-suku-na ḅụ, tẹ anị guluguluma ḅa. Yẹrị KỊNỊNYANAḄỌ ḅe ọkọ ḅẹẹm.”