Jerimaya 10 - FỊAFỊA BAỊBỤLỤ

Oru-afụḅara Tẹkẹ na Karakara ḅara Kẹ Sunsin Tamụnọ pịrị na

¹ Izirẹlịapụ, ọ́ KỊNỊNYANAḄỌ ḅe nyana ọ́ pịrị oku pokii,

² Ori mẹẹ, “Ọmịnị osi asịẹ ma etela ma ḍuka mu ma; ó So-tọrụ ḅụ paka-paka aị gotẹ ḅụụ-ḅalaḅala ma, osi asịẹ ma arị gotẹ tẹmẹ-naịn-naịnarị sọ.

³ Mịna atomi ma tamụnọ nimi ḅara mẹ ye-ḅụ-sọ-a. Ini opu piri-ḅio-ḅẹ sịn pẹlẹ-gbin-arị; ini akanị-aị kẹ anị kịrarị,

⁴ tẹ seleḅa na golu na kẹ anị ḅirimarị. Ini ngbọ kẹ anị ḅakụ kụrọmarị, anị ḅarị fuku paka ḅịa ḅara.

⁵ Ọkọ sime oru-afụḅara ma anie papaa mḅam aḍụọ ḅio sime tẹ feni ḅalafama tẹ in fiin so ḅẹ aị; ini inetẹ ẹkwẹn ḅịa; kịnị mie in dogi ḅarịye ini inetẹ mẹnjị ḅịa ẹrẹsị. Arị ḍiki-ḅalafa ma: arị inetẹ ye kẹ ị́ lama ḅịa, pịkị inetẹ gbọrụ iḅi sọ kẹ ị́ mịẹ ḅịa.”

⁶ KỊNỊNYANAḄỌ, ị́ kịka gbọrụḅọ-sọ ofori; ị́ opu kụrọ nyana wararị, tẹ ị́ ẹrẹ opu na kụrọ na ẹrẹ.

⁷ Tụḅọ ị́ kụn ḅịa, sịẹ mamgba amadaḅọ ḅe? Ị́ kụn gbẹm. Ị́ kịka gbọrụḅọ-sọ ofori sịẹ-sịẹ mamgba ḅẹ ye-nimiapụ ma ogboku, anịanịa ịna amadapụ ma ogboku.

⁸ Inimgba oḅori atomi famam. Sịn kẹ kara oru-afụḅara ḅụ ịn ḍawọ ḅo ḅẹ ye tiye?

⁹ Sipeni ḅụ ḅo seleḅa mie ịn kẹ ịna oru-afụḅara ma sara gbaịn ye pịkị Ufazi ḅụ ḅo golu na, arịmgba aka ḍin apụ kọrịnama famam; kẹ kurukuru tọrụ kịka awụ ḅịtẹ na tụkụma awụ tọrụ sụa aḅịtẹ na mie ịn kẹ arị ḅirima ye, ḅịtẹ ḍori ḅara-ḅaatẹ apụ kọrịnama.

¹⁰ Kụma ị́yẹrị KỊNỊNYANAḄỌ, anie karakara Tamụnọ ḅee, anie ḍumo wararị Tamụnọ ḅee pịkị sime gbamaso amadaḅọ ḅee. Ị́ ịganịarị sakị tomikiri mẹ jikearị; tomikiri ḅẹ asịẹ ma inetẹ ị́ ịganị mẹ da alama ḅịa.

¹¹ (Ọmịnị tomi, ó ḍuko ịn pịrị nyanam, mịnẹ tomikiri mẹ na So-tọrụ mẹ na tẹmẹ-a atamụnọ ma ini arị guluguluma ḅa. Ịn ḅarị jen kẹ tomikiri mẹ ḅẹ gbọrụ pakịrị anga ḅụ sọ sime ḅịa.)

Tamụnọ Tokini Nume

¹² KỊNỊNYANAḄỌ ḅe kiri mẹ tẹmẹm ọ̀ kụrọ ḅụ; Ò nimi ḅụ ò tomikiri mẹ tẹmẹ tẹ So ma nụnụ finjimam.

¹³ Ori tọn ḅara ḅụ So-tọrụ mẹ ọgọnọ-jụ ḅẹ minji mẹ ḍụrụkụarị; Ori oḅuto mẹ ọkị-ḅoarị tomikiri mẹ ḅẹ ịkọlị ma ḅụ. Eene ḅio ọ̀ mịẹ tẹ so-ḅalapụ tẹ kọrị ḅọrọarị tẹ fẹrụ fịrịma pakamarị ori anị koko wẹrị anga ḅụ.

¹⁴ Miemẹ ẹrị atomi oḅori ḅara na nuaa ḅara na sime ḅa; oru-afụḅara kịrarị apụ ma ḅo arị papaa aị ḅara lekiri ḅa, tamụnọ nwẹn ḅẹẹ aị ma iruo aị, tẹ in ḍumo nyana-a ẹrẹsị.

¹⁵ In kẹ mịẹ-mịẹ ye ofori, tẹ kịnị in ḍiki iderima ḅa; KỊNỊNYANAḄỌ ḅe ḅo ọ̀ kẹ ịn mịẹ ḅẹ ye kẹ ịn mịẹ sakị in gulugulu ḅa

¹⁶ Jekọbụ Tamụnọ ḅe ori ịn kịka-a; Ori anie ḅẹẹye-ḅẹẹye tẹmẹḅọọ, tẹ Izirẹlị sẹlẹ ọkị tẹ ini ò soku-ḅẹ atomi sọm. Kụrọmamgba nyana KỊNỊNYANAḄỌ anie ori ẹrẹ.

Ḅoarị Kun-so Mẹ

¹⁷ Jeruselemu ḅẹ apụ ọmịna ama ọkị ḍọkịarị apụ ó gbori-ikelema tẹ ẹbịarị. Ọmịnị ọmịna aị kobirii.

¹⁸ KỊNỊNYANAḄỌ mị amakiri mẹ ḅio ọ́ kẹ gbin pakama ḅẹ-ḅiiarị; ori ọ́ mịẹ nwenii tẹ ọmịna ḅụ gbọrụḅọ-sọ kiri kọn ḅịa. KỊNỊNYANAḄỌ ḅe ọkọ ḅẹẹm.

¹⁹ Jeruselemu ḅẹ apụ ma nwẹnị owu pakama, “Anị kpọma wamịna ḅụ fụka tẹ ḅara ḍikii! Wamịna ịnọ ma ḅịya ḅịa. Wa sịnm miemẹ wa inetẹ inema alama ḅẹ ye!

²⁰ Wamịna akpụrụ-awarị ma sii gulugulu tẹẹ; kẹ arị kpọọ aḍigi ma pẹlẹ tẹẹ. Wamịna awọmẹ mamgba so fama tẹẹ; Kiri kọn tẹ siin wamịna akpụrụ-awarị ma saakị sịẹma ḅẹ gbọrụḅọ-sọ ofori; ịna kiki-pẹlẹ-aḅịtẹ ma sololo ḅẹ gbọrụḅọ-sọ ofori.”

²¹ À nwẹnị pakịrị, “Wamịna sịḅịdapụ ma apantu atomii; ịn datụkụma gotẹ ye kẹ KỊNỊNYANAḄỌ ḅe gbela-gbela-a. Mie in gotẹ gbarị-a nyana ye ịna mịẹ ḅụ, tẹ wamịna atomi gala-galatẹ.

²² Ó poki-ye! Ḅịḅị ḅo tẹẹ! Tomikiri mẹ ọgọnọ-jụ ḅụ gbọrụ sịẹ ḅụ opu gbiri-gbiri-gbiri paka tẹẹ; anị ḅẹ ọmụ-ogbo mẹ Juda ḅẹ opu ama ma kẹ ịkpa mịẹ ḅa, piri-obiri angarị anga.”

²³ KỊNỊNYANAḄỌ, à nimi wararị mịnẹ wamịna ḅụ gbọrụḅọ-sọ amịna ḅụ paka ḅẹ ye kụrọ nyana-a gbọrụḅọ-sọ mḅọ ḍumo ọlọ-sịẹma kụrọ nyana-a.

²⁴ KỊNỊNYANAḄỌ, ị́ atomi irima anga tẹlẹmaa; kụma kụrọ-kụrọ ḅara kẹ wamịnị na mịẹ ḅaka ma anịanịa fomu-ḅara kẹ wa pịrị ị̀ ịganịarị sakị; anie wamịna kunoma sọ ḅa.

²⁵ Ị́ ịganị pịkị siin sunsin ị́ pịrị-pịrị-a apụ ma ọgọnọ gbana pịkị ị́ sịkịarị apụ ma ọgọnọ sọ. Ini ị́ atomi ḅaa tẹẹ; Ịn gbọrsịḅị wa ḅaa-guluguluma tẹ wamịna ama kaan-sara tẹ yọ sọ tẹẹ.