Izikẹlị 8 - FỊAFỊA BAỊBỤLỤ

Izikẹlị ẸRỊ TAMỤNỌ GBOLOMA MAAỊN KARAMA ỊKỊAN 8.1—10.22 Ịn Oru-afụḅara Tẹkẹm Jeruselemu Ḅụ

¹ Kịnị ma kun-so tẹ sonio karama kụra mẹ ḅụ ini karama akalụ mẹ ḅẹ sọnọ aḍin karama eneḅaka mẹ ḅụ, Juda ḅụ kun-ḅo apụ ma ḅẹ sịḅịdapụ ma na ị̀ na ị̀ warị ḅio lẹgị sime wararị ogbo, ḍiki ḅarị sakị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe kụrọ mẹ ḅo ị̀ ọgọnọ gbanatẹ.

² À nwẹnị tọrụ saakị tẹ ḍiki tẹ ịkịan ẹrị, fịnị-fịnị tomḅọ. Ò konju ḅụ ideri kọrị-fịnị kịkam, tẹ konju mẹ ḅụ saakị iwo nwẹnị sịkịrị vịọịmatẹ ojo kịka.

³ Ọ̀ nwẹnị ị̀ tọrụ ḅụ ḅara kịkaye sụn-pakama tẹ kẹ ị̀ sịḅị-ḅẹ-inume ḅụ gịẹsịma ì kuun-sịẹma. Anịtẹso mịẹ ịkịan mẹ ḅụ Tamụnọ tẹmẹ nwẹnị ị̀ saakị gelema So-tọrụ sọ mu tẹ ị̀ kẹ mu Jeruselemu la. Ori ị̀ kẹ Tamụnọ-warị mẹ ḅẹ ọgọnọ-jụ ḅẹ ogigo-ḅọkọ sọ mu anga mẹ mum, anie Tamụnọ ịganịma ḅụra oru-fụḅara sime anga mẹ.

⁴ Anị anga ḅụ à nwẹnị tọrụngbọ ḅio sọarị bele tẹ Izirẹlị Tamụnọ anị yọ emi mẹ ḍie-pakamarị ye mẹ ẹrị, à Keba Tọrụ akaka ḅụ emi sakị ḅụ àrị anị ẹrị gbọrụ ḅara mẹ.

⁵ Tamụnọ nwẹnị ị̀ ḅẹ, “Fịị-fịị tomḅọ, ọgọnọ-jụ pakịrị mẹ ḍiki.” À ḍikim, tẹ anị anga agbamịẹ-anga mẹ kpeki ḅụ, mẹnjị ogigo-ḅọkọ mẹ sọ-sọ anga mẹ ḅụ àrị oru-fụḅara mẹ tẹ Tamụnọ ịganịma ḅụra ye mẹ ẹrị.

⁶ Tamụnọ ị̀ ḅẹẹm, “Fịị-fịị tomḅọ, pakarị ye ị́ ẹrịarị? Izirẹlịapụ ma mịẹ anga ḅụ mịẹarị sịḅị-ngụngụnma aị ma ḍiki, ini ì dee ḅelema-ḅelemarị ị̀ fịafịa yọ mẹ ḅụ. Tọrụ-tuu ma-ma nẹngị ye sọ ị́ ẹrị ḅa.”

⁷ Ọ̀ nwẹnị ị̀ kẹ ḅọrọ Tamụnọ warị mẹ ḅẹ nụngọ da ogigo mẹ sọ-sọ anga mẹ mu tẹ onu mẹ ḅụ ịn sọkị tolu wararị anga kẹ ì ḍie.

⁸ Ori mẹẹ, “Fịị-fịị tomḅọ, onu mẹ kan tolu mị anga.” Arị anị kan-tolu tẹ ḅọkọ ẹrịm.

⁹ Ọ̀ nwẹnị ị̀ ḅẹẹ, “Mẹnjị sọ-mu tẹ anị anga ịn mịẹarị si tẹ sịḅị-ngụngụnma aị ma ẹrị.”

¹⁰ Mie ḅụ à mẹnjị sọ-mu tẹ ḍikim. Bebe onu ma akaka ma ḅụ ini ododo amẹẹ na, ja fịafịa-a anama na, jaị na tẹ Izirẹlịapụ ma sunsin pịrịarị aị na kẹ kẹẹ-kẹẹ sara wararị.

¹¹ Izirẹlị ḅẹ sịḅịdapụ ma ḅẹ kịnị atesi oyi apụ finji anịanga simem, Jazanaya, Safani tụḅọ ḅẹ sọ, ịna ḅụ ḅẹ gbọrụḅọọ. Ọrụḅọ-ọrụḅọ gbọrụ kụnụaị-dọkịmaye ọlọm, tẹ onwin turee-tureema kụnụye mẹ ḅụ iwom.

¹² Tamụnọ ì gbelam, “Fịị-fịị tomḅọ, Izirẹlị ḅẹ sịḅịdapụ ma ḅọị-anga mịẹarị ye ị́ ẹrịarị ya? Inimgba sime tẹ tẹkẹarị ḅio mẹ ḅụ oru-afụḅara afụḅara famam. Ini kẹ gotẹ sọ ḅẹ ye ḍọkịarị ye anie, ‘KỊNỊNYANAḄỌ ḅe wa ẹrị-a! Ọ̀ kọkọ wamịna bebe amakiri kẹ gbin-koroma so tẹẹ.’ ”

¹³ Anịtẹso KỊNỊNYANAḄỌ ị̀ ḅẹẹm, “Ị́ ịn sịḅị-ngụngụnma anie nẹngị aị mịẹarị ye ẹrị ḅẹ muarị.”

¹⁴ Mie ḅụ ori ị̀ kẹ Tamụnọ-warị mẹ ḅẹ ọgọnọ-jụ da ogigo-ḅọkọ mẹ mu tẹ ereme tẹ Tamuzu nwẹn-sịn tamụnọ ḅe fịị ye owuarị ye mẹ kẹ ì ḍiem.

¹⁵ Ò gbelam, “Fịị-fịị tomḅọ, miemẹ ị́ kọkọ ẹrịarị? Ị́ sịḅị-ngụngụnma anị nẹngị aị sọ ẹrị ḅa.

¹⁶ Mie ḅụ ori ị̀ kẹ Tamụnọ-warị mẹ ḅẹ kala-ḅio mẹ mum. Anịjụ fịafịa-yọ mẹ sọ-sọ anga mẹ ḅụ, agbamịẹ-anga mẹ na mẹnjị-ḅọrọ-anga mẹ na ogboku, si sọnọ apụ finji pembe tomi ḅịḅị simem. Ini ọḅụ kẹ fịafịa-yọ mẹ gbin tẹ tuu ideri-koro ịrụa-saakịarị-anga mẹ da tẹ sunsin saakị paka-ḅoarị ịrụa mẹ pịrịarị.”

¹⁷ KỊNỊNYANAḄỌ ḅe nwẹnị ị̀ ḅẹ, “Fịị-fịị tomḅọ, aniemẹ ị̀ kọkọ ẹrịarị? Mịna Juda ḅẹ apụ ma, mịanga ị́ ẹrị tẹ ịn mịẹarị sịḅị-ngụngụnma aị mamgba ngẹrị mịẹ mẹ ịna furo ḅin-a, arị na kụrọ-kụrọ amịẹaị tẹ bebe amakiri mẹ ḅụ ịn mịẹarị ma na. Ẹn-ẹn, ịn mịanga Tamụnọ-warị mẹ ḅio ḅụ sọ mịẹ-a so ḅịa, tẹ ị̀ mịẹ tẹ arị ịganị ḅaka ḅẹ ḅara. Ḍiki ini ị̀ ḅụụ si tẹịn ḅẹ ḅara kẹ ini inetẹ ḅẹ ḅara-ḅara kẹ ị̀ mịẹ-simarị ḅara!

¹⁸ Ị̀ ịganị mẹ ḅẹ kụrọ mamgba ḅo ịn la tẹ ịna ḅụụ ịnọ ḅa. À ḅara-wẹrị ịn pịrị ḅịa anịanịa ọkụrụkụrụ nyana ịn pịrị. Ini oloku-oloku ị̀ tẹkẹ ḅa, ini inetẹ oloku pakama ḅẹ ḅara-ḅara, kụma arị ịn poki ḅịa.”