Jerimaya 1 - FỊAFỊA BAỊBỤLỤ

Jerimaya Ḅe

¹ Miemẹ anie Jerimaya, Hilikaya tụḅọ ḅe kọn ẹkwẹn gboloma ḍiri, Benijamịnị ibe ama Anatọtị ḅẹ agbamịẹapụ ma ḅẹ gbọrụḅọ.

² Josaya Amọnị tụḅọ ḅẹ Juda da tẹ oyi tẹrẹị finji karama kụra mẹ ḅụ mie KỊNỊNYANAḄỌ ḅe ẹkwẹn Jerimaya pịrị yee,

³ tẹ ọ̀ pịkị siin ẹkwẹn ọ̀ pịrịm Josaya tụḅọ Jehohakịmụ ama-daarị sakị. Anie ḅọrọ tẹso, KỊNỊNYANAḄỌ ḅe tọnwa asakị kẹ ẹkwẹn ọ̀ pịrịm, nwenii mu Josaya tụḅọ Zẹdẹkaya ama-da tẹ oyi gberie finji karama kụra mẹ lam. Anị kụra mẹ ḅẹ sọnọ karama akalụ mẹ ḅụ Jeruselemu ḅẹ apụ ma ini in kun som.

Tamụnọ Kẹ Jerimaya Sịn Ḅara

⁴ KỊNỊNYANAḄỌ ḅe ị̀ ḅẹẹm,

⁵ “Tẹrẹmẹ à ḍumo kẹ ị́ pịrị, àrị ị́ sẹlẹ pakama-ḅom, tẹ tẹrẹmẹ í iyi paka-ḅo, àrị ị́ sẹlẹ tẹ mịnẹ ị́ ị̀ ịkịankoroḅọ sọ sịẹ-sịẹ ma pịrị.”

⁶ À nwẹnị pakịrị, “Tẹịn-Ḅẹrẹtọn-Kụrọ-Nyana KỊNỊNYANAḄỌ, àrị ẹkwen-ẹkwẹn ḅara nimi-a; àrị asambịrịma ḅakam.”

⁷ Kụma KỊNỊNYANAḄỌ ḅe ị̀ ḅẹẹm, “Ḅẹẹ ma mịnẹ ị́ asambịrịma ḅakam, kụma arị ị́ kẹ fịrịmarị apụ ma dama-muu, tẹ à tọn ị́ pịrịye pịrịye ḍuko ịn pịrịị.

⁸ In gotẹ ḅalafa ma, kẹ gotẹ ọkọ ḍukoarị, yẹrị ị́ na sime tẹ ị́ gbaịn-ḅọrọma ḅa. Yẹrị, KỊNỊNYANAḄỌ ḅe ọkọ ḅẹẹm!”

⁹ Anịtẹso KỊNỊNYANAḄỌ ọ̀ ḅara sụn-pakama tẹ ḅara-tụngbalị kẹ ị̀ ḅịḅị apakịrị lama tẹ ị̀ ḅẹẹm, “Pokii, arị í ḍuko-koroma ḅarị ẹkwẹn ma kẹ ị́ pịrịarị.

¹⁰ Mịmgba à kụrọ kẹ ị́ pịrịarị, sịẹ-sịẹ ma na amadapụ daarị ayọ ma na ḅụ, kẹ suku-na-suku-na soku pakama-ḅoo, pịkị sukuruma-gbiin, tẹ ḅaa-gulugulumaa, pịkị famaa, namaa, tẹ ḍiḅii.”

Maa Ịkịan

¹¹ KỊNỊNYANAḄỌ ḅe nwẹnị ì gbela, “Jerimaya, í tiye ẹrịarị?” À nwẹnị pakịrị, “Alịmọnịdị nwẹn-sịn sịn mẹ ḅẹ ịkpangị.”

¹² KỊNỊNYANAḄỌ ḅe nwẹnị ḅẹẹ, “Ị́ karakaram, tẹ arị anị ḍiki tẹ ẹrịarị mịnẹ à ḍuko ye mẹ pakarị.”

¹³ Anịtẹso KỊNỊNYANAḄỌ ḅe siin ẹkwẹn ị̀ pịrịm. Ò gbelam, “Ị́ pịkị tiye ẹrịarị?” À pakịrịm, “Tomikiri mẹ ọgọnọ-jụ ḅụ à ḍarịarị ḅẹlẹ ẹrịarị, tẹ anị waa mịẹ pakịrị anga sara ḅẹ-yearị.”

¹⁴ Ọ̀ nwẹnị ị̀ ḅẹẹ, “Ḅaa-guluguluma ọgọnọ-jụ daarị yọ ḅụ waa-sara ideri-ḅo mị amakiri mẹ ḅio angarị apụ mamgba ọgọnọ sara ḅa,

¹⁵ kẹ gotẹ ọkọ ḅẹẹarị, arị ọgọnọ-jụ mẹ ḅẹ asịẹ mamgba sịn ḅoarị. Ịna amadapụ ma ịna emine ma kẹ Jeruselemu ogigo-ḅọkọ dẹẹ ḅa pịkị kẹ anị ḅẹ onu ma ikelema-koro ḅa, pịkị kẹ Juda ḅẹ opu ama ma sọ ikelema-koro ḅa.

¹⁶ À fomu-ḅara kẹ ị̀ atomi pịrị ḅa, in si mịẹ tẹ ẹrẹsị; ini ị̀ sịkị tẹ agba mịẹ-mịẹ oru-atamụnọ pịrị tẹ ẹrẹsị, pịkị oru-afụḅara tẹmẹ tẹ sunsin arị pịrị tẹ.”

¹⁷ “Jerimaya, tẹlẹma tẹ mu à tọn ị́ pịrị ye goyegoye ḍukoo. In gotẹ ḅalafa ma mịọkụ, ọkọ kụma à mịẹ tẹ ị́ ḅalafa ḅaka ḅa í ini na emi sakị ḅụ.

¹⁸ Mịmgba arị ị́ kẹ mịẹ kụrọma tẹ opu ama sọma tẹẹ, ikulele ḅeriye, pịkị ojo onu akaka, tẹ í bebe amakiri mẹ kuḅu da ḅa — Juda ḅẹ amadapụ ma na, anị ḅẹ opu fịrịmẹnjịapụ ma na, anị ḅẹ agbamịẹapụ ma na, pịkị amakiri mẹ ḅẹ apụ ma na.

¹⁹ Ini owu kẹ ị́ paka ḅa, kụma ini ị́ nẹngịma ḅịa, kẹ gotẹ ọkọ ḍukoarị arị ị́ na sime tẹ ị́ pụkọ-pakamaḅo ḅa. Yẹrị, KỊNỊNYANAḄỌ ḅe ọkọ ḅẹẹm.”