Jemụsị 5 - FỊAFỊA BAỊBỤLỤ

Sime Ngọ Kọn Apụ Pịrị Ḅeri nụnụ Ẹkwẹn

¹ Anịsakị mịọkụ, ọmịnị ngọ-kọn apụ, ọmịnị ì pokii! Ọmịnị ó ponoma ḅẹ ḅoarị atọrụsiẹrị ma gotẹ owu tẹ kururuu!

² Ọmịna ngọ ma ḅụrụ kọsị fama tẹ, akarakaraḅa pịkị ọmịna akapa ma pẹị tẹ.

³ Ọmịna golu na seleḅa na asarị sọ tẹ, mị asarị mẹ ḅẹrẹ kẹ ọmịna sịḅị sẹịn ḅa, tẹ pịkị ọmịna oju ḅẹ meni mẹ pẹị kọsịma ḅa, fịnị ye dọkịma ḅara. Mịna kunoma ene ma ḅụ so ọmịnị ngọ tan kpolima tẹ.

⁴ Gbọrụ gbẹẹ-ye sọ amụ ọ́ kẹ ọmịna apiri ḅio kọrịnama kọrị atomi ma gbẹẹ-a; ọmịnị ịn kọn-arị owu ma naa! Ọmịna afịaị ma soku kobiri warị suu apụ ma kọn-arị owu ma mu Tamụnọ ḅeri la tẹ, Kụrọmamgba Nyana KỊNỊNYANAḄỌ ḅe.

⁵ Mị tomikiri ḅụ ọ́ kọn-arị ḍumo mẹ ḅụ woso-woso amịẹaị na tọrụ-ḅẹlẹ na mịẹ anị ḅụ ḅin wararị. Ọmịnị ọmịna aḅụụ ḍikiḍiki tim-tim-ma ḅaa ḅẹ ene wẹrịma tẹ.

⁶ Mịẹye-ofori apụ mie ọ́ ḅẹrẹ-ḅarasii pẹlẹ pịrị tẹ ḅaa ye, tẹ ịn pịkị ọmịnị na nụnụa-a.

Ye-inema Na Tẹkẹ Na

⁷ Ọkọẹrẹsị, ị̀ amịnapụ, ọmịnị inema nwenii KỊNỊNYANAḄỌ ḅe ḅo. Ọ́ ḍụọ-kọrịḅọ ḅe ḍiki, ori inema tẹ koru nwenii tẹ kiri mẹ ò ḍiḅi aị ma ḅụ iḅi aị pakama-ḅo ọ̀ pịrị ḅara mẹ. Ori inema tẹ koru tẹ kụra mẹ ḅẹ kịrị-kịrị asakị ma ḅọrọ nwenii ḅo eene sakị laarị.

⁸ Ọmịnị sọ ọkọ kẹ ye-inemaa. Ọmịnị iḅiọkụ ọmịna ḅiokpọ mẹ ọlọ kụrọmaa, kẹ gotẹ ọkọ ḍukoarị KỊNỊNYANAḄỌ ḅe ḅoo mẹ kpeki tẹ.

⁹ Ị̀ amịnapụ, ó ye kẹ jụmọ-jụmọ ọlọ ma, mịẹtẹ Tamụnọ ọ́ kọn ḅịa ḅara. Ḅẹrẹkọnḅọ ḅe ḅo kpeki tẹ, ala-a ò tolu-paka ḅa.

¹⁰ Ị̀ amịnapụ, ọmịnị ịkịankoroapụ ma tẹ KỊNỊNYANAḄỌ ḅe ẹrẹ ḅụ ẹkwẹn apụ ma kẹ ḅiokoromaa. Ọmịnị ịn kẹ ó ḍikima mịẹ ḅarị apụ ḅara ọkịị, tọrụsiẹrị ḅụ ye-inema alama apụ ma.

¹¹ In ye-inema alama ḅara ẹrẹsị wa ḅioḅẹlẹ nyana tẹ apụ kẹ ịn sịn-arị. Jobu ye-inema gboloma ye ọ́ paa naa tẹ, tẹ anị ḅẹ kunoma ḅụ KỊNỊNYANAḄỌ ḅe ọ̀ gbẹẹ wama ye mẹ sọ ó nimim. Kẹ gotẹ ọkọ ḍukoarị, KỊNỊNYANAḄỌ ḅe ọkụrụkụrụ na jụmọ ḅụụ-fụka kẹ amịna nye sọma kuroma na ọ̀ ḅụụ ḅakam.

¹² Ị̀ amịnapụ, arịmgba ḅụ kụrọ-tẹịn ye, ó ye minini kịnị pịrịarị sakị ó ye karị ma. Ó so kẹ ye karị ma, anịanịa kiri, anịanịa ḅẹẹye-ḅẹẹye sọ. Ọ́ ḅẹẹ ḅẹ ye “Inn” ḅẹḅẹ, ọmịnị ọkọ ḅẹẹ; pịkị “ẹn-ẹn” ḅẹḅẹ, ọmịnị ọkọ ḅẹẹ, anịsakị ọ́ ḅarị ḅo Tamụnọ ḅẹrẹkọn ḅio sọ-a.

¹³ Ọmịna ogboku ḅụ ḅụụ-fụka nyana ḅọ emi? Mḅọ tẹkẹẹ. Ḅioḅẹlẹarị ḅọ emi? Mḅọ nume su-su Tamụnọ bomaa.

¹⁴ Obiarị ḅọ emi? Mḅọ ḅịḅị fịrịma sọsị omongiapụ sịn ḅoo, ịn tẹkẹ mḅọ pịrị, tẹ KỊNỊNYANAḄỌ ḅe ẹrẹ ḅụ olivu olo kẹ mḅọ tan.

¹⁵ Mie minini ḅụ kọn tẹkẹ mẹ obiḅọ mẹ gwọ ḅa; KỊNỊNYANAḄỌ ḅe mḅọ kẹ ḅo oju kụrọtẹ ḅọ mịẹ ḅa, tẹ mḅọ mịẹtẹ asi ma wẹrịso mḅọ pịrị ḅa.

¹⁶ Anị ḅara ḅụ, ó si-go jụmọ-jụmọ pịrịị, tẹ pịkị tẹkẹ jụmọ-jụmọ pịrịị, mịẹtẹ ọ́ gwọ ḅarị ḅara. Karakaraye-mịẹḅọ kọn-arị tẹkẹ mẹ kụrọ nyana wararị, anị ḅii ye mịẹ ḅụ.

¹⁷ Ịlayịja ḅe kọkọ wamịna pembema tomḅọ. Ọ̀ tẹmẹ-la ḅara kẹ tẹkẹ tẹ ḅiim mịnẹ eene koroma, tẹ eene gbọrụ mgbọlị sọ kiri koro-a, tẹra kụra na pakịrị na ḅụ.

¹⁸ Ọ̀ pịkị sin tẹkẹ tẹso, So-tọrụ ḅụ eene paịn-sara tẹ kiri mẹ fịaị pakamam.

¹⁹ Ị̀ amịnapụ, ọmịna ḅụụ ḅẹ gbọrụḅọ karakara mẹ ḅụ ḅele tẹ jụmọ mḅọ sịn pịkị-ḅo ḅoo,

²⁰ ó miemẹ kẹ ḅiokoromaa: ḅẹḅọ-ḅẹḅọ tẹ si mịẹ ḅọ mẹ, si etela mẹ ḅụ mḅọ sịn pịkịarị ḅọ mẹ, si mịẹ ḅọ mẹ tẹmẹ ḅọrọma ḅa fịị ḅụ, tẹ tọnwa-apụ asi wẹrịso dogi-ḅo ḅa.