Izikẹlị 9 - FỊAFỊA BAỊBỤLỤ

Jeruselemu Fomu-ḅara Da tẹ

¹ Anịtẹso à Tamụnọ oloku ye naam, “Ọ́ mịanga ḅoo, ọmịnị fomu-ḅara kẹ opu ama mẹ pịrị ḅẹ muarị owiapụ. Ọmịnị ọmịna owuna-aị na ḅoo.”

² Anị-gbọrụ-kirikiri sonio owiapụ Tamụnọ-warị mẹ ḅẹ ọgọnọ-jụ da tẹ mu nụngọ koro-koro ogigo-ḅọkọ ḅụ sime tẹ ḅo tẹ, ọrụḅọ-ọrụḅọ owuaị dogim. Ferefere pịna kapa sụa gbọrụ owiḅọ ịna ḅụ ḅom, ò ye-kẹẹ-ye dogim. Inimgba ḅo ojo agbamịẹ-anga mẹ akaka sịẹsimem.

³ Anịtẹso tọrụngbọ ḅio sọarị bele mẹ tẹ Izirẹlị ḅẹ Tamụnọ emi anga ḍie-pakamarị ye mẹ nwẹnị saakị iwo Tamụnọ tẹmẹ pamba-sụa ini aị ma ḅụ, anị sime-sime anga mẹ ḅụ, tẹ sikima Tamụnọ-warị mẹ sọ-sọ yọ mẹ mu. KỊNỊNYANAḄỌ ḅe nwẹnị ferefere pịna kapa sụa ḅọ ḅe sịn tẹ ọ̀ ḅẹẹ,

⁴ “Bebe Jeruselemu mẹ mẹnjị fama tẹ elekima kẹ ḅẹḅọ-ḅẹḅọ tẹ opu ama mẹ ḅio ịn mịẹarị sịḅị-ngụngụnma aị ma gotẹ ḅalaḅalarị pịkị arị ḅụụ-fụkamarị apụ ma fụḅara-ḅọkọ sụa.”

⁵ Tẹ Tamụnọ osi owiapụ ma ḅarị tẹ à naam, “Ọmịnị ò ḍuka opu ama mẹ ḅio mẹnjị ḅọrọ, tẹ kịnị ḅaa. Gbọrụḅọ sọ ọ́ kọnma ma; ọmịnị ọkụrụkụrụ nyana gbọrụḅọ-sọ pịrị ma.

⁶ Ọmịnị omongitẹ owiapụ ḅaa, pịkị asawọ na, iriawọ na, iyingiapụ na, ḍọkọḍọkọ-awọmẹ na. Kụma fụḅara-ḅọkọ ḅụ elekima mẹ nyanaḅọ goḅọ-goḅọ, ọ́ ḅara kẹ mḅọ lama ma. Mị yọ Tamụnọ-warị mẹ ḅụ ọ́ saakị.” Mie ḅụ ịn nwẹnị anịanga Tamụnọ-warị mẹ akaka sịẹsime sịḅịdapụ ma kẹ saakị.

⁷ Tamụnọ ịn ḅẹẹm, “Ọ́ Tamụnọ-warị mẹ pilemaa. Ọ́ ḍụẹịn-ḍụẹịn-ḍụẹịn kẹ anị ḅẹ ogigo mẹ ḅio sara ḅinmaa. Ọ́ saakị namakọrị!” Mie ḅụ ịn saakị opu ama mẹ ḅio ḅẹ apụ ma ḅaam.

⁸ Ịn kịnị ma ḅaarị sakị yẹrị kịngẹ anị yọ simem. À nwẹnị ị̀ ḅụụ sẹma-kiri-gbin tẹ iḅo tẹ oloku, “Tẹịn-Ḅẹrẹtọn-Kụrọ-Nyana KỊNỊNYANAḄỌ, mị-ḅara mamgba ị́ nwẹn kẹ ịganị Jeruselemu pịrị tẹ Izirẹlị ḅụ kirikọnḅọ goḅọ-goḅọ ḅaa ḅẹ-yearị aro?”

⁹ Tamụnọ pakịrịm, “Izirẹlị na Juda na ḅẹ apụ ma ḅalafama asi mịẹ tẹ. Bebe amakiri mẹ ikelema-koro ḅụ ịn kịnị ḅaa si mịẹ tẹ, pịkị kịrị-kịrị si-amịẹaị kẹ Jeruselemu ḅinma tẹ. Ini mẹẹ, yẹrị KỊNỊNYANAḄỌ ḅe ịna bebe amakiri mẹ kẹ gbin-koroma-so tẹ ḅarị ini ẹrị-a.

¹⁰ Kụma arị ọkụrụkụrụ nyana ịn pịrị ḅịa. Àrị ịn kẹ ja apụ mịẹ tẹ ye mẹ kẹ ịn mịẹ ḅa.”

¹¹ Anịtẹso ferefere pịna kapa sụa ḅọ ḅe pịkị-so tẹ ye paka ḅara ḍuko KỊNỊNYANAḄỌ ḅe pịrịm, “Ị́ tọn ḅara à mịẹ tẹ.”