Jemụsị 3 - FỊAFỊA BAỊBỤLỤ

Ḅịḅị Ḅio Ḅẹ Ḅẹlẹ

¹ Ị̀ amịnapụ, ọmịna ḅụ ḅẹ tọnwa-apụ ye-tolumapụ sọ ḅẹ ḍọkị ma. Ọmịnị sọ nimi ḅara ḅụ, ịn kẹ wamịnị ye-tolumapụ ma kọn-arị ḅara kụrọ osi apụ nye nẹngịm.

² Wamịnị-mgba sakị mamgba mịẹ-irima nyanarị. Kụma tomḅọ mḅọ ẹkwẹn-arị ye ḅụ mịẹ-irima-ye nyana-a ḅẹḅẹ, anị tomḅọ mẹ mḅọ iḅi fama tẹ ḅọ sọ tẹ, mḅọ pịkị inetẹ mḅọ bebe ḅụụ mẹ ọlọ-sịẹma ḅa.

³ Wa ye kẹ asụ sịḅị kpọọ tẹ anị ḅụ ḅẹ kala anga kẹ ọ̀ ḅịḅị kpọọarị, anị ḅụ mie wa ọ̀ mịẹ tẹ ọ̀ wa ḅii anga muarị ye.

⁴ Anịanịa, ḅekina-arụ kẹ tọnma; arụ mẹ ḍụḅa la ḅara na kụrọ fẹrụ kẹ anị dogi mẹnjịarị ḅara na sọ, lẹmụ kalịye mie anị ḅẹ ḍukuno-fẹịn tẹ anị ikelekele-a tẹ arụ-dọkụḅọ ḅe ḅii anga muarị.

⁵ Anie anị kẹ ḅịḅị ḅio ḅẹ ḅẹlẹ mẹ na sime ḅara: anị ịrụ lama wararị kụma anị kọn-a opu ẹkwẹn ofori, gbala anị tẹịnm. Pịkị opu piri kẹ tọnma, fịnị-ḅẹlẹ kịngẹ inetẹ bebe piri mẹ dọkịma ḅa.

⁶ Anịsakị ḅịḅị-ḅio ḅẹ ḅẹlẹ mẹ kọrị-fịnị na kịkam. Anị amịna tomikiri, tẹ anị ḅio si, si, si, tẹ wamịna oju ḅio amịna sime-anga nyana wararị, anị nwẹnị anị ḅẹ si mẹ kẹ wamịna bebe oju wasamarị. Anị ḅio kẹngẹma paka-ḅoarị fịnị mẹ fịnị kẹ wamịna bebe sime-ḅara mẹmgba ḅụ sụarị.

⁷ Tomi inetẹ ye kẹ Tamụnọ tẹmẹ wararị osi-aị mamgba toluma ḅo ịyọrọma ḅa — piri-ḅio-ḅẹ anama na, feni na, ikiriarị aị na, inji na.

⁸ Kụma gbọrụḅọ-sọ amụ inetẹ anị ḅara kẹ ye kẹ ḅịḅị ḅio ḅẹ ḅẹlẹ mẹ toluma ḅo tẹ anị ịyọrọma-a. Anị anie si ḅioju, tẹ inetẹ anị ọlọ-sịẹma ḅọ ofori, kịnị ḅaa, ḅaa ye ngẹrị mie anị ḅụ simearị.

⁹ Anị mie wa kẹ ịmịẹtẹ kẹ wa Nyanaḅọ, wamịna Ḍaḅọ ḅe ḅẹẹarị, pịkị kẹ wamịna pembema tomḅọ woriarị, Tamụnọ kẹ amịna ḅụụ kịkama tẹmẹḅọ ḅe.

¹⁰ Ịmịẹtẹ ḅẹẹ ẹkwẹn ma na, wori ẹkwẹn ma na, gbọrụ ḅịḅị mẹ ḅio ọsụma paka-ḅoarị. Ị̀ amịnapụ, anị ọkọ pakama!

¹¹ Gbọrụ ngụngụḅa ḅio ḅụ iḅi minji na si minji na paka-ḅo ḅo-a.

¹² Ị̀ amịnapụ, ịla sịn inetẹ olivu mgbọlụ sụa ḅịa; kụrọ sịn pịkị ịla mgbọlụ sụa sụa-a; fụn ḅẹlẹarị ngụngụḅa, ḅẹlẹarị minji pakama-ḅo ḅo-a.

So Ḅio Ḅo Nimi Mẹ

¹³ Ọmịna ogboku ḅụ ye-nimi tẹ kịnị fiearị ye naarị ḅọ emi? Mḅọ anị ḍie-pakamaa iḅi ḍumo ḅụ, pịkị iḅi amịẹaị tẹ mḅọ ḅụụ iderima na nimi na ḅụ mịẹ tẹ aị na ḅụ.

¹⁴ Kụma ọmịna ḅioḅẹngbọ ḅụ afana na, ḍiki-ḅioḅu na, jụmọ kẹ ye ḅụ sụa-a na emi ḅẹḅẹ, ó nimi kẹ ḅụụ-boma ḅụ ḅọrọ tẹ si kẹ karakara mẹ mịẹ ma.

¹⁵ Anị nimi ḅara mẹ So-ḅio ḅo-a, anie tomikiri ḅẹ nimi, tẹmẹ ḅụ ḅẹ ye-a, oru ḅara ḅo nimi.

¹⁶ Afana na, jụmọ kẹ ye ḅụ sụa-a na paka tẹ anga, ye ọrụtọn-a na ja si ḅara, ḅara na sọ paka tẹ.

¹⁷ Kụma, arịmgba ḅụ tarị ye, So-ḅio ḅo nimi mẹ anị wamaye nyana-a, anị pịkị dein wararị, gbene, pịkị ikia kẹ kịnị ḍọkị na; ọkụrụkụrụ anị ḅụ ḅin wararị, tẹ anị pakama ḅoarị mgbọlụ anie iḅi amịẹaị; ḅẹrẹ kẹ ḅioḅẹngbọ sụa wẹrị na, mịẹ tomi ḍie na anị nwẹn nyana-a.

¹⁸ Dein mịẹarị apụ ma dein ḅụ ḍiḅiarị sịn mẹ sụa pakama ḅoarị mgbọlụ anie iḅi amịẹaị.