Jerimaya 11 - FỊAFỊA BAỊBỤLỤ

Jerimaya na Ọḅọkụ mẹ na

¹ KỊNỊNYANAḄỌ ḅe ị̀ ḅẹẹm,

² “Ọmịnị ọḅọkụ mẹ sịẹ pịrị aị ma pokii. Ḍuko Juda na Jeruselemu na ḅẹ apụ ma pịrịị

³ mịnẹ yẹrị KỊNỊNYANAḄỌ, Izirẹlị Tamụnọ ḅe, wori-nume karị mị ọḅọkụ mẹ ḅio tọn koroma wararị aị ma poki tẹ mịẹ-a ḅọ goḅọ-goḅọ pịrị tẹẹ.

⁴ Mị ọḅọkụ mẹ anie à kẹ ịna elemu aḍapụ ma na fị ye mẹ, àrị Ijiputi ḅio ịn pakama-ḅo sakị, anie fịnị orumo ḅara kẹ kọrị sime akakiri mẹ ịna ḅụụ ḅụ. À ḍuko ịn pịrịm ini ị̀ ḅịḅị poki tẹ à tọn ịn pịrị ye goyegoye mị. À ḍuko ịn pịrịm mịnẹ ini ị̀ ḅịḅị poki-poki, ini ì atomi sọ ḅa, tẹ yẹrị pịkị ịna Tamụnọ sọ ḅa.

⁵ Anịtẹso àrị à minini ịna elemu aḍapụ ma pịrị ye mịẹm, tẹ ḅụụ-ḅẹlẹmatẹ iḅiọkụma fịye so-pakamarị amakiri mẹ kẹ ịn pịrịm, mịọkụ ịna ḅara la tẹ amakiri mẹ.” À ḅẹẹm, “KỊNỊNYANAḄỌ, ọkọọ.”

⁶ Anịtẹso KỊNỊNYANAḄỌ ḅe nwẹnị ị̀ ḅẹẹ, “Juda ḅẹ opu ama ma na Jeruselemu etela-ogbo ma na muu. Ì oku mẹ ḍuko wasama arị anga ḅụ, tẹ ḍuko tomi ma pịrị tẹ ini ọḅọkụ mẹ sịẹ pịrị aị ma poki.

⁷ Àrị Ijiputi ḅụ ịna elemu aḍapụ ma pakama-ḅo sakị, à tẹmẹ-la ḅara kẹ ịna aḅeri nụnụ-nụnụ nwenii ḅo mịmgba lam.

⁸ Kụma in poki-a anịanịa à ḍuko ḅara mị. Anie nakara, ọrụḅọ-ọrụḅọ paa kọngọ-kụrọma tẹ si mịẹ-mịẹ-mịẹm. À ḍuko ịn pịrịm ini ọḅọkụ mẹ koko, kụma ịn ḍụkụ-a. Mie ḅụ àrị anị ḅio ḅụ ḍuko finji wararị afomu-ḅara ma ọkị-ḅo ịna ọgọnọ gbanam.”

⁹ Anịtẹso KỊNỊNYANAḄỌ ḅe nwẹnị ị̀ ḅẹẹ, “Juda na Jeruselemu na ḅẹ apụ ma ịn ḅẹrẹ-ḅiya ị̀ pịrịarị.

¹⁰ Ịn pịkị ịna elemu aḍapụ ma asi ma da tẹ ọḅụ kẹ ì gbin tẹ, anie ḍụkụ tẹ à ḍuko ye mịẹ-a apụ ma in sunsin oru-atamụnọ pịrịm. Ini maa apụ ma, Izirẹlị na Juda na, à kẹ ịna elemu aḍapụ ma na fị ọḅọkụ mẹ kan tẹ.

¹¹ Mie ḅụ, mịọkụ yẹrị KỊNỊNYANAḄỌ ḅe ịna ḅeri nụnụarị mịnẹ à ḅaa-guluguluma ọkị-ḅo ịna ọgọnọ gbana ḅa, tẹ ini anị ḅụ pụkọ-so ḅịa. Tẹ ịn ḅara sụa gotẹ oloku sakị arị in poki ḅịa.

¹² Anịtẹso Juda na Jeruselemu na ḅẹ apụ ma ini agbamịẹ pịrịarị atamụnọ ma dama-mu tẹ ḅarasụa gotẹ ịn sịn oloku ḅa. Kụma arị atamụnọ ma inetẹ ịna ḅọrọma ḅịa mịẹ ḅaa-guluguluma mẹ ḅoarị sakị.

¹³ Juda ḅẹ opu ama ma kịẹn-ḅịḅị la ḅara mie ịna atamụnọ kịẹn-ḅịḅị sọ la ḅara, tẹ Jeruselemu ḅio angarị apụ ma opu ama mẹ etela mamgba ḅụ agbamịẹ-anga nama sịḅị-ngụngụnmarị Balị nwẹn-sịn tamụnọ ḅe pịrị tẹ.

¹⁴ Jerimaya ị̀ tẹkẹ ma anịanịa ị̀ na ḅịḅị-ọkịya, mịna apụ ma gotẹ. Ịn ḅụụ-fụka ḅio emi tẹ ḅarasụa gotẹ ị̀ sịn sakị àrị in poki ḅịa.”

¹⁵ KỊNỊNYANAḄỌ ḅe mẹẹ, “À ḅẹlẹmarịapụ ma si-amịẹaị mịẹarị. Ịn tọ kụrọ nyana ị̀ Warị ḅio sime ḅụ? In kuromarị ini inetẹ ḅo ịn la ḅẹ opu ḅụụ-fụka mẹ dasịẹma ḅa, papaa ḅịḅị ḅẹ ye minini ḅụ, pịkị nama kẹ mịẹarị agba ma ḅụ? Anie ḅọrọ mịẹ tẹ in ḅioḅẹlẹ ḅẹ?

¹⁶ Gbọrụ sakị ḅụ àrị ịnyịnya sụa sara wararị olivu-sịn kẹ ịn sịnm, iḅi tẹ mgbọlụ sụa ḅinma wararị ye; kụma mịọkụ so-alagba ḍụrụkụ ḅara, àrị anị ḅẹ ịnyịnya ma ḅụ fịnị sụa tẹ anị ḅe aḅara ma anyịma ḅa.”

¹⁷ “Yẹrị Kụrọmamgba nyana KỊNỊNYANAḄỌ ḅe anie Izirẹlị na Juda kẹ sịn ḍiḅi ḅara ḍiḅi ye, kụma mịọkụ àrị opu ḅụụ-fụka kẹ ini ẹrẹmarị. Ini mie ḅarana miemẹ ọkị-ḅo ịna ọgọnọ gbana ye, in kura-aye mịẹ tẹ ẹrẹsị; ini agba mịẹ Balị pịrị ye ḅụ ịn ḅọrọ tẹ ị̀ ịganịma tẹẹ.”

In Si Ḅẹrẹ-ḅiya Jerimaya Ḍumo Pịrịm

¹⁸ KỊNỊNYANAḄỌ ḅe si kẹ ị̀ tọn apụ ma ì gotẹ ḅiya sime si-aḅẹrẹ ma ḍuko ị̀ pịrịm.

¹⁹ À minini nyanaḅọ pịrị wararị anana kịkam, kẹ paka mu ḅaa ḅẹ-yearị ye, tẹ à nimi-a mịnẹ yẹrị mie in gotẹ si-ḅẹrẹ mẹ ḅiya sime ye. In ḍuko simem, “Ó yee wa sịn mẹ pẹlẹ-gbin anị paa ḍumo wararị ogbo; yee wa ọ̀ ḅaa, mịẹ tẹ gbọrụḅọ-sọ ḅarị jen kẹ ọ̀ kẹ ḅiokoroma ḅịa ḅara.”

²⁰ Anịtẹso à tẹkẹm, “Kụrọmamgba nyana KỊNỊNYANAḄỌ, anie karakara ḅẹrẹkọnḅọ; ị́ kịnị kuromarị aị na ịna ḅụụ-ịnọarị aị na tọn-ḍikiarị. Àrị ị̀ ḅẹrẹ kẹ ị́ aḅara-ḅio sụa tẹẹ; mie ḅụ yee àrị ẹbị ị́ mịna apụ ma ḅara ḅụ gbẹẹfị ḅiiarị sakị.”

²¹ Anatọtị ḅẹ atomi ma ḅiim ini ị̀ ḅaa, tẹ in ḍuko ị̀ pịrịm mịnẹ ini ị̀ ḅaa ḅa, à paa KỊNỊNYANAḄỌ ḅe oku mẹ ḍuko wasamarị ḅẹḅẹ.

²² Mie ḅụ Kụrọmamgba nyana KỊNỊNYANAḄỌ ḅe ḅẹẹm, “À fomu-ḅara kẹ ịn pịrị ḅa! Ịna asawọ ma ọmụ ḅio fịị ḅa; ḅuru-pọkọtarị ịna ḍọkọḍọkọ-awọmẹ ma ḅaa ḅa.

²³ À sakị tọn pẹlẹ tẹẹ, àrị opu ḅụụ-fụka ọkị-ḅo Anatọtị ḅẹ apụ ma ọgọnọ gbana ḅẹ sakị, tẹ anị sakị mẹ ḅụ, ịna ḅụ gbọrụḅọ-sọ ḅọrọ ḅịa.”